Mang Fan ni Ma Rin’ e Girdi’ e Kireb?

TAAB n’en e bay ni buchuuw e girdi’ nra yog nde riyul’, ni aram e: Gad gubin ndawor da flontgad ma yu ngiyal’ e gad ma rin’ boch ban’en ni gad ma kalngan’dad riy ko tomur. Ere gur, aram fan e pi kireb ni gad be guy ni be buch u toobdad nge tin gad ma rung’ag murung’agen?

Yugu aram rogon ndawori flont e girdi’ mab ga’ ni yima yog ni bay e gin thingar ra musgad riy, maku rayog ni nge dab ra rin’ed e tin nib kireb. Maku boor e girdi’ ni ma yog nib thil e bin baaray ni nga mog ban’en nde riyul’ ni gathi lem rom nge bin ni ka mog ni lem rom, nge bin baaray ni kam maad’ad ngak be’ ni kam kal riy, nge bin ni kam li’ ni lem rom. Yooren e pi kireb ni ma buch e ka girdi’ nu toobdad e yad ma rin’. Mang fan ni ma rin’ e girdi’ e tin nib kireb?

 Be weliy e Bible murung’agen e re n’ey. Maku be weliy fan ni ma rin’ e girdi’ e tin nib kireb. Am lemnag e n’en ni be yog.

▪ “Pi gafgow romed e bayi thang lanin’med.”​—DEUTERONOMY 28:34, BT.

Be yog e Bible ni yu ngiyal’ e gad ma rin’ boch ban’en nib kireb ni bochan e magawon ni ke yib ngodad. Ma boch e girdi’ e yad ma rin’ e kireb nib togopuluw ko motochiyel ya yad be lemnag ni kemus rogon me chuw e gafgow nge tin de mat’aw. I yog reb e babyor ni gaar: “Bin th’abi ga’ i fan ni ma rin’ e terrorist e kireb e bochan nder fel’ u wan’rad e pi n’en ni be rin’ e am, nge girdi’, nge rogon ni yibe maruwel ko salpiy.”​—Urban Terrorism.

▪ “Chogowen e salpiy e ir lik’ngin urngin mit e kireb.”​—1 TIMOTHY 6:10.

Ma yog boch e girdi’ ni mus ngak e piin nib fel’, e nap’an ni yad ra guy e salpiy ni boor mar paged talin e tin nib fel’ ni ngar rin’ed. Ma boch e girdi’ e nap’an nra yoor ban’en rorad, fa m’ay ban’en rorad, mi yad thil nge kireb e ngongol rorad. Am lemnag e pi kireb ni yima rin’ e ngiyal’ ney ni bochan e chogow, ni bod rogon ni ngan k’aring e marus ngak be’ ya nge pi’ e salpiy, nge ngan sasalapiy boch ban’en ya nge yog e salpiy riy, nge ngan iring be’, nge ngan li’ be’ ngem’.

▪ “Mang fan ni girdi’ e kaygi par ni be ngongliy e kireb? Bochan e kireb e danir gechignag ni aram feni papey.”​—EKLESIASTES 8:11, BT.

Re thin nu Bible ney e be tamilangnag ni boor e girdi’ ni yad ma lemnag ni yugu rayog ni ngar rin’ed e kireb ni faanra der guyrad e piin ni yad ma ngongliy e motochiyel. Aram fan ni boor e girdi’ ni ma yan u karrow ni kaygi papey, ma boch e ma sasalap u nap’an ni yibe skeng, ma boch e yad ma iring e salpiy ko am, nge ku boch ban’en nib kireb. Faanra danir tay e motochiyel nga tagil’, ara danir rus ni yira koley ni kan rin’ ban’en nib kireb, ma aram e piin ni yad ma fol ko motochiyel e ku rayog ni ngar th’abed e motochiyel. I yog reb e babyor ni gaar: “Bochan danir gechignag e girdi’ ni kireb ma aram fan ni boor e girdi’ ni yad ma rin’ e oloboch nib gel e kireb riy.”​—Arguments and Facts.

▪ “Pi n’en ni ma waliy e girdi’ nge denen e ma yib ngak e en ni pag ir ko n’en nib kireb ni be ar’arnag nge waliy faanem nge aw ko wup; ma aram me diyen e tin nib kireb ni be ar’arnag nge gargeleg e denen.”​—JAMES 1:14, 15.

Gubin e girdi’ nrayog ni nge lemnag ban’en nib kireb. Gubin e rran ni boor ban’en ni gad ma guy ma gad ma rung’ag nrayog ni nge waliydad i yan ko kireb. Kakrom e ni gaar ngak e pi Kristiano: “Pi n’en ni ma waliy e girdi’ nge denen ni ke yib ngomed e ereyer e mit i n’en ni ka ma yib ngak e girdi’.” (1 Korinth 10:13) Ere n’en ni ma buch rok be’ ko tomur e be yan u rogon e n’en ni mel’eg ko som’on, ni aram e reb e nge chuweg e lem nib kireb u laniyan’ nib papey, fa reb e nge  pag nge ilal. Fare thin u James e be yog ni faanra pag be’ e kireb ni be ar’arnag nge “diyen,” ma ngongol ni kireb e bay nga tomuren.

▪ “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.”​—PROVERBS 13:20.

Piin ni gad ma chag e rayog ni ngar suruyed gadad ko tin nib fel’ fa tin nib kireb. Boor yay ni ma rin’ e girdi’ boch ban’en nib kireb nda ur lemnaged ni bochan e taab yangar rorad, ara piin ni yad be chag. “Girdi’ ni balyang” ni be yog e Bible murung’agen e gathi be yip’ fan ni yad ba aliliy, ya be yip’ fan e piin ndarir folgad ko fonow ko Thin rok Got. Ere demtrug yangardad, ma ra dab da mel’eged e piin ni gad ma chag ngorad ma aram e rayog ni ngad ‘kirebgad.’

Pi thin ney nge ku boch e thin u Bible e be tamilangnag fan ni ma rin’ e girdi’ e kireb nge boch ban’en ni yima gin ngay. Rayog ni nge ayuwegdad ni faan gad ra nang fan ni ma rin’ e girdi’ e tin nib kireb. Machane gur, bay ban’en nrayog ni nge ayuweg e pi girdi’ ney ngar thilgad? Ba’, ya Bible e gathi kemus ni be weliy fan ni be rin’ e girdi’ e kireb, ya ku be micheg nra chuw e kireb. Mang e pi n’em ni kan micheg? Ra chuw urngin e kireb, fa? Bin migid e thin e ra pi’ e fulweg riy.