Karemdbã sogsgo . . .

Yɛ la a Kayẽ paam a pagã?

▪ “A Ãdem ne a Hawa sã n talla kom-dibli a yiibu, rat n yeel t’a Kayẽ ne a Abɛlle, yɛ la a Kayẽ paam a pagã?” Sẽn pa tẽed-b Biiblã wae n sokda woto, n dat n wilg tɩ Biiblã goam pa sɩd ye. La baasgo, Biiblã tõe n sõng-d lame tɩ d leok sok-kãngã.

D sã n karem Sɩngr sak a 3 ne a 4 soabã, d paamda kiba-kãensã: 1) A Hawa la ‘nin-vɩɩsã fãa ma.’ 2) A Kayẽ rogmã poore, yɩɩ kaoosg zugẽ la a sẽn wa n kõ Wẽnnaam maoong t’a pa reegã. 3) Wẽnnaam sẽn wa n kãab a Kayẽ t’a “na n lebga lalsa, n saad dũniyã zugã,” a Kayẽ yeelame tɩ rabeem n tar-a, bala a zoeta ‘ned na n wa yã-a,’ n kʋ-a. 4) Wẽnnaam ninga a Kayẽ bãnde, sẽn na yɩl tɩ ned sã n yã-a, bɩ a ra kʋ-a ye. Woto wilgdame tɩ wakat kãng tɩ b buudã neb ra zoe n waoogame n sek nina na wa n yã-a n kʋ. 5) A Kayẽ tɩ zĩnda “Nod tẽngã sẽn be Edɛn yaangã.” A bãnga a pagã t’a rɩk pʋga.—Sɩngre 3:20; 4:3, 12, 14-17.

Woto fãa kɩtame tɩ d tõe n yeel t’a Kayẽ pagã yɩ a Ãdem ne a Hawa biig wall b yagenga, baa d pa mi a rogmã wakate. Sɩngr 5:4 wilgda vẽeneg t’a Ãdem sẽn vɩɩmd yʋʋm 930 wã pʋgẽ, a “roga kom-dibli ne kom-pugli.” Yaa sɩd tɩ Biiblã pa wilgd a Kayẽ pagã sã n yɩ a Hawa biig tã-tã ye. La sẽn yaa Wẽnnaam sẽn kãab a Kayẽ wã poor la b yaool n wa gom a pagã yellã, wilgdame tɩ kaoosame, la tɩ tõe t’a pagã pʋd n yɩ a Ãdem ne a Hawa yagenga. Sɩd me, sebr a ye (The Amplified Old Testament) pʋgẽ, b yeelame bal t’a Kayẽ pagã yɩ “a Ãdem biig a ye wall a yagenga.”

Biibl-mit a Adam Clarke ra yeelame t’a Kayẽ sẽn yɛɛs tɩ ned na n wa kʋ-a, tɩ kɩt tɩ Wẽnnaam ning-a bãndã, wilgdame t’a Ãdem ra zoe n tara yagense, la baa yagen-tʋb-rakẽes menga, n sek b na “tug tẽnse.”

Rũndã-rũndã, zĩis kẽere, nebã tagsdame t’a Kayẽ pagã sã n yɩ a Ãdem biig wall a yagenga, pa zems ye. La naoor wʋsgo, yaa rog-m-migsã, wall b sẽn yɛɛsd kãadem a woto sẽn tõe n kɩt tɩ kambã wa tall zu-loees nins laafɩ wã wɛɛngẽ wã n kɩt tɩ sãnda tagsd woto. La sebr a ye (La Bible racontée en ordre chronologique [ãngil.]) pʋgẽ, rao yʋʋr sẽn boond t’a F. LaGard Smith yeela woto: “Baa kaoosg zugẽ b sẽn wa n gɩdg tɩ ned pa segd n kẽ kãadem ne a roagdã, yaa vẽeneg tɩ sɩngrẽ wã, a Ãdem kambã rɩgsa b pagbã b buudã pʋgẽ.” Sẽn paase, yɩta sõma tɩ d tẽeg tɩ sã n pa a Moiiz sẽn wa n deeg Wẽnnaam Tõogã yʋʋmd 1513 soabã n kõ Israɛll kambã, tɩ b yeel a pʋgẽ wã tɩ ned pa segd n kẽ kãadem ne a roagdã, kãadem a woto ra pa bũmb sẽn gɩdg ye.—Maankʋʋre 18:9, 17, 24.

D yaab a Ãdem ne a Hawa yel-wẽndã maaneg taa yʋʋm tusa masã. Dẽnd yaa vẽeneg t’a biisã sẽn sãamd tõnd keelmã to-to rũndã-rũndã wã wẽnem yɩɩda bãmb nengẽ wã hal zĩig sẽn zãre. Ned ra tõe n dɩka pag a buud pʋgẽ, n pa paam zu-loees nins rẽ sẽn wat ne rũndã-rũndã wã ye. Sẽn paase, vaeesg b sẽn maan tɩ nan pa kaoose, wala makre, b sẽn yiis a soab zʋrnall a ye (Journal of Genetic Counseling) pʋgẽ wã wilgame tɩ sã n yaa f ba bɩ f ma yao bɩ a kẽem biig la f rɩk n maan f pag wall f sɩda, kambã tõeeme n pa tall zu-loees wʋsg laafɩ wã wɛɛngẽ wa nebã sẽn tagsdã ye. Woto yĩnga, wõnda a Ãdem zãmaanã n tall n tãag sẽn deng a Nowe zãmaanã, kãadem a woto ra pa yell ne nebã ye. Dẽnd d tõe n yeelame t’a Kayẽ pagã yɩ a tão wall a Ãdem ne a Hawa yagenga.