Papila Leri Humaka eGrenada

Siku Leri A Hi Ri eRibuweni

LOKO wo tshuka u kuma xiavelo xo va murhumiwa etikweni rimbe, ntsako wa kona a wu nge wu ringanisi na nchumu. Ku fana ni n’wana la honolelaka swilo swo karhi hi ku hlamala, wa tivutisa leswaku vanhu va kona va njhani, swiyimo swa kona swi njhani naswona u va u yi langutele hi mahlo-ngati mintokoto leyi u nga ta yi kuma loko u ri ensin’wini.

Loko mina ni nsati wa mina hi averiwa ku ya tirha etikweni ra Grenada leri nga ni timbuwa to saseka ta kwalomu ka 45, a hi tivutisa leswaku ti njhani timbuwa ta kona. Ku nga ri khale a hi ta tiphina eka yin’wana ya tona, kambe vanhu hi vona lava a va ta hi tsakisa ngopfu ku nga ri dyambu ni magandlati.

Ribuwa ra Grand Anse ri le kusuhi ni laha hi tshamaka kona eGrenada naswona swa tsakisa ku famba hi movha endhawini yoleyo. Gondzo ra kona ra jikajika, kambe a ri endla leswaku hi vona tindhawu to saseka leti a hi nga ta pfuka hi tivonile. Switsunga swa kona i swa rihlaza. Hi hala tlhelo, a hi vona tintshava, makhwati ya rihlaza, maboboma ni lwandle ro saseka. A swi hlamarisi leswi vapfhumba vo huma emisaveni hinkwayo va endzelaka ndhawu leyi! Ndhawu leyi yi saseke ngopfu lerova muchayeri u fanele a va ni vuxiya-xiya leswaku a nga kavanyetiwi. Magondzo ya kona ma larile swinene naswona loko u famba eka wona wa tivutisa loko timovha timbirhi ti ta swi kota ku hundza hi nkarhi un’we handle ko chayisana.

Hi fike endhawini leyi ntsombano a wu ta khomeriwa eka yona leyi nga etlhelo ka Ribuwa ra Grand Anse. Swi nga si ya kwihi, Timbhoni ta Yehovha ta kwalomu ka 600 ti hlengeletanile leswaku ti ta tiphina hi xinakulobye ni ku dyondza Bibele swin’we. Siku rero a ri ri ra nkoka eka Lesley na Daphne, mpatswa lowu tekaneke lowu nga emalembeni ya va-70. Lesley a a ta khuvuriwa hi siku rero naswona Daphne a a ri langutele hi mahlo-ngati, tanihi leswi yena a a khuvuriwe hi 1958 leswaku a va Mbhoni ya Yehovha.

Ku khuvuriwa hi ku nyuperisiwa ematini swi vula swo tala eka Timbhoni. I goza leri munhu a ri tekaka loko a nghenise vutivi bya Bibele naswona a byi tirhisa evuton’wini byakwe. Hi nkarhi lowu, u va a swi kombisa erivaleni leswaku u tinyiketele eka Yehovha Xikwembu.

Hi mina loyi a ndzi fanele ndzi nyikela nkulumo, ndzi hlamusela leswi Matsalwa ma swi vulaka hi nkhuvulo. Loko nkulumo yi fika emakumu, Lesley swin’we ni vanhu vambirhi lava na vona a va ya eku khuvuriweni va suke va yima. A a ambale hembe yo basa leyi ayiniweke kahle ni  thayi naswona a a n’wayitela. Ndzi vutise xivutiso lexi nge: “Xana u hundzukile eswidyohweni swa wena kutani u tinyiketela eka Yehovha leswaku u endla ku rhandza ka yena?” Loko Lesley a hlamula swin’we ni lavan’wana hi rito leri twalaka va ku “Ina,” a swi twala leswaku nhlamulo ya vona yi huma embilwini.

Leswi a ndzi byi tiva vutomi bya Lesley, sweswo swi ndzi khumbile swinene. Se a ku ri malembe a tshike ku dyondza Bibele kukondza yena ni nsati wakwe va endzela exihlaleni xin’wana. Loko va ri kwalaho, va endle xiboho xa leswaku un’wana ni un’wana u ta ya ekerekeni yakwe. Lesley u byele Daphne a ku: “U ta ya ekerekeni ya wena, na mina ndzi ta ya eka ya mina.”

Lesley u hundze a siya Daphne eHolweni ya Mfumo ivi yena a ya ekerekeni ya Anglican leyi a yi ri endhawini yoleyo. Loko kereke yi huma, Lesley u tlhele a hundza a teka nsati wakwe eHolweni ya Mfumo. Loko a fika, u amukeriwe hi mandla mambirhi, hambileswi vanhu va kona a vo sungula ku n’wi vona. Sweswo swi n’wi khumbile swinene. Ekerekeni leyi a ye eka yona, vanhu va kona a va nga ri na mhaka na yena. Lesley u byele Daphne a ku: “A ndzi nge he tlheli ndzi wu veka nenge wa mina ekerekeni ya Anglican. Vanhu va kona a va nga ndzi tekeli enhlokweni, hambi ku ri mufundhisi wa kona. Ku hava la ndzi xeweteke loko ndzi nghena ni loko ndzi huma.” Endzhaku ka siku rero, a nga ha tlhelanga a wu veka nenge wakwe ekerekeni yoleyo.

Lesley u tlhele a sungula ku dyondza Rito ra Xikwembu naswona sweswi se a lunghekele ku ya khuvuriwa. Vanhu lava yaka eku khuvuriweni va kongome eribuweni naswona hi fambe na vona. Leswi lwandle a ri ri ekusuhi, a ku nga ri na xilaveko xo lunghiselela damu ro khuvulela eka rona hilaha swi endliwaka hakona emintsombanweni ya Timbhoni ta Yehovha. Ku ya kona a swo lava hi tsemakanya patu ntsena.

Nambu wa Grand Anse wu aname tikhilomitara tinharhu, wu ni sava ro basa naswona mati ya kona i ya wasi. Vapfhumba va hlamarile loko va hi vona hi nghena eribuweni ra lwandle hi ri ntlawa naswona vavanuna va ambale tihembe ni tithayi kasi vavasati va ambale tirhoko ni swiketi. Lesley u cincile kutani a ambala xikipa ni buruku ro koma. Anakanya ndlela leyi Daphne a titweke ha yona loko a vona nuna wakwe a khuvuriwa endzhaku ka malembe ya 50 yena a khuvuriwile. Dyambu a ri tlhavile, naswona a a nga tikoti hi ntsako. Hambi ku ri vapfhumba va tile eka xiendlakalo xexo xo tsakisa. Na vona va be mavoko loko munhu ha un’we a khuvuriwa.

Xibakabaka xa wasi, sava ro basa ni magandlati lama nga kona eribuweni a swi vangamisa Muvumbi wa swona. Lwandle rero ri ye ri n’wi vangamisa swinene loko vanhu lavanharhu va heta ku khuvuriwa ematini. A hi tsake ngopfu loko hi va vona va huma ematini. Leri a ku ri siku ro hlawuleka hakunene eka Lesley na Daphne.