Nanlingkor Legay Panaon na Makapadinayew ya Inlaknab

KUAN NEN HARLEY HARRIS

Say taon ed saman et Setyembre 2, 1950, diad Kennett, Missouri, U.S.A. Legan na sirkiton asemblea mi et pinaliberan kami na manggugulon totoo. Kanian, angiyakar so mayor na National Guard pian protektaan kami. Walaray armadon sundalo a nanbarikada ed dalan. Anggaman iinsultoen kami na totoo, kalmado kamin tinmaynan tan linma ed Cape Girardeau, Missouri, pian ituloy so asemblea mi. Diman ak abautismoan diad edad a 14. Istoryaen ko pa’d sikayo no panon ak ya akapanlingkor ed si Jehova legan na magulon kipapasen.

DIAD banda’d gapo na dekaday 1930, nadngel di lakik, baik, tan waloran anak da so pigaran inrekord a paliwawa nen Brother Rutherford tan akombinse ra a nalmo day katuaan. Abautismoan so atateng ko a si Bay tan Mildred Harris nen 1935 diad kombension ed Washington, D.C. Agaylay liket da ta kabiangan ira na “baleg a karaklan” odino “baleg ya ulop,” a nipalinew ed satan a kombension!​—Apo. 7:9, 14; King James Version.

Diad tinmumbok a taon, inyanak ak. Tan kayari sakey taon, inmalis kami ed nisulinek a teritorya diad Mississippi. Sanlegan min wadman, agkami nabibisita na ombiabiahen manangasikaso. Napipilimogan mi labat iray agagi kapagno misulatan kami ed Bethel odino onatendi ed asemblea.

Akapansungdo ed Panamasegsegang

Legan na Guerra Mundial II, grabe impamasegsegang ed saray Tasi nen Jehova lapud neutral a talindeg da. Tan inmalis kami ed Mountain Home, Arkansas. Aminsan, sanen manpupulong kami’d karsada nen tatay ko, walay sakey ya lakin bigla ton sinamsam so magasin nen tatay, insan to pinoolan. Tinawag to kamin payakot ta agkami kuno migeguera. Limay taon ko ni labat ed saman kanian manakis ak. Kalmado labat ya ninengneng nen tatay imay laki tan ag-inmesel anggad inyalis to.

Wala met iray totoon maomaong ed sikami. Singa bilang, sanen manbibiahe kami, sinabat kami na sakey a pangkat tan pinaliberan day luluganan mi. Maong labat ta dinmalan so sakey ya abogado, tan intepet to: “Akin, antoy nagagawa dia?” “Arayan Tasi ay, agda labay so milaban parad bansa ra!,” so ebat na sakey a laki. Kanian inmasingger imay abogado tan inyeyag  to: “Akilaban ak nen Guerra Mundial I tan milaban ak met ed sayay Guerra Mundial II! Ibabagak ed sikayo, agyo ra didiwiten. Anggapoy gagawaen da’d sikayo!” Et mareen ya inmalis so pangkat. Talagan papablien mi onia ran totoon maomaong ed sikami!​—Gawa 27:3.

Pinabiskeg Kami na Saray Kombension

Samay kombension nen 1941 diad St. Louis, Missouri et talagan nipanpanaon. Unong ed tantiya, masulok ya 115,000 so inmatendi! Say abautismoan et 3,903! Agko nalingwanan ’may paliwawa nen Brother Rutherford ya apauloan na “Ananak na Ari.” Sikami ran kalangweran so direkta ton kinatongtong ed saman, tan akaawat kami na balibalin asul a libro ya apauloan na Children. Apabiskeg ak na saman a kombension pian naarap iray nagawa’d tinmumbok a taon, say taon sanen maneskuela ak la. Siak tan saray kakapinsan ko et pinaekal ed eskuelaan lapud agmi pansaludo ed bandira. Inagew-agew kamin pawil-pawil ed eskuelaan pian amtaen no angumay nonot na saray direktor. Kinabuasan mi kalamor ya aakarey katakelan pian onla’d eskuelaan, balet papasempeten da kami lanlamang. Anggaman ontan, parad siak et saman so paraan pian nipanengneng mi katooran mi ed Panarian na Dios.

Ag-abayag, ingganggan na Korte Suprema na Estados Unidos ya aliwa lan kapilitan so pansaludo ed bandira. Akapan-eskuela kamin siansia. Samay maestro mi et maomaong tan imbangat to ni ingen ed sikami iray alabsanan min subject. Saray kaklase mi et marespeto met.

Nanonotan ko met imay kombension ed Cleveland, Ohio, nen 1942. Impaliwawa ed saman nen Brother Nathan H. Knorr so “Kareenan​—Mansiansia Kasi?” Impalinew to so Apocalipsis kapitulo 17 a mangipapanengneng a walay samet a kareenan kayari Guerra Mundial II. Kanian, iilaloan ya onlaknab so kimey. Pian makapanparaan, inyuksoy so Gilead School nen 1943. Agko inilaloan ya baleg manayay nagawaaan na satan ed bilay ko. Kayari na guerra, dinmeen a tua so kipapasen tan tinmunday panamasegsegang. Balet, sanen agaway Guerra ed Korea nen 1950, ginmapo lamet so isusumpa ed panagpulong, a singa adeskribe ed gapo.

Akitulongan Ak ed Onlalaknab a Kimey

Nen 1954, nangraduar ak ed haiskul, tan kayari sakey bulan et nampayunir ak ed Kennett, Missouri. Ditan agawa ’may ibabagak a pinaliberan kami na manggugulon totoo nen 1950. Nen Marso 1955, tinawag ak ed Bethel. Sakey ed saray teritorya na kongregasyon ya aka-asainan ko et say Times Square, a walad pegley na New York City. Talagan dumay bilay ed syudad! Pian naalak so imano na saray okupadon totoo’d New York, ipapanengneng koy sakey a makapainteres ya artikulo ed magasin tan ibabagak ya, “Asalim ta lan intepet iya ed sika?” Tan dakel so angawat na magasin.

Sakey ed saray paboritok ed Bethel et say morning worship, ya idadaulo nen Brother Knorr. Gagawaen ton mabilabilay iray teksto ed Biblia tan mangiiter na praktikal iran suhestion no panon ya iyaplika iratan. Sikatoy singa aman mitotongtong ed sikami ran babalolaki, tan mabetbet to kamin sisimbawaen no panon ya itrato iray bibii.

Kasabi 1960, nandesisyon ak a mangasawa. Nansulat ak ed Bethel a kayari 30 agew et onalis ak la, balet anggapoy naawat kon ebat. Kalabas na sakey bulan, anggaman nababaingan ak, nampakpel ak a tinmawag pian tepeten no naawat da ’may sulat ko. Si Brother Robert Wallen so akatongtong ko tan nila to ak ed trabaho. Tinepet to no labay koy man-espisyal payunir odino mankimey ed sirkito. “Balet kuya, bente kuatrok ni labat, tan anggapo ni eksperiensyak,” so ebat ko.

Kimey ed Sirkito

Diad saman a labi, walay asabian kon baleg a sobre diad kuartok. Karga toy aplikasyon parad espisyal a pampayunir tan say sakey et parad kimey ed sirkito. Agayla! Asurprisa ak! Inawat  koy agkanepegan a pribilehyo a manlingkor ed saray agagi diad sirkito. Niasain ak ed southwestern Missouri tan eastern Kansas. Balet antis ak ya inmalis ed Bethel, inmatendi ak ni’d miting parad saray ombiabiahen manangasikaso. Diad sampot na miting, oniay bilin nen Brother Knorr: “No sakey kan manangasikaso na sirkito odino distrito, agto labay ya ibagan mas dakel so amtam nen saray agagi. Walaray arum a mas dakel so eksperiensya ra nen say sika. Balet lapud sirkumstansya ra et ag-ira naikdan na ontan a pribilehyo. Dakel so naaralan mo’d sikara.”

Tua so imbaga ra! Talagan dakel so agagin napanuliranan. Singa bilang, wadtan si Brother Fred Molohan tan say akulaw to, ontan met ed say kuya ran si Charley a taga’d Parsons, Kansas. Naamtaan da so katuaan diad bandad gapo na 1900’s. Makapalikliket a narengel iray naeksperiensya ra antis ak nin nianak! Say sakey nin agi et si John Wristen, sakey a maomaong a masiken a taga’d Joplin, Missouri, ya abayag a nampayunir. Talagan rerespetoen na sarayan pinablin agagi so teokratikon uksoyan. Anggaman ugaw ak, naliliknak so panangapresya da’d siak bilang manangasikaso na sirkito.

Nen 1962, nankasal kami nen Cloris Knoche, sakey a payunir a maalinyada tan balangaan so buek to. Nantultuloy kami nen Cloris a nankimey ed sirkito. Sano manpupundo kami ed saray agagi, lalo mi ran nakakabat. Tan apaseseg mi ray kalangweran ya manpayunir. Singa bilang, walay duaran tinedyer ed sirkito mi, si Jay Kosinski tan JoAnn Kresyman, a mankaukolan na ontan a panamaseseg. Lapud mankakaiba kamin nanlingkor tan malikeliket a nansakripisyo, apaseseg iran manggawa na kalat da. Nagmaliw ya espisyal payunir si JoAnn, tan si Jay balet et nanlingkor ed Bethel. Diad saginonor et nankasal ira, tan natan, manga 30 taon da la ed sirkiton kimey.

Nanlingkor Bilang Misionero

Nen 1966, tinepetan kami nen Brother Knorr no labay mi manlingkor ed arum a bansa. “Maliket kami la diad kawalaan mi, balet no walay pankaukolan ed arum a lugar, tawag yo kami labat,” so kuan mi. Kayari sakey simba, inimbitaan kamin manaral ed Gilead. Eksayted ak ya amawil ed Bethel pian maneskuela tan napilimogan lamet iray aaroen tan rerespetoen ko! Ontan met, nagmaliw min kaaro iray kaklase mi, ya anggad natan et matoor a manseserbi.

Sikami nen Cloris et imbaki ed Ecuador, South America, kaibay Dennis tan Edwina Crist, Ana Rodríguez, tan Delia Sánchez. Niasain iray sanasawan Crist diad Quito, say kabiseran syudad. Sikami balet di Cloris, Ana, tan Delia et niasain ed Cuenca, say komatlon sankabalgan a syudad na Ecuador. Duaran probinsya so teritorya mi. Tan say sankaunaan ya kongregasyon ed Cuenca et ginmapo diad ayaman mi. Say onaatendi et sikamin apat tan wala ni duara. Sankanonot mi no panon kasin napulongan so interon teritorya mi.

 Dakel so simbaan ed Cuenca, tan kapagno walay piesta ra, agnaaandi ’tay libot. Balet, matepet iray totoo ed Cuenca. Singa bilang, sanen primerok ya akatongtong si Mario Polo, say champion ed lumbay bisikleta diad Cuenca, abigla ak ed tepet ton, “Siopa may balangkantis ya abitla ed Apocalipsis?”

Aminsan a labi, linma’d abung si Mario tan singa aburido. Walay inter manaya ed sikato na sakey a pastor a babasaen a manederal ed saray Tasi nen Jehova. Inkuan ko’d sikato a say sakey ya aakusaen et kaukolan ya abuloyan a mangidepensa’d inkasikato. Kanian kaimbuasan, siak tan samay pastor et inimbitaan nen Mario ed abung to pian naebatan iray akusasyon. Diad saman, inkuan kon maabig no iyapasakey mi labat so tongtongan ed Trinidad. Sanen imbasa na pastor so Juan 1:1, mismon si Mario so angipaliwawa ed pandumaan na salitan “Say Dios” tan “sakey a dios” diad Griego. Tan impalinew ko ni ray kaaruman a tekston insitas na pastor. Kanian, asumpal so tongtongan ya agto apaneknekan so Trinidad. Saya so akakombinse’d si Mario tan ed akulaw to a walad sikatayo so katuaan, tan nagmaliw iran maong a manangidepensa ed saray bangat na Biblia. Makapaliket a nanengneng ta diad samay sankaunaan ya asainmin mi, say syudad na Cuenca, et 33 lay kongregasyon, tan ami-amin et 63 lay kongregasyon ed interon teritorya mi! Makapadinayew a tuloy iyan inlaknab!

Inlaknab na Kimey Diad Sangan Opisina

Nen 1970, naimbitaan kami nen Al Schullo a mangasikaso ed sangan opisina diad Guayaquil. Si Joe Sekerak so part-time a mangiimpake ed saray literatura parad 46 a kongregasyon diad interon bansa. Legan kon mankikimey ed Bethel, si Cloris balet et siansia nin mitutulongan ed lawak na kimeyan. Walay 55 a totoon inyaralan to tan nampabautismo. Mabetbet a manga talora anggad limara ed saray iyaaralan to so nababautismoan ed kada asemblea.

Alimbawa, walay inyaralan nen Cloris a manngaran na Lucresia, a say asawa to et oposer. Balet, siansia nin nampabautismo si Lucresia tan ag-abayag et nanregular payunir. Imbangat to’d saray anak to so nipaakar ed si Jehova. Natan, elder la so duaran anak to, tan say sakey et espisyal payunir. Say anak ton bii et payunir met. Akiasawa so apo to ed maespiritual a laki, tan espisyal payunir met ira. Dakel so atulongan na sayan pamilya pian naaral so katuaan.

Nen 1980, manga 5,000 so manangipalapag ed Ecuador. Lapud satan, melag lay opisina mi. Indonasyon na sakey ya agi so manga 32 ektaryan lote to diad paway na Guayaquil. Nen 1984, impaalagey mi ditan so balon sangan opisina tan Assembly Hall, ya indedika nen 1987.

Dakel so Akitulongan ed Onlalaknab a Kimey

Diad apalabas iran taon, makapalikliket ta dakel a manangipalapag tan payunir, manlapud arum iran bansa, so akitulongan ed pasen a kakkaukolan iray manangipulong ed Panarian. Sakey ed saray agko nalingwanan et si Andy Kidd, a nanretiro lan maestro a taga Canada. Nen 1985, diad edad ton 70 et inmalis ed Ecuador tan matoor a nanlingkor ditan anggad impatey to nen 2008 diad edad ya 93. Nen inmunan anengneng ko ed asainmin to, bukbukor toy manangasikaso ed melag a kongregasyon. Anggaman nairapan a man-Español, sikatoy akanbetang ed public talk tan Panagaral ed Panag-Bantayan. Sikato ni mangaasikaso ed Teokratikon Eskuelaan Parad Ministeryo tan amin lawarin parte ed Pantitipon Parad Panagserbi et betang to! Natan, diad satan a lugar et wala lay duaran onaaligwas a kongregasyon, a ngalngali 200 so manangipalapag tan dakel so elder da.

Say sakey nin agi et si Ernesto Diaz. Tinaynan dan sankapamilyaan so Estados Unidos, tan kayari waloy bulan diad Ecuador et oniay inkuan to: “Naaralan na ananak mi so man-Español tan maong la ran manbangat. Bilang ama, agawaan ko ray kalat a singano imposible ed sayan mundo, salanti, say pagmaliw a regular  payunir a kaibay pamilyak. Ami-amin, 25 so iyaaralan mi na Biblia. Lapud saraya, lalon inmelet so aroan min sankapamilya. Nagkalalo ed amin, mas inmapit kami ed si Jehova.” Inad-aro mi irayan agagi tayo!

Nen 1994, pinalaknab so sangan opisina tan doble lay kabaleg na saray pasilidad. Kasabi 2005, masulok lan 50,000 so manangipalapag, tan kaukolan lamet a pabalegen so sangan opisina. Pinabaleg so Assembly Hall, angipaalagey na balon panayaman a bilding, tan opisina parad panagpatalos. Sarayan balon pasilidad et indedika nen Oktubre 31, 2009.

Sanen pinaekal da ak ed eskuelaan nen 1942, manga 60,000 labat iray Tasi diad Estados Unidos. Natan et masulok lan sakey milyon iray Tasi ditan. Sanen sinmabi kami ed Ecuador nen 1966, manga 1,400 so manangipalapag na Panarian. Natan balet et wala lay masulok a 68,000. Tan seguradon dakel ni so nabautismoan ed saray 120,000 ya iyaaralan na Biblia tan ed saray masulok a 232,000 ya inmatendi ed Memoryal na impatey nen Kristo nen 2009. Peteg a bebendisyonan nen Jehova so totoo to diad paraan ya agtayon balot inilaloan! Agaylan makapaliket so panbilay ed panaon tan pasen a makapadinayew so inlaknab! *

[Paimano ed leksab]

[Saray litrato ed pahina 5]

Pataktak ya asemblea (1981) tan Guayaquil Assembly Hall (2009) diad parehon lugar