Ñañehaʼãmbaitékena Jehová ñanderovasa hag̃ua

‘Ñandejára omyengovia porã umi chupe ohekávape.’ (HEB. 11:6, BNP)

1, 2. a) Mbaʼe mbaʼépa ojapo heta tapicha oipotágui Ñandejára ohovasa chupekuéra? b) Mbaʼérepa jaipotaiterei Jehová ñanderovasa?

 “ÑANDEJÁRA tanderovasa!” Péicha heʼi heta tapicha oagradese jave peteĩ mbaʼe ojejapóvare chupe. Avei umi paʼi ohovasa jepi umi héntepe térã oimeraẽ mbaʼe. Heta tapicha katu mombyrymbyry oguata opaga hag̃ua ipromésa oipotágui Ñandejára ovendesi chupekuéra. Ha umi polítiko jepe ojerure Ñandejárape tohovasa hetã. Péro ikatúpa jaʼe oĩ porãha koʼã mbaʼe haʼekuéra ojeruréva? Ohendúpa chupekuéra Ñandejára? Máva mávapepa ohovasa Jehová, ha mbaʼérepa?

² La Bíbliape ojeʼevaʼekue koʼã ára pahápe oĩtaha heta tapicha opa tetãygua ipyʼaguapy ha hekopotĩva, omombeʼútava oparupiete pe marandu porã, oĩramo jepe hénte aña oñemoĩ mbaretéva hesekuéra (Isa. 2:2-4; Mat. 24:14; Rev. 7:9, 14). Ñañemeʼẽvo Ñandejárape jaʼevaʼekue jaikotaha ko profesíape heʼiháicha. Péro Jehová nañanderovasáiramo ni mbaʼevéicharõ ndaikatumoʼãi ñakumpli upéva (Sal. 127:1). Upévare iporã ñañeporandumi: Mbaʼépa jajapovaʼerã Ñandejára ñanderovasa hag̃ua?

Umi iñeʼẽrendúva ohupyty heta mbaʼe porã

3. Mbaʼépa ohupytyvaʼerãmoʼã umi Israelgua iñeʼẽrendúrire Jehovápe?

³ (Jaleemína Proverbios 10:6, 7.) Oike mboyvemi pe Yvy Oñeprometevaʼekuépe, Jehová heʼi umi Israelguápe iñeʼẽrendúramo chupe oiko porãtaha hikuái, ha haʼe voi oñangarekotaha hesekuéra. Ñandejára ndahaʼéi ku  heʼínteva: ‘Pende ári hoʼavaʼerã koʼã vendisión’, síno opromete voi chupekuéra katuete ‘ohupytytaha’ umi mbaʼe porã. Upéva ohechauka Jehová okumplitaha iñeʼẽ ha ndaipóri ojokovaʼerã chupe (Deu. 28:1, 2, ÑÑB).

4. Mbaʼéichapa jahechauka ñaneñeʼẽrenduha Jehovápe ñande pyʼaite guive?

⁴ Umi Israelgua ojapovaʼerã Ñandejára Léi heʼíva ‘pyʼarory ha vyʼápe’, péichamante Haʼe oguerohorýta chupekuéra (jaleemína Deuteronomio 28:45-47). Jehová ningo ndoipotái ñaneñeʼẽrendu chupe ñakumpli hag̃uánte. Jaikuaaháicha umi mymba ha umi demónio jepe ikatu iñeʼẽrendu oĩramo omandáva chupekuéra (Mar. 1:27; Sant. 3:3). Ñaneñeʼẽrendu hag̃ua Jehovápe ñande pyʼaite guive tekotevẽ jahayhu chupe ha vyʼapópe jajapo hembipota. Upearã jagueroviavaʼerã haʼe ndojeruremoʼãiha ñandéve peteĩ mbaʼe ikatuʼỹva jajapo; ha hiʼarive ‘omyengovia porãha umi chupe ohekávape’ (Heb. 11:6, BNP; 1 Juan 5:3).

5. Mbaʼéichapa umi Israelgua ojeroviáramo Jehováre okumplíta Deuteronomio 15:7, 8 heʼíva?

⁵ Umi Israelgua ojeroviáramo Jehováre kyreʼỹme ojapóta haʼe heʼíva. Pór ehémplo, jahechamína mbaʼépa Ñandejára ojerure chuguikuéra Deuteronomio 15:7, 8-pe. (Jaleemína.) Ojapóramo jepe tova pukúpe ko léi heʼíva, haʼekuéra oipytyvõtante avei umi oikotevẽvape. Péro ohechaukátapa péicha ohayhu ha omombaʼeha iñermanokuérape? Ha iñimportanteveha, ojekuaátapa hesekuéra ogueroviaha Jehová akóinte omeʼẽtaha chupekuéra oikotevẽva? Ohechaukáta péicha ovyʼaha ikatu haguére ipojera Jehová ojapoháicha? Nahaniriete katu! Jehová ohecha mbaʼépa oĩ umi Israelgua pyʼapýpe ha ipojeráramo hikuái, heʼi oipytyvõtaha chupekuéra osẽ porã hag̃ua opa mbaʼe ojapóvape (Deu. 15:10). Ojerovia añetéramo pe promésare, haʼekuéra katuete oipytyvõséta umi oikotevẽvape, ha Ñandejára omyengoviáta chupekuéra hetave mbaʼe porãme (Pro. 28:20).

6. Heʼiháicha Hebreos 11:6, mbaʼépa ojapóta katuete Jehová?

⁶ Hebreos 11:6 heʼi tekotevẽha jaguerovia Ñandejára omyengoviataha ñandéve umi mbaʼe porã jajapóva, péro avei ñanemboʼe ambue mbaʼe tekotevẽva jajapo haʼe ñanevendesi hag̃ua. Upépe heʼi Ñandejára omyengovia porãha umi ‘chupe ohekávape’. Griégo ñeʼẽme ko téysto ohechauka ñañehaʼãmbaitevaʼerãha jaheka Jehovápe. Ko versíkulo omombarete ñande jerovia heʼívo Jehová ikatuha ñanevendesi. Katuete ojapóta upéva haʼe ‘ndaijapúigui arakaʼeve’ (Tito 1:2, JMP). Ymaite guive Jehová ohechauka okumpliha oprometéva ha ikatuha jajerovia hese. Haʼe arakaʼeve nopyrũi iñeʼẽre! (Isa. 55:11.) Upéicharõ jajeroviákena Jehováre, haʼe katuete omyengoviáta ñandéve umi mbaʼe porã jajapóva.

7. Mbaʼépa jajapovaʼerã Jehová ñanevendesi hag̃ua Abrahán ñemoñare rupive?

⁷ La Bíbliape ojeʼevaʼekue Abrahán ñemoñare orekotaha mokõi párte: pe iñimportantevéva hína Jesucristo, ha ambue katu umi kristiáno ohótava yvágape, térã unhído. Koʼã unhídope oñemeʼẽ ko tembiapo: ‘Pemoherakuã Ñandejára rembiapo porãita, haʼe penerenoivaʼekue pesẽ hag̃ua pytũmbýgui ha peike haʼe oporohesapeha porãite asýpe’ (Gál. 3:7-9, 14, 16, 26-29; 1 Ped. 2:9). Umi kristiáno ohótava yvágape oñehenói avei ‘tembiguái jeroviaha ha iñarandúva’, ha Jesús omoĩ ipoguypekuéra opa mbaʼe orekóva. Ñandejára ñanevendesi hag̃ua tekotevẽ ñaneñeʼẽrendu chupekuéra (Mat. 24:45-47, NM). Ko ‘tembiguái jeroviaha’ nañanepytyvõiramo ndaikatumoʼãi ñantende Ñandejára Ñeʼẽ, ni jaikuaa mbaʼéichapa jaiporúta ñande rekovépe umi mbaʼe ñaaprendéva. Ha ñañehaʼãramo jajapo la Biblia heʼíva katuete Ñandejára ñanderovasáta.

Ñamotenondevaʼerã Ñandejára rembipota

8, 9. Mbaʼe mbaʼépa ojapo Jacob oipotágui Jehová ohovasa chupe?

⁸ Ojeʼévo ñañehaʼãmbaitevaʼerãha Ñandejára  ñanevendesi hag̃ua, ikatu ñanemanduʼa Jacob rehe. Haʼe ndoikuaaivaʼekue mbaʼéichapa oñekumplíta pe promésa Jehová ojapovaʼekue ijavuélo Abrahánpe. Péro ojerovia ijavuélo familiarégui oikotaha peteĩ tetã tuicháva Jehová heʼi haguéicha. Upévare áño 1781-pe (Jesús ou mboyve), Jacob oviaha táva Haránpe oheka hag̃ua hembirekorã. Oipota peteĩ kuñataĩ imbaʼeporãva, péro iñimportantevéva, ohayhuvaʼerã Jehovápe ha oñangareko porã vaʼerã ifamíliare.

⁹ Haránpe Jacob oikuaa peteĩ mitãkuña hérava Raquel, ha ojegusta hese. Haʼe heʼi Raquel túvape ombaʼapotaha chupe 7 áño omenda hag̃ua itajýrare. Jacob ndahaʼéi ku omendáva ohayhúguinte pe kuñataĩme. Haʼe oikuaa porã mbaʼépa opromete Jehová ijavuélo Abrahán ha itúva Isaácpe (Gén. 18:18; 22:17, 18; 26:3-5, 24, 25). Upe rire itúva heʼi chupe: “[Ñandejára], pe Ipuʼakapáva, tanderovasa ha tanembotaʼýra heta, ha tanemboheta hetave ohóvo oiko peve ndehegui tetã tuicha ha hetaitereíva. [Ñandejára] tanderovasa ndéve ha ne ñemoñarenguérape ohovasa haguéicha Abrahánpe, reguereko hag̃ua ne mbaʼe teéramo pe yvy reikohápe, [Ñandejára] omeʼẽvaʼekue Abrahánpe” (Gén. 28:3, 4, ÑÑB). Jacob ohechauka mbaʼeichaitépa ojerovia Jehováre oñehaʼãmbaitévo oheka hembirekorã peteĩ oipytyvõtava chupe omongakuaa porã hag̃ua ifamília.

10. Mbaʼérepa Jehová ohovasa Jacóbpe?

¹⁰ Upéi Jacob omenda ha ifamília, péro haʼe noñehaʼãi ombyaty pláta omeʼẽ hag̃ua lúho hogayguakuérape. Upéva rangue omotenonde Jehová rembipota ha ohekomboʼe chupekuéra oiko hag̃ua tape porãre. Ojapo ikatúva guive Ñandejára ohovasa hag̃ua chupe, ombohováiramo jepe heta mbaʼe ijetuʼúva. Ituja rire jepe Jacob nokambiái, ha upévare Jehová ohovasa chupe (jaleemína Génesis 32:24-29).

11. Jaikuaágui ‘Ñandejára ára’ hiʼag̃uimaha, mbaʼépa ñañehaʼãmbaitevaʼerã jajapo?

¹¹ Jacóbpe ojehu haguéicha, ñande ndajaikuaaporãi avei mbaʼeichaitépa Ñandejára okumplíta hembipota. Péro ñahesaʼỹijóvo Iñeʼẽ hesakã ñandéve mbaʼépa oikóta og̃uahẽ vove ‘Ñandejára ára’ (2 Ped. 3:10, 17, BNP). Pór  ehémplo, ndajaikuaái arakaʼetépa og̃uahẽta, péro jaikuaa hiʼag̃uimbaitemaha. Upévare koʼág̃a ñañehaʼãmbaitevaʼerã japredika oparupiete. Jajapóramo upéva jajesalváta ñande ha umi ñanerendúva avei (1 Tim. 4:16).

12. Mbaʼépa ojapóta katuete Jehová?

¹² Ñande jaikuaa Ñandejára ára og̃uahẽtaha oimeha órantema. Jehová odesidíma arakaʼetépa, ha nohaʼarõmoʼãi japredikapa raẽ opavave tapichápe oĩva ko yvy ape ári (Mat. 10:23). Upéicharamo jepe, Jehová ñanembokatupyry japredika hag̃ua hekoitépe. Jajeroviágui hese ñañemeʼẽmbaite jajapóvo ko tembiapo ha upearã jaiporu ñane tiémpo, ñane mbaretekue, viru ha opa mbaʼe jarekóva. Oĩnepa gueteri heta tapicha odesidítava oservi Ñandejárape? Ndajaikuaái ningo upéva (jaleemína Eclesiastés 11:5, 6). Péro ñande japredikavaʼerã, jajeroviágui Jehová katuete ohovasataha ñane rembiapo (1 Cor. 3:6, 7). Haʼe ohecha mbaʼeichaitépa ñambaʼapo ha ijespíritu rupive ñanembokatupyry ñaikotevẽhápe (Sal. 32:8).

Jajerurékena Jehovápe ijespíritu sánto

13, 14. Mbaʼéichapa Jehová ohechauka ikatuha ombokatupyry isiervokuérape ijespíritu rupive?

¹³ Péro mbaʼépa jajapokuaa ijetuʼúramo ñandéve japredika téra jajapo ambue tembiapo kongregasiónpe? Upéicharõ jajerurevaʼerã Jehovápe tañanepytyvõ ijespíritu rupive (jaleemína Lucas 11:13). Jehová ombokatupyry hembiguaikuérape ikatu hag̃uáicha ojapo heta mbaʼe iservísiope ijetuʼúramo jepe chupekuéra. Jahechamína mbaʼéichapa oipytyvõvaʼekue umi Israelguápe. Haʼekuéra oĩrõ guare Egíptope oñangareko ovecháre ha ombaʼapo tembiguáiramo. Péro osẽ riremi upégui Jehová espíritu oipytyvõ chupekuéra ipuʼaka hag̃ua iñenemigokuérare (Éxo. 17:8-13). Upéi pe espíritu sánto ombokatupyry avei Bezalel ha Oholiábpe ojapo hag̃ua umi mbaʼe oñekotevẽtava Ñandejára tavernákulope (Éxo. 31:2-6; 35:30-35).

¹⁴ Ñane tiémpope avei ko espíritu imbaretetéva oipytyvõ Ñandejára siervokuérape. Pór ehémplo, oñepyrũtaramo guare oñeimprimi umi puvlikasión haʼekuéra ndaikatupyryivaʼekue ojapo hag̃ua upe tembiapo. Áño 1927-pe, peteĩ kártape pe ermáno omoakãva imprénta hérava Robert J. Martin heʼi: “Ñandejára orepytyvõ roikotevẽve jave. Oñemeʼẽkuri oréve peteĩ mákina rojapo hag̃ua umi puvlikasión ha ndoroikuaái mbaʼéichapa roiporúta. [...] Péro upéi sapyʼaitépe romombaʼapokuaáma ha koʼág̃a peve ideprovécho oréve. Umi ojapovaʼekue pe mákina ni noimoʼãi hetaite mbaʼe rojapotaha pype. Péicha rohecha Ñandejára  ñanembokatupyryha ñañemeʼẽmbaitéramo jajapo hag̃ua hembipota”. Ha koʼág̃a peve Jehová ñanderovasa ñañehaʼãmbaitéramo iservísiope.

15. Mbaʼéichapa ñanemokyreʼỹ Romanos 8:11 oiméramo ñanekangy?

¹⁵ Pe espíritu sánto ñanepytyvõ avei hetave mbaʼépe. Ára ha ára ñambohovái umi mbaʼe ijetuʼuetereíva, pór ehémplo, heta vése jajejokopaitevaʼerã ani hag̃ua jajapo ivaíva. Péro mbaʼépa jajapokuaa oiméramo ñañandu ñanekangyha ha ndaikatuvéima jajejoko? Ikatu jajepyʼamongeta Pablo ohaivaʼekuére Romanos 7:21, 25 ha 8:11-pe. Jahechaháicha koʼã versíkulope, ‘Ñandejára espíritu omoingove jey vaʼekue Jesucrístope omanóva apytégui’. Ko espíritu avei ñanemombaretéta ani hag̃ua jaʼa pekádope. Ojehaíramo jepe umi unhídope g̃uarã, koʼã téysto oipytyvõ entéro kristiánope. Jahupyty hag̃ua jeikove opaveʼỹva jajeroviavaʼerã Jesucrístore, ñañehaʼã jaipeʼa ñande pyʼapýgui umi mbaʼe vai ha jaheja pe espíritu sánto ñanesãmbyhy.

16. Mbaʼépa jajapovaʼerã Jehová omeʼẽ hag̃ua ñandéve ijespíritu?

¹⁶ Jaipotáramo Jehová omeʼẽ ñandéve espíritu sánto, jakuʼevaʼerã. Jajerurevaʼerã chupe ijespíritu ha jaipyguara Iñeʼẽ ára ha ára (Pro. 2:1-6). Ñandejára espíritu oĩ avei rreunionhápe ha upévare ndajafaltaivaʼerã. Péicha jahechauka ñahenduseha ‘pe espíritu sánto heʼíva kongregasionkuérape’ (Rev. 3:6, BNP). Tekotevẽ avei ñañemomirĩ ha jajapo ojeʼéva ñandéve. Proverbios 1:23 [ÑÑB] heʼi: ‘Pejevýke pehendu hag̃ua pokorrehi jave: péina ápe añohẽta che espíritu pende ári’. Péicha jahecha Jehová ‘omeʼẽha ijespíritu umi iñeʼẽrendúvape chupe’ (Hech. 5:32).

17. Mbaʼe rehépa ikatu ñambojoja Jehová vendisión?

¹⁷ Jehová ñanevendesi hag̃ua ningo ñañehaʼãmantevaʼerã. Péro umi mbaʼe porãita jahupytýva Haʼe jeýnte omeʼẽ ñandéve, ndahaʼéi ñañehaʼã rupínte jarekóva. Ñantende hag̃ua ñapensami mbaʼéichapa umi tembiʼu ideprovécho ñande retépe. Jehová omeʼẽ ñandéve umi tembiʼu ha ñandeapo ñaikũmby hag̃ua umi jaʼúva ha ñaneresãi. Péro ñañehaʼãramo jaiporavo umi tembiʼu iñaliméntova ha ojapo porãva ñanderehe, koʼýte ñaneresãivéta. Ñandejára heʼi mbaʼépa jajapovaʼerã jahupyty hag̃ua jeikove opaʼỹva ha ñanepytyvõ upearã. Upéicharõ jahechakuaavaʼerã Haʼe rupínte ikatuha jahupyty upéva ha ñamombaʼevaʼerã chupe upe haguére. Péro avei jajepytasovaʼerã ijykére ha jajapo hembipota; péicha añoite haʼe ñanderovasáta (Ageo 2:18, 19).

18. Mbaʼépa jajapovaʼerã, ha mbaʼérepa?

¹⁸ Upéicharõ, jajapókena ñande pyʼaite guive opa mbaʼe Jehová ojeruréva, ha jajerovia haʼe ñanepytyvõtaha ñakumpli hag̃ua (Mar. 11:23, 24). Ñanemanduʼáke opavave ‘ohekáva ojuhumantevaʼerãha’ (Mat. 7:8, NM). Umi unhído ohupytýta “jeikove opa ára g̃uarãva” yvágape (Sant. 1:12). Ha umi “ambue ovecha” oñehaʼãva ohupyty Ñandejára vendisión Abrahán ñemoñare rupive, ovyʼáta ohendúvo Jesús heʼiha chupekuéra: ‘Peju peẽ che Ru ohovasavaʼekue ha pereko pene mbaʼerã pe rréino ojepreparavaʼekue peẽme g̃uarã, yvyporakuéra oñepyrũ guive’ (Juan 10:16; Mat. 25:34, NM). Péicha “umi Ñandejára ohovasávape [...] opytapáne ko yvy, ha upépe haʼekuéra oikóne opa árape” (Sal. 37:22, 29).

Emyesakãmi

• Mbaʼéichapa jahechauka ñaneñeʼẽrenduha Jehovápe ñande pyʼaite guive?

• Mbaʼe mbaʼépa jajapovaʼerã Jehová ñanderovasa hag̃ua?

• Mbaʼépa jajapovaʼerã oñemeʼẽ hag̃ua ñandéve espíritu sánto? Ha mbaʼéichapa upe espíritu ñanepytyvõ?

[Porandu ñahesaʼỹijóva]

[Nóta oĩva taʼanga ndive páhina 9]

Jacob oñehaʼãmbaitevaʼekue Jehová ovendesi hag̃ua chupe

Ha ñande, ñañehaʼãpa avei upéicha?

[Nóta oĩva taʼanga ndive páhina 10]

Espíritu sánto ombokatupyry Bezalel ha Oholiábpe ojapo hag̃ua peteĩ tembiapo neporãva