Dosiik a Klengeltengat er a Jehovah

“Tirikel osiik er [a Dios] a le besterir chomeksulir.”​—HEBRU 11:6.

1, 2. (a) A ruumesingd el chad te mekerang a losiik a klengeltengat er a Dios? (b) Ngera uchul me kede semeriar el osiik a klengeltengat er a Jehovah?

 “A DIOS lomekngeltengat er kau!” Ngar er a bebil er a beluu e kede orrenges er a rengodech el chad el melekoi er tia el tekoi, sel losngos a chad. Ngdirrek el sebeched el orrenges er a remengeteklel a kakerous el klechelid el omekngeltengat er a rechad me a charm me a dirrek el klalo. A rechad el mesarech a beluu a dirrek el mo er aike el basio el loumerang el kmo a lebong e ngsebechir el mo ngmai a betok el klengeltengat. A rechad er a balatiks a dirrek el meluluuch el olengit a klengeltengat er a Dios el kirel a belurir. Omomdasu, e a chouaika el tekoi ngmera el ungil el ongit? Ngsebechel el oureor? Ngtechang a rredemelel a ngmai a klengeltengat er a Dios, e ngera uchul?

² A Jehovah a ulemlaoch el kirel a uriul sils el kmo, te mo er ngii a reklikiid e chad er a budech el chedal, el mo omerk er a ungil el chais er a Renged el mo er a bek el merekelel a beluulechad, er a chelsel a blekeradel el mui er a kltui me a odechelakl. (Isaia 2:2-4; Matteus 24:14; Chocholt 7:9, 14) E kid el mla kongei er a ngerachel el metutk el kired, e dirrek el kiei el oltirakl a ulekrael er a Dios, a soad e dirrek el kmal ousbech er a klengeltengat er a Dios, e le a lsekum e ngdiak a klengeltengat er a Dios, e ngkmal diak el sebechel el mo ungil a klengar er kid. (Psalm 127:1) Kede mekerang e ngmai a klengeltengat er a Dios?

A Klengeltengat a Mo er a Rebekongesenges el Chad

3. Ngmle sebechel el mo ua ngerang a blekeradel oleko a rechad er a Israel a ullengesenges er a Dios?

³ Monguiu er a Osisechakl 10:6, 7. Telkib er a uchei er a bo lesiseb er a Beluu er a Nglat a renged er a Israel, e a Jehovah a tilbir el kmo a beluu a mo kekeuii me tir a mo mukerreu a lsekum e te melemolem el olengesenges er Ngii. (Duteronomi 28:1, 2) A klengeltengat er a Jehovah a diak di le bo er a rechedal a Dios e ngbai mo ‘ngoititerir’ el belkul a kmo ngulterekokl el mo omekngeltengat er tir.

4. Nguldimukl er a ngerang a mera el blekongesenges?

⁴ Ngera el rolel a blekongesenges a mle kirir a rechad er a Israel el oltirakl er ngii? A Llechul a Dios a mileketeklii el kmo ngsoal a remesiungel a losiou er ngii el oba “ungilreng ma deurreng.” (Monguiu er a Duteronomi 28:45-47.) A Jehovah a rredemelel a nguu a cherrungel el blekongesenges er kid el belkul a kmo kede ngiltii el mo oltirakl a llechul, el ngii a kuk ngodech er sel blekongesenges el olecholt er ngii a charm me a remengelengalek el reng. (Markus 1:27; Jakobus 3:3) A mera el blekongesenges el mo er a Dios a olechotel a bltikerreng. Tia el blekeradel a medangch el oeak a deurreng el ngii a uchetemel a klaumerang er a chad el kirel a llechul a Jehovah, el ngii el llechul a diak el omekberaod, e dirrek el “tirikel osiik er [Ngii] a le besterir chomeksulir.”​—Hebru 11:6; 1 Johanes 5:3.

5. A klaumerang el kirel a telbilel a Jehovah el medung er a Duteronomi 15:7, 8 ngsebechel el rullii a chad el mo mekerang?

⁵ Sel dosaod er a mera el blekongesenges e ngsebeched el melatk er a llach el medung er a Duteronomi 15:7, 8. (Monguiu.) A lsekum e kede meruul a tekoi el olengeseu er a chebuul el diak el ngar er a rengud e meruul, e omomdasu e ngsebechel el mo toketekii a ungil el deleuill  me a bltikerreng er a delongelir a rechedal a Dios? E tiang, ngolechotel a klaumerang er kid el kmo a Jehovah a sebechel el mesterir a rechedal aike el lousbech, e dirrek el mesterir a techellir a rechedal el oukerebai er a blekururau el reng er Ngii? Ngkmal diak! A Dios a medengei aike el ngar er a chelsel a rengul a bekururau el chad me ngtibir el mo omekngeltengat aike el bek el tekoi el loruul. (Duteronomi 15:10) A klaumerang el kirel tia el telbilel a Dios a rullid el mo bekururau el mo er a rechad, e tia el omeruul a mo uchul a betok el klengeltengat.​—Osisechakl 28:20.

6. A bades er a Hebru 11:6 ngoterekeklii a ngera el tekoi el kired?

⁶ Nguldimukl er a klaumerang er kid el kmo a Jehovah a Ngike el omekngeltengat, e a Hebru 11:6 a ochotii a ta er a blekeradel el kired el meruul er ngii me bo el sebeched el nguu a klengeltengat er a Dios. Lak mobes el kmo a Jehovah a omekngeltengat er “tirikel osiik er ngii.” A tekoi el lousbech er ngii er tiang a olecholt er a klisichel a omerellel a chad el soal el osiik er a Dios. Tia el tekoi a oterekeklii el kmo a Dios “el diak lomulak” a mo omekngeltengat er kid el kirel a urered! (Titus 1:2) A Dios a mla ochotii er a chelsel aika el mereko el betok el rak el kmo ngsebeched el otuil a klaumerang er kid er a telbilel. A tekingel a diak el iit e klemerang. (Isaia 55:11) Me ngkmal ulterekokl a rengud el kmo a dochotii a klaumerang er kid er a Dios e ngmo omekngeltengat er kid.

7. Kede mekerang e mo sebeched el ngmai a klengeltengat el okiu a uldidellel a “rasech” er a Abraham?

⁷ A Jesus Kristus a ulechotii el kmo ngii a kot el uldidellel a “rasech” er a Abraham. E dirrek el ngar er a ulaoch e tirke el ngellitel el Kristiano a mo obengkel a Jesus el mo churrengelii tia el telbiil el kirel a uldidellel a “rasech.” Te mla mukngerachel el “momerk a chetengel chomerellel ngikel milekedongemiu era ilkolk losisebemiu ra mengasireng el llemesel.” (Galatia 3:7-9, 14, 16, 26-29; 1 Petrus 2:9) Ngdiak el sebechel el mo er ngii a ungil deleuill er kid el obengkel a Jehovah a lsekum e ngdiak dolengesenges er tirke el chad el Jesus a mla oterekokl a mekreos el kloklel er tir. A lsekum e ngdiak a ngelsuil “ngikel blak a rengul e mellomes a rengul mesiou” e ngdiak el sebeched el mo ungil el medengei a Tekingel a Dios, e doltaut er a chelsel a klengar er kid. (Matteus 24:45-47) Sel  doltaut er a chelsel a klengar er kid aike el desuub er a Bades, e ngsebeched el mo ngmai a klengeltengat er a Dios.

Molemolem el Meruul a Soal a Dios

8, 9. Ngmilekerang a Jakob e mle meringel el oureor el otaut aike el ongtil er a Dios?

⁸ Sel uldasu el kmo ngkired el meringel el oureor me bo el sebeched el ngmai a klengeltengat er a Dios a kora mekltkid er a omerellel a Jakob. Ngdimlak lodengelii sel rolel e ngmotaut a telbilel a Dios el mo er a Abraham, engdi nguluumerang el kmo a Jehovah a mo omdois er a klengelakel er a demal el rubak el mo ua klou el renged. Me ngngar er a chelsel a rak er a 1781, er a uchei er a taem er kid, e a Jakob a mirrael el mo er a beluu er a Haran el mo osiik er a mo bechil. Ngdimlak losiik er a redil el di mo chelmengel, e ngbai ulsiik er a redil el mengull er a Jehovah el sebechel el mo ungil el derrir a rengelekel.

⁹ Kede medengei el kmo a Jakob a mlo metik er a chedal el Rahel. Ngmlo betik a rengul er ngii me ngkilengei el mo oureor el mo er a demal el Laban el euid el rak me bo el sebechel el mo bechil. Tiang a diak di el cheldecheduch el kirel a ultoir. A Jakob a mle medengelii a telbiil el lerirellii ngike el Dios el Olab a Bek el Klisiich el mo er a demal el rubak el Abraham, e dirrek el liluut el dulii el mo er a demal el Isak. (Genesis 18:18; 22:17, 18; 26:3-5, 24, 25) Me a Isak a dilu er a ngelekel er a Jakob el kmo: “A Dios el Olab a Bek el Klisiich lomekngeltengat er a chebechilem e le beskau a re betok el ngelekem, me bo mdemal a betok el beluu. Bo le beskau kau ma ruldidellel a rsechem a klengeltengetel a Abraham, e le bor ngii a kloklem er tial beluu, el sel mkiliei er ngii el le ngiluu a Dios el msa Abraham.” (Genesis 28:3, 4) Me a meringel el urerel a Jakob el ulsiik er a ungil el bechil e mo omekeroul er a telungalek er ngii a mle ultuil er a klaumerang er ngii el kirel a telbilel a Jehovah.

10. Ngera uchul me Jehovah a mle dmeu a rengul el omekngeltengat er a Jakob?

¹⁰ Me nguaisei, a Jakob a dimlak el osiik a ilteet el kirel a telungalek er ngii. Ngbai millatk er sel telbilel a Jehovah el kirel a uldidellel a rsechel. Me ngmle blechoel el meruul a tekoi el oltirakl a soal a Jehovah. Ngmle kltmokl el meruul a bek el tekoi me bo el sebechel el ngmai a klengeltengat er a Dios, alta e ngmlo chelebangel omelsemai er a klengar er ngii. Ngmillemolem el blak a rengul el mo lmuut er a le chudelang me a Jehovah a ulemekngeltengat er ngii el kirel a blakerreng er ngii.​—Monguiu er a Genesis 32:24-29.

11. Ngera kired el meruul me bo el sebeched el otireklii a mla medung el telbilel a Dios?

¹¹ Me kid a ua Jakob el diak dodengei a rokui  el tekoi el kirel a otutel a moktek er a Jehovah. Engdi sel dosuub a Tekingel a Dios, e ngsebeched el mo medengei aike el tekoi el mo er ngii er a “sils ra [Jehovah.]” (2 Petrus 3:10, 13, 17) El ua tiang, ngdiak dodengelii a blsechel a sils er a Jehovah, engdi kede medengei el kmo ngkmal kmedang. Kede oumerang a Tekingel a Dios sel ledu el kmo a bo leblak a rengud el churrengelii a omesiunged er a chelechang, e ngmo sebeched el mo suobel kid me tirke el orrenges er kid.​—1 Timoteus 4:16.

12. Ngulterekokl a rengud el kirel a ngerang?

¹² Kede medengei el kmo a ulebongel a kmal kmedang; me a Jehovah a diak longiil er a rokui el chad er a beluulechad el mo rongesii tia el klumech. (Matteus 10:23) Me a lmuut el tang, kede melai a ungil el ulekrael el mo sebeched el ungil el merkii tia el klumech el mo er a rechad. Me ngoeak a klaumerang er kid, e kede meruul er tia el ureor el mo er a tkurrebab el sebeched el ousbech aike el rokui el dongu, el lomeskid a cheldebechelel a Jehovah. Me kid, kede blechoel el omerk er a klumech er a basio el betok a rechad el semeriar? A mera er ngii, ngdiak el sebeched el mo medengei a lak de bo er a basio. (Monguiu er a Olisechakl 11:5, 6.) Kid a di ngerecheled el omerk er a klumech, e oumerang el kmo a Jehovah a mo omekngeltengat er kid. (1 Korinth 3:6, 7) Ngulterekokl a rengud el kmo sel lomes er a blakerreng er kid a Jehovah, e ngmo ousbech er a oureor el klisichel el meskid a ulekrael el dousbech.​—Psalm 32:8.

Molengit er a Oureor el Klisichel a Dios

13, 14. Ngmekerang e tia el oureor el klisichel a Dios a olengeseu er a remesiungel el meruul er a ureor?

¹³ E kuk mekerang a lsekum e kede omdasu el kmo kede metitur me ngdiak el sebeched el rullii a ngerecheled me a lechub e de teloi er a ureor er a berkel a klumech? Ngkmal kired el meluluuch el olengit er a Jehovah me lengesukid el mo meduch el ousbech aike el duch er kid el meruul er a omesiunged. (Monguiu er a Lukas 11:13.) Me a klisichel a Dios a sebechel el ngosuterir a rechad el mo meruul er tia el ileakl el ureor el diak el ultuil er aike el duch me a klemedengei el lullab er a uchei. El ua tiang, a uriul er a letobed er a Ekipten a rechad er a Israel, e a Dios a milsterir a klisichir a remengkerengel a charm me a resibai el mo mesisiich er a re cherrouir er a mekemad, alta e ngdimlak a duch er tir el oumekemad. (Exodus 17:8-​13) Me a uriul, e a osisiu el klisichel a Dios a ngilsuir a Besalel me a Oholiab el mo oungerachel er a klou el ureor er a okedecherul a tento el templo.​—Exodus 31:2-6; 35:30-35.

¹⁴ Me tia el klou el klisichel a Dios a oureor el olengeseu er a remesiungel el mengetmokl aike el tekoi el lousbech a cheldebechelel, er sera lekot el omuchel a ureor el ousbech a mesil el meruul e oltobed a babier. A ta el odam el Brother R. [Robert] J. Martin a uluungerachel aike el mesil er sel taem, a lilechesii a babier el ouchais aike el mileketmokl er a rak er a 1927 el kmo: “Ngmla er sel ungil el temel e a Rubak a milskemam a klou el mesil el meruul e oltobed a babier el dimlak a duch me a klemedengei er kemam el ousbech el meruul er a ureor. Engdi a Rubak a sebechel el ngosuterir a reblak a rengrir el mesiungel el mo er a tkurrebab el sebechir el meruul er tia el ureor. . . . Ngdi mle chelsel a sesei el sandei, e ngmlo sebecham el lorelii tia el mesil; me ngdirk oureor el me lmuut er a chelechang el meruul a tekoi el tirke el mirruul er tia el mesil a dimlak el omdasu el kmo ngsebechel tia el mesil el remuul.” Me a Jehovah a dirk melemolem el omekngeltengat er tirke el olecholt er a blakerreng er tir el mesiou er ngii.

15. Ngmekerang a bades er a Rom 8:11 a melisiich er kid sel bo dechelebangel a ongetikaik?

¹⁵ A Jehovah a ousbech er a oureor el klisichel el ngar er a betok el rolel. Tia el klisichel a Dios a mo er a rokui el mesiungel el ngosuterir el mo outekangel a ngii di el chetituokel el tekoi. E kuk mekerang a lsekum e kede mo chelebangel a ongetikaik? A tekingel a Paulus el ngar er a Rom 7:21, 25 me a 8:11 a sebechel el melisiich er kid. Nguaisei, sel oureor el klisichel a Dios el “ulekisii a Kristus Jesus ra chelsir ar mla mad” a sebechel el ngosukid el mo mesisiich el  oltngakl aike el ngibes er a tech. Tia el omellach a milluches el kirir a rengellitel el Kristiano, engdi ngdirrek el ungil el kirir a rokui el mesiungel a Dios. Me kid el rokui a sebeched el mo nguu a klengar a lsekum e kede olecholt er a klaumerang er kid er a Kristus, e mo er a tkurrebab el sebeched el mengikiid er kid er a ngii di el ngibes, e dirrek el kiei el oltirakl a ulekrael er a Jehovah.

16. Ngera kired el meruul me bo el sebeched el nguu a oureor el klisichel a Dios?

¹⁶ Ngsebeched el di diak a ngera el derellii e omdasu el kmo a Dios a olengeseu er kid el ousbech er sel oureor el klisichel? Ngkmal diak. Ngdiak di doluluuch el merekong, e ngkired el mesuub e oltirakl a ulekrael er a Tekingel a Dios. (Osisechakl 2:1-6) Me a lmuut el tang, a klisichel a Dios a omekrael er a ongdibel er a Rekristiano. A deblechoel el mo er a bek el miting e ngmeleketek er a urunguled el mo “orrenges a [Tekingel a Dios] el mora ikel eklesia.” (Chocholt 3:6) Me nguaisei, ngkired el mo oltirakl aike el tekoi el dosuub. A Osisechakl 1:23 a mellach er kid el kmo: “Morrenges sel bo kuungeroel er kemiu; ak mo meskemiu a ungil uldasu.” A Dios a ulterekokl el mesterir “tirikel olengesenges er ngii” a oureor el klisichel.​—Rellir 5:32.

17. A blakerreng er kid ngsebeched el omekesiu er ngii er a ngerang sel dosaod er a klengeltengat el omeskid a Dios?

¹⁷ Malta e ngusbechall a blakerreng er kid me bo dengai a klengeltengat er a Dios, engdi lak dobes el kmo a meringel el urered a diak bo el uchul a ungil el tekoi el Jehovah a omesterir a rechedal. A klungiolel a klengeltengat er ngii a sebeched el omekesiu er ngii er sel rolel e ngsebechel a bedenged el ngmai a klungiolel er a ungil er a bedenged el kall. A Dios a milebii tia el bedenged el mo sebeched el dmeu a rengud el omengur e dirrek el mengang aike el ungil er a bedenged el kall. Ngdirrek el meskid a keled. Ngdiak el sebeched el mo medengelii sel rolel e a kall a meskid aike el ousbech a bedenged me a lechub e de sodii sel rolel e ngmo mesisiich a bedenged el oeak aike el kall el dongang. Kede di medengei el kmo tia el blekeradel a oureor me kede oltirakl er ngii el omengur. Me a lsekum e kede melilt el mo mengang a ungil er a bedenged el kall, e ngmo uchul a klungioled. Me ngdi osisiu, a Jehovah a mla oterekokl a tekoi el kirel a diak a ulebengelel el klengar, e meskid a ngeso me bo el sebeched el oltirakl aike el soal a doruul. Me ngbleketakl el kmo, ngii a olengeseu er kid me ngkmal rredemelel a nguu a odanges. Me nguaisei, engdi kid a kmal kired el mo meruul a soal ngii el Jehovah me bo el sebeched el ngmai a betok el klengeltengat.​—Hagai 2:18, 19.

18. Ngera ke mla tibir el mo meruul er ngii, e ngera uchul?

¹⁸ Ngkired el meruul er a omesiunged el mo er a tkurrebab el sebeched e blechoel el olengit a ngeso er a Jehovah. (Markus 11:23, 24) E sel doruul el uaisei e ngulterekokl a rengud el kmo “ngikel osiik a metik.” (Matteus 7:8) Tirke el ngellitel a mo mukngeltengat e le te mo nguu a “krone ra klengar” el ngar er a eanged. (Jakobus 1:12) Tirke el “ngodech el sib” er a Kristus el tir a mo melai a klengeltengat el oeak a uldidelel a rsechel a Abraham, a mo dmeu a rengrir el orrenges er a Kristus el melekoi el kmo: “Mei, kemiu el mlukngeltengat ra Demak, mo mediukes ra rengedel a Dios el mlekedmokl el kiriu era uchelel a belulechad.” (Johanes 10:16; Matteus 25:34) Me nguaisei, “tirkel mukngeltengat er a RUBAK a mo ungilbesrir el kiei er a chelsel a beluu, . . . e mo oubeluu er ngii el di blechoel.”​—Psalm 37:22, 29.

Ngsebechem el Mesaod?

• Ngera el tekoi a uldimukl er a blekongesenges?

• Ngera kired el meruul me bo denguu a klengeltengat er a Dios?

• Kede mekerang e nguu a ngelsuil a oureor el klisichel a Dios, e mekerang a lolengeseu er kid?

[Aike el Ker er a Suobel]

[Siasing el ngar er a 11 el llel]

A Jakob a milengaibedechakl er a anghel me bo lenguu a klengeltengat er a Jehovah.

Kau ke oba osisiu el blakerreng el meruul er a omesiungem?

[Siasing el ngar er a 12 el llel]

Sel oureor el klisichel a Dios a ngilsuir a Besalel me a Oholiab el mo ungil el meruul er a urerir