Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

• Ino nkaambo nzi kuciindizya kunywa bukoko ncokutali kabotu nokuba kuti tamukolwi?

Ibbaibbele lilaamba mapenzi aaboola akaambo kakuciindizya kunywa bukoko. (Tus. 23:20; Is. 5:11, 12) Jesu wakakozyanyisya bantu baciindizya kunywa bukoko abantu baalilwa kuzyiba kuti tupona mumazuba aakatazya. (Lk. 21:34, 35)—7/1, peeji 6.

• Sena lugwalo lwa Tusimpi 6:30 lulazumizya kubba?

Peepe. Tupango tweengelede tutondezya kuti uubba ulaamulandu kuli Leza. Nokuba kuti muntu wabba akaambo kanzala tayelani ayooyo wabba akaambo kabulyato naa kupenzya bantu, pele weelede ‘kuliya’ naa kubbadela. Aabo bayanda kumukkomanisya Leza tabeelede kubba nokuba kuti zyintu zyakatazya buti. (Tus. 6:31)—7/1, peeji 13.

• Ino kuzyiba kuti Jehova “ulabona moyo” inga kwatugwasya buti? (1 Sam. 16:7)

Ikuzyiba kuti Jehova ulanga moyo wamuntu—imuzwa mizeezo, micito alimwi ambwalimvwa—inga kwatugwasya kuzicita kabotu zyintu kutegwa katuyanda.—7/1, peeji 17.

• Ino mbuti mukaintu uucenjede Mujuda mbwaakali kucibelesya kabotu ciindi naakacili abana bakwe?

Wakali kukonzya kubelesya ciindi eeci mbuli nobaunka kumisika anobajoka, ikuyiisya bana bakwe njiisyo zyamu Magwalo. (Dt. 6:6, 7) Alimwi wakali kukonzya kwaambila bana bakwe basimbi mbobakonzya kucizyiba kuula zyintu zili kabotu. (Tus. 31:14, 18)—7/1, peeji 19.

• Ino Magwalo nzi aakonzya kugwasya banabukwetene kuti kabamvwana abamakwe?

Ibbaibbele lyaambila mulumi kuti “uleelede kusia wisi abanyina akukakatila kumwanakazi wakwe, babe nyama yomwe buyo.” (Matl. 2:24) “Mutwe wamwanakazi ngumwaalumi”—nkokuti mulumi. (1 Kor. 11:3)—7/1, peeji 28.

• Sena bafwide balakonzya kubagwasya bapona?

Ibbaibbele lilapandulula kabotu-kabotu alimwi munzila iilivwisya noyaamba kuti, ibafwide tabakonzyi kubagwasya bacipona pe akaambo kakuti “tabezi cintu niciba comwe.” Inzya taaku ncobazi alimwi taaku ngobakonzya kugwasya. (Muk. 9:5, 6, 10)—7/1, peeji 21.

• Ino Bbaibbele libacenjezya nzi aabo bakafwidwa kujatikizya kulizandula?

Nokuba kuti cili kabotu kukkala molikke kwaciindi cili mbocibede, Ilugwalo lwa Tusimpi 18:1 lutucenjezya kuti: “Uulipambukanya ulayandaula zisusi zyakwe mwini.” Aboobo, aabo bakafwidwa balakonzya kulomba kugwasyigwa kubanyina abeezinyina bakonzya kubagwasya. Imbungano ya Banakristo ilijisi bubambe bubotu bukonzya kugwasya. (Is. 32:1, 2)—7/1, peeji 30.