A Rokui El Mekngit A Mo Nguemed!

A DIOS a meskid a Tekingel el ochotii a uchul me a rechad a meruul a mekngit el tekoi. Ngdirrek el meskid a llemelted el di kid el melilt a tekoi me bo el sebeched el omtebechel er a rengud me lak doruul a mekngit. (Duteronomi 30:15, 16, 19) Me kid el medengei aika el tekoi a uchul me ngsebeched el melechesuar a mekngit el dubecha er a uldesued e mo melasem el melodech er ngii. E sel doruul el uaisei el mengeroid er kid er a mekngit e ngmo uchul a deurreng er kid me a rechad el ngar bita er kid.​—Psalm 1:1.

Me nguaisei, alta e kede melasem el mengeroid er kid er a mekngit, engdi a rechad a meruul a mekngit el uchul me a beluulechad a mui er a mekngit el omeruul. A Biblia a omeklatk el kmo: “Di bo modengelii tia el kmo, a ikel uriul sils ra belulechad a morngii  er ngii a blsechel a ringel.” Ngmelemolem el mesaod er a “blsechel a ringel” el kmo: “Isei e ar chad a mo betik a rengrir ra di tir, e nguibes a udoud, e chemat ra di tir, e kididai a rengrir, e oltuub, e omtok rar demerir mar derrir, e diak lodenge saul, e diak le chedaol, e diak le chubechub, e diak le mesumech a rengrir, e melaes, e diak le delodau, e teleberechel, e chetirir a ungil, e keikr, e di olab a rengrir, e blkuuk, e betik a rengrir ra tametereng el kuk ngaruchei ra le betik a rengrir ra Dios, te teletelel a ngar chomeluu ra Dios e mengoit ra klisichel ngiil tekoi. Mongeroid er kau er tirikel uaisel chad.”​—2 Timoteus 3:1-5.

Ngsebechem el mo medengelii a belkul a tekoi el “ikel uriul sils” el ngar er a bades. Ngera belkul el kirem? A rebetok el chad a medengelii a belkul “a ikel uriul sils” el kmo ngmesaod er a tekoi el mochu nguemed. Me tiang ngera el tekoi? Ka momtab er a telbilel a Dios el ngar er a Tekingel.

A remekngit el chad a mo nguemed.

“Ngdi telkib kung, e a re dengerenger a mo dibus; ke mo osiik er tir, ngdi mo diak ke betik er tir; ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—PSALM 37:10, 11.

A Jehovah a “mesebechakl er tirkel betik a rengrir er ngii, ngdi mo tomelleterir a rokui el dengerenger.”​—PSALM 145:20.

Ngmo diak a ulecheracheb.

“Ng olsobel er a re mechebuul el tirkel omekedong er ngii, me tirkel metacherbesrir ma re cheloit el chad. Ng olsobel er tir er a ulecheracheb ma mekngit el bekeu el omeruul.”​—PSALM 72:12, 14.

“Ngmo lmuut ra bleob el mengubet ra blekeradel ra klsibai ra ngemed e mo nguu a ilmokl ra klebkall rar ngelekel a Dios.”​—ROM 8:21.

A rechad a mo ungilbesul a klengar er tir.

“A re bek el chad a mo kiei el ngar a budech er bita er a dellemelir el bilong ma kerrekar er tir el fig, el diak a mo omekdakt er tir.”​—MIKA 4:4.

“A re chad a mo toketek a blai e mo kiei er ngii; el diak le ngodech el chad a mo ousbech. Te mo dualem a sers er a bilong, e mo dmeu a rengrir er a bilong; ng diak le kuk ngodech el chad a mo melim. A re chedak a mo kemanget a klengar er tir el ua kerrekar. Ng mo cherrungel a deuil a rengrir er a ikel uluureor el kirel.”​—ISAIA 65:21, 22.

Ngmo er ngii a llemalt.

“E a Dios ngdiak bo lsodeterir ar ngellitel er ngii, el omekedong er ngii ra llomes ma klebesei? E mechiiteterir el di uaisei el mo meketeket . . . ? Ak subedemiu el kmo, ngdimereched el smodeterir.”​—LUKAS 18:7, 8.

“Ele [Jehovah] a betik a rengul er a melemalt, el diak le chititerir a re bekelatk el chedal. Ng di blechoel el mengkar er tir.”​—PSALM 37:28.

A llemalt a mo mtechir a rechorecherreng.

“Ma re chad er ngii [a] mo medengei el kmo ng ngera llemalt.”​—ISAIA 26:9.

“Ngdi kid a mengiil er sel ngara telbilel a Dios el beches el eanged ma beches el chutem el bo le kiei er ngii a llemalt.”​—2 PETRUS 3:13.

Ngklou el Omelodech a Ngar Ngii er Chelecha el Taem

Kede rokui el ungil a rengud el kirel aika el telbiil el mla medung. Engdi ngera el tekoi a oterekeklii el kmo aikang a mera el mo tmaut? Chelecha el taem e ngsebeched el mesang a olechotel a telbilel a Dios el kmo ngmera el mo tmaut. Me ngngera tia el olechotel? Chelecha el taem el meliuekl er a  beluulechad e a rebetok el miliol el chad a mla ngmodech a blekerdelel a klengar er tir, el mle merechorech a rengrir, e meruul a deleboes me a dirrek el uldikel e mla mesuub el mo melemalt el chad, e chad er a budech e ungil a blekerdelir. Chelechang e te betok er a euid el miliol el Sioning er a Jehovah a teloi er tia el klodam er a beluulechad, el tir a mla chemoit a blekeradel el melisiich er a omengetukel er a rechad, me a bliongel er a rechad, me a beluu, me a tekoi er a balatiks, me a kerruul el ngii a uchul a kltui me a kdekudel el omeruul me a dirrek el okodellir a rechad el kemanget el taem. Chouaika el omelodech a meketmokl er a chelecha el taem el melisiich er a klaumerang el kmo ngdi telkib kung e a Dios a mo otaut a telbilel er a beluulechad el rokir.

Ngera sel uchul me ngmo er ngii a omelodech? A nger el kirel tia el telbiil er a Biblia a lulluches er ngii a profet el Isaia el kmo:

“A lbolb ma sib a mo dmak el kiei el ngar a budech, ma leopard a mo mechiuaiu el obengkel a ngelekel a kaming. Ma ngelekel a kerbou ma ngelekel a laion a mo dmak el mengang, e a re mekekerei el ngalek a mo mengedmokl. . . . Ng mo lmuut er a kekerel ngalek me ng diak bo le mekesakl a lsekum ng ousekool er bitar omekodall el bersoech. Ngar a Sion, el chedaol rois er a Dios, e ng mo diak a ngeral kdekudel ma lechub e ng mekngit. A beluu a mo mui er a klemedengei er a [Jehovah] el di ua ngouaol el mui er a daob.”​—Isaia 11:6-9.

Tia el ulaoch ngdi mesaod er a taem el rechad me a charm a mo dmak el kiei el ta rengrir? Ngdiak, ngngar ngii a lmuut el bebil er a omesodel. Ngar er a ulebengelel tia el bades e ngochotii a uchul tia el omelodech el kmo: “A beluu a mo mui er a klemedengei er a [Jehovah.]” Me a klemedengei el kirel a Dios ngsebechel melodech a blekerdelel a charm? Ngkmal diak. Engdi ngsebechel e dirrek el ngmodech a blekerdelir a rechad! Tia  el ulaoch a melekoi el kmo tirke el chad el mle ua blekerdelel a charm a mo melodech a blekerdelir e mo omekeroul a blekeradel el ua Kristus e le tir el mesuub e oltirakl a ulekrael er a Biblia.

Ka di molatk er a blekerdelel a Pedro. * Sera bo el teloi er a cheldebechel er a remekngit el chad, e nguluumerang el kmo ngoumekemad el kirel a llemalt. Me a lemerekong el ngar er a omesuub e ngmlodurech el mo omuu er a blirir a rebulis. Me ngmengetmokl er ngii el kirel e te mildechemii e kulebsengii. Me a Pedro a mle chelsimer el 18 el buil e millemolem el melatk er tia el ngerechelel. A bechil a mlo omuchel el mesuub a Biblia el obengterir a Resioning er a Jehovah. Me sera letobed er a kelebus e ngmlo omuchel el mesuub a Biblia, e milsuub el kirel a Jehovah el Dios e mlo ngodechii a blekerdelel me a uldesuel el kirel a klengar er ngii. Ngmelekoi el kmo: “Ak kmal mereng a sulel a Jehovah el dimlak el bechikak me kukodir a chad er sera dirk kmekngit el chad. Chelechang e a kuusbech er a Biblia el omerk er a klumech el mo er a rechad el kirel a mera el budech me a llemalt el ngii a ungil el chais el kirel a Rengedel a Dios.” Ngdirrek el mo oldingel er sel blirir a rebulis el mle kirel melemall er ngii me bo el sebechel el ouchais er a klumech el kirel a budech me a beluulechad el diak a uldikel er a chelsel.

 Sel klisiich el ngar er a Tekingel a Dios el sebechel el ngodechii a blekerdelel a chad, a meskid a ungil el uchul me kede oumerang er a telbilel a Dios el kmo a rokui el mekngit a mo nguemed. Nguaisei, a rechad a mo diak loruul a mekngit e te bai mo meruul a ungil el tekoi. Ngdi kmedung e a Jehovah a mo kulebsengii ngike el uchul a mekngit el tekoi el Satan el Diabelong el ngii a mengeuid er a beluulechad. A Biblia a melekoi el kmo: “A belulechad el rokir a chederdall er ngikel mekngit.” (1 Johanes 5:19) Engdi ngdi kmedung e ngmo nguemed. Me tirke el chad el diak el bo lolodech a blekerdelel a klengar er tir me te dirrek el mo nguemed. Ngulterekokl el kmal mo dmeu a rengud er a klengar er kid er sel taem!

A chad ngkirel el meruul a ngerang el oterekeklii a klengar er ngii er a ngar medal el klebesei? Lak dobes el kmo ngoeak a “klemedengei er a [Jehovah,]” e a rechad a melodech a blekerdelel a klengar er tir er chelechang el mo uchul a klou el omeldechel a beluulechad er a ngar medad el klebesei. Me sel dokurulii a klemedengei er kid er a Biblia e doltirakl a ulekrael er ngii el ua Pedro, e ngmo sebeched el omes el beduluchei el mo kiei er a beluulechad el “bo le kiei er ngii a llemalt.” (2  Petrus 3:13) Me aki melisiich er kau el mo ousbech er a techellem el mo mesuub el mo medengelii a Dios me a Jesus Kristus, e le tiang a mo uchul a diak a ulebengelel el klengar el kirem.​—Johanes 17:3.

[Footnote]

[Blurb el ngar er a 9 el llel]

Kau me ngdirrek el sebechem el omes el beduluchei el mo kiei er a beluulechad el “bo le kiei er ngii a llemalt.”​—2 PETRUS 3:13