Batamela Kgaufsi le Modimo

O re Nea Seriti ka go re Nea Tokologo ya Boikgethelo

2 DIKXOŠI 18:1-7

BATSWADI ba swanetše go beela bana ba bona mohlala o mobotse. Tutuetšo e botse ya batswadi e ka thuša ngwana go hlagolela dika tše di kgahlišago le go dira dikgetho tše bohlale bophelong. Ka manyami, batswadi ba bantši ba beela bana ba bona mohlala o mobe. Na bana ba bjalo ga ba na sebaka sa go atlega? Re hwetša karabo therešong e kgodišago e le ruri—Jehofa Modimo o neile yo mongwe le yo mongwe wa rena seriti ka go mo nea tokologo ya boikgethelo. Ela hloko mohlala wa Hiskia, bjalo ka ge o hwetšwa go 2 Dikxoši 18:1-7.

Hiskia e be e le “morwa wa Ahasi” kgoši ya Juda. (Temana 1) Ahasi o ile a etelela balata ba gagwe pele go hlanogeleng borapedi bjo bo sekilego bja Jehofa. Kgoši ye e kgopo e be e tšea karolo borapeding bja Baali le ditirelong tša bjona tša go dira dihlabelo ka batho. O ile a dira gore bo-mogolo’a Hiskia ba babedi goba o tee, ba bolawe. Ahasi o ile a dira gore mejako ya tempele e tswalelwe gomme “a itirêla dialetare dikhutlong ka moka tša Jerusalêma.” O ile “a rumola [Jehofa].” (2 Koronika 28:3, 24, 25) Ge e le gabotse, tatago Hiskia o be a le kgopo. Eupša na Hiskia o be a swanetše go fo dira diphošo tša go swana le tša tatagwe?

Ge a se na go hlatlama tatagwe sedulong sa bogoši, Hiskia kapejana o ile a bontšha gore o be a ka se itumelele go bopša ke mohlala o mobe wa tatagwe. Hiskia “ó dirile tše di kxahlišaxo Morêna.” (Temana 3) Hiskia o ile a bota Jehofa, gomme “mo xo maxoši ka moka a Juda, . . . xa xo’ e a swanaxo le Yêna.” (Temana 5) Ngwageng wa pele wa pušo ya gagwe, kgoši ya mofsa e ile ya thoma lesolo la go tsošološa borapedi bja therešo leo le ilego la lebiša go fedišweng ga mafelo a phagamego, moo medimo ya diswantšho ya boheitene e bego e rapelwa gona. Tempele e ile ya bulwa gape gomme borapedi bjo bo sekilego bja bušetšwa sekeng. (Temana 4; 2 Koronika 29:1-3, 27-31) Hiskia o ile “a xomarêla Morena . . . , Morêna ó be a na le yêna.”—Temana 6, 7.

Ke’ng seo se kgontšhitšego Hiskia go se latele mohlala o mobe wa tatagwe? Na e ka ba e le gore mmagwe, Abi—yo go sa tsebjego gakaalo ka yena—o ile a tutuetša morwa wa gagwe gabotse? Na mohlala o mobotse wa Jesaya, yo a thomilego modiro wa gagwe wa go porofeta pele ga ge Hiskia a ka belegwa, o ka ba o tutueditše morwa yo wa kgoši? * Beibele ga e bolele. Go sa šetšwe gore boemo ke bofe, seo re nago le kgonthe ya sona ke se: Hiskia o ile a kgetha go tšwela pele a phela bophelo bjo bo bego bo fapane kudu le bja tatagwe.

Mohlala wa Hiskia o kgothatša bao batswadi ba bona ba ba beetšego mohlala o kgopo. Dilo tša nakong e fetilego di ka se ke tša fetošwa; re ka se ke ra phumola dilo tše di kwešago bohloko tšeo di diregilego nakong e fetilego. Eupša diphihlelo tšeo ga se gore di ra gore re ka se atlege. Re ka dira dikgetho gona bjale tšeo di ka lebišago bokamosong bja katlego. Go swana le Hiskia, re ka kgetha go rata le go rapela Modimo wa therešo, Jehofa. Tsela e bjalo e ka feleletša ka go re tlišetša bophelo bjo bo kgotsofatšago gona bjale gomme ya re lebiša bophelong bjo bo sa felego lefaseng le lefsa la Modimo. (2 Petro 3:13; Kutollo 21:3, 4) Ruri re swanetše go leboga Modimo yo lerato yo a neilego yo mongwe le yo mongwe wa rena seriti ka go re nea mpho e bohlokwa kudu—tokologo ya boikgethelo!

[Mongwalo wa tlase]