Dahme Kahrehda Aramas Kin Wia Soahng Suwed Kan?

MIE mehkot me aramas tohto pahn pwungki. Met iei me kitail koaros soh unsek, oh e kin kahrehiong atail kin sapwungala oh wia soahng kan me kitail kin koluhkihla mwuhr. Ahpw mendahki met eh mehlel, ia duwe, ih kahrepen soahng suwed kan, me laud oh me tikitik me kitail kin kilang de rong kereniong rahn koaros eh kin wiawi?

Mendahki soh unsek en aramas, pali laud kin pwungki me mie soangen wiewia kan me kitail sohte pahn wia. Re pil pwungki me aramas kak liksang wiewia suwed kan. Pali laud pil kin pwungki me mie wekpeseng en sapwungala nda mehkot me sohte mehlel oh nsenkihda en likamw. De pil mie wekpeseng en sapwungala kamedekihala emen oh pilahnehda en kemehla emen. Ahpw wiewia suwed me kin kapwuriamwei, kalapw kohsang rehn irail akan me kitail sohte kin kasik, pwe re mwomwen mwahu nan atail kousapwan. Ahpw dahme kahrehda aramas kin wia soahng suwed pwukat?

 Paipel kin kawehwehda duwen ire wet. E kasalehda ni pwung dahme kahrehda aramas kin wia soahng suwed kan mendahki re ese me e suwed. Tehk dahme e mahsanih.

▪ “Amwail lokolok pahn kahrehda amwail pahn sahliella.”—DEUDERONOMI 28:34.

Paipel kin kasalehda me ekei pak aramas kin wia soahng kan me re sohte kin wia pwehki arail irair me kahrehda. Ekei mwein kin wiahda tiahk en mwersuwed kan pwehki ar medewe me ih me pahn kamwahwihala kahpwal kan oh koasoandi sapwung kan. Ehu pwuhk koasoia: “Pak tohto, wiewia suwed kan kin kohsang arail kin uhdahn pwunodki koasoandi en arail mour, palien politik, oh pai en arail wehi me mwomwen sohte kak mwahula.”—Urban Terrorism.

▪ “Limpoak ong mwohni, iei tepin soangen suwed koaros.”—1 TIMOTY 6:10.

Ekei pil kin nda me aramas mwahu kan pahn kauwehla kosonned ma re alehdi uwen mwohni ehu. Ekei me kin mwomwen mwahu oh kadek ni ahnsou me soahng koaros mwahu kin wekila ni ahnsou me re kin alehdi uwen mwohni ieu de ahnsou me re kin luhs sang neirail mwohni. Re kin uhd lemeila de suwedla. Medewehla soahng suwed tohto me kin wiawi pwehki noahrok, me duwehte mwersuwed, likamw, pirapa aramas pwehn ale mwohni oh pil kemehla aramas.

▪ “Dahme aramas kan kin mengeiki wiahda sapwung laud? Pwehki ar sohte kin mwadangete ale kalokepe.”—EKLESIASDES 8:11.

Iren Paipel wet kin kasalehda en aramas ar kin ahneki madamadau me re kak pitsang ar wiewia suwed kan ni en kaunen wehi kan ar sohte kin mwadang kapwaiada kosonned kan. Met kin sansalda ni en aramas akan ar kin tangahki wuk werennansapw akan nan ahl oh rehn irail akan me kin mwersuwed ni ahnsoun des de irail akan me kin pirapa mwohni me kowohng arail wehi de pil wiewia kan me suwed sang mepwukat. Irail kan me kin peikiong kosonned kakete lemehda en wia soahng kan me re sohte kin wia pwehki epwelpen kosonned kan solahr kehlail de aramas solahr masak ma e dierek ar wiewia suwed kan. Ehu makasihn koasoia: “Pwehki irail akan me kin wiahda soahng suwed akan ar sohte kin ale kalokeparail, met kin kahrehiong aramas me ke sohte kin kasik, en wia soahng kan me keieu suwed.”—Arguments and Fact.

▪ “Aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp. Eri, eh kin kanaitikihada eh ineng suwed, oh ni dihp eh kin pweidahr mehlel, e kin kahrehiong mehla.”—SEIMS 1:14, 15.

Aramas koaros kak ahneki madamadau sapwung. Rahn koaros, soahng tohto kin kasonge kitail pwehn wia dahme sapwung. Ni ahnsou me Paipel ntingda, mahsen pwukat kowohng Kristian akan: “Pwe songosong koaros me kin lelohng kumwail, ih me kin lelohng aramas koaros.” (1 Korint 10:13) Mendahki met, en emen eh kin wiahda dahme suwed kin kohsang ni pilipil me e wiahda, ma e pilada en mwadang kihsang madamadau suwedo sang eh madamadau de e medemedewehte oh  mweidohng wiewia suwedo en lalaudla reh. Iren Paipelo nan kisinlikou en Seims kin kasalehda me ma emen kin “kanaitikihada” ineng suwed nan eh madamadau, e uhdahn pahn imwikihla wiewia suwed.

▪ “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.”—LEPIN PADAHK 13:20.

Irail akan me kitail kin werekiong kak kamwakid laud atail mour, re kak kahrehiong kitail en wia dahme pwung de dahme sapwung. Pali laud en ahnsou, aramas kin wia soahng kan me kin imwila suwed pwehki iengerail kan de pwehki werek suwed. Nan Paipel, lepin lokaia pwukat “me pweipwei kan,” sohte kin wehwehki irail kan me sohte loalokong ahpw e kin wehwehki irail kan me kin pohnsehsehla kaweid erpit kan en Mahsen en Koht. Mehnda ma kitail pwulopwul de mah, ma kitail sohte doadoahngki kaweid erpit kan en Paipel pwehn pilada mwahu kompoakepatail kan de ihs me kitail pahn werekiong, kitail pahn kak “ohkihla.”

Iren Paipel pwukat oh pil iren Paipel tohto teikan kin kasalehda ni sansal dahme kahrehda aramas de pil irail kan me mwomwen mwahu kin wia me suwed de pil soahng suwed kan me kapwuriamwei. E kin sawas laud ni atail kin wehwehkihda dahme kahrehda aramas kin wia soahng suwed kan. Ahpw ia duwe, mie koapworopwor me ehu rahn mepwukat pahn solahr wiawi? Ei, Paipel sohte kawehwehdahte kahrepen aramas arail kin wiahda soahng suwed kan ahpw e pil inoukihda me wiewia suwed pwukat pahn sohrala. Soangen inou dah kei met? Soahng suwed kan koaros nin sampah wet uhdahn pahn imwisekla? Ire en mwuri pahn sapengla.