Sulat Gikan sa Grenada

Usa ka Espesyal nga Adlaw Diha sa Baybayon

KON makadawat kag asaynment nga mahimong misyonaryo sa laing nasod, dili gayod mahubit ang imong bation nga kahinam. Samag gamayng bata nga nahingangha pag-ayo, ikaw maghanduraw kon unsa kahay kultura sa mga tawo didto, kon unsay hitsura sa lugar, ug kon unsay imong masinati sa imong pagsangyaw.

Sa dihang kami sa akong asawa giasayn sa Grenada, nga may mga 45 ka nindot kaayong baybayon, naghinamhinam mi nga makita kana. Wala madugay, nasinati ra gyod namo ang kalipay nga makaadto sa usa niana. Apan kami nalipay dili lang tungod sa kanindot sa dapit kondili sa mga tawo usab.

Dili ra kaayo layo ang among gibiyahe gikan sa among balay sa Grenada paingon sa Grand Anse Beach—apan puwerteng nindota ang among mga naagian! Kay palikoliko man ang dalan, napahimuslan namo pag-ayo ang pagtan-aw sa nindot nga talan-awon. Ang mga bungtod naputos sa lunhawng mga tanom. Kada liko sa among sakyanan, among makita ang mga bukid, kalasangan, busay, ug ang nindot nga talan-awon sa dagat. Dili ikatingala nga daghang turista gikan sa lainlaing nasod ang manganhi dinhi! Tungod sa kanindot sa talan-awon ang drayber angayng mag-amping nga dili malinga. Usahay ang dalan nga among maagian gamay kaayo ug matingala ka kon sa unsang paagi maigo ang duha ka sakyanan.

Nakaabot mi sa Convention Trade Center, sa Grand Anse Beach, nga daplin lang sa karsada. Dinhi, mga 600 ka Saksi ni Jehova ang malipayong nagtigom aron maminaw ug mga pakigpulong bahin sa Bibliya. Kini nga okasyon ilabinang halandomon sa magtiayong Lesley ug Daphne, nga nag-edad nag 70 kapin. Niining adlawa, si Lesley bawtismohan. Dugay nang naghinamhinam niana si Daphne, nga nabawtismohan ingong Saksi ni Jehova niadto pang 1958.

Alang sa mga Saksi, ang bawtismo—diin ang usa bug-os nga ituslob sa tubig—makahuloganon kaayo. Himoon kini human nga ang usa makabatog tukmang kahibalo sa Bibliya ug magpadapat sa iyang nakat-onan. Kini maoy usa ka publikong pasundayag nga siya nagpahinungod na sa iyang kaugalingon ngadto kang Jehova nga Diyos.

Ako ang giasayn nga mopakigpulong aron ipatin-aw ang giingon sa Bibliya bahin sa bawtismo. Sa hinapos sa pakigpulong, si Lesley, nga malipayon kaayo, mibarog uban sa duha  pa nga bawtismohanan. Siya nagsul-ob ug puti nga polo ug nagkorbata. Ako nangutana: “Ikaw ba naghinulsol na sa imong mga sala ug nagpahinungod na sa imong kaugalingon kang Jehova aron buhaton ang iyang kabubut-on?” Makita gayod ang ilang sinseridad ug debosyon sa dihang sila kinasingkasing nga mitubag ug “Oo!”

Nahibalo ko sa kaagi ni Lesley, mao nga nalipay ko pag-ayo nga siya magpabawtismo na. Sulod sa daghang katuigan, wala siya mosugot nga magtuon sa Bibliya. Unya siya ug ang iyang asawa nakaadto sa laing isla. Samtang atua didto, nagkasabot si Lesley ug Daphne nga mag-iyahayg simba. “Adto sa inyong simbahan, ug moadto pod ko sa amo,” matod pa ni Lesley kang Daphne.

Gihatod ni Lesley si Daphne sa Kingdom Hall ug dayon miadto siya sa simbahan sa Anglikano nga anaa ra sa duol. Human sa simba, gihapit ni Lesley ang iyang asawa sa Kingdom Hall. Didto giabiabi siya pag-ayo sa buotan ug mahigalaong mga tawo nga dili niya kaila. Natandog niana si Lesley. Sa ilang simbahan, wala man lang ganiy mitagad niya. “Di na gyod ko mobalik sa among simbahan,” giingnan ni Lesley si Daphne. “Walay bisan usa nga nakig-estorya kanako, bisan gani ang pari. Pagsulod nako hangtod sa akong paggawas, wala gyoy mitimbaya kanako.” Si Lesley wala na gyod mobalik sa ilang simbahan.

Human niana, si Lesley kugi nang nagtuon sa Bibliya. Ug niining higayona, andam na siyang magpabawtismo. Ang mga bawtismohanan nangadto sa baybayon, ug kami nagsunod kanila. Kay duol ra ang dagat, dili na kinahanglang maghimog baptism pool, sama sa ginahimo sa ubang mga kombensiyon sa mga Saksi ni Jehova. Dinhi igo ra ming motabok sa karsada.

Ang Grand Anse Beach maoy tulo ka kilometro nga puting baybayon ug kanunayng asul ang tubig niini. Ang mga turista nahibulong sa dihang ilang nakita ang among grupo diha sa baybayon, mga lalaki ug babaye nga desenteg sinina. Nag-ilis si Lesley ug nagsul-ob siyag T-shirt ug short. Handurawa ang kalipay ni Daphne nga human sa mga 50 ka tuig sukad siya nagpabawtismo, iyang nakita ang iyang bana nga nabawtismohan! Dili matukib ang kalipay ni Daphne. Bisan ang mga turista miduyog sa kalipay sa okasyon. Sila mipakpak pod sa dihang gibawtismohan ang matag kandidato.

Ang asul nga kalangitan, puting balas, ug ang paglapya-lapya sa mga balod niini nga baybayon nakahatag ug himaya sa Maglalalang. Apan kini ilabinang nakahatag ug himaya sa Diyos sa dihang dunay tulo nga gibawtismohan dinhi. Ang tanang presente niini nga okasyon malipayon kaayo. Espesyal gayod kini nga adlaw, ilabina kang Lesley ug Daphne.