Kpukpru Ndiọi N̄kpọ Ẹyetre!

ABASI ọnọ nnyịn Ikọ esie eke odudu spirit, emi etịn̄de mme ntak emi mme owo ẹsinamde ndiọi n̄kpọ. Enye omonyụn̄ ọnọ nnyịn ifụre ndimek se imade ye ukeme ndifara ke idem, ndien emi anam ikeme ndimek ke nnyịn idinamke ndiọi n̄kpọ. (Deuteronomy 30:15, 16, 19) Sia inyenede mme ukeme emi, nnyịn imekeme ndifiọk idiọk ekikere ekededi oro ekemede ndidụk nnyịn esịt inyụn̄ inam se oyomde man itre idiọk ekikere emi. Edieke itrede ndinam ndiọi n̄kpọ, emi ayanam nnyịn ye mbon oro ẹfiọkde nnyịn ikop inemesịt.—Psalm 1:1.

Kpa ye oro, inamke n̄kpọ m̀mê nnyịn owo kiet kiet idomo adan̄a didie nditre ndinam ndiọi n̄kpọ, ndiọi n̄kpọ emi mme ekemmọ owo ẹnamde ẹyọyọhọ ererimbot.  Bible odụri owo utọn̄ ete: “Fiọk emi, ete ndiọkeyo ẹyedu ke mme akpatre usen.” Man owụt se inamde mme akpatre usen ẹdi “ndiọkeyo,” enye aka iso ọdọhọ ete: “Mme owo ẹyedi mme ama idem, mme ama okụk, ẹwụt idem, ẹtan̄ idem, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma inemesịt utu ke ndima Abasi, ẹnyene enyọn̄ enyọn̄ ido uten̄e Abasi edi idụhe uwem ekekem ye odudu esie; wọn̄ọde kpọn̄ mmọ emi.”—2 Timothy 3:1-5.

Eyedi afo omokụt ikọ oro “mme akpatre usen” ke ntịn̄nnịm ikọ oro ikotde isịn ke enyọn̄ emi. Afo ekere ke ikọ oro ọwọrọ nso? Nte ifiọkde, ndidọhọ “mme akpatre usen” ọwọrọ ke n̄kpọ ọmọn̄ esịm utịt. Nso idisịm utịt? Kop se Abasi ọn̄wọn̄ọde mi ke Ikọ esie.

Ẹyesobo mme idiọkowo ofụri ofụri.

“Osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” —PSALM 37:10, 11.

“Jehovah ekpeme kpukpru mmọ eke ẹmade enye: onyụn̄ osobo kpukpru mme idiọk owo.”—PSALM 145:20.

Ufịk ididụhe aba.

“Enye ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a. Enye ayafak ukpọn̄ mi osio ke ukụt [m̀mê ufịk] ye nnama.” —PSALM 72:12, 14.

“Ẹyenam edibotn̄kpọ ke idemesie ọbọhọ ufụn itie mbiara onyụn̄ enyene ubọn̄ ubọn̄ ifụre eke nditọ Abasi.”—ROME 8:21.

Ẹyenọ mme owo kpukpru se mmọ ẹyomde.

“Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—MICAH 4:4.

“Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ebietde usen eto, ndien edimek ikọt mi ẹyedia se ubọk mmọ ẹnamde.”—ISAIAH 65:21, 22.

Edinen ikpe oyodu.

“Ke akpanikọ, ndien, nte Abasi idinamke ndimek ikọt esie emi ẹsemede ẹnọ enye uwemeyo ye okoneyo ẹnyene unenikpe . . . ? Ndọhọ mbufo nte, Enye ayawara anam mmọ ẹnyene unenikpe.”—LUKE 18:7, 8.

“Jehovah [ama] edinen ikpe, ndien ikpọn̄ke mbon-ima esie; eyekpeme mmọ ke nsinsi.”—PSALM 37:28.

Edinen ido ayada itie ibụk.

“Mme andidụn̄ ererimbot [ẹyekpep] se inende.”—ISAIAH 26:9.

“Mbufa enyọn̄ ye obufa isọn̄ ẹdu emi nnyịn itiede ibet nte ekemde ye un̄wọn̄ọ esie, ndien edi mi ke edinen ido edidụn̄.” —2 PETER 3:13.

Mme Owo ke Ẹkpụhọde —Idem Idahaemi

Eyịghe idụhe ke kpukpru nnyịn ikpama se ẹn̄wọn̄ọde oro. Edi nso iwụt ke mmọ ẹyesu? Ke nditịm ntịn̄, nnyịn imokokụt  mme n̄kpọ oro ẹwụtde ke mme un̄wọn̄ọ Abasi ẹyesu. Nso idi mme n̄kpọ oro? Edi nte ke ata ediwak owo ke ofụri ererimbot ẹtọtọn̄ọ nditre ibụk, oburobụt ido, m̀mê afai ẹnyụn̄ ẹkpep ndinam akpanikọ, ntie emem emem, nnyụn̄ mfọn ido. Mfịn, Mme Ntiense Jehovah emi ẹwakde ẹbe miliọn itiaba, ẹdi nditọete ofụri ererimbot emi mînyeneke asari eke orụk, eke ekpụk, eke idụt, eke ukara, ye eke idaha uforo, kpa mme n̄kpọ oro ẹdide ntak ekese usua, afai, ye uduọkiyịp ke kpukpru emana. * Mme utọ ukpụhọde oro ndida itie mfịn enen̄ede anam inịm ke mme un̄wọn̄ọ Abasi ẹyesu ke ata akamba udomo.

Edi nso inam mmọ ẹnam mme utọ ukpụhọde oro? Ibọrọ odu ke mme un̄wọn̄ọ en̄wen ke Bible, emi prọfet Isaiah ekewetde. Enye ekewet ete:

“Wolf oyodụn̄ ye eyen erọn̄, nawụri-ekpe oyonyụn̄ osụhọde ana ye eyen-ebot: eyen-enan̄, ye abak lion, ye enan̄ ubom, ẹyenyụn̄ ẹna ọtọ kiet: ekpri eyen-ọwọn̄ oyonyụn̄ akama mmọ. . . . Lion oyonyụn̄ ata nnyanyan̄a nte enan̄. Eyen-nsek eyebre mbre ke enyọn̄ odudu okụn̄, eyen emi adahade ke eba oyonyụn̄ ada ubọk esie odori odudu ibọm. Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.”—Isaiah 11:6-9.

Ndi ntịn̄nnịm ikọ emi aban̄a ini emi unam ẹdidude ke emem ye mme owo kpọt? Baba, enye etịn̄ se ikande oro. Ti ete ke akpatre ikpehe itien̄wed oro owụt se inamde ẹnam ukpụhọde oro, ete: “Ifiọk Jehovah ọyọyọhọ ke ererimbot.” Ndi ifiọk Jehovah esikpụhọde unam? Baba. Edi enye ekeme  esinyụn̄ okpụhọde mme owo! Ntịn̄nnịm ikọ emi owụt ke mbon oro ẹnyenede edu emi ebietde eke unam ẹkeme ndikpụhọde edu emi, ẹnyụn̄ ẹnyene edu Christ ke ntak emi ẹkpepde ẹnyụn̄ ẹnamde se Bible ọdọhọde.

Da Pedro ke uwụtn̄kpọ. * Enye ama odụk n̄ka edinam oyomonsia sia ekekerede ke in̄wana man itre ufịk. Ke ẹma ẹkenọ enye ukpep, ẹma ẹdọhọ enye ọkọduọk bọmb ke itieidụn̄ mme bodisi. Nte enye okosụk oyomde ndinam emi, ẹma ẹmụm enye. Enye ama odu isua kiet ye ubak ke ufọk-n̄kpọkọbi, emi enye ekesịnede oyom usụn̄ nte ẹkpebọde ukara. Edi ke adan̄aemi enye osụk odude do, n̄wan esie ama ọtọn̄ọ ndikpep Bible ye Mme Ntiense Jehovah. Ke ẹma ẹkesio enye ke ufọk-n̄kpọkọbi, enye n̄ko ama ọtọn̄ọ ndikpep Bible ndien se enye ekekpepde aban̄a Jehovah Abasi ama anam enye anam akamba ukpụhọde ke nte enye esidude uwem, onyụn̄ okpụhọde nte enye adade uwem. Pedro ọdọhọ ete: “Mmọkọm Jehovah sia mmen̄kowotke owo ndomokiet ke ofụri ini oro n̄kodude ke n̄ka oro. Idahaemi ndida ofụt spirit Abasi, kpa Bible, nnọ mme owo etop ata emem ye edinen ikpe—kpa eti mbụk Obio Ubọn̄ Abasi.” Pedro ama akam aka itieidụn̄ mme bodisi  oro enye okoyomde ndiduọk bọmb do man ọkọkwọrọ aban̄a emem ye ererimbot emi afai mîdidụhe.

Odudu oro Ikọ Abasi enyenede ke idem mme owo anam inen̄ede inịm ke un̄wọn̄ọ Abasi oro aban̄ade idiọkido nditre oyosu. Ih, mme owo idinamke idiọkn̄kpọ ke nsinsi edi mmọ ẹyekabade ẹdi nti owo. Ke mîbịghike, Jehovah ọmọn̄ osio andikọtọn̄ọ idiọkn̄kpọ, Satan kpa Devil, emi edịbede edi ntak mme n̄kpọ oro ẹtịbede ke ererimbot emi. Bible ọdọhọ ete: “Ofụri ererimbot esịne ke idak odudu andidiọk.” (1 John 5:19) Edi ke mîbịghike enye ididụhe aba. Mbon oro ẹsọn̄de esịt ẹsịn nditre idiọkido idinyụn̄ idụhe aba. Omokụt do ke uwem eyenem etieti ini oro!

Nso ke owo akpanam man ekeme ndidu ini oro? Kûfre ke “ifiọk Jehovah” anam mme owo ẹkpụhọde mfịn, ndien ke mîbịghike ke enye ọmọn̄ ada ukpụhọde n̄ko edi ke ofụri ererimbot. Edieke enyenede nnennen ifiọk Bible onyụn̄ adade emi esịn ke edinam—nte Pedro—afo eyenyene idotenyịn ndidu ke ererimbot emi ‘edinen ido edidụn̄de.’ (2 Peter 3:13) Nnyịn imesịn udọn̄ inọ fi ite ada ifet oro odude idahaemi ekpep aban̄a Abasi ye Jesus Christ, koro ndinam emi edinam enyene nsinsi uwem.—John 17:3.

[Mme Ikọ Idakisọn̄]

[Se ẹwetde ke ikpọ abisi ke page 9]

Afo n̄ko emekeme ndinyene idotenyịn ndidu ke ererimbot emi ‘edinen ido edidụn̄de.’—2 PETER 3:13