Sosa Lusakumunu ya Yehowa na Masonga Yonso
Sosa Lusakumunu ya Yehowa na Masonga Yonso
“Nzambi ke pesaka matabisi na bantu yina ke sosaka yandi [na masonga yonso, NW].”—BAEB. 11:6.
1, 2. (a) Inki mutindu bantu mingi kesosaka balusakumunu ya Nzambi? (b) Sambu na nki beto fwete tula dikebi mingimingi na kuzwa lusakumunu ya Yehowa?
“NZAMBI kusakumuna nge!” Na bansi yankaka, yo ke mpasi ve na kuwa muntu mosi ketuba mambu yai na muntu yankaka yina yandi mezaba ve kana yandi mesala nsia. Beto lenda mona bamfumu ya mabundu mingi kesakumuna bantu, bambisi, mpi bima ya kenikanaka ve. Bantu lenda sala banzyetelo na bisika yankaka ya lusambu ti kivuvu ya kuzwa lusakumunu. Bantu ya politiki kelombaka mbala na mbala lusakumunu ya Nzambi sambu na bansi na bo. Keti nge keyindula nde bisambu ya mutindu yai ya bantu kesalaka sambu na kulomba lusakumunu mefwana? Keti yo kebutaka mbuma? Nani mpenza kezwaka lusakumunu ya Nzambi, mpi sambu na nki?
2 Yehowa kutubaka na ntwala nde na bilumbu ya nsuka, yandi zolaka kuvanda ti bantu ya bunkete mpi ya ngemba yina zolaka kukatuka na makanda yonso mpi zolaka kusamuna nsangu ya mbote ya Kimfumu tii na bisika ya ntama ya ntoto ata na nsi ya kimbeni ti mbangika. (Yez. 2:2-4; Mat. 24:14; Kus. 7:9, 14) Bantu yina na kati na beto mendimaka mukumba ya kuvanda na kati ya bantu ya Nzambi kezolaka mpi kele ti mfunu ya lusakumunu ya Nzambi, sambu kukonda yo beto lendaka ve ata fyoti kuvanda ti kivuvu ya kununga. (Nk. 127:1) Kansi, nki mutindu beto lenda zwa lusakumunu ya Nzambi?
Bantu ya Bulemfu Kezwaka Balusakumunu Mingi
3. Inki zolaka kusalama kana bantu ya Izraele kulemfukaka na ndinga ya Nzambi?
3Tanga Bingana 10:6, 7. Ntangu fyoti na ntwala nde dikanda ya Izraele kukota na Ntoto ya Lusilu, Yehowa kumonisaka nde bo zolaka kuzwa kimvwama mingi mpi lutaninu kana bo lemfuka na ndinga na yandi. (Kul. 28:1, 2) Ee, Yehowa zolaka kusakumuna mingi mpenza bantu na yandi. Bantu yina ya bulemfu zolaka kuzwa mpenza balusakumunu.
4. Bulemfu ya kyeleka kelombaka inki?
4 Ti nki nkadilu yo lombaka nde bantu ya Izraele kulemfuka? Nsiku ya Nzambi kutubaka nde yandi zolaka kusepela ve kana bantu na yandi kusadila yandi ve “na kikesa ti na kiese.” (Tanga Kulonga 28:45-47.) Yehowa kelombaka ve nde beto lemfuka kukonda kuyindula na bantuma ya sikisiki, bonso bambisi to bademo kelemfukaka. (Mar. 1:27; Yak. 3:3) Kulemfuka na Nzambi na masonga yonso kele mutindu mosi ya kumonisa zola. Yo mesimbama na kyese yina kekatukaka na lukwikilu yina beto kevandaka na yo nde bansiku ya Yehowa kele kilo ve mpi nde yandi kekumaka muntu yina “ke pesaka matabisi na bantu yina ke sosaka yandi [na masonga yonso, NW].”—Baeb. 11:6; 1 Yoa. 5:3.
5. Inki mutindu kukwikila na lusilu ya Yehowa zolaka kusadisa muntu na kulemfuka na nsiku yina kele na Kulonga 15:7, 8?
5 Beto tadila balusakumunu yina bulemfu ya masonga ya mutindu yai vandaka kunatila bantu ya Izraele na ntangu bo vandaka kuzitisa nsiku yina kele na Kulonga 15:7, 8. (Tanga.) Kulemfuka na nsiku yai na bantima zole lendaka kunatila bansukami mwa mambote, kansi keti yo zolaka kusala nde bantu ya Nzambi kuvanda ti bangwisana ya mbote mpi ya kyese na kati na bo? Dyambu ya kuluta mfunu, keti yo zolaka kumonisa lukwikilu na makuki ya Yehowa ya kulungisa bampusa ya bansadi na yandi mpi ntonda sambu na dibaku ya kulanda mbandu ya kikalulu na yandi ya kukaba? Ata fyoti ve! Nzambi vandaka kutadila nkadilu ya ntima ya muntu yina kuvandaka mpenza ti kikalulu ya kukaba mpi kusilaka na kusakumuna yandi mpi kusala na mpila nde mambu na yandi yonso kubonga. (Kul. 15:10) Lukwikilu na lusilu yina zolaka kunata muntu na kusala kima mpi yo zolaka kunatila yandi balusakumunu mingi.—Bing. 28:20.
6. Inki dyambu Baebreo 11:6 fwete ndimisa beto?
6 Katula kukwikila na Yehowa bonso Nzambi yina kepesaka balusakumunu na bansadi na yandi, Baebreo 11:6 kebenda dikebi na kikalulu yankaka yina kele mfunu sambu na kuzwa lusakumunu ya Nzambi. Simba nde Yehowa kesakumunaka bantu yina “ke sosaka yandi na masonga yonso.” Ngogo ya kisina ya bo mesadila awa kepesa ngindu ya kusala bikesa ya ngolo. Verse yai fwete ndimisa beto mpenza! Kana beto sala bikesa ya masonga, beto tazwa lusakumunu. Yo kekatukaka na Nzambi mosi kaka ya kyeleka “yina ke tubaka luvunu ve.” (Tito 1:2) Yandi memonisaka na nsungi ya bamvula mingi kibeni nde mambu yina yandi kesilaka kele ya kutudila mpenza ntima. Mambu ya yandi ketubaka kebelaka ve; yo kelunganaka ntangu yonso. (Yez. 55:10, 11) Yo yina, beto lenda tula mpenza ntima nde kana beto monisa lukwikilu ya kyeleka, yandi takuma Muntu yina kepesaka lusakumunu sambu na beto.
7. Inki mutindu beto lenda zwa lusakumunu ya Nzambi na nzila ya “nkuna” ya Abrahami?
7 Yezu Kristu kele kitini ya ntetentete ya “nkuna” (NW) ya Abrahami. Bakristu ya kupakulama kele kitini ya zole ya “nkuna” yango yina bo tubilaka na ntwala. Bo mepesaka bo mukumba ya ‘kuzabisa bantu nsangu ya mambu ya nene ya yandi salaka. Yandi solaka bo sambu bo katuka na mpimpa, bo temuka na mwini na yandi ya kuyituka.’ (Gal. 3:7-9, 14, 16, 26-29; 1 Pie. 2:9) Beto lenda vanda ve ti bangwisana ya mbote ti Yehowa kana beto kezitisa ve bantu yina Yezu metulaka sambu na kukeba bima na yandi. Kukonda lusadisu ya “mpika ya kwikama mpi ya mayele,” (NW) beto zolaka ve ata fyoti kubakisa ntendula yonso ya mambu ya beto ketangaka na Ndinga ya Nzambi mpi kuzaba mutindu ya kusadila mambu yango. (Mat. 24:45-47) Na kusadilaka mambu yina beto kelongukaka na Masonuku, beto lenda zwa lusakumunu ya Nzambi.
Vanda Ntangu Yonso ti Luzolo ya Nzambi na Mabanza
8, 9. Inki mutindu tata ya mabuta Yakobi kusalaka kikesa sambu na kusala na kuwakana ti bisambu na yandi?
8 Dibanza ya kusala ngolo mpenza sambu na kuzwa lusakumunu ya Nzambi lenda yibusa beto Yakobi, tata ya mabuta. Yandi zabaka ve mutindu lusilu yina Nzambi pesaka Abrahami zolaka kulungana, kansi yandi kwikilaka nde Yehowa zolaka kukumisa mingi mpenza bana ya nkaka na yandi, ebuna bana yango zolaka kukuma dikanda mosi ya nene. Yo yina, na mvu 1781 N.T.B., Yakobi kukwendaka na Arani sambu na kusosa nkento. Yandi vandaka kutula ve dikebi kaka na kuzwa nkento mosi ya kitoko; kansi, yandi vandaka kusosa nkento yina vandaka kuzola mambu ya kimpeve, yina kuvandaka nsambidi ya Yehowa, mpi yina zolaka kuvanda mama ya mbote sambu na bana na yandi.
9 Beto mezaba nde Yakobi kukutanaka ti Rashele, muntu ya fami na yandi. Yakobi kumaka kuzola Rashele mpi kundimaka na kusadila tata na yandi, Labani, bamvula nsambwadi sambu na kukwela yandi. Yo vandaka kaka ve disolo mosi buna ya zola, yina bantu kevilaka ve. Ntembe kele ve nde Yakobi kuzabaka lusilu yina Nzambi Nkwa-Ngolo Yonso kusalaka na nkaka na yandi Abrahami mpi yina yandi vutukilaka dyaka na tata na yandi, Izaki. (Kuy. 18:18; 22:17, 18; 26:3-5, 24, 25) Na nima, Izaki kusongaka mwana na yandi Yakobi nde: “[Nzambi Nkwa-Ngolo Yonso, NW] kusakumuna dibala na nge, yandi pesa nge bana mingi; mpidina nge ta kuma tata ya makanda mingi ya bantu. Yandi sakumuna ti bana na nge, mutindu yandi pesaka Abrahami. Yandi pesa nge ntoto yai ya nge ke zingaka, ya yandi pesaka Abrahami.” (Kuy. 28:3, 4) Yo yina, bikesa yina Yakobi kusalaka sambu na kuzwa nkento ya mbote mpi kusala dibuta vandaka kumonisa nde yandi vandaka kutula ntima na mambu yina Yehowa kutubaka.
10. Sambu na nki Yehowa kusepelaka na kusakumuna Yakobi?
10 Yakobi vandaka ve kusosa kimvwama sambu na kulungisa bampusa ya dibuta na yandi. Mabanza na yandi kuvandaka na difwa na yandi. Yandi tulaka dikebi kaka na kulungana ya luzolo ya Yehowa. Yakobi kuvandaka ti lukanu ya kusala yonso yina yandi lendaka kusala sambu na kuzwa lusakumunu ya Nzambi ata yandi kutanaka ti mambu yina vandaka kukanga yandi nzila. Yandi taninaka nkadilu yina tii na kimununu na yandi, mpi Yehowa kusakumunaka yandi sambu na yo.—Tanga Kuyantika 32:25-30.
11. Inki kikesa beto fwete sala na kuwakana ti luzolo ya Nzambi yina yandi mesongaka beto?
11 Bonso Yakobi, beto mezaba ve mambu yonso ya ketadila kulungana ya lukanu ya Yehowa. Kansi, na ntangu beto kelongukaka Ndinga ya Nzambi, beto kebakisaka dibanza ya kimvuka ya mambu yina beto kevingila na yina metala “kilumbu” ya Yehowa. (2 Pie. 3:10, 17) Mu mbandu, beto mezaba ve na sikisiki yonso nki ntangu kilumbu yina takwisa, kansi beto mezaba nde yo mefinama. Beto kekwikilaka Ndinga ya Nzambi ntangu yo ketubaka nde kana beto keta kimbangi mbotembote na ntangu fyoti yina mebikala, beto tagulusa moyo na beto mosi mpi ya bantu yina kewaka malongi na beto.—1 Tim. 4:16.
12. Inki dyambu beto lenda ndima mpenza?
12 Beto kendimaka mpi kebakisaka nde nsuka lenda kwisa na konso ntangu yina; kalandrie ya Yehowa kele ve ti mfunu ya kuvingila nde konso muntu na ntoto kuwa nsangu. (Mat. 10:23) Dyaka, beto kebakaka lutwadisu ya mbote na mutindu ya kusala mbotembote kisalu na beto ya kusamuna. Ti lukwikilu, beto kesalaka kisalu yai na makuki na beto yonso, na kusadilaka bima yonso yina beto kele na yo. Keti beto tasamunaka ntangu yonso na teritware yina kebutaka mbuma? Ya kyeleka, inki mutindu beto lenda zaba yo na ntwala? (Tanga Longi 11:5, 6.) Kisalu na beto kele ya kusamuna, na kutulaka ntima nde Yehowa tapesa beto lusakumunu na yandi. (1 Kor. 3:6, 7) Beto lenda ndima mpenza nde yandi kemonaka bikesa ya beto kesalaka, mpi na nzila ya mpeve santu na yandi, yandi tapesa konso lutwadisu ya sikisiki yina beto kele na yo mfunu.—Nk. 32:8.
Sosa Mpeve Santu
13, 14. Inki mutindu makuki ya mpeve santu ya Nzambi ya kusadisa bansadi na yandi memonanaka?
13 Inki beto lenda sala kana beto keyindula nde beto mefwana ve na kulungisa mukumba mosi buna to na kusala kisalu ya kusamuna? Beto fwete lomba Yehowa na kupesa beto mpeve santu na yandi sambu na kutomisa konso makuki ya beto kele ti yo na kisalu na yandi. (Tanga Luka 11:13.) Mpeve ya Nzambi lenda pesa bantu makuki ya kusala kisalu to kulungisa mukumba mosi ya kisalu, kukonda kutadila mambu ya luzingu na bo ya ntete to eksperiansi na bo. Mu mbandu, ntangu fyoti kaka na nima ya Kubasika na Ezipte, mpeve ya Nzambi kusadisaka bangungudi mpi bampika na kubedisa bambeni na bo na bitumba, ata bo vandaka ve ti eksperiansi na mambu ya bitumba. (Kub. 17:8-13) Ntangu fyoti na nima, mpeve yina mosi kupesaka Besalele ti Oholiabi makuki ya kutunga nzo ya ntenta, na kulandaka bapula ya kitoko yina kukatukaka na Nzambi.—Kub. 31:2-6; 35:30-35.
14 Mpeve yina ya ngolo kupesaka bansadi ya Nzambi ya ntangu na beto makuki ya kulungisa bampusa ya organizasio ntangu yo kumaka mfunu na kuyantika kisalu na bo mosi ya kunyema mikanda. Na mukanda mosi, Mpangi R. J. Martin, yina vandaka kutwadisa kisalu ya kunyema mikanda na ntangu yina, kutendulaka mambu yina bo salaka na 1927. “Na ntangu ya mbote, Mfumu kukangulaka kyelo; mpi masini mosi ya nene ya kunyema mikanda kukwisilaka beto na maboko, yo kwisaka na maboko ya bantu yina kuzabaka ata kima mosi ve ya metala mutindu bo salaka masini yango mpi mutindu yo kesalaka. Kansi, Mfumu mezaba mutindu ya kuyedisa mabanza ti makuki ya bantu yina mekudipesaka ya mvimba na yandi. . . . Na bamposo fyoti mpenza, beto nungaka na kusala na mpila nde masini yina kusala; mpi yo kelanda kusala kisalu yina ata bantu yina kusalaka masini yango kuzabaka ve ata fyoti nde yo lendaka kusala kisalu yina.” Yehowa kelanda na kusakumuna bikesa ya masonga ya mutindu yai tii bubu yai.
15. Inki mutindu Roma 8:11 lenda pesa kikesa na bantu yina kekutana ti mpukumuna?
15 Mpeve ya Yehowa kesalaka na mitindu mingi. Bansadi yonso ya Nzambi lenda baka mpeve yina, mpi yo kesadisaka bo na kununga mambu ya nene ya kekangaka bo nzila. Inki beto lenda sala kana mpukumuna mosi kelutila beto? Beto lenda baka kikesa na bangogo ya Polo yina kele na Roma 7:21, 25 mpi 8:11. Ee, ‘mpeve ya Nzambi yina tedimisaka Yezu na lufwa’ lenda sala sambu na mambote na beto mpi kupesa beto ngolo ya kununga bitumba yina beto kenwana ti bampusa ya kinsuni. Polo kusonikaka verse yai sambu na Bakristu ya kupakulama na mpeve, kansi munsiku yango ketadila bansadi yonso ya Nzambi. Beto yonso tabaka luzingu kana beto kemonisa lukwikilu na Kristu, kesala ngolo sambu na kufwa bampusa ya mbi, mpi kezinga na kuwakana ti lutwadisu ya mpeve.
16. Inki beto fwete sala sambu na kuzwa mpeve santu ya Nzambi?
16 Keti beto lenda vingila nde Nzambi kupesa beto ngolo na yandi ya kisalu kukonda nde beto sala ata kikesa mosi? Ve. Katula kusamba sambu na yo, beto fwete tangaka Ndinga ya kupemama ya Nzambi na kikesa yonso. (Bing. 2:1-6) Dyaka, mpeve ya Nzambi kevandaka na dibundu ya Bukristu. Ntangu beto kekwendaka mbala na mbala na balukutakanu, beto kemonisaka mpusa na beto ya kuwa “mambu yai ya Mpeve ya Nzambi ke tuba na badibundu!” (Kus. 3:6) Dyaka, beto fwete sadila mambu yina beto kelongukaka na kudikulumusa yonso. Bingana 1:23 kelongisila beto nde: “Beno wa kana mono ke nganina beno; mono ta pesa beno malongi ya mbote, mono ta songa beno mayele na mono.” Ya kyeleka, Nzambi kepesaka mpeve santu na yandi “na bantu yina ke lemfukaka na yandi” bonso Mfumu.—Bis. 5:32.
17. Na nki beto lenda fwanisa bupusi ya lusakumunu ya Nzambi na bikesa na beto?
17 Na ntangu yo kele mfunu na kusala bikesa ya masonga sambu na kuzwa lusakumunu ya Nzambi, yibuka nde kisalu ya ngolo yo mosi lenda vanda ve na kisina ya bima mingi ya kitoko yina Yehowa mepesaka bantu na yandi. Beto lenda fwanisa bupusi ya lusakumunu na yandi na bikesa na beto na mutindu nitu na beto kebakaka mambote na madya ya mbote. Nzambi kusalaka nitu na beto na mpila nde beto lenda sepela na madya mpi kubakila yo mambote. Yandi kepesaka mpi madya. Beto mezaba mpenza ve mutindu madya na beto kebakaka bima yina nitu na beto kevandaka na yo mfunu, mpi mingi na kati na beto lenda tendula ve mutindu nitu na beto kebakaka ngolo na madya ya beto kedyaka. Kana beto pona na kudya madya ya ketungaka nitu, mavimpi tavanda mbote kuluta. Mutindu mosi, Yehowa metulaka mambu yina yo kelomba kulungisa sambu na kuzwa luzingu ya mvula na mvula, mpi yandi kepesa beto lusadisu ya beto kele na yo mfunu sambu na kulungisa mambu yango. Yo kele pwelele nde yandi kesala kitini ya nene ya kisalu mpi yandi mefwana nde beto pesa yandi lukumu. Ata mpidina, beto fwete sala kumosi ti Nzambi, na kuwakana ti luzolo na yandi sambu na kuzwa lusakumunu.—Agai 2:18, 19.
18. Inki kele lukanu na nge, mpi sambu na nki?
18 Yo yina, tula ntima na konso mukumba ya bo mepesa nge. Ntangu yonso, tula kivuvu na Yehowa sambu na kununga. (Mar. 11:23, 24) Na ntangu nge kesala yo, ndima nde “konso muntu yina ke sosaka mambu yina ya yandi ke na yo mfunu, yandi ta mona yo.” (Mat. 7:8) Nzambi tasakumuna Bakristu ya kupakulama na mpeve na kupesaka bo mpu ya “moyo” na zulu. (Yak. 1:12) “Mameme ya nkaka” ya Kristu, yina kesalaka ngolo sambu na kuzwa lusakumunu sambu na bo mosi na nzila ya nkuna ya Abrahami, tasepela na kuwa Yandi ketuba nde: “Beno bantu yai ya Tata na mono me sakumuna, beno kwisa. Beno kwisa kubaka Kimfumu ya yandi me yidikilaka beno katuka ntangu yandi salaka bima yonso.” (Yoa. 10:16; Mat. 25:34) Ee, “bantu yina ya Mfumu Nzambi me sakumunaka bo ta zinga na ngemba na ntoto, . . . yo ta vanda ya bo tii kuna.”—Nk. 37:22, 29.
Keti Nge Lenda Tendula?
• Bulemfu ya masonga kelombaka inki?
• Inki yo kelombaka sambu na kuzwa lusakumunu ya Nzambi?
• Inki mutindu beto lenda zwa mpeve santu ya Nzambi, mpi nki mutindu yo lenda sala sambu na mambote na beto?
[Bangyufula ya Disolo ya Kulonguka]
[Bifwanisu ya kele na lutiti 12]
Yakobi kunwanaka ti wanzyo mosi sambu na kuzwa lusakumunu ya Yehowa.
Keti nge mpi kesalaka kikesa ya masonga?
[Kifwanisu ya kele na lutiti 13]
Mpeve santu ya Nzambi kupesaka Besalele ti Oholiabi makuki ya kusala kisalu ya mbote mpenza