Magsalig kay Jehova kay Buligan Ka Gid Niya

Panugiron ni Edmund Schmidt

Nadumduman ko ini nga laygay antes ako mag-atubang sa isa ka korte sa New York sang Oktubre 1943. Sang mag-25 anyos ako, mga apat ka tuig na ako nga napriso bangod sa Cristianong neutralidad. Pareho sang mga sumulunod ni Jesus, determinado ako nga “tumanon ang Dios subong manuggahom sa baylo sang mga tawo.” (Binuhatan 5:29) Pero antes sini, isugid ko anay kon ngaa malig-on gid ang akon pagsalig sa Dios.

NATAWO ako sang Abril 23, 1922, sa Cleveland, Ohio, U.S.A., sa amon apartment sa ibabaw sang panaderya ni Tatay. Apat ka bulan sang ulihi, ang akon amay nga si Edmund nagtambong sa kombension sang mga Estudyante sang Biblia (ang tawag sadto sa mga Saksi ni Jehova) sa Cedar Point, malapit sa Sandusky, nga mga 160 kilometros halin sa amon ginaistaran.

Sa amo nga kombension, ang mga nagtambong ginsugo nga “ibantala, ibantala, ibantala ang Hari [sang Dios] kag ang iya ginharian.” Pagka-Domingo, nag-upod si Tatay sa sini nga hilikuton. Padayon niya ini nga ginhimo sa sulod sang 66 ka tuig, asta nga napatay sia sang Hulyo 4, 1988. Ang akon iloy nga si Mary napatay man nga matutom sa Dios sang 1981.

Nagbuylog Ako sa Akon mga Ginikanan

Ang amon pamilya nagatambong sa kongregasyon sa Cleveland nga Polaco ang lenguahe. Kon Sabado sang hapon, kami nga mga bata nagaupod sa mga may edad na sa pagwali sang maayong balita sa mga balay. Kon Domingo naman, ang amon mga ginikanan nagapamati sa isa ka pamulongpulong sa Biblia sa mayor nga awditoryum sang amon tilipunan. Kami naman nga mga 30 ka kabataan ginatudluan sang isa ka eksperiensiado nga manunudlo sang Biblia sa bulig sang libro nga The Harp of God. * Sang ulihi, pati ako nagtudlo man sing Biblia sa iban, kag maayo ang resulta sini.

Sang Hulyo 1931, ang amon pamilya upod sa akon manghod nga si Frank, nagtambong sa isa pa ka kombension sang mga Estudyante sang Biblia sa Columbus, nga mga 160 kilometros pa bagatnan. Sa sini nga kombension, malipayon nga ginbaton sang mga Estudyante sang Biblia ang ngalan halin sa Biblia nga Mga Saksi ni Jehova. (Isaias 43:10-12) Nag-upod ako sa mga nagawali,  kag nag-agda sa mga tawo nga mamati sa pamulongpulong ni J. F. Rutherford, nga amo sadto ang nagapanguna sa hilikuton sang mga Saksi ni Jehova. Sa sulod sang 79 ka tuig sugod sadto, gingamit ko ang akon kabuhi sa pag-alagad kay Jehova nga Dios kag sa iya katawhan.

Positibo nga mga Resulta sa Pihak sang Mabudlay nga mga Tion

Sang 1933, naeksperiensiahan sang bilog nga kalibutan ang Great Depression (pagsarurot sang ekonomiya). Sa Estados Unidos, sobra sa 15 milyones ka tawo ukon mga 25 porsiento sang mga nagaobra ang nadulaan sing trabaho. Nagkalaputo ang mga siudad, kag wala sing mabulig ang gobierno sa mga tigulang kag mga imol. Pero, nagbuligay ang Cristianong mga kauturan. Kon Domingo, ginadal-an namon sing tinapay halin sa panaderya ang mga kauturan sa amon tilipunan. Kon mabayaran na ni Tatay ang tanan nga balayran kada tapos bulan, ginapadala niya ang sobra nga kuarta sa headquarters sang mga Saksi ni Jehova sa Brooklyn, New York. Nahibaluan niya nga makabulig ini sa pag-imprinta sang mga literatura parte sa Biblia.

Sadto, daku gid ang papel sang radyo sa amon pagwali. Mabatian sa sobra sa 400 ka estasyon ang parte sa Biblia nga mga pamulongpulong sa amon kombension. Sang dekada 1930, ang mga Saksi naghimo man sing mga phonograph kag mga rekord sa imprintahan sa Brooklyn. Amo ini ang ginagamit namon sa pagwali kag ginareport namon kon pila ka beses namon ginpatokar ang mga pamulongpulong parte sa Biblia sa mga indi-Saksi, kag kon pila ang namati.

Naggahom sa Germany si Adolf Hitler kag ang mga Nazi sang 1933. Madamo nga Saksi ni Jehova didto ang mapintas nga ginhingabot bangod sa ila Cristianong neutralidad. (Juan 15:19; 17:14) Ginpriso sila ukon ginpadala sa mga kampo konsentrasyon bangod indi sila mag-entra sa pulitika ukon magsaludo kay Hitler. May ginsentensiahan sing kamatayon; ang iban ginpatrabaho sing todo asta mapatay. Bangod sa pagpamintas sa ila, madamo ang napatay wala madugay pagkatapos sila ginpagua. Pero wala mahibaluan sang kalabanan nga ginapintasan man ang mga Saksi ni Jehova sa iban nga lugar, pati sa Estados Unidos.

Sang 1940, nagtambong kami sa kombension sa Detroit, Michigan. Sang Hulyo 28, ginbawtismuhan ako didto bilang simbulo sang akon dedikasyon kay Jehova nga Dios. Isa ka bulan antes sini, ang Korte Suprema sang Estados Unidos nagsiling nga supak sa kasuguan ang indi pagsaludo sa bandera. Ang maglapas, pahalinon sa eskwelahan. Ano ang ginhimo sang mga Saksi? Madamo sa ila ang naghimo sang ila kaugalingon nga mga eskwelahan para sa ila kabataan. Gintawag nila ini nga Kingdom Schools.

Sang Septiembre 1939, nagsugod sa Europa ang Bug-os Kalibutan nga Inaway II, kag ang kinagamo kag pagsuporta sang mga pungsod sa  inaway naglapnag sa bilog nga Estados Unidos. Ang pamatan-on nga mga Saksi gingamo kag ginbakol sang mga pamatan-on kag mga adulto nga wala makaintiende sa amon panindugan. Ginreport nga sang 1940 asta 1944, ang mga Saksi ni Jehova sa Estados Unidos nakaeksperiensia sing sobra sa 2,500 ka pagpamintas sang akig nga mga grupo. Nagdugang pa ini sang ginsalakay sang mga Hapones ang Pearl Harbor sang Disiembre 7, 1941. Pila ka semana antes sini, nagpayunir ako, ang tawag sa full-time nga mga ministro sang mga Saksi ni Jehova. Nagtipon ako sing kuarta kag nagbakal sing 7 metros nga house trailer, kag ang pila sa amon nagsaylo sa Louisiana para didto magpayunir.

Paghingabot sa mga Teritoryo sa Bagatnan

Gintugutan kami sang mga pumuluyo nga i-parking ang amon trailer sa talamnan sang kahoy nga mga pecan malapit sa siudad sang Jeanerette. Isa ka Sabado, nagwali kami sa mga kalye, pero ginpadakop kami sang hepe sang pulis sa iya mga tinawo kag ginpriso kami sa city hall. Sa gua, may nagabantay nga akig nga grupo sang mga 200 ka tawo. Ginpagua kami sang pulis kag wala ginproteksionan. Maayo lang kay naghawa ang grupo kag ginpaagi nila kami. Pagkadason nga adlaw, nagkadto kami sa Baton Rouge, nga isa ka daku nga siudad malapit sa amon, para isugid sa mga Saksi didto ang natabo.

Pagpauli namon, may mensahe nga natapik sa puertahan sang amon trailer: “Palihug, kadtui ako sa oil camp.” May ngalan ini nga “E. M. Vaughn.” Nakita namon si Mr. Vaughn, kag gin-agda niya kami nga magkaon upod sa ila nga mag-asawa. Suno sa iya, sia kag ang iya mga tinawo ato didto sa grupo sang Sabado, kag kon may nag-atake sa amon, apinan niya kami. Ginpasalamatan gid namon ang iya pagpabakod kag suporta.

Pagkadason nga adlaw, gin-aresto kami sang armado nga mga sheriff kag ginpanguha ang amon mga balasahon. Ginkuha nila ang mga yabi sang akon trailer kag ginbartolina ako sing 17 ka adlaw kag halos wala ginpakaon. Nagtinguha si Mr. Vaughn nga buligan kami, pero halos wala sia sing nahimo. Sang ginpriso kami, ginkawatan kami sang akig nga grupo kag ginpanunog ang amon pagkabutang, pati ang trailer. Pero ginahanda lang gali ako ni Jehova para sa masunod nga matabo.

Ginpriso sa Aminhan

Isa ka bulan pagkatapos nga nakabalik ako sa aminhan, nangin espesyal payunir ako sa Olean, New York, upod sa iban pa nga Saksi. Sang didto ako, ginsugo ako sang gobierno nga magparehistro para mangin soldado, kag gindeklarar ako nga nagapamatok bangod sa konsiensia. Sang makapasar ako sa medical exam, ang akon papeles gintatakan sing “Kandidato sa Akademya nga Nagahanas Para Mangin Soldado.”

Mga isa pa ka tuig nga nakapadayon ako sa pagpayunir. Pero sang 1943, bangod sige ang akon pagwali kag wala ako magreport para mangin soldado, gindakop ako sang FBI kag ginpareport sa hukmanan sang pungsod sa Syracuse, New York, pagkadason nga semana. Ginpasakaan ako sing kaso, kag ginbista ako duha ka adlaw sang ulihi.

Sa amon Cristiano nga mga pagtilipon, ginatudluan ang pamatan-on nga mga Saksi kon paano magdepensa sang kinamatarong sa korte kag kon ano ang dapat nga paggawi didto. Gani, ako ang nagrepresentar sang akon kaugalingon sa korte. Nadumduman ko gid ang laygay nga ginsambit ko sa umpisa. Ang iban nga prosecutor nagsiling pa gani nga mas nahibaluan sang mga Saksi ang kasuguan sangsa ila! Pero nagdesisyon ang jury nga guilty ako. Sang ginpamangkot ako sang hukom kon may ihambal pa ako, nagsabat ako, “Subong, ang pungsod ginabista sa atubang sang Dios bangod sa pagtratar sini sa mga nagaalagad sa iya.”

Ginsentensiahan ako nga mapriso sing apat ka tuig sa Chillicothe, Ohio. Gin-asayn ako subong sekretaryo sang isa ka opisyal sang prisuhan. Pagligad sang pila ka semana, may imbestigador halin sa Washington, D.C., nga nagkadto sa amon opisina kag nagsiling nga ginaimbestigahan nila si Hayden Covington. Sia ang abogado  sang mga Saksi ni Jehova kag kilala subong isa sa pinakamaayo nga abogado sa Amerika.

Ginpangayo sang imbestigador ang kompleto nga papeles sang duha ka priso nga sanday Danny Hurtado kag Edmund Schmidt. “Tayming ka gid,” siling sang akon superbisor, “ari si Mr. Schmidt.” Sekreto tani ang misyon sang imbestigador, pero narealisar niya nga nahibaluan na namon ini. Gani gin-asayn ako sa kusina.

Pagpayunir, Bethel, kag Pagpangasawa

Sang Septiembre 26, 1946, ginhatagan ako sing parol, kag nagpadayon ako sa pagpayunir sa Highland Park nga Kongregasyon sa California. Sang Septiembre 1948, nalab-ot ko gid man ang madugay ko na nga handum. Gin-agda ako nga mangin panadero sa headquarters (Bethel) sa Brooklyn, diin ginahimo ang mga literatura sa Biblia nga ginagamit namon sa pagwali sa bilog nga kalibutan. Gin-untatan ko dayon ang akon obra subong panadero sa isa ka restawran sa Glendale kag nagkadto sa Bethel.

Pito ka tuig sang ulihi, sang 1955, ang pila ka internasyonal nga kombension hiwaton sa Europa. Ginbuligan ako sang akon pamilya para makatambong. Nalipay gid ako sa mga kombension sa London, Paris, Roma, kag labi na gid sa Nuremberg, Germany, diin sobra sa 107,000 ang nagtambong sa isa ka daku nga istadyum nga gingamit sadto ni Hitler para ipabugal ang iya tropa. Ang pila sa mga tumalambong amo ang mga Saksi nga siling ni Hitler ubuson niya pamatay. Makalilipay gid nga makaupod sila!

Nakilala ko didto ang isa ka hoben nga Aleman nga Saksi nga si Brigitte Gerwien, kag nahulog ang akon buot sa iya. Wala pa isa ka tuig, nagpakasal kami kag nagpauli sa Glendale kag nag-istar malapit sa akon mga ginikanan. Ang amon kamagulangan nga si Tom, natawo sang 1957, ang ikaduha nga si Don, sang 1958, kag ang ikatlo nga si Sabena, sang 1960.

Malipayon Gid nga Kabuhi

Ginapamangkot ako sang iban kon bala ginhinulsulan ko ang tion nga ginpintasan ako sang akig nga mga grupo kag napriso bangod sa pag-alagad sa Dios. Sa akon bahin, ginapasalamatan ko gid kay Jehova nga Dios ang pribilehiyo nga maalagad sia upod sa madamo pa nga matutom man sa iya. Nagalaum ako nga ang akon mga eksperiensia makapabakod man sa iban nga mangin suod sa Dios kag indi magbiya sa iya.

Madamo nga alagad sang Dios ang nag-antos sing tuman para alagdon sia. Pero indi bala nga amo gid sini ang mapaabot naton? “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man,” siling sang Biblia. (2 Timoteo 3:12) Napamatud-an ko nga matuod ang ginasiling sang Salmo 34:19: “Madamu ang kapipit-an sang matarung; apang ang GINOO nagaluwas sa iya sa sini tanan sa ila”!

[Nota]

[Retrato sa pahina 27]

Pagwali sa Louisiana sang dekada 1940

[Retrato sa pahina 29]

Sang panadero ako sa headquarters

[Retrato sa pahina 29]

Upod sa akon asawa nga si Brigitte