Tukuy sonqo maskhasun Jehová Diospa bendicionninta

“Diosqa maskhaqninkunata saminchaq[mi].” (HEB. 11:6.)

1, 2. a) ¿Imaynatan runakuna maskhanku Diospa bendicionninta? b) ¿Imanaqtinmi maskhananchispuni Jehová Diospa bendicionninta?

ASKHAN ninku: “Qhapaq kaypas, askha wasiyoq, carroyoq, imaymanayoq kaypas Diospa bendicionninmi”, nispa. Wakin religionkunapi umallikunapas bendicinkun runakunata, animalkunata, cosaskunata ima. Wakin runakunaqa khuyaytan karuta purinku Diosmanta bendicionta chaskinankupaq. Wakin político runakunapas llaqtankupaqmi Diosmanta bendicionta mañakunku. ¿Allinchu chay ruwasqanku? ¿Uyarinchu Dios mañakusqankuta? ¿Pikunamanmi qon bendicionninta? ¿Imaraykun chayta qon? Chaykunamantan yachasunchis.

² Bibliaq willasqan hina, kay tukukuy tiempopin lliw nacionkunamanta runakuna Jehová Diosta servinanku karqan. Paykunaqa Diospa munasqanman hinan sumaqta kawsananku karqan, allin willakuykunatapas hinantinpin predicananku karqan, chayraykuña cheqnisqa qatiykachasqa kankuman chaypas (Isa. 2:2-4; Mat. 24:14; Apo. 7:9, 14). Llapanchismi chay runakuna ukhupi tarikunchis. Ichaqa Diospa munayninta ruwananchispaqqa bendicionnintan necesitanchis. Mana yanapayninwanqa manan imatapas ruwayta atisunmanchu (Sal. 127:1). ¿Imaynatan yanapayninta chaskikusunman?

Jehová Diosqa kasukuqkunatan allinta yanapan

3. ¿Imaynatan Israel runakuna kawsankuman karqan Diosta kasukuspanku?

³ (Leey Proverbios 10:6, 7.) Israel runakuna  manaraq Prometesqa Hallp’aman haykushaqtinkun Jehová Diosqa prometerqan: ‘Kamachikuyniykunata kasukuspaykichisqa allillanpunin kankichis’, nispa (Deu. 28:1, 2). Kasukunkuman chayqa, Diospa bendicionnintan chaskinkuman karqan.

4. ¿Imayna kasukunanchistan Dios munan?

⁴ Ichaqa manan hawa sonqollachu kasukunanku karqan, aswanpas ‘tukuy sonqo kusisqan’ servinanku karqan, mana chayqa manan Diospa sonqonman chayaqtachu ruwankuman karqan (leey Deuteronomio 28:45-47). Animalkunapas supaykunapas yachankun kasukuytaqa, ichaqa manan paykuna hinachu kasukunanchis (Mar. 1:27; Sant. 3:3). Ñoqanchisqa Diosta munakusqanchisraykun kusikuywan kasukunanchis. Diosninchisqa manan hayk’aqpas mana hunt’ay atinataqa imatapas kamachiwasunmanchu, hinaspapas payqa tukuy sonqo maskhaqninkunataqa sumaqtan qhawarin (Heb. 11:6; 1 Juan 5:3).

5. ¿Imatan Israel runakuna rikuchinkuman karqan Deuteronomio 15:7, 8 textoq nisqanta kasukuspanku?

⁵ Israel runakunaqa Diospi confiasqankutan rikuchinkuman karqan tukuy sonqowan kamachikuyninkunata kasukuspa. Huknintan tarinchis Deuteronomio 15:7, 8 textopi (leey). Sichus chay kamachikuyta obligasqa hina rimapakuspa mich’akuspa hunt’ankuman karqan chayri, ¿yanapakunkumanchu karqan Diospa llaqtanpi sumaq kawsay kananpaq? ¿Confiashankumanchu karqan Jehová Dios tukuy ima necesitasqankuta qonanpi? ¿Dios hina qoykukuqchu kankuman karqan? Manapunin. Diosqa imayna sonqoyoq kasqankutan qhawasharqan, tukuy sonqowan qoykukuqkunataqa yanapananmi karqan tukuy imapipas allillan kanankupaq (Deu. 15:10). Diospa chay ruwananpi confiaqkunaqa paykunallamantan allin kaqta ruwananku karqan, Diostaq tukuy ima necesitasqankuta qonan karqan (Pro. 28:20).

6. ¿Imamantan seguro kanchis Hebreos 11:6 textota leespa?

⁶ Hebreos 11:6 textoq nisqan hina, Diospa yanapayninta chaskinanchispaqqa manan iskayrayananchischu premiota qowananchismanta, chaymantapas paytan ‘maskhananchis’. Chay textopi griego rimaypi ‘maskhaymanta’ rimaspaqa tukuy sonqowan maskhaymantan rimashan. Chhaynaqa tukuy sonqowan Diosta maskhaspaqa chaskisunpunin yanapayninta. Chaytaqa ‘mana llullakuq Diosmi prometen’ (Tito 1:2). Ñawpaq tiempomantapachan Diosqa rikuchirqan promesankunaqa mana yanqachu kasqanta. Rimasqanqa hunt’akunpunin (Isa. 55:11). Diosqa yanapawasunpunin paypi tukuy sonqo confiaqtinchisqa.

7. ¿Ima yanapaytan chaskinchis Abrahampa mirayninmanta?

⁷ Diosqa willarqanñan Abrahampa ‘mirayninwan’ askha bendicionkuna kananta. Chay mirayqa karqan Jesucriston, hinallataq hanaq pachapaq akllasqa cristianokunapas. Chay cristianokunatan ‘Diosqa laqhayaqmanta sumaq k’anchayninman waqyaspa akllarqan paypa musphana ruwasqankunata willanankupaq’ (Gál. 3:7-9, 14, 16, 26-29; 1 Ped. 2:9). Paykunan kanku Jesuspa kaqninkunata qhawanankupaq churasqa “allin yuyayniyoq hunt’aq kamachi”, chayraykun kasukunanchis, mana chayqa manan atisunmanchu Diospa amigon kayta (Mat. 24:45-47). Mana yanapayninkuwanqa manan Diospa Simin Qelqata entiendesunmanchu, nitaq yachasunmanchu chayman hina imayna ruwaytapas. Bibliapi yachasqanchisman hina kawsaqtinchisqa Diosmi allinpaq qhawariwasun.

Diospa munaynintan ñawpaqta ruwana

8, 9. ¿Imaynatan Jacob kallpachakurqan Diospa munayninta hunt’ananpaq?

⁸ Jacobmanta yuyarisun, payqa anchatan kallpachakurqan Diospa allin qhawarisqan kananpaq. Manan yacharqanchu imaynata Abrahamman Diospa prometesqan hunt’akunanta, ichaqa seguron kasharqan abuelonpa miraynin askhaman tukuspa huk nación kapunanta. Chaymi 1781 watapi, manaraq Jesús hamushaqtin,  Haranta rirqan huk esposata maskhakamunanpaq. Ichaqa manan allin esposallatachu munarqan, aswanpas Dios sonqo warmitan, chhaynapi wawankuna allin uywaq mama kananpaq.

⁹ Jacobqa Labanpa ususin Raqueltan reqsirqan, anchatataq payta munakurqan. Chaymi paywan casarakapunanpaq qanchis wata Labanpaq llank’arqan. Ichaqa manan payta ancha munakusqanraykullachu. Payqa allintan yacharqan abuelon Abrahamman, taytan Isaacmanpas Diospa prometesqanta (Gén. 18:18; 22:17, 18; 26:3-5, 24, 25). Qhepa watakunamanmi taytan Isaac nirqan: “Tukuy-atiyniyoq Dios[mi] qanta saminchasunki, anchata askhayachisunki ancha askha suyukunaman tukunaykikama. Abrahampa saminchantaq qanman qosqa kachun, hinallataq mirayniykimanpas, tiyasqayki hallp’ata herenciapi chaskinaykipaq, chaytan Diosqa Abrahamman qorqan”, nispa (Gén. 28:3, 4). Jacobqa confiarqanmi Diospa promesankuna hunt’akunanpi, chaymi kallpachakurqan familiayoq kananpaq allin warmita tarinanpaq.

10. ¿Imanaqtinmi Jehová Dios sumaqta qhawarirqan Jacobta?

¹⁰ Familiayoq kapuspanqa manan qhapaq kaykuna huñuypichu karqan, aswanpas wawankunamanmi yachachirqan Jehová Diospa promesankunamanta. Jacobpaqqa Diospa munaynin ruwaymi imamantapas aswan allin karqan. Chaymi Diospa sumaq qhawarinanta munaspa tukuy atisqanta kallpachakurqan, imaymana sasachakuykunaña kaqtinpas. Chhaynatapunin payqa ruwaq machuyapuspapas, chayraykun Diosqa sumaqta qhawarirqan (leey Génesis 32:24-29).

11. Yachanchistaq Diospa ima ruwananta chayqa, ¿ima ruwananchispaqmi kallpachakunanchis?

¹¹ Jacob hinan ñoqanchispas mana llapantachu yachanchis Diospa munaynin imayna hunt’akunanmanta. Ichaqa Diospa Siminta estudiaspan yachanchis Jehová Diospa ‘p’unchaynin’ imayna kananta, imakuna chaypi sucedenantawan (2 Ped. 3:10, 17). Manaña yachanchischu hayk’aqchus chay p’unchay chayamunanta chaypas, yachanchismi cercapiña kasqanta. Chaymantapas yachallanchistaqmi kay tukukuy p’unchaykunapi tukuy kallpawan predicaspanchisqa kikinchista qespichikunanchista hinallataq uyariwaqninchiskunatapas (1 Tim. 4:16).

12. ¿Imatan Dios allinta yachan, imaynatan yanapawashallasun?

 ¹² Jehová Diospa phiñakuyninqa qonqayllan chayamunqa. Payqa ñan huk p’unchayta akllanña chaypaq, manataqmi suyanqaraqchu kay pachapi llapan runakunaman predicananchistaqa (Mat. 10:23). Chaywanpas payqa allintan yachachiwarqanchis allin predicaq kananchispaq. Chaymi iñiywan tukuy atisqanchista ruwanchis kaqninchiskunatapas qonchis predicaypi yanapakunanchispaq. ¿Hayk’a runakunaraqtaq predicasqanchis territoriokunapi Diospa llaqtanman haykumunqaku? Manan chaytaqa yachanchischu (leey Eclesiastés 11:5, 6). Chaywanpas willashanallanchismi Jehová Diosmanta, paymi llank’asqanchista allinpi tukuchinqa (1 Cor. 3:6, 7). Payqa allintan yachan maytukuy kallpachakusqanchista, chaymi santo espiritunwan necesitasqanchisman hina yachachiwashallasunpuni (Sal. 32:8).

Diosmanta mañakusun santo espiritunta

13, 14. ¿Imaynatan Jehová Dios rikuchirqan santo espiritunwan serviqninkunata yanapasqanta?

¹³ ¿“Manan Diospa llaqtanpi ima llank’aypipas yanapakuyta atiymanchu, manan predicaytapas atiymanchu”, nispachu nishanki? Chhayna kaqtinqa, Jehová Diosmanta mañakuy santo espiritunta (leey Lucas 11:13). Payqa espiritunwanmi serviqninkunata yanapan ima llank’aytapas hunt’anankupaq, pisillataña yachaqtinkupas otaq imaynaña ñawpaqpi karqanku chaypas. Israel runakunaqa michiqkunalla kamachikunallan karqanku, ichaqa Egipto llaqtamanta lloqsisqanku qhepallatan paykunata santo espíritu kallpacharqan ejercitokunata atipanankupaq (Éxo. 17:8-13). Diosqa espiritullanwantaqmi Bezaleelman Aholiabmanwan yachaywan hunt’aykurqan, chhaynapi yupaychana karpata kamachikusqanman hinapuni ruwanankupaq (Éxo. 31:2-6; 35:30-35).

¹⁴ Kay tiempopipas Diospa espiritunqa chhaynatan wakin iñiqmasinchiskunata yanaparqan qelqanchiskuna ruwaq maquinakunata manejayta yachanankupaq. 1927 watapin qelqakuna ruwaymanta encargasqa Robert J. Martin iñiqmasinchis huk cartapi khaynata willakusqa: “Señorninchisqa necesitasqanchis tiempopin chayachimuwarqanku qelqakuna ruwanapaq huk hatun maquinata, ichaqa manan imatapas yacharqaykuchu chay maquinamanta. Señormi yanapawarqanku allin yachayta qowaspanku. [...] Chaymi iskay kinsa semanamantaqa allintaña chay maquinata llank’achisharqayku; kunankamapas llank’ashallanraqmi imaymanatataq chaywan ruwashayku, chay máquina ruwaqkunapas manan creenkuchu imaymanapaq llank’achisqaykuta”, nispa. Kunanpas Jehová Diosqa yanapashallanmi tukuy sonqonkuwan llank’aqkunata.

15. ¿Imaynatan yanapawanchis Romanos 8:11 texto?

 ¹⁵ Santo espirituqa imaymanapin yanapawanchis, chaywanmi cristianokunaqa imaymana sasachakuyninchiskunata atipayta atinchis. Sichus sonqonchis ima huchamanpas aysayta munawashanchis chayqa, santo espiritun yanapawasun kallpata hap’inanchispaq. Yuyaymanananchismi Romanos 7:21, 25; 8:11 textopi, chaypin apóstol Pablo rimarqan “wañusqanmanta Jesucristota kawsarichimpuq Diospa Espiritun[manta]”, chay espiritun kallpata qowasun ama cuerponchiswan atipachikunanchispaq. Chay textoqa hanaq pachapaq akllasqa cristianokunapaqña qelqasqa karqan chaypas, llapanchistan yanapawasunman. Sichus Cristopi iñispa sonqonchismanta mana allin yuyaykuykunata chinkachisun, santo espirituq munasqanman hinataq kawsasunpas chayqa, wiñay kawsaytan chaskisunchis.

16. ¿Imakunatan ruwananchis santo espirituta chaskinanchispaq?

¹⁶ Diosqa manan hinallachu qowasun santo espirituntaqa, chaymi mañakusqanchismantapas tukuy sonqowan Simin Qelqata estudiananchis (Pro. 2:1-6). Santo espiritutaqa chaskillasunmantaqmi iñiq t’aqawan huñunakuspapas, chayraykun mana p’itiyta hamushanallanchis huñunakuykunaman, chhaynapin “iñiq t’aqakunaman Espirituq nisqanta” uyarisun (Apo. 3:6, Edición 1988). Chaymantapas huch’uyyaykukuywanmi chaskikunanchis Diospa ima yachachikuynintapas, chhaynapin kasukuq kasun. Bibliaq nisqan hina, “Diosmi kasukuqninkunaman Santo Espirituta qon” (Hech. 5:32).

17. Huk rikch’anachiywan willay Diospa yanapawasqanchista.

¹⁷ Tukuy imaymana allin kaqkunata Jehová Diosmanta chaskinanchispaqqa, kallpachakunanchismi munasqanman hina ruwananchispaq. Ichaqa manan chayraykullachu imatapas paymantaqa chaskinchis. Chayta entiendenapaq yachasunchis mikhunamanta. Imaynan mikhunaqa kallpata qowanchis, chhaynallataqmi Diospa yanapayninpas allinninchispaq. Mikhuspaqa kusikunchismi, chhaynapitaqmi kallpatapas hap’inchis. Manaña allintachu yachanchis imaynapi chay mikhuna kallpata qowasqanchista chaypas, yachanchismi allinninchispaq kasqanta. Allin alimento kaqta mikhuqtinchisqa aswan allintan hap’iwanchis. Imaynan Jehová Diosqa mikhunata qowanchis kallpata hap’inanchispaq, chhaynallataqmi wiñay kawsayman chayananchispaqpas qowanchis askha kamachikuykunata, yanapawanchistaq chayta hunt’ananchispaq. Payqa imaymanapin sumaqta yanapaykuwanchis, chaymi agradecekunanchis, kasukunanchistaqmi ima niwasqanchistapas; chayta ruwallaqtinchismi sumaqta qhawariwasun (Ageo 2:18, 19).

18. ¿Imata ruwananchispaqmi kallpachakushanallanchis, imarayku?

¹⁸ Chhaynaqa tukuy sonqo ruwasun Diospa llaqtanpi chaskisqanchis llank’aykunata, Diosman hap’ipakusun ima ruwasqanchispas allinpi tukunanpaq (Mar. 11:23, 24). Chhaynapin ‘maskhasqanchista tarisunchis’ (Mat. 7:8). Akllasqa cristianokunaqa “wiñay kawsay coronatan” chaskinqaku hanaq pachapi (Sant. 1:12). ‘Wak ovejakunataq’ Abrahampa mirayninrayku wiñay kawsayta chaskinqaku. Michiqninku Jesucriston paykunata ninqa: “Yayaymi qankunata samincharqasunkichis, chayrayku hamuychis, hinaspa qhapaqsuyu saminchakunata chaskiychis. Chaykunatan Diosqa kay pacha kamasqamantapacha qankunapaq wakichirqan”, nispa (Juan 10:16; Mat. 25:34). Jehová “Diospa saminchasqankunaqa kay [pacha] hallp’atan chaskinqaku, [...] chaypin wiñaypaq tiyanqaku” (Sal. 37:22, 29).

¿Ima nispan kutichisunman?

• ¿Imayna kasukunanchistan Dios munan?

• ¿Imatan ruwananchis Dios sumaqta qhawariwananchispaq?

• ¿Imatan ruwananchis santo espirituta chaskinanchispaq? ¿Imaynatan chay espíritu yanapawanchis?

[Tapuykuna]

[9 paginapi dibujokuna fotokunapiwan]

Jacobmi huk angelwan hap’inakurqan Diospa sumaq qhawarinanta munaspa.

¿Pay hinachu kallpachakushanchis?

[10 paginapi dibujo]

Santo espiritun Bezaleelman Aholiabmanwan yachaywan hunt’aykurqan