Iitabay Xayanaagee Attenna!

XOOSSAY nuussi, asay iitabaa aybissi oottiyaakko yootiya ba Qaalaa immiis. I nuussi koyidobaa dooridi oottiyo maataanne nu huuphiyaa naagiyo abbiyaakka immiis; hegee nuuni iitabaa oottennan agganau dooranaadan maaddees. (Zaa. 30:15, 16, 19) Hegaa qoppiyo wode, nuussi deˈiya iita qofaa akeekanaunne hegaa giigissanau tangguwaa ekkana danddayoos. Nuuni iita oosuwaappe haakkiyoogee nuussinne nunaara deˈiyaageetussi wurssettan ufayssaa demissees.—Maz. 1:1.

SHin, nuuni iitabaa oottennaadan ay keena baaxetikkokka, asay oottiyo iita oosoy ubbatoo alamiyan keehippe dariiddi dees. Geeshsha Maxaafay, “Wurssetta gallassi waissiya wodee yaanaagaa akeeka” yaagees. Wodee ‘wayssiyaagaa’ gidido gaasuwaa  hagaadan gees: “Asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77⁠obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana. Eti nu ammanuwaa bolla doonan ekkidabaa milatana; shin a tumu wolqqaa erikke gaana. Hegeetu mala asatukko shiiqoppa.”—2 Xim. 3:1-5.

Qommoora deˈiya hiraagan, “wurssetta gallassi” yaagiyaagaa akeekennan aggakka. Hegee neeyyo woygiyoogee? Ooninne akeekiyoogaadan, ‘wurssetta gallassa’ giyoogee issibay xayiyoogaa malaatees. Hegee aybaa xayo gidanee? Xoossay ba Qaalan yootidobaa akeeka.

Iitati muleera xayana.

“Iitaa oottiyaageeti guutta wodiyaappe guyyiyan de7⁠okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana.”—MAZ. 37:10, 11.

“GODAI bana siiqiyaageeta ubbaa naagees; shin iitata ubbaa xaissana.”—MAZ. 145:20.

Huqqunnay xayana.

“A xeesiya hiyyeesata, naaqettidaageetanne maaddiyaabi bainnaageeta i ashshees. Eta naaquwaappenne makkalaappe i wozees.”—MAZ. 72:12, 14.

“Mereta ubbai ba huuphen bashshaa ailletettaappe issi gallassi kiyana; qassi he meretati Xoossaa naati ailletettaappe kiyido bonchcho kessaa shaakkana.”—ROO. 8:21.

Asau asatettan koshshiyaabay kumana.

“Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna.”—MIK. 4:4.

“Asati keettata keexxidi, etan de7ana; woiniyaa turatakka tokkidi, eta aifiyaa maana. Eti keexxin, harai de7⁠enna; harai maanau tokkiyoobaa tokkokkona. Ta asaa laittai mittaa laittaadan aduqqana; qassi taani dooridoogeeti bantta adussa wodiyau bantta kushiyaa oosuwan ufaittana.”—ISI. 65:21, 22.

Suure pirdday deˈana.

“Yaatin bana maaddana mala, gallassinne qammi baakko waassiya doorettida asaassi Xoossai pirddennee? . . . Taani inttessi odiyoogee aibee giikko, i eesuwan etassi pirddana.”—LUQ. 18:7, 8.

“GODAI xillobaa dosees. Xoossaa asata i yeggenna; xilloti merinau naagettoosona.”—MAZ. 37:28.

Ba huuphiyaa siiqiyoogee attin xillotettay deˈana.

“Sa7an de7⁠iya asai xillotettaa tamaarees.”—ISI. 26:9.

“Nuuni Xoossai immana giido ooratta saluwaanne ooratta sa7aa xilloi de7anasaa naagoos.”—2 PHE. 3:13.

Asay Ha Wodiyankka Laamettiiddi Deˈees

Nuuni ubbay hegaa mala hidootan ufayttiyoogee sirissenna. SHin hegee polettanaagaa aybin ammanettanee? Xoossay qaalaa gelidobay polettanaagaa bessiya naqaashaa ha wodiyan beˈiiddi deˈoos. He naqaashay aybee? Ha wodiyan alame yuushuwan  deˈiya, miilooniyan qoodettiya asay yaaretiyoogaa, shori baynna kandduwaa woykko makkaliyoogaa aggidi, ammanettiyoogaa, sarotettaa medhiyoogaanne keha gidiyoogaa tamaaridoogaa. Ha wodiyan, laappun miilooneppe dariya Yihoowa Markkati, taarike wode ubban asay ixettanaadan, makkalanaadaaninne suuttaa gussanaadan oottida, zariyan, sheeshshan, biittan, polotikaaninne ikkonoomiyan shaahettiyoogaa aggidi, alame yuushuwan ishanttu maabara gididosona. * Ha wodiyan hegaa mala hanotan laamettiiddi deˈiyoogee, Xoossay gelido qaalay aahuwan polettanaagaa minttidi ammananaadan oottees.

SHin hegaadan laamettanaadan oottiyaabay aybee? Hegaa zaaroy Geeshsha Maxaafay yootiyo hara hidootan, hananabaa yootiya Isiyaasi xaafidoogan deˈees. I hagaadan giis:

“Wanggireelloi dorssa maraara issippe de7ana; maaheekka deeshsha maraara issippe zin77ana; miizzaa maraara, gaammuwaa maraaranne daddaruwaara issippe heemettana; guutta na7⁠i eta heemmana. . . . Gaammoi booraadan utulaa maana. Xammiya na7⁠i shooshshaa ollan kaa7ana; xanttaa duuxxida na7⁠i woriya shooshshaa ollan ba kushiyaa yeddana. Ta geeshsha deriyan ooninne qohettenna, woikko bayenna; aissi giikko, abbai haattan kumiyoogaadan, sa7ai GODAA eriyoogan kumana.”—Isi. 11:6-9.

Ha hiraagay doˈay asaara sarotettan deˈana wodiyaabaa xallaa yootii? CHii, hegaappe harabaakka oyqqiis. Hegaa mala laamee deˈanaadan oottidabay aybakko he xiqisiyau wurssetta qofay yootiyoobaa akeeka:  “Abbai haattan kumiyoogaadan, sa7ai GODAA eriyoogan kumana.” Xoossaa eriyoogee doˈaa eeshshaa laammii? Mule laammenna. SHin asaa laammana danddayees; qassi laammees! Geeshsha Maxaafay tamaarissiyoobaa tamaaridi oosuwan peeshshiyoogan, kase doˈaagaa mala eeshshay deˈiyoogeeti hegaa aggidi, Kiristtoosaagaa mala eeshshaa bessanaagaa ha hiraagay yootees.

Petiro leemisuwaa beˈa. * I shabbirssiya dirijjitiyan gelido wode suure pirddau olettiyaabadan qoppiis. I loohissuwaa demmi simmin, polise kambbiyan bombbiyaa xuussanaadan azazoy imettiis. SHin i hegaa oottanau giigettiiddi oyqettiis. Petiroy 18 aginaa qashettiis; he sohuwankka ba oosuwaa aggibeenna. He wodiyan, Petiro machiyaa Yihoowa Markkatuura Geeshsha Maxaafaa xannaˈiyoogaa doommaasu. Birshshetti simmidi, Petiroykka Geeshsha Maxaafaa xannaˈiyoogaa doommiis; Xoossaa Yihoowabaa i eridobay a eeshshaanne i deˈuwaa xeelliyo ogiyaa keehippe laammiis. Petiroy, “Taani shabbirssiyaagaa gidada oottido wodiyan oonanne worabeenna gishshau Yihoowa galatays. Haˈˈi asaayyo tumu sarotettaanne suure pirddaa kiitaa, giishin Xoossaa Kawotettaa mishiraachuwaa yootanau ayyaanaa bisuwaa, Geeshsha Maxaafaa goˈettays” yaagiis.  Petiroy sarotettaabaanne makkalay baynna alamiyaabaa yootanau, kase i xayssanau halchido kambbiyaakka biis.

Xoossaa Qaalay asaa keehippe laammana danddayiyoogee, iitabay ubbay xayanaagee attennaagau Xoossay qaalaa gelidoogaa nuuni ammananaadan oottiya hara gaaso. Ee, asay iitabaa merinau oottenna; shin laamettidi loˈˈobaa oottana. Beettenna hanotan alamiyaa kaalettiya, iitabaa pulttuwaa, Seexaanaa Dabloosa Yihooway mata wode xayssana. Geeshsha Maxaafay, “Ha mule sa7aikka xalahe halaqan haarettidoogaa eroos” yaagees. (1 Yoh. 5:19) SHin i mata wode xayana. Bantta iita ogiyaappe simmennan zozzidi ixxidaageetikka xayana. He anjjettida wodiyan deˈanaagee ayba ufayssiyaabee!

Issi uri he wode deˈanau ay oottana bessii? Ha wodiyan asay laamettanaadan oottiyay, qassi mata wode kumetta saˈan he laamiyaa ehaanay ‘Yihoowa eriyoogaa’ gidiyoogaa akeeka. Petiroogaadan, Geeshsha Maxaafaa suure eraa demmiyoogaaninne hegaa oosuwan peeshshiyoogan neenikka ‘xilloy deˈana’ alamiyan deˈanau hidootana danddayaasa. (2 PHe. 3:13) Yaatiyo gishshau, neeni Xoossaabaanne Yesuus Kiristtoosabaa eriyoogee merinaa deˈuwaa demmanau maaddiyo gishshau, he eraa demmanau ha injje wodiyaa goˈettanaadan minttettoos.—Yoh. 17:3

[Tohossa qofata]

[Sinttaa 9n deʼiya misiliyaa]

Neenikka ‘xilloy deˈana’ alamiyan deˈanau hidootana danddayaasa.—2 PHE. 3:13