Hūhū he Tau Tagata Totou ha Tautolu . . .

Moua e Kaino i Fe e Hoana Haana?

▪ “Kaeke ke ua e tama taane ha Atamu mo Eva, ko Kaino mo Apelu, hau i fe mogoia e hoana ha Kaino?” Pete fa hūhū he tau tagata tuhituhi e hūhū tā lagatau nei, kua foaki mooli he Tohi Tapu e tau tala matafeiga ma e tali mauokafua.

Ne foaki he Kenese veveheaga 3 mo e 4 e tau vala tala ne mui mai: (1) Ko Eva “ko e matua fifine a ia he tau tagata momoui oti kana.” (2) Fai vehā he magaaho ne fanau a Kaino mo e poa haana ne fakaheu he Atua. (3) Mole e vega kehe haana “mo tagata hekepefano mo tagata paea fano,” ne tupetupe a Kaino neke kelipopo ‘he taha a ia ka moua.’ (4) Ne fakatū he Atua e fakamailoga ke puipui aki a Kaino, ti fakakite ai na liga ko e lafu po ke falu magafaoa haana ni ne lali ke kelipopo a ia. (5) [“He mole ai,” NW], ne momohe a Kaino mo e hoana haana “ke he motu ko Nota.”—Kenese 3:20; 4:3, 12, 14-17.

Mai he talahauaga i luga, kua maeke ia tautolu ke fakahiku ko e hoana ha Kaino ko e hologa ha Eva ne nakai iloa e aho ne fanau. Ne talahau ia Kenese 5:4 he magahala ne 930 e tau tau moui ha Atamu, ‘ne fanau foki e ia e tau tama tane, mo e tau tama fifine.’ Mooli, ne nakai talahau fakatonu he Tohi Tapu ko e hoana ha Kaino ko e tama fifine ha Eva. Ha kua totoku e tama fifine nei he mole e vega kehe a Kaino, ne fakakite ai kua fai magaaho lahi ne mole ati liga ko ia taha he tau mokopuna fifine ha Atamu mo Eva. Ti, fakamaama he The Amplified Old Testament ko e hoana ha Kaino ko e “taha he tau hologa ha Atamu.”

Ne talahau tuahā he tagata fakahoko tala Tohi Tapu he senetenari ke hogofulumahiva aki ko Adam Clarke, ne fakatū he Atua e fakamailoga he matakutaku a Kaino ha kua fitā e tokologa e atuhau he tau hologa ha Atamu—ti maeke “ke moua ai e tau maaga loga.”

Ne mau e Kaino e mahakitaga haana po ke taha tama fifine he hologa ha Atamu puhala ne mau e tau tama taane po ke tau tama fifine ha Atamu nukua mailoga he falu kaufakalataha he vahā nei ko e mena nakai lata. Ne fa pihia ai ha kua fakataputapu he kaufakalataha po ke matakutaku neke nakai katoatoa e talagaaga he tama. Pete ia, ne talahau e F. LaGard Smith he The Narrated Bible in Chronological Order: “Tuga kua femauaki e tau tugaane mo e tau mahakitaga fakamua nei, pete he nakai lata ke he logonaaga he atuhau a mui kaeke ke taute pihia.” Ne mailoga lahi foki he magaaho ne moua e Mose e tau fakatufono he Atua ma e motu ha Isaraela he 1513 F.V.N. kua nakai fakaatā pauaki e tau magafaoa tata ke femomoheaki.—Levitika 18:9, 17, 24.

He vahā nei, kua totou afe e tau tau ne mamao mai a tautolu he mitaki katoatoa ne moua he tau matua fakamua ha tautolu. Ko e lauiaaga he tau puhala talaga mo e tupumaiaga he tino ne moua e tautolu kua liga nakai lauia ki a laua. Mua atu, ko e tau kumikumiaga foou, tuga ia ne tohia he Journal of Genetic Counseling, kua fakakite ko e tau matutakiaga he tau kasini fakamua kua tote e hagahagakelea he fanau e tau tama ne nakai katoatoa e talagaaga ke he mena ne fa talitonu ki ai. Maama ai, ko e tau matakupu pihia kua nakai manamanatu lahi ki ai he vahā ha Atamu po ke fakamua atu foki ato hoko e vahā ha Noa. Ti maeke ia tautolu mogoia ke fakahiku ko e hoana ha Kaino ko e taha fifine mai he tau faoa haana.