Buka Maromak Jeová nia bensaun ho laran tomak
Buka Maromak Jeová nia bensaun ho laran tomak
“[Maromak] fó kolen ba sira neʼebé buka nia.”—EBR 11:6.
1, 2. (a) Oinsá mak ema barak buka Maromak nia bensaun? (b) Tanbasá mak ita hakarak no presiza Maromak Jeová nia bensaun?
IHA rai oioin ema iha toman atu hatete: “Maromak haraik bensaun ba Ita.” Porezemplu iha rai balu maski ema la koñese malu, maibé sira hatete ida-neʼe kuandu ema fani. Ulun-naʼin husi relijiaun oioin fó bensa ba ema, animál, no sasán ruma. Ema balu laʼo-rai dook atu bá fatin santu tanba sira hakarak hetan bensaun. Polítiku-naʼin sira mós husu beibeik Maromak atu haraik bensaun ba sira-nia nasaun. Tuir Ita-nia hanoin ema bele husu bensaun hanesan neʼe ka lae? Sira hetan duni bensaun ka lae? Sé mak loloos hetan Maromak nia bensaun, no tanbasá?
2 Maromak Jeová fó-hatene nanis katak iha loron ikus nia sei iha povu neʼebé moos no buka dame. Povu sira-neʼe mai husi nasaun hotu no sira sei haklaken lia-foun diʼak kona-ba Reinu toʼo rai nia rohan maski ema odi no kontra sira. (Isa 2:2-4; Mt 24:14; Apok 7:9, 14) Ita hotu neʼebé simu responsabilidade atu sai parte ba povu neʼe hakarak no presiza Maromak nia bensaun, tanba ita la bele hetan susesu se ita la iha Maromak nia bensaun. (Sal 127:1) Maibé oinsá mak ita bele hetan Maromak nia bensaun?
Bensaun toman ema neʼebé halo tuir
3. Se ema Izraél halo tuir Maromak, sira sei hetan rezultadu diʼak saida?
3 Lee Provérbios 10:6, 7. * Foin antes nasaun Izraél tama ba rai neʼebé promete ona ba sira, Maromak Jeová fó-hatene katak sira sei hetan moris neʼebé diʼak no hetan protesaun se sira halo tuir ninia liafuan. (Deut 28:1, 2) Tuir loloos sira laʼós deʼit hetan Maromak Jeová nia bensaun maibé bensaun sira-neʼe rasik mak sei “kaer toman” sira. Neʼe katak sira neʼebé halo tuir Maromak sei hetan duni bensaun barak.
4. Halo tuir ho laran tomak envolve saida?
4 Saida mak tenke book ema Izraél atu halo tuir Maromak? Maromak nia Ukun-Fuan hatudu katak se ninia povu la serbí nia “ho ksolok no kontente iha laran” nia sei la kontente duni ho sira. (Deut 28:45-47) Animál ka anju aat sira mós dala ruma bele halo tuir Maromak maski la ho laran tomak, maibé ita nuʼudar Maromak Jeová nia povu tenke halo tuir nia ho laran tomak tanba nia merese ida-neʼe. (Mc 1:27; Tgo 3:3) Hodi halo tuir Maromak husi laran ita hatudu katak ita hadomi nia. Ita halo tuir ho kontente tanba ita fiar katak Maromak Jeová nia ukun-fuan sira la susar mai ita no katak “nia fó kolen ba sira neʼebé buka nia”.—Ebr 11:6; 1 Joao 5:3.
5. Oinsá mak fiar ba Maromak Jeová nia promesa ajuda ema atu halo tuir lei iha Deuteronômio 15:7, 8?
5 Hanoin toʼok oinsá mak ema Izraél bele hatudu sira-nia fiar ba Maromak hodi halo tuir lei husi Deuteronômio 15:7, 8. * (Lee.) Se karik ema Izraél halo tuir lei ida-neʼe la ho laran, neʼe karik bele halo kmaan ba ema kiak sira, maibé neʼe bele haburas relasaun diʼak no domin entre Maromak nia povu ka lae? No liuliu, ida-neʼe sei hatudu sira-nia fiar ba Maromak Jeová nia kbiit atu tau matan ninia atan sira ka lae? No mós neʼe sei hatudu katak sira hafolin oportunidade atu haleno ninia laran-luak ka lae? Lae duni! Maromak bele haree ema nia laran no nia promete katak nia sei haraik bensaun ba buat neʼebé ema laran-luak halo. (Deut 15:10) Fiar ba promesa neʼe sei book ema atu halo tuir Maromak no sei lori bensaun barak ba sira.—Prov 28:20.
6. Ebreu 11:6 halo ita fiar kona-ba saida?
6 Maski importante atu fiar katak Maromak Jeová mak Ida neʼebé Fó Kolen ba ninia atan sira, maibé iha Ebreu 11:6 fó sai hahalok ida tan neʼebé ita presiza hatudu atu simu Maromak nia bensaun. Iha eskritura neʼe ita bele haree katak Maromak Jeová fó kolen ba sira neʼebé “buka nia”. Iha lia orijinál liafuan neʼebé uza iha neʼe hatudu kona-ba hakaʼas-an ho neon tomak atu buka hetan buat ruma. Sin, se ita hakaʼas an ita bele fiar duni katak ita sei hetan bensaun! Ida neʼebé halo promesa neʼe mak Maromak loos neʼebé “la bosok”. (Tito 1:2) Durante tinan rihun ba rihun Maromak hatudu ona katak ita bele fiar duni ba ninia promesa sira. Ninia liafuan sempre sai loos. (Isa 55:11) Nuneʼe ita la duvida katak se ita hatudu fiar neʼebé loos, Maromak sei haraik duni kolen ba ita.
7. Oinsá mak ita bele hetan bensaun liuhusi Abraão nia “bei-oan”?
7 Jesus Kristu mak parte primeiru husi Abraão nia “bei-oan”. No ema kristaun kose-mina sira mak parte segundu husi “bei-oan” neʼebé promete nanis ona. Maromak fó knaar ba sira atu “haklaken nia hahalok kmanek. Nia bolu [sira] husi nakukun laran ba roman nabilan”. (Gal 3:7-9, 14, 16, 26-29; 1 Ped 2:9) Ita la bele hetan relasaun diʼak ho Maromak Jeová se ita lakohi halo tuir sira neʼebé Jesus hili atu tau matan ba ninia rikusoin tomak. Se ita la simu ajuda husi atan “laran-metin no matenek”, ita sei la komprende buat neʼebé ita lee iha Maromak nia Liafuan no la hatene oinsá atu halo tuir. (Mt 24:45-47) Hodi halo tuir buat neʼebé ita aprende husi Bíblia, ita bele fiar katak ita sei hetan Maromak nia bensaun.
Hanoin nafatin Maromak nia hakarak
8, 9. Oinsá mak Jacob nia hakaʼas-an tuir duni buat neʼebé Maromak hakarak?
8 Kuandu ita hanoin kona-ba hakaʼas-an atu hetan Maromak nia bensaun, karik ita hanoin-hetan istória kona-ba Jacob. Nia la hatene oinsá mak Maromak nia promete ba Abraão sei sai loos, maibé nia fiar katak Maromak Jeová sei halo ninia avó nia bei-oan sira sai barak, no sira sei sai nasaun boot ida. Nuneʼe, iha tinan 1781 molok Kristu, Jacob halo viajen ba Haran atu buka feen ida. Nia la hanoin deʼit atu buka feen neʼebé bele halo nia haksolok, maibé nia buka feen ida neʼebé adora Maromak Jeová no sei sai inan neʼebé diʼak ba ninia oan sira.
9 Ita hatene katak Jacob hasoru ninia prima Raquel, no ikusmai Jacob laran monu ba nia. Jacob promete atu halo serbisu ba Raquel nia aman Labão ba tinan hitu, hodi bele hetan Raquel nuʼudar feen. Neʼe laʼós deʼit istória domin nian ida. Maibé ita bele fiar katak Jacob hatene kona-ba Maromak Aas Liu Hotu nia promesa ba ninia avó Abraão, no promesa neʼe mós repete fali ba ninia aman, Isaac. (Gên 18:18; 22:17, 18; 26:3-5, 24, 25) Tuirmai Isaac fó-hatene fali promete neʼe ba ninia oan Jacob hodi dehan: “Maromak Aas Liu Hotu sei haraik bensaun ba ó no aumenta ó-nia bei-oan no halo ó sai barak, no ó sei sai duni nasaun barak. No nia sei fó ba ó bensaun Abraão nian, ba ó no ó-nia bei-oan sira hamutuk ho ó, atu ó bele simu rai neʼebé ó hela hanesan ema estranjeiru, rai neʼebé Maromak fó tiha ona ba Abraão.” (Gên 28:3, 4) Nuneʼe Jacob nia hakaʼas-an atu hetan feen neʼebé diʼak hodi harii família ida hatudu katak nia tau fiar ba buat neʼebé Maromak Jeová hatete ona.
10. Tanbasá mak Maromak Jeová hakarak atu fó bensaun ba Jacob?
10 Jacob la buka deʼit rikusoin ba ninia família. Maibé nia hanoin liuliu kona-ba Maromak Jeová nia promesa ba ninia oan sira. Nia hanoin nafatin kona-ba Maromak Jeová nia hakarak. Jacob ho laran-metin hakaʼas an atu halo buat hotu neʼebé nia bele atu hetan Maromak nia bensaun maski hasoru susar sira. Toʼo nia katuas ona nia sei sente hanesan neʼe, no Maromak Jeová fó bensaun ba nia.—Lee Gênesis 32:28. *
11. Tanba ita hatene ona Maromak nia hakarak, ita tenke hakaʼas an atu halo saida?
11 Hanesan Jacob, ita la hatene buat hotu kona-ba oinsá mak Maromak Jeová nia hakarak sei sai loos. Maibé, hodi estuda Maromak nia Liafuan, ita bele hatene buat balu kona-ba “Naʼi [Jeová] nia loron”. (2 Ped 3:10, 17) Porezemplu, ita la hatene loloos bainhira mak loron neʼe sei toʼo mai, maibé ita hatene katak loron neʼe besik ona. Ita fiar ba Maromak nia Liafuan neʼebé hatete katak hodi fó sasin ho didiʼak iha tempu badak neʼe, ita sei salva ita-nia an rasik no sira neʼebé rona ita.—1 Tim 4:16.
12. Ita bele fiar kona-ba saida deʼit?
12 Ita hatene katak mundu nia rohan bele mosu iha tempu naran deʼit; Maromak Jeová lalika hein toʼo ita fó sasin hotu ba ema ida-idak iha rai neʼe. (Mt 10:23) Liután neʼe, ita simu matadalan neʼebé diʼak kona-ba oinsá atu halaʼo didiʼak ita-nia serbisu haklaken. Ho fiar ita hola parte iha serbisu neʼe hodi uza ita-nia kbiit tomak, no uza buat saida deʼit neʼebé ita iha. Ita sei sempre haklaken iha fatin neʼebé ema simu ita-nia mensajen ka lae? Tuir loloos, ita la bele hatene nanis kona-ba neʼe. (Lee Eclesiastes 11:5, 6. *) Ita-nia knaar mak atu haklaken no ita fiar katak Maromak Jeová sei fó bensaun ba ita. (1 Kor 3:6, 7) Ita bele fiar katak Maromak haree ita-nia hakaʼas-an, no liuhusi ninia espíritu santu nia sei fó matadalan neʼebé ita presiza.—Sal 32:8.
Buka espíritu santu
13, 14. Oinsá mak Maromak nia espíritu santu ajuda ninia atan sira?
13 Maibé oinsá se ita sente katak ita la iha matenek atu halaʼo knaar ruma ka atu hola parte iha serbisu haklaken? Ita tenke husu Maromak Jeová atu fó ninia espíritu santu atu aumenta ita-nia matenek atu halaʼo serbisu ba nia. (Lee Lucas 11:13.) Maromak nia espíritu bele ajuda ema ida atu halo serbisu ka atu halaʼo knaar espesiál ruma maski uluk nia ladún iha esperiénsia ka la iha matenek ruma. Porezemplu, lakleur depois ema Izraél sai husi Ejitu, Maromak nia espíritu ajuda sira atu manán inimigu maski sira la iha esperiénsia kona-ba halo funu tanba sira mak bibi-atan ka ema nia atan deʼit. (Êx 17:8-13) Lakleur depois neʼe, Maromak nia espíritu mós ajuda Bezalel no Oholiab atu harii tabernákulu neʼebé kapás hodi tuir planu neʼebé Maromak fó.—Êx 31:2-6; 35:30-35.
14 Espíritu neʼe mós ajuda Maromak nia atan sira iha tempu modernu atu tau matan ba organizasaun nia presiza kuandu sira tenke uza mákina boot atu halo rasik livru sira. Iha tinan 1927, irmaun R. J. Martin, neʼebé tau matan ba serbisu halo livru sira, hakerek karta ida atu esplika kona-ba buat diʼak neʼebé Maromak nia atan sira halo. Nia hatete: “Iha tempu neʼebé loos, Naʼi loke odamatan; no ami hetan mákina boot atu halo livru, maski ami la hatene oinsá atu monta no uza mákina neʼe. Maibé Naʼi hatene oinsá atu book ema nia hanoin no fó matenek ba sira neʼebé fó sira-nia an tomak ba nia. . . . Iha semana balu deʼit nia laran, ami bele halo mákina neʼe laʼo; no sei laʼo toʼo agora, hodi halo serbisu neʼebé ninia naʼin rasik la hatene katak mákina neʼe bele halo.” Ohin loron Maromak Jeová kontinua fó bensaun ba ninia atan sira neʼebé hakaʼas an atu serbí nia.
15. Oinsá mak Roma 8:11 bele fó laran-manas ba sira neʼebé hasoru tentasaun ruma?
15 Maromak Jeová nia espíritu fó ajuda mai ita iha dalan oioin. Maromak nia atan hotu bele simu espíritu neʼe no ida-neʼe bele ajuda sira atu manán hasoru susar boot oioin. Oinsá se ita sente katak tentasaun boot besik atu domina ita? Paulo nia liafuan iha Roma 7:21, 25 no 8:11 bele fó laran-manas mai ita. Sin, “espíritu neʼebé halo Jesus moris hiʼas husi mate” bele mós ajuda ita, hodi fó kbiit mai ita atu manán hasoru hakarak aat isin nian. Maski Paulo hakerek liafuan sira-neʼe ba ema kristaun kose-mina sira, maibé liafuan sira-neʼe diʼak ba Maromak nia atan hotu. Ita hotu bele hetan moris hodi tau fiar ba Kristu, hodi hakaʼas an atu oho hakarak neʼebé aat no hodi moris tuir matadalan neʼebé ita simu liuhusi espíritu.
16. Saida deʼit mak ita tenke halo atu simu Maromak nia espíritu santu?
16 Ita bele simu Maromak nia espíritu se ita la hakaʼas an atu buka espíritu neʼe ka lae? Lae. Maski ita presiza halo orasaun atu husu Maromak nia espíritu, maibé importante mós atu sai badinas estuda Maromak nia Liafuan. (Prov 2:1-6) Liután neʼe, Maromak mós haraik ninia espíritu ba kongregasaun kristaun. Hodi tuir reuniaun beibeik ita hatudu katak ita hakarak “rona ba buat neʼebé espíritu dehan ba kreda sira”. (Apok 3:6) No mós, ita tenke ho haraik-an halo tuir buat neʼebé ita aprende. Provérbios 1:23 fó konsellu hodi dehan: “Fila fali bá, hodi tuir haʼu-nia konsellu. No haʼu sei halo haʼu-nia espíritu suli ba imi.” Loloos, Maromak fó ninia espíritu santu “ba sira neʼebé halo tuir nia hakarak”.—Apos 5:32.
17. Ho saida mak ita bele kompara rezultadu husi Maromak nia bensaun ba ita-nia hakaʼas-an?
17 Maski ita presiza hakaʼas an atu bele hetan Maromak nia bensaun, maibé la haluha katak bensaun barak neʼebé Maromak Jeová fó ona ba ninia povu laʼós tan deʼit ita-nia serbisu badinas. Ita bele kompara rezultadu husi Maromak nia bensaun ba ita-nia hakaʼas-an ho rezultadu neʼebé ita hetan husi ai-han neʼebé diʼak. Maromak kria ita-nia isin hodi ita bele haksolok ho ai-han diʼak no iha tempu hanesan hetan forsa husi ai-han neʼe. Nia mós mak ida neʼebé fó ai-han mai ita. Ita ladún komprende oinsá mak ai-han bele iha buat diʼak sira neʼebé importante ba ita-nia isin. No ita barak mós la bele esplika kona-ba oinsá mak ita-nia isin hetan forsa husi ai-han neʼe. Ita hatene deʼit katak prosesu neʼe laʼo diʼak no ita apoia ida-neʼe hodi han loroloron. Se ita hili atu han ai-han neʼebé diʼak ba saúde, neʼe bele fó rezultadu diʼak liu ba ita-nia isin. Nuneʼe mós, Maromak Jeová fó matadalan ba ita kona-ba oinsá ita bele hetan moris rohan-laek, no nia fó ajuda neʼebé ita presiza atu halo tuir matadalan sira-neʼe. Klaru katak nia fó ajuda barak mai ita no ba nia deʼit mak ita tenke fó agradese. Maibé atu bele simu bensaun neʼe, ita tenke halo tuir nia no moris tuir ninia hakarak.—Ageu 2:18, 19.
18. Ita rasik sei hakaʼas an atu halo saida? Tanbasá?
18 Tan neʼe hakaʼas an ho laran tomak atu halo knaar hotu neʼebé ita simu. Diʼak atu sempre sadere ba Maromak Jeová atu hetan susesu. (Mc 11:23, 24) Nuʼudar ita halo ida-neʼe, fiar metin bá katak “ema neʼebé buka sei hetan”. (Mt 7:8) Ema kristaun kose-mina sira sei hetan “kolen moris nian” iha lalehan. (Tgo 1:12) Kristu nia “bibi seluk”, neʼebé hakaʼas an atu hetan bensaun ba sira-nia an rasik liuhusi Abraão nia bei-oan, sei haksolok hodi rona Kristu hatete: “Mai, imi neʼebé haʼu Aman fó bensa, mai simu nuʼudár liman-rohan reinu neʼebé hadiʼa hela ba imi hori mundu hahú.” (Joao 10:16; Mt 25:34) Sin, “sira neʼebé simu bensaun husi [Maromak] sei hela iha rai, . . . no sira sei moris ba nafatin iha neʼebá”.—Sal 37:22, 29.
[Nota–rodapé]
^ par. 3 Provérbios 10:6, 7: “Bensaun mak ba ema loos, maibé kona-ba ema aat nia ibun, neʼe mak nakonu ho violénsia. Ema loos sei hanoin-hetan tanba nia bensaun, maibé ema aat nia naran mak hanesan buat neʼebé dois tebes.”
^ par. 5 Deuteronômio 15:7, 8: “Se karik imi-nia maun-alin ida sai kiak iha imi leet iha imi-nia sidade ida, iha rai neʼebé Jeová imi-nia Maromak fó ba imi, imi keta halo toos imi-nia laran ka taka imi-nia liman ba imi-nia maluk neʼebé kiak. Tanba imi tenke ho laran-diʼak loke imi-nia liman ba nia no ho buat neʼebé imi iha fó empresta ba nia ho promesa, hodi tuir buat neʼebé nia presiza, no neʼebé nia kuran.”
^ par. 10 Gênesis 32:28: “Depois mane hatete: ‘Agora ó-nia naran laʼós tan Jacob maibé Israel, tanba ó luta malu ho Maromak no ho ema hodi ikusmai ó manán.’”
^ par. 12 Eclesiastes 11:5, 6: “Hanesan ó la hatene kona-ba oinsá espíritu laʼo iha ruin sira iha feto neʼebé isin-rua nia kabun laran, nuneʼe mós ó la hatene Maromak loos nia serbisu, ida neʼebé halo buat hotu. Iha dadeer ó kari ó-nia fini no toʼo kalan keta husik ó-nia liman atu deskansa, tanba ó la hatene ida neʼebé mak sei moris, iha neʼe ka iha neʼebá, ka rua rua sei fó rezultadu diʼak.”
Ita bele hatán?
• Halo tuir ho laran tomak envolve saida?
• Saida mak ita presiza halo atu hetan Maromak nia bensaun?
• Oinsá mak ita bele hetan Maromak nia espíritu santu? No oinsá mak espíritu neʼe bele ajuda ita?
[Pergunta estudu nian]
[Dezeñu iha pájina 9]
Jacob riba malu ho anju atu simu Naʼi Jeová nia bensaun.
Ita mós hakaʼas an hanesan neʼe ka lae?
[Dezeñu iha pájina 10]
Maromak nia espíritu ajuda Bezalel no Oholiab atu halo serbisu kapás