Mga Magbabasa Nangutana . . .

Diin Kuhaa ni Cain ang Iyang Asawa?

▪ “Kon duha ra ang anak ni Adan ug Eva, nga mao si Cain ug si Abel, diin kuhaa ni Cain ang iyang asawa?” Kini nga pangutana sagad isukna sa mga kritiko sa Bibliya. Apan ang Bibliya nagtaganag mga detalye aron matubag kana.

Atong mabasa sa Genesis kapitulo 3 ug 4 ang mosunod nga impormasyon: (1) Si Eva ang “inahan sa tanang tawo nga buhi.” (2) Sukad nga natawo si Cain, milabay pa ang pipila ka panahon una nahitabo ang iyang paghalad nga wala dawata sa Diyos. (3) Sa dihang gihinginlan si Cain ug nahimong “usa ka latagaw ug kagiw,” siya nahadlok nga basin patyon siya ni ‘bisan kinsa nga makakaplag kaniya.’ (4) Ang Diyos nagbutang ug usa ka ilhanan aron panalipdan si Cain, nga nagpakitang ang mga igsoon ni Cain o ang iyang mga paryente lagmit magtinguha sa pagpatay kaniya. (5) “Human niadto,” si Cain nakigdulog sa iyang asawa “sa yuta sa Pagkakagiw.”—Genesis 3:20; 4:3, 12, 14-17.

Base niana nga impormasyon, makaingon kita nga ang asawa ni Cain kaliwat ni Eva, apan wala kita mahibalo sa petsa sa iyang pagkatawo. Ang Genesis 5:4 nagpakita nga sulod sa 930 ka tuig nga pagkinabuhi ni Adan, siya nakabaton ug “mga anak nga lalaki ug mga anak nga babaye.” Busa, ang asawa ni Cain posibleng anak ni Eva, o posible usab nga siya apo ni Adan ug Eva tungod kay human hinginli sa Diyos si Cain milabay pa ang taas nga panahon una siya naasawa ni Cain. Ang The Amplified Old Testament naghubit sa asawa ni Cain ingong “usa sa mga kaliwat ni Adan.”

Sumala sa pangagpas sa komentarista sa Bibliya sa ika-19ng siglo nga si Adam Clarke, gibutangan sa Diyos ug ilhanan si Cain tungod kay si Cain nahadlok sa daghang kaliwatan ni Adan nga naglungtad na nianang panahona—nga ang gidaghanon kanila “katumbas nag pipila ka baryo.”

Ang ubang tawo karon dili makadawat nga si Cain nakigminyo sa iyang igsoon o sa iyang pag-umangkon tungod kay sa ilang kultura gidili ang pag-unay o kaha sila nahadlok nga kana mopatunghag dili normal nga mga bata. Bisan pa niana, si F. LaGard Smith mikomento diha sa The Narrated Bible in Chronological Order nga posible gayong ang mga anak ni Adan ug Eva nagminyoay, apan ang ulahing henerasyon nag-isip na sa pag-unay nga dili dalawaton. Matikdi usab nga gilatid lamang diha sa balaod ang pagdili sa pagminyoay sa managparyente niadtong 1513 B.C.E., sa dihang gihatag sa Diyos kang Moises ang balaod sa nasod sa Israel.—Levitico 18:9, 17, 24.

Kita karon layo na kaayo sa kahingpitan sa atong unang mga ginikanan. Sa ilang panahon lagmit ang pagminyo sa managparyente wala pay daotang epekto sa anak. Dugang pa, ang bag-ong panukiduki, sama nianang gipatik sa Journal of Genetic Counseling, nagpakita nga ang pagminyo sa mga igtagsa dili sama ka grabeg epekto diha sa mga anak kon itandi sa gituohan sa kadaghanan. Busa, kana nga isyu dili problema sa panahon ni Adan o una pa sa panahon ni Noe. Makaingon gayod kita nga si Cain nakigminyo sa usa sa iyang mga paryente.