Hanuot nga Pangitaa ang Pagpakamaayo ni Jehova

“Ginapadyaan [sang Dios] ang mga nagapangita sa iya sing hanuot.”—HEB. 11:6.

1, 2. (a) Ano ang ginahimo sang madamo nga tawo para mabaton ang pagpakamaayo sang Dios? (b) Ngaa dapat kita mangin interesado sa pagtigayon sang pagpakamaayo ni Jehova?

“KABAY nga pakamaayuhon ka sang Dios!” Amo sini ang masami nga ginasiling sang mga tawo kon himuan sila sing maayo sang iban. Ang mga klero sang nanuhaytuhay nga relihion nagapakamaayo ukon nagabendisyon sa mga tawo, mga sapat kag bisan sa mga butang nga wala sing kabuhi. Madamo ang nagakadto sa relihioso nga mga duog agod makabaton sing pagpakamaayo. Ang mga pulitiko pirme nagapangamuyo nga pakamaayuhon sang Dios ang ila pungsod. Sa banta mo nagakaigo bala ang ila ginapangabay? Ginasabat ayhan sila sang Dios? Sin-o gid bala ang ginapakamaayo sang Dios, kag ngaa?

² Si Jehova nagtagna nga sa katapusan nga mga adlaw, may yara sia matinlo kag mahidaiton nga katawhan gikan sa tanan nga pungsod nga magabantala sang maayong balita sang Ginharian sa tanan nga bahin sang duta walay sapayan sang mga pagdumot kag pagpamatok. (Isa. 2:2-4; Mat. 24:14; Bug. 7:9, 14) Kon isa kita sa mga nagbaton sina nga responsibilidad, kinahanglan gid naton ang pagpakamaayo sang Dios. Ngaa? Bangod kon wala ini, indi gid kita magmadinalag-on. (Sal. 127:1) Apang, paano naton matigayon ang pagpakamaayo sang Dios?

Ang mga Pagpakamaayo Magalambot sa mga Matinumanon

3. Ano kuntani ang resulta kon nangin matinumanon ang mga Israelinhon?

³ Basaha ang Hulubaton 10:6, 7. Sang manugsulod  na ang pungsod sang Israel sa Ginsaad nga Duta, nangako si Jehova nga maagom nila ang kahamungayaan kag proteksion kon tumanon nila sia. (Deut. 28:1, 2) Gani, ang mga pagpakamaayo ni Jehova pat-od gid nga matigayon ukon “magalambut” sa mga matinumanon sa iya.

4. Ano ang nadalahig sa kinabubut-on nga pagtuman?

⁴ Ano dapat ang panimuot sang mga Israelinhon sa ila pagtuman sa Dios? Ginapakita sang Kasuguan sang Dios nga wala sia nahamuot kon ang iya katawhan nagaalagad sa iya nga wala sing “kasadya kag kalipay sa tagiposoon.” (Basaha ang Deuteronomio 28:45-47.) Si Jehova wala nahamuot sa indi kinabubut-on nga pagtuman, kay bisan ang mga sapat kag mga demonyo nagahimo sini. (Mar. 1:27; Sant. 3:3) Ang kinabubut-on nga pagtuman sa Dios isa ka ekspresyon sang gugma. Ang isa nalipay sa paghimo sini bangod nagatuo sia nga ang mga sugo ni Jehova indi mabug-at kag “ginapadyaan niya ang mga nagapangita sa iya sing hanuot.”—Heb. 11:6; 1 Juan 5:3.

5. Paano ang pagtuo sa saad ni Jehova makabulig sa isa nga matuman ang sugo sa Deuteronomio 15:7, 8?

⁵ Binagbinaga kon paano mapakita sang isa ang iya pagtuo paagi sa pagtuman sang sugo sa Deuteronomio 15:7, 8. (Basaha.) Ang pagtuman sini bangod napilitan lang ang isa mahimo makahatag sang temporaryo nga kaumpawan sa imol, apang mapasanyog bala sini ang maayo nga kaangtanan sa tunga sang katawhan sang Dios? Labaw sa tanan, nagapakita bala ini sang pagtuo sa ikasarang ni Jehova nga amanan ang iya mga alagad, kag sing apresasyon sa pribilehiyo nga mailog ang kaalwan Niya? Wala gid! Makita sang Dios kon ang kaalwan nga ginapakita sang isa naghalin gid sa iya tagipusuon kag nangako sia nga pakamaayuhon ang tanan nga ginahimo sina nga tawo. (Deut. 15:10) Ang pagtuo sa sina nga saad magapahulag sa isa nga mangin mahinatagon kag magaresulta ini sa bugana nga mga pagpakamaayo.—Hulu. 28:20.

6. Ano ang ginapasalig sa aton sang Hebreo 11:6?

⁶ Luwas sa pagtuo nga si Jehova ang Manugpadya, ginapadaku man sang Hebreo 11:6 ang isa pa ka kinaiya nga kinahanglan naton agod matigayon ang pagpakamaayo sang Dios. Dumduma nga ginapadyaan ni Jehova ang mga ‘nagapangita sing hanuot sa iya.’ Sa orihinal nga lenguahe, ang tinaga nga gingamit nagapahangop sing tuman nga pagpanikasog. Makapalig-on gid ini nga teksto! Ginapakita sini nga kon manikasog kita sing tuman pakamaayuhon gid kita sang Dios. Ini nga saad naghalin sa matuod nga Dios, nga “indi makabutig.” (Tito 1:2) Ginpamatud-an niya sa sulod na sang linibo ka tuig nga ang iya mga saad masaligan gid. Ang iya pinamulong wala gid nagakapaslawan; pirme ini nagamadinalag-on. (Isa. 55:11) Gani, makasalig gid kita nga kon ipakita naton ang matuod nga pagtuo, pamatud-an man niya sa aton nga sia ang Manugpadya.

7. Paano naton matigayon ang pagpakamaayo paagi sa “binhi” ni Abraham?

⁷ Si Jesucristo amo ang panguna nga bahin sang “binhi” ni Abraham. Ang hinaplas nga mga Cristiano amo ang segundaryo nga bahin sinang gintagna nga “binhi.” Ginsugo sila nga ‘ipahayag sing lapnag ang pagkahalangdon sang isa nga nagtawag sa ila gikan sa kadudulman pakadto sa iya makatilingala nga kapawa.’ (Gal. 3:7-9, 14, 16, 26-29; 1 Ped. 2:9) Indi kita makalaum nga mangin suod kay Jehova kon balewalaon naton ang mga gintangdo ni Jesus sa pag-atipan sang iya mga pagkabutang. Kon wala ang bulig sang “matutom kag mainandamon nga ulipon,” indi naton mahangpan sing bug-os ang Pulong sang Dios ukon mahibaluan kon paano ini iaplikar. (Mat. 24:45-47) Paagi sa pag-aplikar sang aton natun-an gikan sa Kasulatan, makasalig kita nga mabaton naton ang pagpakamaayo sang Dios.

Padayon nga Himua ang Kabubut-on sang Dios

8, 9. Paano nanikasog ang patriarka nga si Jacob nahisuno sa saad sang Dios?

⁸ Ang isa nga nagpakita sing tuman nga pagpanikasog agod mabaton ang pagpakamaayo sang Dios amo ang patriarka nga si Jacob. Wala sia makahibalo kon paano matuman ang saad sang Dios kay Abraham, apang nagapati sia nga padamuon gid ni Jehova ang kaliwat sang iya lolo agod mangin isa ka daku nga pungsod. Gani, sang 1781 B.C.E., naglakbay si Jacob pakadto sa Haran agod mangita sing asawa. Wala lamang sia nangita sang isa ka maayo nga kaupod kundi nangita sia sang isa ka matutom nga sumilimba ni Jehova nga mangin maayo nga iloy sa iya kabataan.

 ⁹ Nahibaluan naton nga nakilala ni Jacob ang iya paryente nga si Raquel. Ginhigugma gid niya si Raquel kag nagpasugot sia nga magtrabaho sa amay sini nga si Laban sa sulod sang pito ka tuig agod mapangasawa niya si Raquel. Indi lamang ini istorya parte sa gugma. Pat-od gid nga nakahibalo si Jacob sang saad sang Labing Gamhanan nga Dios sa iya lolo nga si Abraham nga ginsaad man sa iya amay nga si Isaac. (Gen. 18:18; 22:17, 18; 26:3-5, 24, 25) Nian, si Isaac nagsiling kay Jacob: “Ang Dios nga Makaako magpakamaayo sa imo kag maghimo sa imo nga mabungahon kag magpabuad sa imo, agud nga manginkabon ka sang mga katawohan. Kabay maghatag sia sang pagpakamaayo ni Abraham sa imo kag sa imo mga kaliwatan upud sa imo, agud nga mapanubli mo ang duta sang imo mga pagpanlugayaw nga ginhatag sang Dios kay Abraham!” (Gen. 28:3, 4) Gani, ang pagpanikasog ni Jacob nga makakita sing maayo nga asawa kag makatigayon sang pamilya nagapakita nga nagatuo sia sa ginsaad ni Jehova.

10. Ngaa nahamuot si Jehova nga pakamaayuhon si Jacob?

¹⁰ Si Jacob wala nagkonsentrar sa pagtipon sing manggad para sa iya pamilya. Nakasentro ang iya hunahuna sa ginsaad ni Jehova sa iya mga kaliwat. Ang pinakaimportante sa iya amo ang katumanan sang kabubut-on ni Jehova. Determinado gid si Jacob nga himuon ang bug-os niya nga masarangan agod matigayon ang pagpakamaayo sang Dios walay sapayan sang mga balagbag. Wala nagbag-o ang iya panimuot tubtob nagtigulang sia, kag bangod sini ginpakamaayo sia ni Jehova.—Basaha ang Genesis 32:24-29.

11. Ano nga panikasog ang dapat naton himuon nahisuno sa ginpahayag nga kabubut-on sang Dios?

¹¹ Kaangay ni Jacob, wala kita makahibalo sang tanan nga detalye kon paano tumanon ni Jehova ang iya katuyuan. Apang paagi sa pagtuon sa Pulong sang Dios, makatigayon kita sing ideya kon ano ang mahanabo sa “adlaw ni Jehova.” (2 Ped. 3:10, 17) Halimbawa, wala kita makahibalo sang eksakto nga adlaw kon san-o ini magaabot, apang nahibaluan naton nga malapit na ini. Nagatuo kita sa ginasiling sang Pulong sang Dios nga paagi sa pagbantala sing maid-id sa malip-ot nga tion nga nabilin, maluwas naton ang aton kaugalingon kag ang mga nagapamati sa aton.—1 Tim. 4:16.

12. Sa ano kita makapat-od?

¹² Nahibaluan naton nga mahimo mag-abot ang katapusan sa bisan ano nga oras. Indi na kinahanglan nga hulaton pa ni Jehova nga mapanaksihan  ang kada indibiduwal antes niya pahanabuon ang iya gintalana nga tion. (Mat. 10:23) Apang, ginahanas kita sing maayo kon paano mangin epektibo sa pagbantala nga hilikuton. Bangod sang aton pagtuo, nagapakigbahin kita sa sini nga hilikuton sa aton bug-os nga masarangan, nga ginagamit ang aton mga pagkabutang. Paabuton bala naton nga mangin mabungahon pirme ang aton teritoryo? Indi kita makasiling. (Basaha ang Manugwali 11:5, 6.) Ang aton hilikuton amo ang pagbantala, kag nagasalig kita sa pagpakamaayo ni Jehova. (1 Cor. 3:6, 7) Makapat-od kita nga nakita ni Jehova ang aton tuman nga pagpanikasog kag tuytuyan niya kita paagi sa iya balaan nga espiritu.—Sal. 32:8.

Mangabay sang Balaan nga Espiritu

13, 14. Paano ginabuligan sang balaan nga espiritu sang Dios ang iya mga alagad?

¹³ Kamusta kon nagabatyag kita nga kulang ang aton ikasarang para tungdan ang isa ka asaynment ukon ang pagbantala nga hilikuton? Dapat kita mangabay kay Jehova sang iya balaan nga espiritu agod mapauswag naton ang aton ikasarang sa pag-alagad sa iya. (Basaha ang Lucas 11:13.) Ang espiritu sang Dios sarang makabulig sa isa nga mangin kalipikado para sa isa ka hilikuton ukon pribilehiyo sa pag-alagad bisan ano man ang iya kahimtangan kag inagihan. Halimbawa, sang paggua sang mga Israelinhon sa Egipto, nalutos sang mga manugbantay sang karnero kag mga ulipon ang ila mga kaaway bisan pa wala sila sing eksperiensia sa pagpakig-away bangod sa bulig sang espiritu sang Dios. (Ex. 17:8-13) Sang ulihi, ini man nga espiritu ang nagbulig kanday Bezalel kag Oholiab nga masunod ang matahom nga desinyo nga ginhimo sang Dios para sa iya tabernakulo.—Ex. 31:2-6; 35:30-35.

¹⁴ Inang gamhanan nga espiritu amo man ang nagbulig sa mga alagad sang Dios nga maatipan ang mga kinahanglanon sang organisasyon ilabi na sang tion nga kinahanglan na nila ang kaugalingon nga imprintahan. Sa iya sulat, ang manugtatap sang imprintahan nga si Utod R. J. Martin nagsugid kon ano ang nahimo nila sang 1927. “Sa iya nagakaigo nga tion, ginbuksan sang Ginuo ang ganhaan; kag nakatigayon kami sing kaugalingon nga rotary [press] bisan pa wala kami sing hinalung-ong kon paano ini i-asembol kag gamiton. Apang ang Ginuo nakahibalo gid kon paano hatagan sing kaalam ang mga tawo nga nagahimo sang ila bug-os nga masarangan para sa iya. . . . Sa sulod lang sang pila ka semana, napadalagan namon ang imprintahan; kag padayon ini nga ginagamit sa paagi nga bisan ang nakaimbento wala makahibalo sang masarangan sini himuon.” Tubtob karon padayon nga ginapakamaayo ni Jehova inang hanuot nga mga panikasog.

15. Paano ang Roma 8:11 makapalig-on sa mga ginasulay?

¹⁵ Ang espiritu ni Jehova nagapanghikot sa nanuhaytuhay nga paagi. Ini nga espiritu sarang matigayon  sang tanan nga alagad sang Dios kag nagabulig ini sa ila nga malandas ang mabudlay nga mga balagbag. Kamusta kon ginasulay kita? Ang ginsiling ni Pablo sa Roma 7:21, 25 kag 8:11 makapalig-on gid sa aton. Huo, “ang espiritu sang nagbanhaw kay Jesus gikan sa mga patay” magabulig sa aton. Hatagan kita sini sing kusog agod malandas naton ang aton mga kailigbon sa unod. Bisan pa ini nga teksto ginsulat para sa hinaplas nga mga Cristiano, ang prinsipio sini naaplikar man sa tanan nga alagad sang Dios. Matigayon naton tanan ang kabuhi paagi sa pagtuo kay Cristo, paagi sa pagpanikasog nga patyon ang aton sayop nga mga handum, kag paagi sa pagkabuhi nahisuno sa panuytoy sang espiritu.

16. Ano ang dapat naton himuon agod mabaton naton ang balaan nga espiritu sang Dios?

¹⁶ Makapaabot bala kita nga hatagan kita sang Dios sang iya aktibo nga puersa bisan wala kita sing panikasog nga himuon? Indi. Luwas nga ipangamuyo naton ini, dapat man naton tun-an sing maukod ang inspirado nga Pulong sang Dios. (Hulu. 2:1-6) Dugang pa, ang espiritu sang Dios yara sa Cristianong kongregasyon. Ang aton regular nga pagtambong sa mga miting nagapakita nga luyag gid naton “magpamati sa ginasiling sang espiritu sa mga kongregasyon.” (Bug. 3:6) Importante man nga mangin mapainubuson kita sa pag-aplikar sang aton natun-an. Ang Hulubaton 1:23 nagalaygay sa aton: “Liso kamo sa akon pagsabdong; yari karon, iula ko ang akon espiritu sa inyo.” Huo, ginahatagan sang Dios sing balaan nga espiritu ang “mga nagatuman sa iya subong manuggahom.”—Binu. 5:32.

17. Sa ano mapaanggid ang pagpakamaayo sang Dios sa aton mga panikasog?

¹⁷ Bisan pa kinahanglan naton ang hanuot nga panikasog agod mabaton ang pagpakamaayo sang Dios, dapat naton dumdumon nga indi lamang ini ang rason kon ngaa ginapakamaayo ni Jehova ang iya katawhan. Ang epekto sang pagpakamaayo ni Jehova sa aton mga panikasog mapaanggid naton sa benepisyo nga makuha naton sa masustansia nga pagkaon. Ang Dios nagdesinyo sang aton lawas nga makaapresyar sang pagkaon kag makakuha sang sustansia sa sini. Sia man ang nagaaman sing pagkaon. Wala kita makahibalo kon sa diin nagahalin ang sustansia sang aton pagkaon, ukon kon paano nagapatubas sing enerhiya ang aton lawas gikan sa aton ginakaon. Basta nakahibalo kita nga may proseso sa aton lawas nga nagapanghikot kag nagakooperar kita sa sini paagi sa pagkaon. Kon masustansia ang aton ginakaon, mangin mapagros kita. Sing kaanggid, may ginapatuman si Jehova para sa kabuhi nga walay katapusan, kag nagahatag sia sing bulig para matuman naton ini. Huo, si Jehova amo gid ang may daku nga papel sa sini kag takus gid nga dayawon. Apang, kinahanglan gihapon nga magkooperar kita sa iya kag magkabuhi suno sa iya kabubut-on agod matigayon ang iya pagpakamaayo.—Hag. 2:18, 19.

18. Ano ang imo determinasyon, kag ngaa?

¹⁸ Gani, bisan ano man nga asaynment ang ihatag sa imo, himua ini sing tinagipusuon. Mangayo pirme sing bulig kay Jehova agod magmadinalag-on ka. (Mar. 11:23, 24) Dumduma nga “ang tagsatagsa nga nagapangita makakita.” (Mat. 7:8) Ang mga hinaplas sang espiritu magabaton sang “purongpurong sang kabuhi” sa langit. (Sant. 1:12) Samtang ang “iban nga mga karnero” nga nagatinguha nga makabaton sing mga pagpakamaayo paagi sa binhi ni Abraham, malipay sa pagpamati sa Iya nga nagasiling: “Kari, kamo nga ginpakamaayo sang akon Amay, panublia ninyo ang ginharian nga gin-aman sa inyo kutob sa pagtukod sa kalibutan.” (Juan 10:16; Mat. 25:34) Huo, “ang mga ginpakamaayo sang [Dios] magapanubli sang duta, . . . kag magapuyo dira sa gihapon.”—Sal. 37:22, 29.

Mapaathag Mo Bala?

• Ano ang matuod nga pagkamatinumanon?

• Ano ang dapat naton himuon agod matigayon ang pagpakamaayo sang Dios?

• Paano kita makabaton sang balaan nga espiritu sang Dios, kag paano ini makapanghikot para sa aton?

[Mga Pamangkot sa Pagtinuon]

[Mga Retrato sa pahina 9]

Si Jacob nagpakigdumog sa anghel agod makatigayon sang pagpakamaayo ni Jehova.

Nagapanikasog ka man bala sing hanuot?

[Retrato sa pahina 10]

Ang balaan nga espiritu sang Dios amo ang nagbulig kanday Bezalel kag Oholiab nga mangin sampaton sa ila buluhaton