Ia Mafuta Atu i le Atua

Ua Foaʻi Mai e Ieova le Saʻolotoga e Filifili Ai

2 TUPU 18:1-7

E TATAU i mātua ona fai se faaaʻoaʻoga lelei mo a latou fanau. E aogā lea mo a latou fanau e atiaʻe ai uiga lelei ma faia ai filifiliga lelei i le olaga. Ae e faanoanoa ona e toʻatele mātua e lē o faia se faaaʻoaʻoga lelei mo fanau. Po o lona uiga la, o le a lē taulau nei fanau? E tatou te maua le tali i se upu moni e faalaeiau ai: Ua foaʻi mai e Ieova iā i tatou uma se meaalofa, o le saʻolotoga lea e filifili ai. Seʻi tatou iloilo le tulaga o Esekia i le 2 Tupu 18:1-7.

O Esekia o le “atalii o Aasa.” (Fuaiupu 1) Na tataʻi sesē e Aasa ona tagata mai le tapuaʻiga mamā a Ieova. Sa tapuaʻi o ia iā Paala, ma faia taulaga i tagata. E tusa ma le tasi pe e sili atu uso o Esekia na ia fasiotia. Na tapunia e Aasa faitotoʻa o le malumalu ma “faia mo ia lava o fata faitaulaga i itu uma o Ierusalema,” ma ua “faatigā ai iā Ieova.” (2 Nofoaiga a Tupu 28:3, 24, 25) Ioe, e uiga ese le leaga o le tamā o Esekia. Po o lona uiga, o le a mulimuli ai Esekia i mea leaga na faia e lona tamā?

Na nofoia e Esekia le nofoālii ina ua mavae atu Aasa, ma na vave ona faaalia e leʻi mulimuli Esekia i lana faaaʻoaʻoga leaga, ona na ‘⁠faia pea e Esekia mea ua tonu i le silafaga a Ieova.’ (Fuaiupu e 3) Na faatuatua Esekia iā Ieova ma “e leai foʻi se tasi e pei o ia i tupu uma o Iuta.” (Fuaiupu e 5) I le tausaga muamua o lana nofoaiga, na amata ai e lenei tupu talavou le galuega o le aveesea o mea maualuluga sa tapuaʻia ai tupua faapaupau. Na ia toe tatalaina le malumalu ma toe faafoʻisia le tapuaʻiga mamā. (Fuaiupu e 4; 2 Nofoaiga a Tupu 29:1-3, 27-31) “Ua pipii pea [Esekia] iā Ieova . . . , ma na faatasi Ieova iā te ia.”—Fuaiupu 6, 7.

Na faapefea ona lē mulimuli Esekia i le faaaʻoaʻoga leaga a lona tamā? E itiiti ni faamatalaga e uiga i lona tinā o Avi, ae atonu na telē se aafiaga lelei mai iā te ia. Na amata le auaunaga a Isaia a o leʻi fanau mai Esekia, o lea, atonu foʻi na iai se aafiaga lelei o lana faaaʻoaʻoga i lenei aloalii talavou. * E lē o taʻu maia i le Tusi Paia, ae pau le mea ua mautinoa, na filifili Esekia ia ese lona olaga mai i le olaga o lona tamā.

O le faaaʻoaʻoga a Esekia ua faalaeiau ai i latou uma e leʻi faia e o latou mātua se faaaʻoaʻoga lelei. E lē mafai ona suia pe aveesea mea faigatā na tutupu i le taimi ua teʻa. Ae e lē faapea ai o le a tatou lē taulau ona o na mea. E mafai ona tatou maua se lumanaʻi fiafia ona o filifiliga e tatou faia i le taimi nei. E mafai ona tatou filifili e pei o Esekia, ia alolofa ma tapuaʻi iā Ieova le Atua moni. E tatou te maua ai se olaga e faamalieina ma ola ai e faavavau i le lalolagi fou a le Atua. (2 Peteru 3:13; Faaaliga 21:3, 4) E tatau ona tatou faafetaia le Atua agaalofa, o lē ua faaeaina i tatou i le tuuina mai lea o se meaalofa tāua, o le saʻolotoga e filifili ai!

[Faaopoopoga i lalo]