Buska e Bendishon di Yehova ku Empeño

“[Dios] ta bira e rekompensador di esnan ku ta busk’é ku empeño.”​—HEB. 11:6, NW.

1, 2. (a) Kon hopi hende ta buska e bendishon di Dios? (b) Dikon nos mester ta spesialmente interesá pa haña e bendishon di Yehova?

“DIOS bendishoná bo!” Esei ta un ekspreshon ku hende sa usa pa gradisí un persona ku a hasi algu bon pa nan òf ora nan pidi un hende hasi nan un fabor. Lidernan di vários religion sa bendishoná hende, bestia i opheto sin bida. Algun turista ta bishitá sierto sitionan religioso ku e speransa di risibí bendishon. I regularmente polítikonan sa pidi Dios bendishoná nan pueblo. Abo ta kere ku tur e petishonnan ei ta apropiá? Nan ta duna resultado? Ken realmente ta haña e bendishon di Dios, i dikon?

² Yehova a profetisá ku den e último dianan lo e tin un pueblo limpi i pasífiko ku ta konsistí di hende di tur nashon, kendenan lo prediká e bon notisia di Reino te na e finnan di tera apesar di odio i oposishon. (Isa. 2:​2-4; Mat. 24:14; Rev. 7:​9, 14) Nos, ku a aseptá e responsabilidat di ta parti di e pueblo di Dios, ke—i tin mester di—e bendishon di Dios; sin esei, nos no por tin éksito. (Sal. 127:1) Pero, kon nos por haña e bendishon di Dios?

Yehova Ta Bendishoná Hende Obediente Rikamente

3. Kiko e israelitanan lo a risibí si nan a obedesé Yehova?

³ Lesa Proverbionan 10:​6 i 7. Djis promé ku e nashon di Israel a drenta e Tera Primintí, Yehova a indiká ku si nan obedesé su bos, nan lo a risibí protekshon i prosperidat. (Deu. 28:​1, 2) Sí, esnan ku a obedesé Yehova siguramente lo a haña su bendishon.

4. Kiko berdadero obedensia ta enserá?

⁴ Ku ki aktitut e israelitanan mester a obedesé Yehova? Segun e Lei di Dios, si su pueblo kier a agrad’é, nan mester a sirbié “ku goso i ku un kurason kontentu.” (Lesa Deuteronomio 28:​45-47.) Yehova no meresé pa hende obedesé djis pa obedesé, manera bestia i demoñonan ta hasi. (Mar. 1:27; Sant. 3:3) Berdadero obedensia na Dios ta un ekspreshon di amor; e ta bai akompañá ku goso i ku e fe ku Yehova su mandamentunan no ta pisá i ku e ‘ta rekompensá esnan ku ta busk’é ku empeño.’​—Heb. 11:6, NW; 1 Juan 5:3.

5. Kon fe den e promesa di Yehova lo a yuda hende obedesé e lei na Deuteronomio 15:​7 i 8?

⁵ Tuma por ehèmpel e lei na Deuteronomio 15:​7 i 8. (Les’é.) Kiko lo a pasa si e israelitanan no a obedesé e lei akí ku e fe ku Yehova lo a rekompensá nan? Si nan a obedes’é di mala gana, nan lo a yuda hende pober sí, pero esei lo no a promové bon relashon entre e miembronan di e pueblo di Dios. Mas importante ainda, esei lo a demostrá fe den Yehova su abilidat di perkurá pa su sirbidónan? E obedensia ei lo a demostrá ku nan a apresiá e oportunidat di por a imitá Yehova su generosidat? Klaru ku nò! Dios a tuma nota di e kondishon di kurason di e personanan ku realmente  tabata generoso i a primintí di bendishoná tur nan trabou i tur loke nan ta hasi. (Deu. 15:10) Sí, fe den e promesa ei lo a motivá e israelitanan na akshon i lo a resultá den hopi bendishon.​—Pro. 28:20.

6. Ki garantia Hebreonan 11:6 ta duna nos?

⁶ Ademas di fe den Yehova komo e Rekompensador, Hebreonan 11:6 ta enfatisá un otro kualidat ku ta nesesario pa risibí e bendishon di Yehova. Tuma nota ku e teksto ta bisa ku Yehova ta rekompensá esnan ku ta “busk’é ku empeño.” Den e idioma original, e ekspreshon akí ta enserá intensidat i esfuerso vigoroso. Pues, siendo ku e palabranan di e versíkulo akí ta bini di e úniko Dios berdadero, “kende no por gaña,” nan ta un garantia ku si nos hasi esfuerso vigoroso, nos lo haña bendishon. (Tito 1:2) Pa míles di aña Yehova a demostrá ku su promesanan ta digno di konfiansa. Su palabra no ta faya nunka; semper e ta kumpli. (Isa. 55:11) Pues, nos por tin pleno konfiansa ku si nos desplegá berdadero fe, lo e ta un Rekompensador den nos kaso tambe.

7. Kiko nos tin ku hasi pa nos por haña e bendishon ku Yehova a primintí mediante e “simia” di Abraham?

⁷ Hesukristu a resultá di ta e parti prinsipal di e “simia” di Abraham, pa medio di ken Yehova a primintí di trese bendishon. E parti sekundario di e “simia” primintí ta konsistí di kristiannan ungí. Nan a haña e asignashon pa “proklamá e alabansanan di esun ku a yama [nan] for di skuridat na su lus maravioso.” (Gal. 3:​7-9, 14, 16, 26-29; 1 Ped. 2:9) Si nos ke tin un bon relashon ku Yehova, nos no por ignorá e personanan akí, esta, “e esklabo fiel i prudente,” kende Hesus a nombra pa perkurá pa su propiedatnan. Ademas, sin e yudansa di “e esklabo,” nos lo no por haña un bon komprondementu di loke nos ta lesa den e Palabra di Dios ni nos lo no sa kon pa apliká esaki. (Mat. 24:​45-47) I ta ora nos ta praktiká loke nos ta siña for di e Skritura, nos por ta sigur ku nos lo haña e bendishon di Dios.

Keda Enfoká Riba e Boluntat di Dios

8, 9. Ki esfuerso e patriarka Jakòb a hasi na armonia ku e promesa di Dios?

⁸ E idea di hasi esfuerso vigoroso pa haña bendishon di Dios kisas ta laga nos kòrda riba e patriarka Jakòb. Ounke e no tabata sa kon e promesa ku Dios a hasi na Abraham lo a kumpli, e tabatin fe ku Yehova lo a oumentá e desendensia di su tawela di tal manera ku nan lo a bira un nashon grandi. P’esei, na aña 1781 promé ku nos era, Jakòb a bai Haran pa buska un kasá. Su meta no tabata djis pa haña un persona ku lo a bira un kompañera agradabel. Mas bien, e tabata buska un adoradó di Yehova ku tabata spiritualmente fuerte i ku lo a bira un bon mama pa su yunan.

⁹ Nos sa ku Jakòb a topa ku su prima Raquel. El a stima Raquel i a bai di akuerdo ku Raquel su tata, esta, Laban, ku lo e traha shete aña p’e pa e por a kasa ku Raquel. Esaki no tabata djis un kuenta romántiko memorabel. Jakòb tabata bon na altura di e promesa ku e Dios Todopoderoso a hasi na su tawela Abraham i despues na su tata, Isaak. (Gén. 18:18; 22:​17, 18; 26:​3-5, 24, 25) I Isaak, na su turno, a bisa su yu hòmber Jakòb: “Ku Dios Todopoderoso bendishoná bo i hasi bo fruktífero i multipliká bo, pa bo bira un multitut di pueblonan. Ku e duna bo tambe e bendishon di Abraham, abo i tur bo desendientenan huntu ku bo, pa bo poseé e tera kaminda bo ta keda biba pa un tempu, kual Dios  a duna Abraham.” (Gén. 28:​3, 4) Pues, e esfuerso ku Jakòb a hasi pa haña un bon esposa i forma un famia a demostrá ku e tabatin konfiansa den loke Yehova a primintí.

10. Dikon Yehova a bendishoná Jakòb?

¹⁰ Sí, Jakòb su enfoke no tabata pa akumulá rikesa pa su famia. Su mente tabata riba e promesa ku Yehova a hasi relashoná ku su desendientenan. P’esei, el a enfoká riba e kumplimentu di Yehova su boluntat. Jakòb tabata desididu pa hasi tur loke tabata na su alkanse pa e por a haña e bendishon di Dios apesar di opstákulonan ku por a presentá. Asta ora el a bira bieu, el a keda ku e mesun aktitut, i Yehova a bendishon’é.​—Lesa Génesis 32:​24-29.

11. Ki esfuerso nos mester hasi na armonia ku Dios su boluntat revelá den su Palabra?

¹¹ Meskos ku tabata e kaso ku Jakòb, nos tampoko no sa tur detaye di e manera ku Yehova su propósito lo kumpli. Pero studiando e Palabra di Dios, nos ta haña un bista general di loke nos por spera relashoná ku ‘e dia di Yehova.’ (2 Ped. 3:​10, 17) Por ehèmpel, ounke nos no sa eksaktamente ki dia e gran dia ei lo bini, nos sa sí ku e ta serka. Nos ta kere loke e Palabra di Dios ta bisa, esta, si nos duna testimonio kabal den e tempu kòrtiku ku a sobra, nos por salba tantu nos mes komo esnan ku ta skucha nos.​—1 Tim. 4:16.

12. Di kiko nos por ta sigur?

¹² Nos ta konsiente ku e fin por yega un ora pa otro. I maske Yehova no tin ku warda te ora ku nos alkansá tur hende personalmente ku e bon notisia, e ta duna nos instrukshon pa yuda nos kumpli ku e trabou di prediká na un manera efikas. (Mat. 10:23) Ku fe, nos ta partisipá den e trabou akí lo mihó ku nos por, usando kualke rekurso ku nos tin na nos disposishon. Pero ta hopi hende den nos teritorio lo aseptá e mensahe ku nos ta prediká? Bon mirá, nos no por sa esei di antemano. (Lesa Eklesiastés  11:​5 i 6.) Nos trabou ta di prediká ku e konfiansa ku Yehova lo duna nos su bendishon. (1 Kor. 3:​6, 7) Nos por ta sigur ku e ta mira kualke esfuerso vigoroso ku nos ta hasi, i mediante su spiritu santu, lo e duna nos e guia ku nos tin mester.​—Sal. 32:8.

Buska Spiritu Santu

13, 14. Kon e spiritu santu di Dios a kapasitá hende den pasado i ta hasi esei den nos tempu?

¹³ Pero kiko nos tin ku hasi si nos ta sinti ku nos no tin e abilidatnan nesesario pa kumpli ku un sierto asignashon òf pa partisipá den e trabou di prediká? Nos mester pidi Yehova duna nos su spiritu santu pa yuda nos mehorá kualke abilidat ku nos tin pa por hasi su trabou. (Lesa Lukas 11:13.) E spiritu di Dios por yuda hende kualifiká pa kualke trabou òf privilegio di sirbishi sin importá ki eksperensia nan tin òf den ki sirkunstansia nan ta. Por ehèmpel, djis despues di e Eksodo for di Egipto, e spiritu di Dios a yuda wardadó- i esklabonan vense nan enemigunan den guera ounke nan no tabatin eksperensia di guera. (Eks. 17:​8-13) Mas despues, e mesun spiritu ei a kapasitá Bezaleel i Aholiab pa traha e tabernakel segun e plannan arkitektóniko ku Dios a duna nan.​—Eks. 31:​2-6; 35:​30-35.

¹⁴ Ademas, e spiritu poderoso ei a yuda sirbidónan di Dios den tempu moderno kumpli ku e nesesidatnan di e organisashon ora nan mes mester a kuminsá imprimí nan literatura. Den un karta, e superintendente di e fábrika den e tempu ei, ruman R. J. Martin, a splika loke nan a logra te ku aña 1927. El a bisa: “Na e momento oportuno, Señor a habri e porta i un mashin grandi [di imprenta] rotativo a kai den nos man, man di hendenan ku no tabata sa kon e ta hinká den otro ni kon e ta funshoná. Pero Señor sa kon pa yuda mente di hende ku ta dun’é tur loke nan por. . . . Despues di apénas algun siman, nos por a pone e mashin traha i ainda e ta traha. I e ta hasi trabou ku ni esnan ku a trah’é no tabata sa ku e por a hasi.” I te awe, Yehova ta sigui bendishoná esfuerso sinsero.

15. Kon Romanonan 8:11 por animá hende ku ta haña nan ku tentashon?

¹⁵ Yehova su spiritu santu ta obra den vários manera. Tur sirbidó di Dios por benefisiá di dje, i e ta yuda nan vense opstákulonan grandi. Kon e spiritu santu por yuda nos ora nos haña nos ku tentashon? Wèl, e palabranan di Pablo na Romanonan 7:​21, 25 i 8:11 ta fortalesé nos. Sí, “e spiritu di  Esun ku a lanta Hesus for di e mortonan” por obra na nos fabor, dunando nos e fortalesa pa lucha kontra deseonan di karni. Ounke e pasashi akí a ser skirbí pa kristiannan ungí ku spiritu santu, e prinsipio su tras ta konta pa tur sirbidó di Dios. Pues, nos tur por gana bida si nos ehersé fe den Kristu, hasi esfuerso pa mata deseonan inkorekto i biba di akuerdo ku e guia di spiritu santu.

16. Kiko nos tin ku hasi pa nos por haña Dios su spiritu santu?

¹⁶ Nos por keda sin hasi niun esfuerso i ferwagt ku Dios ta duna nos su forsa aktivo? Nò. Ademas di hasi orashon pidi Dios duna nos su spiritu santu, nos tin ku studia su Palabra diligentemente. (Pro. 2:​1-6) Es mas, Dios su spiritu santu ta riba e kongregashon kristian. P’esei, nos asistensia regular na e reunionnan ta demostrá ku nos tin e deseo di “tende loke e spiritu ta bisa e iglesianan.” (Rev. 3:6) Un otro kos ku nos tin ku hasi ta reakshoná humildemente riba loke nos ta siña. Proverbionan 1:23 ta konsehá nos: “Bolbe na mi reprendementu! Mira, lo mi drama mi spiritu riba boso.” Sí, Dios ta duna su spiritu santu “na esnan ku ta obedes’é.”​—Echo. 5:32.

17. Ku kiko nos por kompará e manera ku Yehova ta bendishoná nos esfuersonan?

¹⁷ Maske nos tin ku hasi esfuerso pa haña e bendishon di Yehova, nos tin ku kòrda ku e abundansia di bon kosnan ku Yehova ta duna su pueblo no ta solamente e resultado di nos trabou duru. Nos por kompará e manera ku Yehova ta bendishoná nos ora nos ta hasi esfuerso ku e manera ku nos kurpa ta benefisiá di alimento saludabel. Dios a traha nos kurpa di tal manera ku nos por disfrutá di kuminda i saka nutrishon importante for di esaki. Ta é ta perkurá kuminda tambe. Nos no sa presis kon nos kuminda ta haña su supstansianan nutritivo. I mayoria di nos no por splika tampoko kon nos kurpa ta produsí energia for di loke nos ta kome. Nos sa sí ku e proseso ta funshoná i ku ora nos ta kome nos ta kooperá kuné. Si nos kome kosnan nutritivo, nos ta haña asta mihó resultado. Di mes manera, ta Yehova ta pone e rekisitonan ku nos tin ku kumpli kuné pa haña bida eterno, i e ta duna nos e yudansa nesesario pa kumpli ku e rekisitonan ei. Pues, ta klaru ku é ta hasi mayoria di e trabou i ta meresé nos alabansa. Pero, pa nos haña e bendishon di Dios, nos tin ku kooperá kuné, esta, hasi su boluntat.​—Hag. 2:​18, 19.

18. Kiko ta bo determinashon, i dikon?

¹⁸ Pues, hasi tur esfuerso pa kumpli ku kualke asignashon ku bo haña. Akudí semper na Yehova pa yudansa. (Mar. 11:​23, 24) I ora bo ta hasi esei, hasié ku e konfiansa ku “esun ku buska ta haña.” (Mat. 7:8) Kristiannan ungí ku spiritu santu lo ser bendishoná ku “e korona di bida” den shelu. (Sant. 1:12) Kristu su “otro karnénan” ku ta luchando pa nan por risibí bendishon mediante e simia di Abraham, lo tin e goso di tende Kristu bisa: “Bin, boso ku ta bendishoná di mi Tata, heredá e reino ku ta prepará pa boso desde e fundashon di mundu.” (Juan 10:16; Mat. 25:34) Sí, “esnan ku [Dios] bendishoná lo heredá e tera . . . i lo biba den dje pa semper.”​—Sal. 37:​22, 29.

Bo Por Splika?

• Kiko berdadero obedensia ta enserá?

• Kiko nos tin ku hasi pa haña e bendishon di Dios?

• Kon nos por risibí Dios su spiritu santu, i kon e por obra na nos fabor?

[Preguntanan di Estudio]

[Plachinan na página 12]

Jakòb a lucha ku un angel pa e haña bendishon di Yehova.

Abo tambe ta hasi esfuerso vigoroso?

[Plachi na página 13]

Dios su spiritu santu a yuda Bezaleel i Aholiab sobresalí den nan trabou