Oni Mbedi Na Mbori

Ko Fu gu Ranirii Nga ga Siapai Furani

2 ABAKINDO 18:1-7

SI NAIDA avunguagude moi wene kpiapai fu awiriyo. Gu wene kpiapai nga ga avunguagude rengbe ka undo gude u sonosi wene asino na kini mangi agu adiaberã duna tatamana rogo gau raka yo. Ono tie, dungu avunguagude amaanga wene kpiapai fu awiriyo te. Ono ya mo gure nayugo gupai nga agu agude re arengbanga kadu niwene aboro te? Ani nagbia karagapai sa gu sanahe re rogo gupai yo nga rengo nga, Yekova nafu ranirii furani nga ga siapai. Oni bingo gupai nadu tipa Izikiya, a wa duhe nikekehe rogo 2 Abakindo 18:​1-7.

Izikiya angia “wiri Aza bakindo aYudo.” (Veresi 1) Aza asa kpoto gako aboro yo kusayo ti ndikidi irisombori. Gi gbegberẽ bakindo re aairiso Bara, kini fu aboro nimotumo fu Bara. Ko aimi awirina Izikiya nimotumo fu kungbo ambori. Aza akisi angbadimo ga Yekova yekaru “ki mbakadi abamotumo ni gako ti atukpu Yerusarema dunduko.” Ko ‘agara ga Yekova zinga kuriko.’ (2 Pekapai 28:3, 24, 25) Ba Izikiya angia gbegberẽ boro kisusi. Ono ya mo Izikiya adu wakina bako?

Ho Izikiya atona zogarago ni kuba bako, ko ayugu gupai nga, ga bako gbegberẽ kpiapai aasanga ko ko du nigbegberẽ boro te. Izikiya “ki nimangi gu pai naru aru bangiri Yekova.” (Veresi 3) Izikiya akido kuti Yekova, na “fuo ko bakindo adú nga ho dagba abakindo aYudo wa ko te.” (Veresi 5) Rogo gako bambata garã zogarago, gu paranga bakindo re aru kuari tipa ndikidi irisombori, ki kuadi tumbatumba arago dunduko, nga agu aba i anaairiso akpiahe rogoho. Ko azaki yekaru berewe, ki karaga ndikidi irisombori kubaha. (Veresi 4; 2 Pekapai 29:1-3, 27-31) Izikiya “aka kuti Yekova. . . . Yekova adu na ko kindi.”​—Veresi 6, 7.

Gine naundo Izikiya ka ko pekenga fuo ga bako gbegberẽ kpiapai ya? Ya mo nako nangia Abiya du naundo ko? Ya mo gu kpiapai nangia ga Yesaya du naundo ko, natona sunge ninebi mbata fu vungayo Izikiya? * Ziazia Kekeapai agumbanga ha wo te. Ono singia i naundo ko watadu wo te, gupai nga rengo nga: Izikiya adiberã nitiko ka manga gupai nadukia ti gu bako anaamangaha.

Gu kpiapai nga ga Izikiya nangarasa agu aboro nasono rogo gbegberẽ kporo mbiko avunguyo. Agu apai naima manga, ani arengbanga ka ariaha berewe te; ani arengbanga ka dia pa gu gbegberẽ apai kusayo berãrani yo namangi rani te. Ono agu apai re ayugongo gupai nga ka ani mangingo wenepai berewe te te. Ani rengbe arengba ka manga siapai awere si ki ye na ngbarago furani kumbatayo. Wakina Izikiya, ani nitirani rengbe ka siapai ka kpinyemu ndikidi Mbori nga Yekova na kini irisiko. Ka ani mangihe wo, ani raki wene raka araka awere na ki gbia nyenye unga rogo ga Mbori vovo zegino. (2 Petero 3:13; Yugoti 21:3, 4) Ani nafu tambuahe fu gaani Mbori mbiko ko fu gu ranirii nga ga siapai furani wa du ani nibasasa!

[Gu rukutu kekeapai du bandu kpewaraga yo]