Paglilingkod sa Panahon nin Makangangalas na Paghiwas

Isinaysay ni Harley Harris

Setyembre 2, 1950 kaidto sa Kennett, Missouri, E.U.A. Nasa pansirkitong asamblea kami asin napapalibotan nin mga tawong anggot. Ipinadara kan alkalde an National Guard tanganing protehiran kami sa depisil kontrolon na mga tawong idto. Nagrilinya sa tinampo an mga soldados na may mga kapot na riple asin bayoneta. Mantang iniinsulto, nagsakay kami sa samong mga auto asin nagpasiring sa Cape Girardeau, Missouri, para sa natatadang mga sesyon kan asamblea. Duman ako nabautismohan sa edad na 14. Alagad ieestorya ko nguna sa saindo kun paano ako nagin lingkod ni Jehova sa panahon na ini nin grabeng kariribokan.

KAN enot na mga taon kan dekada nin 1930, an sakong lolo asin lola saka an saindang walong aki may nadangog na mga rekording kan mga pahayag ni Tugang na Rutherford asin nakombensir na nanompongan na ninda an katotoohan. An sakong mga magurang, si Bay asin Mildred Harris, nabautismohan kan 1935 sa kombension sa Washington, D.C. Ogmahon nanggad sinda na magin kabtang kan “dakulang kaburunyogan,” o “dakulang kadaklan,” na ipinamidbid pa sana sa kombension na iyan!—Kap. 7:9, 14; King James Version.

Namundag ako kan suminunod na taon. Asin pakalihis nin sarong taon, buminalyo an sakong mga magurang sa sarong teritoryo sa Mississippi na mayong Saksi. Mantang yaon kami duman, dai mi lamang naeksperyensiahan na songkoon nin nagbibiaheng paraataman. An samong pamilya nakikikomunikar sa Bethel paagi sa surat asin nag-aatender sa mga asamblea, asin sa laog nin sarong peryodo nin panahon, sa paaging iyan mi sana nakakaasosyar an mga tugang.

Pagtagal sa Ibong nin Persekusyon

Durante kan Guerra Mundial II, grabe an nagin pagpersegir sa Mga Saksi ni Jehova huli sa saindang pagigin neutral. Buminalyo kami sa Mountain Home, Arkansas. Sarong aldaw, kami ni Tatay naghuhulit sa tinampo. Biglang inagaw nin sarong lalaki ki Tatay an mga magasin, sinabritan iyan, asin tolos-tolos na sinolo iyan. Inapod nia kaming matalaw huling dai kami nakikiguerra. Huling singko anyos pa sana ako, naghibi ako. Si Tatay dai nagtaram nin ano man asin kalmado sana niang hineling an lalaki sagkod na maghale ini.

May marahay na mga tawo man na maboot sa samo. Sa sarong pangyayari, kan palibotan kami sa samong auto nin mga tawong anggot, nag-agi an piskal kan lugar na idto. “Ano an nangyayari digdi?” an ihinapot nia. Sarong lalaki an nagsimbag, “An mga Saksi ni Jehova na ini dai  makikipaglaban para sa saindang nasyon!” Sa puntong iyan, tuminungtong an piskal sa may gilid kan samong auto asin kuminurahaw: “Nakipaglaban ako kan Guerra Mundial I, asin makikipaglaban man ako ngonyan! Pabayaan nindong maghale an mga tawong ini. Mayo sindang ginigibong maraot sa siisay man!” An mga tawo toninong na nagsuruwayan. Pinahalagahan mi nanggad an marahay na mga tawong idto na nagin maboot sa samo!—Gibo 27:3.

Napakosog Kami kan mga Kombension

Nakatabang nanggad sa samo an kombension sa St. Louis, Missouri, kan 1941. Segun sa sarong pagkarkulo, labing 115,000 an nag-atender. Dakolon an nabautismohan, 3,903! Malinaw pa sa isip ko an pahayag ni Tugang na Rutherford na may temang “Mga Aki kan Hade.” Ipinanongod nia sa samo na mga hoben an pahayag na iyan, asin gabos kami nag-ako nin kopya kan magayon na asul na librong Children. An kombension na ini nagpakosog sa sako na maatubang an nangyari kan suminunod na taon, an taon na mapoon na akong mag-eskuela sa elementarya. Pinahale ako asin an mga pinsan ko sa eskuelahan huli sa dai pagsaludo sa bandera. Aroaldaw kaming nagpapaeskuelahan tanganing aramon kun baga nagbago na an saboot kan mga direktor kan eskuelahan. Dakol na aga kaming naglalakaw sa mga kakahoyan pasiring sa eskuelahan, alagad papapulion man sana palan kami. Minsan siring, para sa sako iyan an samong paagi na ipaheling an kaimbodan mi sa Kahadean nin Dios.

Pero, dai naghaloy, an Korte Suprema kan Estados Unidos nagdesisyon na dai dapat ipirit an pagsaludo sa bandera. Sa katapustapusi, nakaeskuela man giraray kami. Mabooton an maestro asin tinogotan nia kaming makasabay sa ibang mga estudyante sa leksion. Iginalang man kami kan samong mga kaeskuela.

Nagigirumdoman ko man an kombension sa Cleveland, Ohio, kan 1942, na duman ipinahayag ni Tugang na Nathan H. Knorr an diskursong “Katoninongan—Makakapagpadagos daw Iyan?” An pag-analisar na ini sa Kapahayagan kapitulo 17 nagpaparisa na magkakaigwa nin peryodo nin katoninongan pagkatapos kan Guerra Mundial II. Sa siring, inantisipar an orog na pagpahiwas. Bilang pag-andam para sa siring na pagpahiwas, pinonan an Paadalan sa Gilead kan 1943. Dai ko kaidto naisip na magkakaigwa iyan nin epekto sa buhay ko. Nagkaigwa talaga nin katoninongan pagkatapos kan guerra asin nainaan an persekusyon. Minsan siring, kan magpoon an Guerra sa Korea kan 1950, biglang nagkaigwa giraray nin pagtumang sa samong paghuhulit, arog kan ilinadawan sa kapinonan.

Pagkaigwa nin Orog na Kabtang sa Paghiwas

Kan 1954, naggradwar ako sa haiskul, asin pakalihis nin sarong bulan, nagpayunir ako. Pagkatapos maglingkod sa Kennett, Missouri, na duman pinalibotan kami nin mga tawong anggot kan 1950, inimbitaran ako sa Bethel kan Marso 1955. An Times Square, na nasa tahaw kan Siudad nin Nueva York, kabtang kan teritoryo kan kongregasyon na duman ako iinasignar. Laen na marhay ini sa buhay sa probinsia! Nakua ko an atension kan sibot na mga taga Nueva York paagi sa pagbukas kan magasin sa sarong artikulong nakakapukaw sa isip asin sa pagsabi, “Ihinapot na daw nindo ini sa saindong sadiri?” Dakol an nag-ako kan mga magasin.

An saro sa mga gustong-gusto ko sa Bethel iyo an pang-agang pagsamba, na pinangengenotan ni Tugang na Knorr. Malinaw nanggad niang ikinakapaliwanag an mga teksto sa Biblia asin ikinakatao sa samo an praktikal na aplikasyon kaiyan! Siring sa sarong ama, kinakaolay nia kaming mga hoben na soltero asin parate siang nagtatao nin marahay na hatol kun paano tatrataron an mga bakong kasekso.

Kan 1960, nagdesisyon akong mag-agom. Ipinaaram ko sa Bethel paagi sa surat na mahale ako pagkatapos nin 30 aldaw, alagad mayo akong naresibing simbag. Pagkatapos nin 30 aldaw, dawa nasusupog nanggad ako, kinosogan ko an sakong boot na maghapot manongod sa paghale ko. Si Tugang na Robert Wallen an nakasimbag kan telepono asin dinumanan nia ako sa pinagtatrabahohan ko. Hinapot nia ako kun ano an masasabi ko dapit sa pagigin espesyal payunir o paraataman sa sirkito. “Pero Bob,” an simbag ko, “24 anyos pa sana ako, asin mayo ako nin eksperyensia.”

Paglilingkod Bilang Paraataman sa Sirkito

Paglaog ko sa sakong kuarto kan bangging idto, may naheling akong dakulang sobre. Yaon dian an  aplikasyon para sa pagigin espesyal payunir asin an saro para sa pagigin paraataman sa sirkito. Waw! Garo ako madismayo sa pagkabigla! Ibinilang kong dakulang pribilehio na maglingkod sa sakong mga tugang bilang paraataman sa sirkito sa timog-solnopan na Missouri asin sirangan na Kansas. Minsan siring, bago maghale sa Bethel, nag-atender ako sa sarong miting para sa nagbibiaheng mga paraataman. Bilang kongklusyon, si Tugang na Knorr nagsabi: “An saindong pagigin paraataman sa sirkito o distrito dai nangangahulogan na mas dakol an aram nindo kisa sa mga tugang na dinadalaw nindo. An nagkapira mas eksperyensiado nanggad kisa sa saindo. Alagad mayo sinda sa kamugtakan na magkaigwa kan mga pribilehio nindo. Dakol an manonodan nindo sa sainda.”

Nagin totoo nanggad iyan! Marahayon na halimbawa si Tugang na Fred Molohan asin an saiyang agom kaiba kan tugang niang si Charley na taga Parsons, Kansas. Nanodan ninda an katotoohan kaidto pang enot na mga taon kan dekada nin 1900. Nakakaogma nanggad na madangog an mga nagin eksperyensia ninda bago pa ngani ako mamundag! An saro pa iyo si John Wristen, sarong maboot na may edad nang tugang na taga Joplin, Missouri, na nagpayunir sa laog nin dakol na dekada. An namomotan na mga tugang na ini may hararom na paggalang sa teokratikong areglo. Ipinamate ninda sa sako na pinapahalagahan ninda ako bilang saindang paraataman sa sirkito—dawa hoben pa ako.

Kan 1962, nagpakasal kami ni Cloris Knoche, sarong bibong payunir na pula an buhok. Nagpadagos ako sa pagigin paraataman sa sirkito kaiba si Cloris. Kun nagdadagos kami sa harong kan mga tugang, mas namimidbid mi sinda. Nadadagka mi an mga hoben na maglaog sa pambilog na panahon na paglilingkod. An siring na pagdagka maogmang inako kan duwang tin-edyer sa sirkito—si Jay Kosinski asin JoAnn Kresyman. Paagi sa paglilingkod kaiba ninda asin pag-estorya sa sainda kan kagayagayahan sa pagsasakripisyo, namotibar sinda na magkaigwa nin mga pasohan. Si JoAnn nagin espesyal payunir, asin si Jay naglingkod sa Bethel. Kan huri, sinda nagkaagoman, asin ngonyan mga 30 taon na sinda sa gibohon sa sirkito.

Pagmimisyonero

Kan 1966, hinapot kami ni Tugang na Knorr kun interesado kaming maglingkod sa ibang nasyon. “Naoogma kami kun haen kami ngonyan,” an simbag mi, “alagad kun igwa nin pangangaipo sa ibang lugar, andam kami.” Pakalihis nin sarong semana, inimbitaran kami sa Paadalan sa Gilead. Nakakaogma nanggad na makabalik sa Bethel mantang nasa paadalan asin makaibanan an dakol sa mga tawong namotan asin iginalang ko! Nagin katood mi man an mga kaklase mi, na maimbod na naglilingkod sagkod ngonyan.

Idinestino kami ni Cloris sa Ecuador sa Amerika del Sur, kaiba si Dennis asin Edwina Crist, Ana Rodriguez, saka Delia Sanchez. An mag-agom na Crist naglingkod sa kabiserang siudad na Quito. Arog mi, si Ana asin Delia idinestino man sa Cuenca, an ikatolong pinakadakulang siudad sa Ecuador. May duwang probinsia na kaiba sa teritoryo. Sa sala kan harong mi nagpoon an enot na kongregasyon sa Cuenca, kaming apat kaiba an duwa pa. Iniisip mi kaidto kun paano mi nanggad mahuhulitan an bilog na teritoryo.

 Kadakol nin simbahan sa Cuenca, asin sa inaapod na mga aldaw na banal, an siudad napapano nin relihiosong mga prosisyon. Pero, an mga tawo sa Cuenca kadakol nin hapot. Halimbawa, kan enot kong makaolay si Mario Polo, sarong kampeon na siklista sa Cuenca, nabigla ako sa hapot nia, “Siisay an patotot na sinambit sa libro nin Kapahayagan?”

Sarong banggi, si Mario haditon na nagduman sa samong harong. Sarong ebanghelikong pastor an nagtao sa saiya nin babasahon na may magabat na mga akusasyon sa Mga Saksi ni Jehova. Nangatanosan ako na an inaakusaran maninigong togotan na idepensa an saiyang sadiri. Kaya kan suminunod na aldaw, ako asin an pastor inimbitaran ni Mario sa saiyang harong tanganing simbagon an mga akusasyon. Sa pag-orolay na iyan, isinuherir ko na magkonsentrar kami sa Trinidad. Kan basahon kan pastoran Juan 1:1, ipinaliwanag mismo ni Mario kun ano an pagkakalaen kan “an Dios” asin “sarong dios” sa lenguaheng Griego. Asin arog kaiyan an nangyari sa gabos na teksto sa Biblia na sinambit. Siempre, naghale an pastor na dai ikinadepensa an Trinidad. Nakakombensir ini ki Mario asin sa saiyang agom na nasa samo an katotoohan, asin sinda nagin matibay na mga paradepensa kan mga katokdoan sa Biblia. Nakakagayagaya nanggad na maheling an pagdakol kan mga kongregasyon sa siudad nin Cuenca sagkod na magin 33 iyan, asin sagkod na magin 63 an total kaiyan sa mahiwas na teritoryo na duman kami enot na idinestino—makangangalas na paghiwas nanggad!

Naheling Ko an Paghiwas Mantang Nasa Sangang Opisina

Kan 1970, inapod ako sa sangang opisina sa Guayaquil kaiba si Al Schullo. Inasikaso mi an gibohon sa sangang opisina. Si Joe Sekerak part-time na nag-iimpake nin mga literatura para sa 46 na kongregasyon sa bilog na nasyon. Sa laog nin pirang panahon, si Cloris nagmimisyonero sa langtad mantang ako naglilingkod sa Bethel. Natabangan nia an 55 katawo na magpabautismo, na sa parate tolo sagkod lima an inaadalan nia sa Biblia na nababautismohan sa sarong asamblea.

Halimbawa, inadalan ni Cloris sa Biblia an sarong babae na si Lucresia, na an agom nagkokontra. Sa ibong kaiyan, nag-abot an panahon na si Lucresia nabautismohan asin nagregular payunir. Tinokdoan nia an saiyang mga aki kan mga dalan ni Jehova. An duwa niang aking lalaki mga magurang na sa kongregasyon, asin an saro sa sainda espesyal payunir; an saiyang aking babae sarong payunir. An saiyang makoapong babae naagom nin marahay na tugang, asin espesyal payunir man sinda. Dakol an natabangan kan pamilyang ini na makanood kan katotoohan.

Kan 1980 mga 5,000 an parahayag sa Ecuador. Kaya, kinaipuhan ming pahiwason an samong opisina. Sarong tugang na lalaki an nag-alok sa samo nin 32 na ektaryang daga na nasa luwas kan Guayaquil. Kan 1984, pinonan ming itogdok sa dagang ini an bagong sangang opisina asin sarong Assembly Hall, na idinedikar kan 1987.

Dakol an Andam na Suportaran an Pagpahiwas

Sa nag-aging mga taon, nakakaogmang maheling an pag-abot sa Ecuador kan dakol na parahayag asin payunir hale sa ibang mga nasyon tanganing tumabang sa lugar na dakula an pangangaipo para sa mga parahulit kan Kahadean. An saro na nagigirumdoman ko iyo si Andy Kidd, sarong retiradong maestro sa eskuelahan na taga Canada. Nagbalyo sia sa Ecuador kan 1985 sa edad na 70 asin maimbod siang naglingkod sagkod na magadan kan 2008 sa edad na 93. Kan enot ko siang maheling sa lugar na pinagboboluntaryohan nia, sia sana an paraataman sa sarong saditon na kongregasyon. Dawa nasasakitan magtaram nin Kastila, sia an nagtatao kan pampublikong pahayag dangan nangengenot sa Pag-adal sa Torrengbantayan. Pinangengenotan man nia an Teokratikong Paadalan sa Pagmiministro asin ipinepresentar an kadaklan na kabtang sa Pagtiripon sa Paglilingkod! Sa lugar na iyan, igwa na ngonyan nin duwang maoswag na kongregasyon, na may haros 200 na parahayag asin dakol na lokal na magurang sa kongregasyon.

An saro pang tugang, si Ernesto Diaz, na nagbalyo hale sa Estados Unidos kaiba an saiyang pamilya, nagsabi pagkatapos nin walong bulan sa Ecuador: “Nanodan kan tolo ming aki an lenguahe asin nagin sindang matibay na mga paratokdo nin Biblia sa lenguaheng iyan. Bilang ama, naabot ko an sarong pasohan na garo baga imposible sa sistemang  ini—an magin regular payunir, na bilog na panahon na nagmiministeryo kaiba an sakong pamilya. Gabos-gabos, 25 an inaadalan mi sa Biblia. An gabos na ini nagresulta sa mas nagkakasararong pamilya asin, orog sa gabos, nagin mas dayupot ako ki Jehova orog kisa kasuarin man.” Pinapahalagahan mi nanggad an namomotan na mga tugang na ini!

Nagkaigwa pa nin pagpahiwas sa sangang opisina kan 1994, na dinoble an kadakulaan kan mga pasilidad. Kan 2005, nalampasan mi an 50,000 na bilang nin parahayag, asin orog pang pagpahiwas an kinaipuhan. Kaiba digdi an pinadakulang Assembly Hall asin sarong bagong erokan na edipisyo, saka mga opisina sa pagtradusir. An bagong mga pasilidad na ini idinedikar kan Oktubre 31, 2009.

Kan pahaleon ako sa eskuelahan kan 1942, an Saksi sa Estados Unidos mga 60,000. Ngonyan, labi nang sarong milyon. Kan mag-abot kami sa Ecuador kan 1966, an parabalangibog kan Kahadean digdi mga 1,400. Ngonyan, labi nang 68,000. Asin seguradong dakol pa an madadagdag hale sa 120,000 na inaadalan sa Biblia asin hale sa labing 232,000 na nag-atender sa Memorial kan kagadanan ni Cristo kan 2009. Tunay nanggad, binebendisyonan ni Jehova an saiyang banwaan sa paaging dai mi noarin man naimahinar. Nakakaogma nanggad na mabuhay sa panahon asin sa lugar na nagkaigwa nin makangangalas na paghiwas! *

[Nota sa Ibaba]

[Mga Ritrato sa pahina 5]

Sarong asamblea (1981) asin Assembly Hall sa Guayaquil (2009) sa iyo man sanang lugar