Maigot na Hanapon an Bendisyon ni Jehova
Maigot na Hanapon an Bendisyon ni Jehova
“[An Dios] nagigin an paratao nin balos sa mga maigot na naghahanap sa saiya.”—HEB. 11:6.
1, 2. (a) Paano hinahanap nin dakol na tawo an mga bendisyon nin Dios? (b) Taano ta maninigo kita na partikularmenteng magin interesado sa pagkamit kan bendisyon ni Jehova?
“BENDISYONAN ka man logod nin Dios!” Sa nagkapirang nasyon, ini an parateng sinasabi nin mga tawong dai nanggad kabisto sa saro na naghatsing. An mga klero nin manlaenlaen na relihion binebendisyonan an mga tawo, hayop, asin daing buhay na mga bagay. An mga tawo minaduman sa nagkapirang relihiosong lugar tanganing mabendisyonan. An mga politiko regular na naghahagad nin bendisyon sa Dios para sa saindang nasyon. Sa heling daw nindo angay an siring na mga paghagad nin bendisyon? Epektibo daw iyan? Siisay talaga an nagkakamit kan bendisyon nin Dios, asin taano?
2 Ihinula ni Jehova na sa huring mga aldaw, magkakaigwa sia nin malinig asin matoninong na banwaan hale sa gabos na nasyon, na maghuhulit kan maogmang bareta kan Kahadean sagkod sa mga poro kan daga sa ibong nin pagkaongis asin pagtumang. (Isa. 2:2-4; Mat. 24:14; Kap. 7:9, 14) Kita na mga nag-ako kan paninimbagan na magin kabtang kan banwaan na ini nagmamawot—asin nangangaipo—kan bendisyon nin Dios, huling kun mayo iyan nungka kitang magigin mapanggana. (Sal. 127:1) Alagad paano niato makakamtan an bendisyon nin Dios?
Maabot Nanggad an mga Bendisyon sa mga Makinuyog
3. Kun nagin makinuyog an mga Israelita, ano kutana an nagin resulta?
3 Basahon an Talinhaga 10:6, 7. Kan an nasyon nin Israel madali nang maglaog sa Dagang Panuga, ipinarisa ni Jehova na pambihirang prosperidad asin proteksion an mapapasainda kun kukuyogon ninda an saiyang tingog. (Deut. 28:1, 2) An mga bendisyon ni Jehova sierto nanggad na maabot sa mga makinuyog.
4. Ano an kalabot sa tunay na pagkuyog?
4 Ano an dapat na magin kalabot sa pagigin makinuyog kan mga Israelita? An Ley nin Dios nagsabi na maaanggot sia kun an saiyang banwaan dai sia paglilingkodan “na may paggayagaya asin kagayagayahan sa puso.” (Basahon an Deuteronomio 28:45-47.) An pagkuyog ki Jehova maninigo na labi sa dai isinasaboot na pagkuyog sa espesipikong mga pagboot, na puedeng gibohon dawa nin mga hayop o demonyo. (Mar. 1:27; Sant. 3:3) An tunay na pagkuyog sa Dios sarong kapahayagan nin pagkamoot. Iyan igwa nin kagayagayahan na naggigikan sa pagtubod na an mga togon ni Jehova dai nakakapagabat asin na ‘sia an paratao nin balos sa mga maigot na naghahanap sa saiya.’—Heb. 11:6; 1 Juan 5:3.
5. Paano an pagtitiwala sa panuga ni Jehova nakatabang sa saro na kuyogon an ley sa Deuteronomio 15:7, 8?
5 Isip-isipa kun paano posibleng ipinaheling an siring na may pagtitiwalang pagkuyog paagi sa pag-otob kan ley sa Deuteronomio 15:7, 8. (Basahon.) An napipiritan na pagkuyog sa ley na idto tibaad kan enot nakatao nin kadikit na ginhawa sa mga pobre, alagad iyan daw nakatabang sa banwaan nin Dios na magin marahay an relasyon ninda sa lambang saro? An mas mahalaga, ikinapabanaag daw kaiyan an pagtubod sa kakayahan ni Jehova na susteniran an saiyang mga lingkod asin an pagpahalaga sa oportunidad na arogon an pagkamatinao nia? Dai nanggad! Mahalaga ki Jehova an kamugtakan nin puso kan tunay na matinao asin nanuga sia na bebendisyonan nia ini sa gabos na ginigibo kaini. (Deut. 15:10) An pagtubod sa panugang iyan magmomotibar sa saro na humiro asin magreresulta sa dakolon na bendisyon.—Tal. 28:20.
6. Ano an sinisierto sa sato kan Hebreo 11:6?
6 Apuera sa pagtubod ki Jehova bilang an Paratao nin Balos, itinatampok kan Hebreo 11:6 an saro pang kualidad na kaipuhan sa pagkamit kan bendisyon nin Dios. Mangnohon na tinatawan ni Jehova nin balos an mga “maigot na naghahanap sa saiya.” An tataramon sa orihinal na lenguahe na ginamit digdi nagpaparisa nin pagigin mapuersa asin nin bilog na paghihingoa. Sinisierto nanggad kaiyan sa sato an pag-abot kan bendisyon! Hale iyan sa solamenteng tunay na Dios, “na dai makakapagputik.” (Tito 1:2) Sa laog nin mga milenyo, ipinaheling nia na biyong mapagtitiwalaan an ipinanuga nia. Pirmeng naootob an saiyang mga tataramon. (Isa. 55:11) Kaya, biyo kitang makakasarig na kun magpapaheling kita nin tunay na pagtubod, sia magigin satong Paratao nin Balos.
7. Paano kita puedeng magkamit nin bendisyon paagi sa “banhi” ni Abraham?
7 Si Jesu-Cristo an nagin pangenot na kabtang kan “banhi” ni Abraham. An linahidan na mga Kristiano an minakompuesto sa sekondaryong kabtang kan ihinulang “banhi” na iyan. Isinugo sinda na ‘ipahayag nin mahiwas an mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ (Gal. 3:7-9, 14, 16, 26-29; 1 Ped. 2:9) Dai kita magkakaigwa nin marahay na relasyon ki Jehova kun binabaliwala niato an mga ninombrahan ni Jesus na mag-asikaso sa mga rogaring nia. Kun mayo an tabang kan “maimbod asin mapagmansay na oripon,” dai niato masasabotan nin lubos an satong nababasa sa Tataramon nin Dios ni maaaraman man niato kun paano iaaplikar iyan. (Mat. 24:45-47) Sa pagsagibo kan mga nanonodan niato sa Kasuratan, puede kitang magkamit kan bendisyon nin Dios.
Danay na Pagkonsentrar sa Kabotan nin Dios
8, 9. Anong mga pagmamaigot an ginibo kan patriarkang si Jacob kaoyon kan panuga nin Dios?
8 Kun nasasambitan an dapit sa maigot na paghihingoa tanganing kamtan an bendisyon nin Dios, tibaad magirumdoman niato an patriarkang si Jacob. Dai nia aram kun paano maootob an panuga nin Dios ki Abraham, alagad naniwala sia na papadakolon nanggad ni Jehova an mga magikan sa saiyang lolo asin sinda magigin sarong dakulang nasyon. Sa siring, kan 1781 B.C.E., si Jacob nagduman sa Haran tanganing maghanap nin maaagom. Bako sanang marahay na kaibaiba an hinanap nia; imbes, naghanap sia nin babaeng parasamba ki Jehova na espirituwal an kaisipan asin magigin marahay na ina sa saiyang mga aki.
9 Aram niato na namidbid ni Jacob an saiyang paryente na si Raquel. Sia namoot ki Raquel asin tanganing maagom ini, nag-oyon sia na magtrabaho nin pitong taon sa ama kaini, ki Laban. Bako sana ining estorya nin dai malilingawan na pagkaminotan. Seguradong aram ni Jacob an panuga kan Makakamhan sa Gabos na Dios sa lolo niang si Abraham, na sinabi giraray sa saiyang ama na si Isaac. (Gen. 18:18; 22:17, 18; 26:3-5, 24, 25) Sinabi man ini ni Isaac sa saiyang aking si Jacob: “Bebendisyonan ka kan Dios na Makakamhan sa Gabos asin gigibohon kang mabunga asin papadakolon ka, asin magigin ka nanggad sarong kongregasyon nin mga banwaan. Asin itatao nia sa saimo an bendisyon ni Abraham, sa saimo asin sa banhi mo na kaiba mo, tanganing masadiri mo an daga na ineerokan mo bilang dayo, na itinao nin Dios ki Abraham.” (Gen. 28:3, 4) Kun siring, an pagmamaigot ni Jacob na makahanap nin angay na agom asin magkapamilya nagpabanaag kan saiyang pagsarig sa sinabi ni Jehova.
10. Taano ta naogma si Jehova na bendisyonan si Jacob?
10 Bakong kayamanan an minawot ni Jacob para sa saiyang pamilya. An nasa isip nia iyo an saiyang mana. Nakakonsentrar sia sa pagkaotob kan kabotan ni Jehova. Determinado si Jacob na gibohon an pinakamakakaya nia tanganing kamtan an bendisyon nin Dios sa ibong nin mga olang. Pinagdanay nia an kaisipan na iyan sagkod sa paggurang nia, asin huli kaiyan, binendisyonan sia ni Jehova.—Basahon an Genesis 32:24-29.
11. Anong paghihingoa an maninigo niatong gibohon kaoyon kan ihinayag na kabotan nin Dios?
11 Arog ni Jacob, dai niato aram an gabos na detalye dapit sa pagkaotob kan katuyohan ni Jehova. Pero, paagi sa pag-adal kan Tataramon nin Dios, nagkakaigwa kita nin pangkagabsan na ideya kun ano an aasahan niato mapadapit sa “aldaw ni Jehova.” (2 Ped. 3:10, 17) Halimbawa, dai niato aram nin eksakto kun noarin maabot an aldaw na iyan, alagad aram niato na harani na iyan. Naniniwala kita sa sinasabi kan Tataramon nin Dios na paagi sa lubos na pagpapatotoo sa natatadang halipot na panahon, ililigtas niato an satong sadiri pati an mga naghihinanyog sa sato.—1 Tim. 4:16.
12. Sa ano kita puedeng makasierto?
12 Aram niato na puedeng mag-abot an katapusan ano man na oras; an iskedyul ni Jehova dai nakadepende sa satong pagpapatotoo sa kada indibiduwal sa daga. (Mat. 10:23) Dugang pa, nag-aako kita nin tamang pagdirehir kun paano epektibong makakapaghulit. May pagtubod kitang nakikikabtang sa gibohon na ini sagkod sa makakaya niato, na ginagamit an ano man na yaon sa sato. An huhulitan daw niato pirmeng pinakamabungang teritoryo? Paano man nanggad niato patienot na maaaraman iyan? (Basahon an Eclesiastes 11:5, 6.) An satong gibohon maghulit, na nagtitiwalang bebendisyonan kita ni Jehova. (1 Cor. 3:6, 7) Makakasierto kita na naheheling nia an satong maigot na paghihingoa, asin paagi sa saiyang banal na espiritu, itatao nia an ano man na espesipikong pagdirehir na kaipuhan niato.—Sal. 32:8.
Hagadon an Banal na Espiritu
13, 14. Paano naheheling an kakayahan kan banal na espiritu nin Dios na sangkapan an saiyang mga lingkod?
13 Paano kun sa pagmate niato kulang an satong kakayahan na magibo an sarong asignasyon o na maghulit? Maninigo niatong hagadon ki Jehova an saiyang banal na espiritu tanganing mapaoswag an ano man na kakayahan niato sa paglilingkod sa saiya. (Basahon an Lucas 11:13.) An espiritu nin Dios puedeng sangkapan an mga tawo para sa sarong gibohon o pribilehio nin paglilingkod ano man an dating kamugtakan o eksperyensia ninda. Halimbawa, pagkatapos tolos kan Lagdoan na Pagharale sa Egipto, pinangyari kan espiritu nin Dios na daogon kan mga pastor asin oripon an saindang mga kaiwal dawa mayo sindang eksperyensia sa pakikilaban. (Ex. 17:8-13) Dangan dai naghaloy, sinangkapan kan espiritu man sanang iyan si Bezalel asin Oholiab tanganing magibo an magayonon asin ipinasabong nin Dios na arkitektural na mga plano para sa tabernakulo.—Ex. 31:2-6; 35:30-35.
14 Sinangkapan kan makapangyarihan na espiritung iyan an mga lingkod nin Dios sa satong kapanahonan tanganing maasikaso an mga pangangaipo kan organisasyon kan kaipuhan na ninda na magsadiring mag-imprenta. Paagi sa surat, ipinaliwanag kan paraataman sa imprentahan kaidto na si Tugang na R. J. Martin kun ano na an nahaman kan 1927. “Sa tamang panahon, binukasan kan Kagurangnan an pinto; asin an dakulang nag-iitok na makina [na pang-imprenta] napasamo, sa samo na mayo nin kaaram-aram sa pagkagibo asin pagpaandar kaiyan. Alagad aram kan Kagurangnan kun paano gibohon na alisto an isip kan mga nagtao sa saiya kan pinakamakakaya ninda. . . . Sa laog nin pira sanang semana, napaandar mi an imprentahan na iyan; asin nagagamit mi pa iyan, na may mga nahahaman na nungkang naisip kan mga kaggibo na makakaya kaiyan.” Sagkod ngonyan, padagos na binebendisyonan ni Jehova an siring na maigot na mga paghihingoa.
15. Paano puedeng mapakosog kan Roma 8:11 an mga napapaatubang sa sugot?
15 An espiritu ni Jehova nagpupunsionar sa manlaenlaen na paagi. An espiritung iyan puedeng kamtan kan gabos na lingkod nin Dios, asin tinatabangan sinda kaiyan na mapangganahan an dakulaon na mga olang. Paano kun sa pagmate niato dai na niato kayang labanan an sugot? Mapapakosog kita kan mga tataramon ni Pablo sa Roma 7:21, 25 asin 8:11. Iyo, “an espiritu nia na nagbangon ki Jesus hale sa mga gadan” puedeng humiro para sa sato, na nagpapakosog sa sato tanganing mapangganahan an makalaman na mga pagmawot. An mga tekstong iyan isinurat para sa mga Kristiano na linahidan nin espiritu, pero an prinsipyo aplikado sa gabos na lingkod nin Dios. Kita gabos nagkakamit nin buhay paagi sa pagtubod ki Cristo, pagmamaigot na gadanon an salang mga pagmawot, asin pamumuhay kaoyon kan paggiya kan espiritu.
16. Ano an dapat niatong gibohon tanganing mag-ako kan banal na espiritu nin Dios?
16 Tatawan daw kita nin Dios kan saiyang aktibong puersa kun dai man lamang kita naghihingoa? Dai. Apuera sa paghagad kaiyan paagi sa pamibi, dapat kitang maigot na magkua nin kaaraman sa ipinasabong na Tataramon nin Dios. (Tal. 2:1-6) Dugang pa, an espiritu nin Dios nasa Kristianong kongregasyon. An regular na pag-atender niato sa mga pagtiripon nagpapaheling na minamawot niatong “magdangog sa sinasabi kan espiritu sa mga kongregasyon.” (Kap. 3:6) Dapat man na mapakumbaba niatong himateon an nanonodan niato. An Talinhaga 1:23 nagsasadol sa sato: “Magbalik kamo huli sa sakong pagsagwe. Dangan papasulwakon ko sa saindo an sakong espiritu.” Tunay nanggad na itinatao nin Dios an saiyang banal na espiritu “sa mga nagkukuyog sa saiya bilang namamahala.”—Gibo 5:32.
17. Sa ano niato puedeng iagid an epekto kan bendisyon nin Dios sa satong mga paghihingoa?
17 Minsan ngani kaipuhan an maigot na paghihingoa sa pagkamit kan bendisyon nin Dios, girumdomon na bakong huli sa paghihingoa sana kaya tinatawan ni Jehova nin dakol na marahay na bagay an saiyang banwaan. An epekto kan pagbendisyon nia sa satong mga paghihingoa puedeng ikomparar sa kun paano nakikinabang an satong hawak sa masustansiang kakanon. Ginibo nin Dios an satong hawak sa paaging ikinakaogma niato an kakanon asin nakakakua kita nin mahalagang marhay na sustansia hale dian. Sia man an nagtatao kan kakanon. Dai niato lubos na aram kun paano nagkakaigwa nin sustansia an kakanon niato, ni ikakapaliwanag man kan kadaklan sa sato kun paano nagigibo kan satong hawak na magin enerhiya an kinakakan niato. An aram sana niato nangyayari an proseso asin nakikikooperar kita dian paagi sa pagkakan. Kun masustansia an kinakakan niato, mas marahay pa ngani an mga resulta. Sa kaagid na paagi, itinatao ni Jehova an mga kahagadan para sa buhay na daing katapusan, asin tinatabangan nia kita na maabot an mga kahagadan na iyan. Malinaw nanggad na sia an may mas dakol na ginibo asin maninigo sa pag-omaw. Pero tanganing kamtan an bendisyon, dapat kitang makikooperar sa Dios, na naghihiro kaoyon kan kabotan nia.—Hag. 2:18, 19.
18. Ano an determinasyon mo, asin taano?
18 Kaya, gibohon mo an bilog mong makakaya sa lambang asignasyon sa saimo. Pirmeng maglaom ki Jehova para sa kapangganahan. (Mar. 11:23, 24) Kun gigibohon mo iyan, makakasierto ka na “an gabos na naghahanap nakakakua.” (Mat. 7:8) An mga linahidan nin espiritu bebendisyonan kan “korona nin buhay” sa kalangitan. (Sant. 1:12) An “ibang mga karnero” ni Cristo, na nagmamaigot na mag-ako nin bendisyon paagi sa banhi ni Abraham, maoogmang marhay na madangog Siang nagsasabi: “Madia, kamong mga binendisyonan kan sakong Ama, manaha nindo an kahadean na iinandam para sa saindo poon pa kan pagkaestablisar kan kinaban.” (Juan 10:16; Mat. 25:34) Iyo, “an mga binebendisyonan [nin Dios] an magmamana kan daga, . . . asin sinda mag-eerok dian sagkod lamang.”—Sal. 37:22, 29.
Ikakapaliwanag daw Nindo?
• Ano an kalabot sa tunay na pagkuyog?
• Ano an kaipuhan tanganing kamtan an bendisyon nin Dios?
• Paano kita puedeng mag-ako kan banal na espiritu nin Dios, asin paano iyan puedeng maghiro para sa sato?
[Mga Hapot Para sa Pag-adal]
[Mga Ritrato sa pahina 9]
Si Jacob nakigumolan sa sarong anghel tanganing kamtan an bendisyon ni Jehova.
Ika daw maigot man na naghihingoa?
[Ritrato sa pahina 10]
Si Bezalel asin Oholiab sinangkapan kan banal na espiritu nin Dios tanganing magin eksperto