Fuena Ku Huku

Oe Wetuhivilika Nepondolo Liokuliholovonena

2 REIS 18:1-7

OVOHE vena otyilinga tyokuavela ovana vavo ongeleka ongwa. Ovituwa oviwa vio vohe vipondola okukuatesako omona okukala novituwa viakolela, nokulinga omaholovono onondunge momuenyo. Anthi, ovohe ovanyingi vaavela ovana vavo ongeleka ombi. Okuti ovana ovo kavapondola vali okulinga etyi tyaviuka? Ekumbululo tulivasa motyili tyipameka, tyokuti Jeova Huku wetuhivilika, mokuaavela kese umwe puonthue epondolo liokuliholovonena. Tala etyi tyalingile Ezekia, ngetyi tyapopiwa mu 2 Reis 18:1-7.

Ezekia ankho “omona wa Akasi ohamba yo Judaa.” (Oversikulu 1) Akasi wahindilile ovanthu moutumini wae okuyekapo efendelo liasukuka lia Jeova. Ohamba oyo ondingavivi ankho ufenda Mbaale, kumwe noviso viayo viokuava ovilikutila viovanthu. Oe alo umwe vatumine okuipaa wike ine vamwe ponondenge mbae muene. Akasi wayeilile omapito ondyuo ya Huku, iya “atungu ono altale pala oe muene pukese evindi lio Jelusalei.” Oe “anumanesa Jeova.” (2 Crônicas 28:3, 24, 25) Tyayandyuluka nawa, okuti he ya Ezekia ankho ondingavivi unene. Mahi, okuti ankho Ezekia wesukisa okupitulula okuendela mononkhali mba he?

Etyi Ezekia apinga Akasi koutumini, liwa-liwa walekesa okuti oe ankho kahande okuhetekela ovituwa ovivi via he. Ezekia “watualako okulinga etyi tyaviuka komaiho a Jeova.” (Oversikulu 3) Ezekia wayumbile onthumbi mu Jeova, iya “kakuamonekele vali nawike ukahi ngae pokati ko nohamba ambuho mbo Judaa.” (Oversikulu 5) Menima liotete lioutumini wae, omukuendye oo omutumini, wahimbika ovilinga viokupindulapo efendelo liotyotyili. Iya ahanye omitala koupunda, kuna ankho ovanthu vafendela ovikahuku. Aikula ondyuo ya Huku, nokupindulapo efendelo liasukuka. (Oversikulu 4; 2 Crônicas 29:1-3, 27-31) Ezekia “watualako okukakatela mu Jeova . . . , iya Jeova alekesa okuti ukahi nae.”—Oversikulu 6 no 7.

Oityi tyakuatesileko Ezekia okuhalandula ovituwa ovivi via he? Okuti hamwe ina yae Abiya tuhei nawa, waavelele ongeleka ongwa omona wae? Okuti ovituwa oviwa via Isaia, wahimbikile ovilinga viae viokuula etyi Ezekia ehenetyitwe, viakuatesileko omukuendye oo omutumini? a Ombimbiliya kaityipopi. No ngotyo, etyi twii okuti: Ezekia wakoyelepo okulandula ondyila yelikalela unene no ya tate yae.

Ongeleka ya Ezekia ipameka kese umwe wekulila monkhalelo yepuiya, mokonda yovituwa ovivi vio vohe. Etyi tyalamba kapondola okupilululwa. Onthue katupondola okunyima omuihamo wetyi tyalamba. Anthi, katyilekesa okuti katupondola okulinga etyi tyaviuka. Tupondola okuholovona pahe etyi matyiketukalesa nombembwa komutwe. Nga Ezekia, tupondola okuholovona okukala nohole na Huku yotyotyili Jeova nokumufenda. Okulinga ngotyo, tyieta omuenyo omuwa pahe, nokutuala komuenyo uhapu mouye omupe wa Huku. (2 Pedro 3:13; Revelação [Apocalipse] 21:3, 4) Tuesukisa okupandula unene ngatyi Huku woluembia, wetuhivilika mokuavela kese umwe puonthue otyipuka otyiwa unene—epondolo liokuliholovonena!

[Onondaka Poutoi]