Tsoma Ditšhegofatšo tša Jehofa ka Phišego
Tsoma Ditšhegofatšo tša Jehofa ka Phišego
“[Modimo] e ba moputsi wa bao ba mo tsomago ka phišego.”—BAHEB. 11:6.
1, 2. (a) Batho ba bantši ba tsoma bjang ditšhegofatšo tša Modimo? (b) Ke ka baka la’ng re swanetše go kgahlegela go tšea karolo medirong e dirago gore re hwetše ditšhegofatšo tša Jehofa?
“MODIMO a go šegofatše!” Batho ba bolela mantšu a ge ba leboga motho yo a ba diretšego selo se sebotse. Baruti ba dikereke tše di fapa-fapanego ba šegofatša batho, diphoofolo le dilo tše dingwe tšeo di sa phelego. Batho ba bantši ba sepela maeto a matelele go ya dikerekeng tše dingwe gore ba šegofatšwe. Gantši bo-radipolitiki ba kgopela Modimo gore a šegofatše setšhaba sa bona. Na o nagana gore ke mo go swanetšego go kgopela ditšhegofatšo ka tsela e bjalo? Na ke tša kgonthe? Ke bomang bao ge e le gabotse ba hwetšago ditšhegofatšo tša Modimo, gona ka baka la’ng?
2 Jehofa o boletše e sa le pele gore mehleng ya bofelo o tla ba le batho ba hlwekilego le ba khutšo bao ba tšwago ditšhabeng ka moka, bao ba tlago go bolela ditaba tše dibotse tša Mmušo go fihla magomong a lefase go sa šetšwe lehloyo le kganetšo. (Jes. 2:2-4; Mat. 24:14; Kut. 7:9, 14) Rena bao re amogetšego boikarabelo bja go phelela mantšu a ao a buduletšwego re nyaka gore Modimo a re šegofatše, ka gobane ka ntle le moo re ka se atlege. (Ps. 127:1) Eupša re ka hwetša bjang ditšhegofatšo tša Modimo?
Ditšhegofatšo di Tlela Bao ba Kwago
3. Go kwa ga Baisiraele go be go tla ba le mafelelo afe?
3 Bala Diema 10:6, 7. Pejana ga ge setšhaba sa Isiraele se ka tsena Nageng ya Kholofetšo, Jehofa o ile a se botša gore se tla atlega le go šireletšwa ge e ba se ka kwa lentšu la gagwe. (Doit. 28:1, 2, PK) Ditšhegofatšo tša Jehofa di be di ka se fo tlela batho ba Modimo eupša di be di tlo ba “fihlela.” Bao ba kwago ba be ba tla tlelwa ke ditšhegofatšo e le ka kgonthe.
4. Go kwa e le ka kgonthe go akaretša’ng?
4 Baisiraele ba be ba swanetše go kwa ka tsela efe? Molao wa Modimo o ile wa bontšha gore o be a ka se kgahlišwe ke ge batho ba gagwe ba palelwa ke go mo hlankela “ka thabô le ka pelo e wilexo.” (Bala Doiteronomio 28:45-47.) Jehofa ga a kgahlišwe ke ge re fo latela melao e itšego, go etša ge go be go ka dirwa le ke diphoofolo le batemona. (Mar. 1:27; Jak. 3:3) Go kwa Modimo e le ka kgonthe ke pontšho ya gore re a mo rata. Re bontšha seo ka lethabo leo le tutuetšwago ke tumelo ya gore melao ya Jehofa ga e boima le gore “e ba moputsi wa bao ba mo tsomago ka phišego.”—Baheb. 11:6; 1 Joh. 5:3.
5. Go bota dikholofetšo tša Jehofa go be go tla tutueletša motho bjang go kwa molao o lego go Doiteronomio 15:7, 8?
5 Ela hloko kamoo go kwa ka potego go ka bago go ile gwa bontšhwa ka gona ka go latela molao o begilwego go Doiteronomio 15:7, 8. (Bala.) Go ka direga gore go latela molao wo ka bolokologi go ile gwa hola badiidi, eupša na go be go tla dira gore batho ba Modimo ba be le ditswalano tše dibotse? Sa bohlokwa le go feta, na e be e tla ba go bontšha tumelo bokgoning bja Jehofa bja go nea bahlanka ba gagwe tšeo ba di hlokago le go leboga sebaka se sebotse sa go ekiša mokgwa wa gagwe wa go ba le seatla se se bulegilego? Ga go bjalo le gatee! Modimo o be a lemoga boemo bja pelo bja motho yo a nago le seatla se se bulegilego gomme a holofetša gore o tla mo šegofatša medirong ya gagwe ka moka le moo a išago seatla gona. (Doit. 15:10) Go ba le tumelo kholofetšong e bjalo go tla dira gore ba tšee kgato gomme seo sa feleletša ka ditšhegofatšo tše dintši.—Die. 28:20.
6. Baheberu 11:6 e swanetše go re kgonthišetša’ng?
6 Go tlaleletša go beng le tumelo go Jehofa bjalo ka Moputsi, Baheberu 11:6 e gatelela seka se sengwe seo se nyakegago gore re hwetše ditšhegofatšo tša Modimo. Ela hloko gore Jehofa o putsa “bao ba mo tsomago ka phišego.” Leleme la mathomo leo le dirišitšwego mo le šupa maitekong a magolo le ao a tiilego. Ruri se se re kgonthišetša gore ditšhegofatšo tše ke tša kgonthe! Mothopo wa tšona ke Modimo a nnoši wa therešo “yo a ka se kego a aketša.” (Tito 1:2) Go theoša le nywaga o bontšhitše gore seo a se holofetšago se ka botwa. Seo a se bolelago ga se ke se folotša; ka mehla se a phethagala. (Jes. 55:11) Ka gona ruri re ka holofela gore ge re bontšha tumelo ya kgonthe, o tla re bontšha gore ke Moputsi.
7. Ke’ng seo se ka dirago gore re hwetše ditšhegofatšo ka “peu” ya Aborahama?
7 Jesu Kriste o ile a hlatsela gore ke karolo ya mathomo ya “peu” ya Aborahama. Bakriste ba tloditšwego ba bopa karolo ya bobedi ya “peu” e holofeditšwego. Ba laetšwe gore ba “bolele ka gohle mabothakga a yo a [ba] biditšego lefsifsing gomme a [ba] biletša seetšeng sa gagwe se se makatšago.” (Bagal. 3:7-9, 14, 16, 26-29; 1 Pet. 2:9) Re ka se letele gore re be le tswalano e botse le Jehofa ge e ba re hlokomologa bao Jesu a ba beilego gore ba hlokomele dilo tša gagwe. Ka ntle ga thušo ya “mohlanka yo a botegago le wa temogo,” le ka mohla re be re ka se kwešiše ka botlalo seo re se balago ka Lentšung la Modimo ra se tsebe le gore re se diriše bjang. (Mat. 24:45-47) Eupša Modimo a ka re šegofatša ge re diriša seo re ithutago sona Mangwalong.
Go Dula re Naganne ka Thato ya Modimo
8, 9. Mopatriareka o dirile dilo bjang ka go dumelelana le topo ya gagwe?
8 Taba ya go katana ka matla go hwetša ditšhegofatšo tša Modimo e re gopotša ka mopatriareka Jakobo. O be a sa tsebe gore seo Modimo a se holofeditšego Aborahama se tla phethagala bjang, eupša o be a holofela gore Jehofa o tla godiša moloko wa rakgolokhukhu wa gagwe, woo ditlogolo tša wona di tla bago setšhaba se segolo. Ka gona, ka 1781 B.C.E., Jakobo o ile a ya Harane go ya go nyaka mosadi. O be a sa nyake feela motho yo e tla bago molekane yo mobotse; eupša o be a nyaka mosadi yo a rapelago Jehofa le yo a ratago dilo tša moya yo a tla bago mma yo mobotse baneng ba gagwe.
9 Re a tseba gore Jakobo o ile a kopana le Ragele wa leloko la gabo. O ile a rata Ragele gomme a dumela go šomela tatagwe, Labane, ka nywaga e šupago e le gore a ka hwetša mosadi. Ye e be e se feela kanegelo ya lerato. Jakobo o be a tseba gabotse seo Modimo Ramatla-ohle a se holofeditšego rakgolokhukhu wa gagwe Aborahama a ba a se holofetša le tatagwe, Isaka. (Gen. 18:18; 22:17, 18; 26:3-5, 24, 25) Ka baka leo, Isaka o boditše morwa wa gagwe Jakobo gore: “Modimo Ra-matla-ohle a Xo šexofatšê, a Xo atišê, a Xo ntšifatšê, O bê bontši bya dithšaba. Thšexofatšô yela ya Aborahama a e neê wêna, le bana ba xaxo ka wêna, xore naxa yé ya madiilêlô a xaxo e bê ya xaxo, yôna-yé ye Modimo a e filexo Aborahama.” (Gen. 28:3, 4) Maiteko ao Jakobo a a dirilego gore a hwetše mosadi yo a swanetšego le go ba le lapa a bontšhitše gore o be a bota seo Jehofa a se boletšego.
10. Ke ka baka la’ng Jehofa a ile a kgahlwa ke go šegofatša Jakobo?
10 Jakobo o be a sa inyakele mahumo gore a hlokomele lapa la gagwe. O be a naganne ka seo e bego e tla ba bohwa bja gagwe. O be a šeditše kudu go phethagatšwa ga thato ya Jehofa. Jakobo o be a ikemišeditše go dira sohle seo a ka se kgonago gore a hwetše ditšhegofatšo tša Modimo go sa šetšwe mapheko. O ile a dula a naganne ka seo go fihla a tšofala gomme Jehofa o ile a mo šegofaletša seo.—Bala Genesi 32:24-29.
11. Re swanetše go dira maiteko afe ka go dumelelana le thato ya Modimo yeo e utolotšwego?
11 Go swana le Jakobo, ga re tsebe ka botlalo kamoo merero ya Jehofa e tlago go phethagatšwa ka gona. Lega go le bjalo, ka go ithuta Lentšu la Modimo, re lemoga seo re swanetšego go se letela ka “letšatši la Jehofa.” (2 Pet. 3:10, 17) Ka mohlala, ga re tsebe gabotse gore letšatši leo le tla tla neng, eupša re a tseba gore le kgaufsi. Re bota seo Lentšu la Modimo le re botšago sona ge le bolela gore re tla iphološa le go phološa bao ba re theetšago ge re nea bohlatse ka botlalo nakong ye e nyenyane e šetšego.—1 Tim. 4:16.
12. Ke’ng seo re ka kgodišegago ka sona?
12 Re a lemoga gore bofelo bo ka tla nako e nngwe le e nngwe; nako ya Jehofa ga se ya ithekga ka gore re nee bohlatse go motho yo mongwe le yo mongwe mo lefaseng. (Mat. 10:23) Go feta moo, re newa tlhahlo e botse ya gore re dire modiro wa rena bjang ka tsela e atlegilego. Ka ge re e-na le tumelo, re tšea karolo modirong wo kamoo re ka kgonago ka gona, re diriša selo se sengwe le se sengwe seo re nago le sona. Na re tla dula re dira boboledi tšhemong e tšweletšago kudu? Ge e le gabotse, re ka tseba bjang se e sa le pele? (Bala Mmoledi 11:5, 6.) Re dira modiro wa boboledi gomme re holofela gore Jehofa o tla re šegofatša. (1 Bakor. 3:6, 7) Re ka holofela gore o bona maiteko a rena a magolo gomme ka moya wa gagwe o mokgethwa, o tla re nea tlhahlo le ge e le efe e lebanyago yeo re e nyakago.—Ps. 32:8.
Go Tsoma Moya o Mokgethwa
13, 14. Gore moya o mokgethwa wa Modimo o kgona go dira gore batho ba swanelege go bontšhitšwe bjang?
13 Go thwe’ng ge e ba re ikwa re sa swanelege go phetha boikarabelo bja rena bja go tšea karolo modirong wa boboledi? Re swanetše go kgopela Jehofa gore a re nee moya wa gagwe o mokgethwa gore re kaonefatše bokgoni le ge e le bofe bjoo re nago le bjona tirelong. (Bala Luka 11:13.) Moya wa Modimo o ka dira gore batho ba swanelegele modiro goba tokelo ya tirelo go sa šetšwe maemo goba phihlelo ya bona ya nakong e fetilego. Ka mohlala, ka morago ga gore ba Huduge Egipita, moya wa Modimo o ile wa dira gore badiši le makgoba ba fenye manaba a bona ntweng le ge ba be ba se na phihlelo ditabeng tša ntwa. (Ek. 17:8-13) Lega go le bjalo, ka moragonyana wona moya woo o ile wa tutuetša Betsaliele le Oholiaba gore ba thale polane e botse, le e kgethwa bakeng sa go agwa ga tabarenakele.—Ek. 31:2-6; 35:30-35.
14 Moya o bjalo o matla o ile wa dira gore bahlanka ba Modimo ba mehleng yeno ba kgone go hlokomela dinyakwa tša mokgatlo ge go be go thoma go nyakega gore ba dire modiro wa go gatiša. Lengwalong la gagwe, Ngwanabo rena R. J. Martin, molaodi wa feketori wa nakong yeo, o hlalositše seo se ilego sa fihlelelwa ka 1927. “Ka nako e swanetšego, Morena o ile a bula mojako; gomme re ile ra hwetša motšhene o mogolo wa go gatiša, wa fihla go rena re sa tsebe selo ka go o lokiša le go o diriša. Eupša Morena o be a tseba kamoo a tlago go thuša bao ba ineetšego e le ruri go yena. . . . Dibekeng tše mmalwa tša go latela, re be re šetše re kgona go diriša motšhene woo gabotse; gomme le bjale o sa šoma, re dira modiro woo le mong wa motšhene wo a bego a sa tsebe gore o ka kgona go o dira.” Le lehono Jehofa o sa dutše a šegofatša maiteko a bjalo a tšwago pelong.
15. Baroma 8:11 e ka kgothatša bjang bao ba lebeletšanago le diteko?
15 Moya wa Jehofa o šoma ka ditsela tše dintši. Bahlanka ba Modimo ka moka ba hwetša moya woo gomme o ba thuša go phema mapheko ao a lego thata. Go thwe’ng ge e ba re imelwa ke diteko? Re ka matlafatšwa ke mantšu a Paulo a lego go Baroma 7:21, 25 le 8:11. Ee, “moya wa yo a tsošitšego Jesu bahung” o ka re direla mošomo, wa re matlafaletša go fenya ntwa kgahlanong le dikganyogo tša nama. Temana ye e be e lebišitšwe go Bakriste bao ba tloditšwego ka moya, lega go le bjalo molao wo wa motheo o šoma le go bahlanka ka moka ba Modimo. Ka moka ga rena re hwetša bophelo ka go dumela go Kriste, ka go katanela go bolaya dikganyogo tše di sa lokago le ka go phela ka go dumelelana le tlhahlo ya moya.
16. Re swanetše go dira’ng gore re amogele moya o mokgethwa wa Modimo?
16 Na re ka letela gore Modimo a re nee matla a gagwe a šomago ntle le gore rena re dire se sengwe? Aowa. Ntle le gore re a rapelele, re swanetše go iphepa gabotse ka Lentšu la Modimo leo le buduletšwego. (Die. 2:1-6) Go tlaleletša moo, moya wa Modimo o dula o le godimo ga phuthego ya Bokriste. Go ba gona ga rena ka mehla dibokeng go bontšha gore re kganyoga go “[kwa] seo moya o se botšago diphuthego.” (Kut. 3:6) Go oketša moo, re swanetše go diriša seo re ithutago sona. Diema 1:23 (PK) e re eletša gore: “Sokologang ka kgalemo ya-ka; Ke tlo le tšhollela moya wa-ka.” Ke therešo gore Modimo o tšhollela moya wa gagwe go “bao ba mo kwago e le mmuši.”—Dit. 5:32.
17. Re ka swantšha bjang mafelelo a ditšhegofatšo tša Modimo ka baka la maiteko a rena?
17 Gaešita le ge go nyakega maiteko a tšwago pelong gore re hwetše ditšhegofatšo tša Modimo, re swanetše go gopola gore go šoma ka thata ga se gwa ithekga ka gore Jehofa o neile batho ba gagwe dilo tše dibotse gakaakang. Mehola ya ditšhegofatšo tša gagwe ka baka la maiteko a rena e ka swantšhwa le tsela yeo mebele ya rena e holwago ke dijo tše di nago le phepo. Modimo o dirile gore mebele ya rena e thabele dijo gomme re hwetše phepo go tšona. Le gona o re neile dijo. Ga re tsebe gabotse gore dijo tša rena di tšea kae phepo ye, e bile re ka se kgone go hlalosa kamoo mebele ya rena e tšweletšago matla go tšwa dijong tšeo re di jago. Seo re se tsebago ke gore se a direga le gore ge re e-ja, re a se thekga. Ge e ba re ka kgetha go ja dijo tšeo di nago le phepo, mafelelo e ba a mabotse. Ka tsela e swanago, Jehofa o re neile dinyakwa tša go hwetša bophelo bjo bo sa felego gomme o re nea thušo yeo re e nyakago gore re fihlelele dinyakwa tšeo. Go molaleng gore o dira modiro o mogolo gomme o swanelwa ke theto. Lega go le bjalo, re swanetše go dirišana le Modimo, ka go dira dilo ka go dumelelana le thato ya gagwe, gore a re šegofatše.—Hag. 2:18, 19.
18. O ikemišeditše go dira’ng, gona ka baka la’ng?
18 Phetha kabelo e nngwe le e nngwe ka pelo ka moka. Ka mehla ithekge ka Jehofa gore o atlege. (Mar. 11:23, 24) Ge o dutše o dira bjalo, kgodišega gore “yo mongwe le yo mongwe yo a tsomago o a hwetša.” (Mat. 7:8) Bao ba tloditšwego ka moya ba tla šegofatšwa ka “mphapahlogo wa bophelo” legodimong. (Jak. 1:12) “Dinku tše dingwe” tša Kriste, tšeo di katanelago go ikhweletša ditšhegofatšo ka peu ya Aborahama, di tla thabela go kwa Kriste a re: “Tlang, lena bao le šegofaditšwego ke Tate, jang bohwa bja mmušo wo le o lokišeditšwego go tloga go theweng ga lefase.” (Joh. 10:16; Mat. 25:34) Ee, “bašexofatšwa ba Morêna e tlo ba beng ba naxa; . . . ba dula mo xo yôna ka mehla le ka mehla.”—Ps. 37:22, 29.
Na o ka Hlalosa?
• Go kwa e le ka kgonthe go akaretša’ng?
• Go nyakega’ng gore re hwetše ditšhegofatšo tša Modimo?
• Re ka hwetša bjang moya o mokgethwa wa Modimo, gona o ka re direla’ng?
[Dipotšišo tša Thuto]
[Diswantšho go letlakala 9]
Jakobo o ile a katana le morongwa gore a hwetše ditšhegofatšo tša Jehofa.
Na le wena o dira maiteko a bjalo a tšwago pelong?
[Seswantšho go letlakala 10]
Moya o mokgethwa wa Modimo o dirile gore Betsaliele le Oholiaba ba atlege