Fer bokou zefor pour ganny benediksyon Zeova
Fer bokou zefor pour ganny benediksyon Zeova
“[Bondye] i rekonpans tou bann ki rod li.”—EBR. 11:6.
1, 2. (a) Ki mannyer bokou dimoun i rod benediksyon sorti kot Bondye? (b) Akoz nou devret sirtou enterese pour ganny benediksyon Zeova?
“DYE benis!” Dan serten pei i pa etonan pour tann dimoun dir sa parol avek en lot ki’n fek eternen. Ou kapab trouv bann dirizan ki sorti dan diferan legliz beni bann dimoun, zannimo ek lobze. I annan dimoun ki vizit serten landrwa relizye akoz zot krwar ki zot pou kapab ganny en benediksyon. Souvan bann politisyen i demann Bondye pour beni zot nasyon. Letan dimoun i demann en benediksyon, eski ou krwar zot senser dan sa ki zot dir? Eski zot gannyen sa bann benediksyon? Lekel ki vreman ganny benediksyon Bondye e akoz?
2 Zeova ti predir ki dan bann dernyen zour i ti pou annan en pep ki pou prop e anpe avek kanmarad. I ti dir ki sa pep pou sorti dan tou nasyon e zot pou pres sa bon nouvel lo Rwayonm lo later antye malgre laenn ek lopozisyon. (Iza. 2:2-4; Mat. 24:14; Rev. 7:9, 14) Bann parmi nou ki’n aksepte sa responsabilite pour viv dapre sa deskripsyon ki’n ganny enspire, nou anvi e bezwen benediksyon Bondye, akoz san sa, nou pa pou zanmen kapab reisi. (Ps. 127:1) Me ki mannyer nou kapab ganny benediksyon Bondye?
Bann ki obeisan pou ganny benediksyon annabondans
3. Ki ti pou arive si bann Izraelit ti’n obeir Zeova?
3 Lir Proverb 10:6, 7. * Zis avan nasyon Izrael ti antre dan Later Promiz, Zeova ti dir zot si zot obeir son parol zot pou ganny proteze e zot pou prospere dan en fason ekstraordiner. (Det. 28:1, 2) Benediksyon Zeova pa pou zis vin lo zot, me i pou “zwenn” zot, setadir zot pou ganny son benediksyon annabondans. Bann ki obeisan i annan sa lasirans total ki zot pou ganny beni.
4. Ki savedir vre lobeisans?
4 Avek ki kalite latitid bann Izraelit ti bezwen obeir? Lalwa Bondye i montre ki i ti pou ankoler si son pep pa ti servi li avek “lazwa dan zot leker.” (Lir Deterononm 28:45-47. *) Nou pa devret obeir Zeova zis akoz nou bezwen fer li, akoz menm bann zannimo ek demon i kapab obeir bann lord ki zot gannyen. Zeova pa merite sa kalite lobeisans. (Mark 1:27; Zak 3:3) Nou montre ki nou annan lanmour pour Bondye letan nou demontre vre lobeisans. Sa i evidan atraver sa lazwa ki nou gannyen akoz nou annan lafwa ki bann komannman Zeova pa en fardo e ki “i rekonpans tou bann ki rod li.”—Ebr. 11:6; 1 Zan 5:3.
5. Dan ki fason konfyans dan promes Bondye ti pou ed en dimoun pour obeir sa lalwa dan Deterononm 15:7, 8?
5 Annou vwar ki mannyer sa kalite lobeisans ki demontre konfyans ti ganny demontre kan sa lalwa ki ganny mansyonnen dan Deterononm 15:7, 8 ti pe ganny aplike. (Lir. *) I vre ki menm si zot pa ti kontan pour aplik sa lalwa, zot lobeisans ti anmenn soulazman pour bann pov o konmansman, me eski pep Bondye ti pou annan en bon relasyon ek en bon lantant antre zot? Pli enportan, eski sa ti pou demontre lafwa dan abilite ki Zeova i annan pour pran swen avek son bann serviter ek lapresyasyon pour sa loportinite ki nou annan pour imit son zenerozite? Ditou! Bondye ti remark kondisyon leker sa enn ki ti vreman zenere e promet pour beni tou sa ki i ti fer. (Det. 15:10) Lafwa dan sa promes ti pou pous zot pour fer aksyon e an rezilta, sa ti pou anmenn bokou benediksyon.—Prov. 28:20.
6. Ki lasirans Ebre 11:6 i donn nou?
6 Apard demontre lafwa dan Zeova konman sa Enn ki rekonpans nou, Ebre 11:6 i fer resorti en lot kalite enportan pour ganny benediksyon Bondye. Remarke ki Zeova i rekonpans tou bann ki fer bokou zefor pour “rod li.” (Nou ki’n met an italik.) Dan langaz orizinal, sa mo ki’n ganny servi i enplik lentansite ek bokou zefor. Pa sa verse i asir nou ki nou zefor pou vreman ganny beni! Par lekel? Par sa sel vre Bondye “ki pa zanmen manti.” (Tit 1:2) Diran sa plizyer syek ki’n pase, i’n montre nou ki nou kapab met konfyans total dan son bann promes. Son parol i toultan vin vre. (Iza. 55:11) Alors, nou kapab annan konfyans total ki si nou demontre vre lafwa, i pou montre nou ki i sa Enn ki rekonpans nou.
7. Ki mannyer nou kapab fer sir ki nou ganny beni atraver “desandans” Abraam?
7 Zezi ti parti prensipal “desandans” Abraam. Bann Kretyen swazir i form dezyenm parti sa “desandans.” Zot in ganny demande pour “proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (Gal. 3:7-9, 14, 16, 26-29; 1 Pyer 2:9) Nou pa kapab ekspekte ganny en bon relasyon avek Zeova si nou inyor sa bann ki Zezi in apwente pour pran ka avek tou son byen. San lasistans “lesklav fidel e pridan,” nou pa ti pou zanmen vreman konpran, ni menm konnen ki mannyer pour aplik sa ki nou lir dan Labib. (Mat. 24:45-47, NW) Par met an aplikasyon sa ki nou aprann dan Lekritir, nou pou vreman ganny beni par Bondye.
Fikse nou latansyon lo lavolonte Bondye
8, 9. Ki mannyer Zakob ti fer zefor pour azir an armoni avek son demann?
8 Sa nide pour fer bokou zefor pour ganny benediksyon Bondye i kapab fer nou mazin legzanp patrias Zakob. I pa ti konnen ki mannyer sa promes ki Zeova ti fer avek Abraam ti pou ganny akonplir, me i ti annan konfyans ki Zeova ti pou fer desandans son granpapa vin en gran nasyon. Pour sa rezon, Zakob ti al Arann pour rod en madanm an 1781 A.N.L. I pa ti zis enterese pour rod en dimoun ki ti pou vin en bon konpanyon, me o kontrer i ti rod en serviter Zeova ki ti enterese avek bann keksoz spirityel e ki ti pou en bon manman.
9 Nou konnen ki Zakob ti zwenn Rasel, enn son fanmir. I ti kontan Rasel e i ti dakor pour travay pour son papa Labann pour set an, pour li kapab pran Rasel konman son madanm. Sa pa ti zis en zoli zistwar romantik. Zakob ti konn byen sa promes ki Bondye Tou Pwisan ti fer avek son granpapa Abraam e ki i ti repete avek son papa Izaak pli tar. (Zen. 18:18; 22:17, 18; 26:3-5, 24, 25) Izaak ti repet sa parol avek son garson Zakob: “Bondye Tou Pwisan pou beni ou e fer ou annan bokou zanfan e i pou fer ou vin bokou, e ou pou sirman vin en lasanble bann pep. E i pou donn ou benediksyon Abraam, ou ek ou desandans, pour ki ou kapab pran an posesyon sa later ki ou ti reste lo la konman en rezidan etranze, ki Bondye in donn Abraam.” (Zen. 28:3, 4) Alor, zefor ki Zakob ti mete pour trouv sa bon madanm pour li e fer en fanmir ti demontre konfyans ki i ti annan dan sa ki Zeova ti dir.
10. Akoz i ti en plezir pour Zeova beni Zakob?
10 Zakob pa ti pe mazin pour akimil larises pour son fanmir. I ti plito konsantre lo promes ki Zeova ti’n fer konsernan son desandans. I ti enterese avek lafason ki lavolonte Zeova ti pou ganny akonplir. Zakob ti determinen pour fer tou dan son pouvwar pour ganny benediksyon Bondye menm si i ti rankontre serten lobstak dan son semen. I ti gard sa latitid ziska dan son bann vye zour e Zeova ti beni li pour sa.—Lir Zenez 32:24-29. *
11. Ki zefor nou devret fer annakor avek lavolonte Zeova?
11 Parey Zakob, nou pa konn tou detay konsernan lafason ki Zeova pou akonplir son plan. Me kantmenm sa, atraver letid dan Parol Bondye, nou ganny en nide apepre lo ki nou kapab ekspekte konsernan “Zour Senyer.” (2 Pyer 3:10, 17) Par egzanp, nou pa konnen kan ki sa zour pou arive me nou konnen ki i pros. Nou krwar dan Parol Bondye kan i dir ki si nou anons sa bon nouvel plennman dan sa ptigin letan ki reste, nou pou sov nou lekor ek tou bann ki ekout nou.—1 Tim. 4:16.
12. Ki lasirans nou annan?
12 Nou rekonnet ki lafen i kapab arive nenport ler; Zeova pa oblize esper ziska ler sak dimoun lo later i ganny en temwannyaz personnelman. (Mat. 10:23) Deplis, nou ganny bon gidans lo konman nou pou fer nou travay predikasyon dan en fason efikas. Nou partisip dan sa travay avek lafwa e nou fer nou mye dapre nou abilite e nou servi tou resours ki dan nou dispozisyon. Eski nou pou toultan pres dan en teritwar ki prodiktif? Eski i posib pour nou konn sa davans? (Lir Eklezyast 11:5, 6. *) Nou travay se pour prese avek konfyans ki Zeova pou beni nou zefor. (1 Kor. 3:6, 7) Nou kapab annan lasirans ki i vwar sa bann gran zefor ki nou pe fer e atraver son lespri sen, i pou donn nou nenport gidans spesifik ki nou bezwen.—Ps. 32:8.
Rod lespri sen
13, 14. Ki mannyer lespri sen Bondye in demontre son kapasite pour ed bann serviter Bondye?
13 Me si nou santi nou pa ase kalifye pour fer en latas oubyen pour partisip dan sa travay predikasyon? Nou devret demann Zeova son lespri sen pour ed nou amelyor bann abilite ki nou deza annan dan son servis. (Lir Lik 11:13.) Lespri Bondye i kapab fer en dimoun kalifye pour fer en travay oubyen desarz en responsabilite dan servis malgre son leksperyans oubyen sirkonstans dan lepase. Par egzanp, zis apre ki zot ti sorti Lezip, lespri Bondye ti fer bann berze ek lesklav ganny laviktwar lo zot lennmi menm si zot ti napa okenn leksperyans dan lager. (Egz. 17:8-13) Zis en pti pe letan apre, sa menm lespri ti ed Betsalel ek Ooliab pour konstrir tanp an servan plan ki ti’n ganny fer par Bondye.—Egz. 31:2-6; 35:30-35.
14 Sa lespri pwisan ti ed bann serviter Bondye dan nou letan pour pran ka avek bezwen lorganizasyon kan i ti neseser pour zot annan zot prop sistenm lenprimri. Dan en let, Frer Robert Martin, sirveyan lizin dan sa letan ti eksplike kwa ki ti’n ganny akonplir ziska lannen 1927. “Senyer in ouver laport dan en moman apropriye; e sa gro masin lenprimri in vin dan nou lanmen, nou’n ganny sa masin menm si nou pa ti konn nanryen lo lafason ki i’n ganny fer oubyen fason ki i marse. Me Senyer i konnen ki mannyer pour fer marse lespri bann ki’n dedye zot lavi avek li. . . . Dan zis detrwa semenn, nou ti reisi fer sa masin marse; e i ankor pe marse. I pe fer travay ki ni menm bann dimoun ki’n fer li pa ti konnen si i ti kapab fer.” Zeova in kontinyen beni bann ki pe fer bokou zefor dan nou letan.
15. Ki mannyer Romen 8:11 i kapab ankouraz bann ki pe fer fas avek tantasyon?
15 Lespri sen Zeova i travay dan diferan fason. Tou serviter Zeova i kapab ganny lespri sen e i ed zot pour sirmont menm bann pli gran lobstak. Me si nou santi ki tantasyon i tro for? Nou kapab ganny lafors dan parol Pol ki dan Romen 7:21, 25 ek 8:11. Wi, “Lespri Bondye ki’n resisit Zezi,” i kapab travay lo nou osi par donn nou lafors pour nou lalit kont bann move dezir. Sa resi ti ganny ekrir pour bann Kretyen ki’n ganny swazir par lespri sen, me kantmenm sa, sa prensip i aplik pour tou serviter Bondye. Nou tou nou kapab ganny lavi par met lafwa dan Kris, fer zefor pour met a mor tou move dezir dan nou e viv annakor avek gidans lespri sen.
16. Ki nou devret fer pour ganny lespri sen Bondye?
16 Eski nou kapab ekspekte Bondye donn nou son lespri sen san ki nou fer okenn zefor? Non. Apard demann li son lespri sen atraver lapriyer, nou bezwen fer bokou zefor pour nouri nou lespri avek Parol enspire Bondye. (Prov. 2:1-6) An plis ki sa, lespri Bondye i avek kongregasyon Kretyen. Par asiste renyon regilyerman nou montre ki nou annan sa dezir pour “ekout sa ki lespri i dir” avek kongregasyon. (Rev. 3:6) Deplis, nou bezwen azir avek limilite annakor avek sa ki nou aprann. Proverb 1:23 i donn nou sa konsey: “Aksepte mon disiplin e revin ver mwan. Mon pou devers mon lespri annabondans lo ou.” Byensir, Bondye i donn son lespri sen “tou bann ki obeir li” konman dirizan.—Akt 5:32.
17. Avek kwa nou kapab konpar lefe benediksyon Bondye lo nou zefor?
17 Fer bokou zefor i enportan pour nou ganny benediksyon Bondye, me nou bezwen osi mazinen ki sa bann bon keksoz ki Zeova in donn son pep annabondans pa depan zis lo nou travay. Lefe son benediksyon lo nou zefor i kapab ganny konpare avek lafason nou lekor i benefisye avek en bon manze. Bondye in kree nou dan en fason ki nou kapab apresye e an menm tan benefisye avek sa ki nou manze. I osi donn nou sa manze. Nou pa konn egzakteman ki mannyer nou manze i vin nourisan e laplipar nou pa kapab eksplike ki mannyer nou lekor i prodwir lenerzi an servan sa ki nou manze. Nou zis konnen ki sa prosesis i marse e nou korpere par kontinyen manze. Si nou swazir pour manz manze nourisan, nou pou ganny en pli bon rezilta. Pareyman, Zeova i dir nou sa ki nou merit fer pour ganny lavi eternel e i ed nou pour nou kapab fer sa ki i demande. I kler ki i donn nou bokou led e i merit ganny loue. Kantmenm sa, nou bezwen korpere avek li par azir an armoni avek son lavolonte pour nou kapab ganny son benediksyon.—Aga. 2:18, 19.
18. Ki ou determinen pour fer e akoz?
18 Alor, nenport ki travay ki ou ganny demande pour fer, fer li avek tou ou leker. Toultan depan lo Zeova pour ou kapab reisi. (Mark 11:23, 24) An menm tan ki ou fer sa, asire ki tou dimoun “ki rode i trouve.” (Mat. 7:8) Bann ki’n ganny swazir par lespri sen pou ganny beni avek “kouronn lavi” dan lesyel. (Zak 1:12) “Lezot mouton” Kris ki pe fer zot mye pour ganny en benediksyon atraver desandans Abraam pou vreman kontan pour tann Li dir: “Vini, zot ki mon Papa in beni! Vin erit Rwayonm ki’n ganny prepare pour zot depi kreasyon lemonn.” (Zan 10:16, NW; Mat. 25:34) Wi, “bann ki pe ganny beni par [Bondye] zot menm ki pou posed later, . . . e zot pou reste lo la pour touzour.”—Ps. 37:22, 29.
[Not anba lo paz]
^ par. 3 Proverb 10:6, 7: “Benediksyon i pour latet sa enn ki drwat, me labous bann mesan i kasyet zot lentasyon vyolan. Sa enn ki drwat pa pou ganny oubliye e i pou ganny beni, me non bann mesan pou pouri.”
^ par. 4 Deterononm 28:45-47: “E tou sa bann malediksyon pou sirman ariv lo ou e swiv ou e i pou zwenn ou ziska ki ou ganny detrir, akoz ou pa ti ekout lavwa Zeova ou Bondye par gard son bann komannman ek son bann lord ki in konmann ou. E zot pou reste lo ou ek ou bann zanfan konman en sinny pour en letan endefini. Akoz ou pa’n servi Zeova ou Bondye avek lazwa dan ou leker pour tou sa ki zot annan annabondans.”
^ par. 5 Deterononm 15:7, 8: “An ka enn ou bann frer dan enn ou lavil, dan later ki Zeova ou Bondye pe donn ou, i vin pov, ou pa devret andirsi ou leker oubyen refize pour ed ou pov frer. Akoz ou merit ouver ou lanmen avek zenerozite anver li e pa ezite pour pret li kantite ki i bezwen lo en garanti, sa ki i anvi.”
^ par. 10 Zenez 32:24-29: “Finalman Zakob ti li tousel. Apre en zonm ti konmans lit avek li ziska lizour ti fer. Letan i ti vwar ki i pa ti pe ganny laviktwar lo li, i ti tous zwentir son laans e deranz laans Zakob pandan ki i ti pe lalit avek li. Apre sa i ti dir: ‘Les mwan ale, akoz lizour in fer.’ Alor i ti dir: ‘Mon pa pou les ou ale ziska ki ou beni mwan avan.’ Alor i ti dir avek li: ‘Ki mannyer ou apele?’ e i ti reponn: ‘Zakob.’ Apre i ti dir: ‘Ou non pou nepli Zakob me Izrael, akoz ou’n batay avek Bondye ek zonm ki finalman ou’n vin venker.’ An retour Zakob ti demann li an dizan: ‘Silvouple dir mwan ki mannyer ou apele?’ Par kont i ti dir: ‘Akoz ou pe demann mwan mon non?’ Apre sa i ti beni li.”
^ par. 12 Eklezyast 11:5, 6: “Zis parey ou pa konn fason lespri i travay dan lezo sa zanfan ki dan vant sa madanm ki ansent, pareyman ou pa konn travay sa vre Bondye, li ki fer tou keksoz. Dan bomaten senm ou lagrenn e ziska aswar pa les ou lanmen repoze; parski ou pa konnen kote i pou reisi, si isi oubyen laba, ouswa si tou le de pou bon menm.”
Eski ou kapab eksplike?
• Ki savedir vre lobeisans?
• Ki ou bezwen fer pour ganny benediksyon Bondye?
• Ki mannyer nou kapab ganny lespri sen Bondye, e ki mannyer i kapab travay dan nou?
[Kestyon]
[Portre lo paz 12]
Zakob ti lalit avek en lanz pour ganny benediksyon Zeova.
Eski ou osi ou pe fer bokou zefor?
[Portre lo paz 13]
Lespri sen Bondye ti ed Betsalel ek Ooliab pour fer byen