Anchata kallpanchakusun Diospa bendicionninta chaskinapaq

‘Kallpanchakuspa maskaqninkunatam [Diosqa] premian.’ (HEB. 11:6, NM.)

1, 2. a) ¿Imakunatam runakunaqa ruranku Diospa bendicionninta chaskinanpaq? b) ¿Imanasqam interesakunanchik Diospa bendicionninta chaskinapaq?

“¡DIOSYÁ bendecisunki!” Achka nacionkunapim chaynata ninku yanapasqa kasqankumanta agradecekuspa. Chaynataq, religionkunapi punta apaqkunapas bendecinkum runakunata, animalkunata hinaspa imakunatapas. Kantaqmi hanaq pachamanta bendicionkuna chaskiyta piensaspanku, dioskuna yupaychananku sitioman karu-karuta riqkunapas. Wakin kamachiqkunapas Diospa bendicionnintam nacionninkupaq mañakunku. ¿Allinchu chayna mañakusqanku? ¿Yanapanmanchu? ¿Pikunatam Jehová Dios bendecin hinaspa imanasqa?

² Diosqa nirqañam tukupay tiempopi lliw nacionmanta hawkalla kawsaq hinaspa limpio runakuna llaqtanpi kananta, cheqnisqa chaynataq qatikachasqa kaspankupas paymantam Allpantinpi willananku karqa (Isa. 2:2-4; Mat. 24:14; Apo. 7:9, 14). Lliwmi acuerdopi karqanchik chay willakuyman hina kawsanapaq. Chaypaqmi Diospa bendicionninta necesitanchik (Sal. 127:1). Ichaqa, ¿imaynatam chaskichwan?

Bendicionkunaqa ‘haypanmi’ kasukuqkunata

3. ¿Ima bendiciontam israelitakuna chaskinmanku karqa kasukuspankuqa?

³ (Leey Proverbios 10:6, 7.) Prometesqan Allpaman israelitakuna yaykunankupaqña kachkaptinmi Jehová Dios nirqa kasukuspankuqa tukuy imayoq hinaspa waqaychasqa kanankuta (Deu. 28:1, 2, NM). “Kay bendicionkunam qamkunaman chayamusunkichik” nispallachuqaya nirqa, aswanqa cumplikuynin seguro kananmanta qawachinanpaqmi nirqataq: ‘Haypamusunkichikmi’, nispa.

4. ¿Imaynam cheqap kasukuyqa?

 ⁴ ¿Imaynatam israelitakunaqa Diosta kasukunanku karqa? Leypa nisqanman hinaqa ‘kusikuywan hinaspa tukuy sonqonkuwanmi’, mana chayqa Diostam piñachinmanku karqa (leey Deuteronomio 28:45-47). Jehová Diostaqa manam obligasqachu kasukuna, animalkunawan demoniokunapas chayna kamachisqaqa kasukunmankum (Mar. 1:27; Sant. 3:3). Cheqaptapuni Diosta kasukuqqa sonqomantam kuyakuywan hinaspa kusisqa kasukun, yachanmi paypa kamachikuyninkuna mana llumpay sasa kasqanta hinaspa “kallpanchakuspa maskaqninkunata premiasqantapas” (Heb. 11:6, NM; 1 Juan 5:3).

5. ¿Imaynatam Jehová Diospa prometesqanpi confiasqanku yanaparqa Deuteronomio 15:7, 8 nisqanta kasukunankupaq?

⁵ Israelitakunaqa chayna confiasqankutam qawachinmanku karqa Diospa kamachisqanta tukuy sonqomanta kasukuspanku. Rimasun Deuteronomio 15:7, 8 tarikuq kamachikuymanta (leey). Paykunaqa atinmankum karqa piñakustinpas kasukuyta hinaspa wakchakunata imallapipas yanapayta. Chaynata ruraspankuqa, ¿yaqachu Diospa llaqtanpi wawqe-panintin hina kanmanku karqa? ¿Qawachinmankuchu karqa imapas pisipuqninkuta Dios qonanpi confiasqankuta hinaspa Diospa qokuykuq kasqanta qatipakusqankutapas? ¡Manamá! Sonqonkutam Diosqa qawaq, imankupas qokuykuq kaptinkuqa paymi prometerqa tukuy rurasqankupi bendecinanpaq (Deu. 15:10). Chay promesapi cheqapta confiaspankuqa kallpanchasqam tarikunmanku karqa allinkunata ruranankupaq, hinaspam achka bendicionkunata chaskinmanku karqa (Pro. 28:20).

6. ¿Ima chaskinamantam nin Hebreos 11:6?

⁶ Premiawaqninchik Diospi iñiy ancha allin kasqanta Hebreos 11:6 (NM) qawachispanpas, niwanchikmi bendicionninta chaskinapaq imatawanraq ruranamanta. Payqa premianmi “kallpanchakuspa maskaqninkunata”. Kayna nisqanqa, griego rimaypiqa anchata kallpanchakuy hinaspa empeñowan ruray ninanmi. Kay textoqa kaytam segurawanchik: anchata kallpanchakuspaqa Diospa bendicionninta chaskinamanta. ‘Mana llullakuq Diosmi prometewanchik’ (Tito 1:2). Payqa ñam waranqantin watakunaña qawachirqa promesankuna cumpliq kasqanta. ¡Promesankunaqa cumplikunmi! (Isa. 55:11.) Chaymi seguro kachwan iñisqanchikta cheqapta qawachiptinchik Jehová Dios bendeciwananchikmanta.

7. ¿Imaynatam Jehová Diospa bendicionninta tarisun Abrahampa ‘miraynintakama’?

⁷ Diosmi prometerqa Abrahampa ‘miraynintakama’ achka bendicionkuna qonanmanta, kay mirayqa iskaypi rakisqam: punta kaqmi Jesucristo, chaymantañataq hanaq pachaman riy suyaqkuna. Paykunam tutayaymanta admirakuypaq kanchaypi purinankupaq qayaqninku ‘Diospa atiyninmanta willakunankupaq’ kamachisqa kanku (Gal. 3:7-9, 14, 16, 26-29; 1 Ped. 2:9). Chaymi Dioswan amistad kaytaqa mana atichwanchu paykunata otaq ‘allin yuyayniyoq confianza sirvienteta’ qepanchaspaqa, paykunamanmi Jesus kapuqninta confiarqa (Mat. 24:45-47). Paykuna mana yanapawaptinchikqa manam atichwanchu Bibliamanta allin entiendeytawan imayna kasukuytapas. Bibliamanta yachasqanchikta kasukunapaq kallpanchakuspaqa Diospa bendicionnintam tarisun.

Diospa munayninmi puntapiqa

8, 9. ¿Imakunatam Jacob kallpanchakuspa rurarqa Diospa munayninwan cumplinanpaq?

⁸ Diospa bendicionninta chaskinapaq ancha kallpanchakuymanta rimaspaqa Jacobmantachá yuyarinchik. Payqa manam yacharqachu abuelon Abrahanman Diospa prometisqan imayna cumplikunanmanta, ichaqa segurom karqa Dios encargakuptin abuelonpa miraynin achkallaña kanantawan hatun nacionpi rikurinantapas. Chaymi cristianokunapa tiemponmanta ñawpataraq 1781 watapi, Haran llaqtaman rirqa casarakunanpaq warmi maskaq. Manam sumaq vida pasaqmasin kanallanpaqchu  munarqa, aswanqa Diosta serviq hinaspa churinkunapaq allin maman kananpaqmi.

⁹ Yachasqanchikman hinaqa Jacobmi ayllun Raquelta reqsirurqa hinaspa llumpayta kuyarqa. Paywan casarakunanraykum, qanchis wata llamkarqa Raquelpa taytan Labanpaq. Kayqa manam warmi-qari kuyanakusqankumanta willakuyllachu. Payqa allintam yacharqa abuelon Abrahanman hinaspa taytan Isaacmanpas Jehová Dios prometesqanta (Gen. 18:18; 22:17, 18; 26:3-5, 24, 25). Chaymantañam Jacobta kikin Isaac nirqa: ‘Tukuy Atiyniyoq Dios bendecisuptikim [. . .] achka mirayniyoq kanki. Abrahanman prometisqan bendicionnintam qosunki miraynikikunamanwan. Diosmi payman prometirqa forastero hina yachasqanchik kay allpata’, nispa (Gen. 28:3, 4). Hinaptinqa, allin warmita tarinanpaq hinaspa familiayoq kananpaq Jacobpa kallpanchakusqanmi qawachirqa Jehová Diospa prometesqanpi confiasqanta.

10. ¿Imanasqataq Diosqa Jacobta mañakusqanta uyarirqa hinaspa bendecirqa?

¹⁰ Familiayoqña Jacob kaspanqa, manam kapuqniyoq kaytachu maskarqa aswanqa yachachirqam Diospa promesanmanta. Puntapim churarqa Diospa munayninta. Bendicionninta chaskinanpaqmi tukuy atisqanta rurarqa hinaspa imapas harkaqninta atiparqa. Chaynam karqa yuyaq kanankamapas, chaymi Diosqa bendecirqa (leey Genesis 32:24-29).

11. Diospa rurananmanta Bibliapi yachasqanchikman hina, ¿imata rurananpaqmi kallpanchakunanchik?

¹¹ Jacob hinam Diospa munasqan imayna rurakunantaqa, llapantaqa mana yachanchikchu. Ichaqa, Bibliata estudiaspam yachanchik ‘Jehová Diospa punchawninmanta’ hinaspa imayna kananmantapas (2 Ped. 3:10, 17, NM). Manam yachanchikchu haykapi kananta, ichaqa yachanchikmi hichpallapiña kasqanta. Confianchikmi Bibliapa kayna prometewasqanchikpipas: puchuq pisi tiempopi allinta predicanapaq kallpanchakuspaqa, uyariwaqninchikkunawan kuskam salvacionta haypasun (1 Tim. 4:16).

12. ¿Imamantam seguro kachwan?

¹² Yachanchikmi Diospa piñakuynin qonqayllamanta chayaramunanta. Diosqa tantearunñam haykapi kananta, manam enteron allpapi runakunaman sapakamata predicanamantachu kanqa (Mat. 10:23). Ichaqa, Jehová  Diosmi yachachiwanchik predicasqanchik aswan allin kananpaq. Confianzawanmi predicanchik ñoqanchikpa allinnin kaqta qospa hinaspa tukuy imatapas allinta servichikuspa. Predicasqanchik lawkunapi, ¿achka runakunachu predicasqanchikta kasukunqaku? Manam chaymanta yachaytaqa atichwanchu (leey Eclesiastes 11:5, 6). Rurayninchikqa predicaymi, chaytaqa ruranchik Dios bendeciwananchikmanta seguro kaspanchikmi (1 Cor. 3:6, 7). Segurom kachwan kallpanchakusqanchikta pay qawamusqanmanta hinaspa espiritunta servichikuspa necesitasqanchikta yachachiwananchikmantapas (Sal. 32:8).

Chuya espirituta qowananchikpaq mañakusun

13, 14. ¿Imaynatam Diosqa qawachin espiritunwan serviqninkunata yanapasqanta?

¹³ ¿Imatam rurachwan Diospa llaqtanpi aswan llamkananchikpaq niwaptinchik otaq predicayta mana atisqanchikta piensaspaqa? Chayna kaptinqa, Jehová Diostam mañakuna espiritunta qowaptinchik aswan allinta rurananchikpaq (leey Lucas 11:13). Chuya espiritunwanmi payqa serviqninkunata yanapan, mana experienciayoq hinaspa pasaq tiempopi imayna kaspankupas rurayninkuwan cumplinankupaq. Ejemplopaq, Egiptomanta lloqsiramusqanku qepallatam chuya espiritu yanaparqa guerrapaq mana preparasqa michiqkunatawan sirvientekunata enemigonkupa tropankunata vencenankupaq (Exo. 17:8-13). Chaymantapas, hina chay espiritullam Bezaleeltawan Aholiabta yanaparqa, Diospa yachanan carpata paypa nisqanman hina ruranankupaq (Exo. 31:2-6; 35:30-35).

¹⁴ Kunanpas, chuya espiritum wakin cristianokunaman yachayta qospan yanaparqa Diospa llaqtanpi qellqakunata rurayta qallarinankupaq. 1927 watapi lloqsimuq cartapim, qellqakuna ruraypi encargakuq Robert J. Martin, chay tiempokama rurasqankumanta nirqa: “Señormi punkuta kichaykurqa necesitasqayku tiempopi, hatun maquinam chayaramurqa qellqakuna ruranapaq ichaqa manam yacharqanikuchu imayna kasqanta nitaq manejaytapas. Ichaqa, Señormi paypa munasqanta ruranankupaq kallpanchakuqkunapa piensayninta yanapan. [. . .] Semanakuna pasaruptinmi chay maquinaqa funcionarqaña chaynataq hinallam llamkachkan, chay maquinata ruraqkunapa mana piensasqantam rurachkan”, nispa. Kunankamapas, chayna kallpanchakuqkunatam Jehová Diosqa bendecichkan.

15. ¿Imaynatam Romanos 8:11 kallpanchawanchik ima tentaciontapas atipanapaq?

¹⁵ Chuya espirituqa tukuypim yanapakun. Llapanchiktam yanapawanchik hatun sasachakuykunata atipanapaq. Ejemplopaq, ichapas  tentasqa tarikuchwan mana allinkunata ruranapaq. ¿Imatam rurachwan atipanapaq mana kallpayoq tarikuspa? Romanos 7:21, 25 chaynataq 8:11 Pablopa qellqasqanpim yuyaymananchik. Kay versiculokunapi qawasqanchikman hinaqa, ‘Jesucristota kawsarichimuq’ espiritum kallpata qowanchikman mana allin ruray munayta vencenapaq. Hanaq pachaman riqkunapaq kay willakuy kaspanpas, lliwtam yanapawanchik Jehová Dios serviqkunataqa. Llapanchikmi wiñay kawsayta tarisun: Cristopi iñisqanchikta qawachispa, sonqonchikmanta mana allin munaykunata horqospa chaynataq espirituman hina kawsaspaqa.

16. ¿Imatam rurananchik chuya espirituta chaskinanchikpaq?

¹⁶ Espiritunta Jehová Dios qawananchikpaqqa ñoqanchikpas kallpanchakunanchikmi. Qowananchikpaq mañakuspapas, Bibliatam allinta estudiananchik (Pro. 2:1-6). Espirituntaqa huñunakuypipas chaskinchikmi, chaymi mana faltakunanchikchu. Chaynatam qawachisun ‘huñunasqa iñiqkunaman espiritupa nisqanta’ (Apo. 3:6). Chaynataq yachasqanchikta humildadwan kasukunanchik. Proverbios 1:23 versiculopim Dios kaynata niwanchik: “Anyasqaykunata kasukuptikichikqa sonqoytam kicharisqaykichik [otaq espirituytam qosqaykichik]. Anyasqaykunata kasukuptikichikqa piensasqaytam yachachisqaykichik”, nispa. Diosqa ‘kasukuqninkunamanmi [. . .] qon chuya espiritunta’ (Hech. 5:32).

17. Huk rikchanachiywan willamuy Diospa bendicionninwan imayna yanapachikusqanchikta.

¹⁷ Jehová Diospa bendicionninta chaskinapaqqa anchatam kallpanchakuna. Ichaqa, allinkuna chaskisqanchikqa manam kallpanchakuspa rurasqallanchikmantachu. Chaytam tupachichwan mikuptinchik ima pasasqanwan. Imaynam cuerpopas mikuywan yanapachikun chaynam ñoqanchikpas yanapachikunchik kallpanchakusqanchikta Dios bendecisqanwan. Cuerpo qowasqanchikwanmi unanchasqan mikuykunata kusisqa mikunchik hinaspa alimentakunchikpas. Manam yachanchikchu mikuypa alimentonkunata cuerponchik imayna horqosqanta nitaq chay horqosqan imaynata kallpapi tikrakusqantapas. Ichaqa yachanchikmi cuerponchikpi chaynakuna pasasqanta, chaymi cuerponchikta yanapanchik mikuspa. Mikusqanchik alimentakuq kaptinqa aswan allinmi kasun. Chaynallataqmi Diospas wiñay kawsayta haypanapaq ima rurananchikta niwanchik hinaspa yanapawanchik chaykunawan cumplinapaq. Diosmi chaykunataqa yaqa lliwta ruran chaymi payta reqsikunanchik. Ichaqa, yanapakunanchikmi munayninta ruraspa, chaynata ruraspallam bendicionnintaqa chaskisun (Hageo 2:18, 19).

18. ¿Imata ruranapaqmi kallpanchasqa kachkanchik, hinaspa imanasqa?

¹⁸ Chaynaqa, tukuy sonqonchikmanta kallpanchakusun imapas kamachiwasqanchikwan cumplinapaq hinaspa Diospi haykapipas hapipakusun chaykunata ruranapaq (Mar. 11:23, 24). Ama qonqasunchu, “maskaqqa tarinmi” (Mat. 7:8). Hanaq pachaman riy suyaqkunaqa ‘wiña-wiñaypaq kawsakuy’ premiotam cielopi chaskinqaku (Sant. 1:12). Abrahampa miraynintakama bendicionkuna chaskiyta suyaq ‘sapaq ovejakunañataqmi’, kusisqa uyarinqaku allin Michiq Jesucristopa kayna nisqanta: ‘Hamuychik Taytaypa favorecesqankuna, hinaspayá kay pacha unanchasqa kasqanmantapuni qamkunapaq alistasqa munaychakuyta chaskiychik’ (Juan 10:16; Mat. 25:34). Chaynapim Jehová Diospa ‘favorecesqan runakunaqa allpata dueñochakunqaku’ hinaspa ‘chaypi wiña-wiñaypaq kawsakunqaku’ (Sal. 37:22, 29).

¿Imaynatam explicachwan?

• ¿Imaynam cheqap kasukuyqa?

• ¿Imatam rurananchik Diospa bendicionninta chaskinapaq?

• ¿Imaynatam chaskinchik chuya espirituta, hinaspa imatam ruran ñoqanchikpaq?

[Kay yachachikuypa tapukuyninkuna]

[9 kaq paginapi dibujokuna]

Jacobqa huk angelwanmi atipanakurqa Jehová Diospa bendicionninta chaskinanpaq

¿Chaynatachu ñoqanchikpas kallpanchakunchik?

[10 kaq paginapi dibujo]

Diospa espiritunmi Bezaleeltawan Aholiabta yanaparqa mana tupachiy atinata ruranankupaq