Taem Ol Kristin Oli Joengud, Oli Leftemap Nem Blong God

“Tabu Spirit, . . . hem i givim pis long yumi. Nao from samting ya, yumi mas traehad blong holem pis ya, blong yumi save joen gud oltaem.”—EFES. 4:3.

1. ?Long faswan handred yia, olsem wanem ol Kristin long Efesas oli leftemap nem blong God?

KRISTIN kongregesen long Efesas bifo i joengud, mo samting ya i leftemap nem blong tru God ya, Jeova. I gat plante bigfala bisnes long taon ya Efesas. Ating sam Kristin oli rij mo oli gat ol slef blong olgeta. Sam narafala Kristin oli ol slef, we ating oli pua tumas. (Efes. 6:5, 9) Sam long ol Kristin ya oli man Jiu, mo oli kasem save long trutok taem oli lesin long ol tok we aposol Pol i mekem blong tri manis, long haos prea blong ol man Jiu. Sam narafala, oli mekem wosip long god ya Atemis bifo we oli kam Kristin, mo oli mekem majik tu. (Wok 19:8, 19, 26) I klia se, tru Kristin skul i mekem ol man we oli gat ol defdefren kaen laef bifo, oli joengud. Pol i luksave se taem olgeta long kongregesen oli joengud, oli leftemap nem blong Jeova. Aposol ya i raetem se: “Yumi ol man blong jos [“kongregesen,” NW], bambae yumi evriwan i . . . leftemap nem blong God i go antap oltaem.”—Efes. 3:21.

2. ?Wanem i save spolem fasin joengud blong ol Kristin long Efesas?

² Be i gat sam samting we oli save spolem gudfala fasin joengud long kongregesen blong Efesas. Pol i givim woning long ol elda se: “I gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.” (Wok 20:30) Mo tu, sam brata oli gat sam tingting yet we oli save seraotem kongregesen. Pol i givim woning se ol tingting ya oli ‘stap mekem wok long ol man we oli no obei long God.’—Efes. 2:2; 4:22.

Leta We i Tokbaot Fasin Joengud

3, 4. ?Wanem ol samting we Pol i raetem long ol Kristin long Efesas, long saed blong fasin joengud?

³ Pol i luksave se sipos ol Kristin oli wantem gohed blong wok tugeta long wan tingting nomo, wanwan long olgeta oli mas traehad oltaem blong joengud. God i pulum Pol blong raetem wan leta i go long ol Kristin long Efesas, mo i gat plante toktok long leta ya long saed blong fasin joengud. Long wan haf blong leta ya, Pol i tokbaot stamba tingting blong God blong mekem ‘olgeta samting oli kam joen long Kraes.’ (Efes. 1:10) Mo tu, Pol i talem se ol Kristin we tabu spirit i makemaot olgeta, oli olsem ol pos blong wan haos. Hem i talem se: ‘From we [ol narafala pos blong haos ya oli joen long nambawan pos long medel], oli stap stanap strong, nao haos ya i stap kam gud moa, olsem wan haos blong Hae God we i tabu, i klin gud.’ (Efes. 2:20, 21) Mo tu, Pol i tokbaot olsem wanem ol Kristin we oli man Jiu oli joengud wetem ol Kristin we oli blong ol narafala laen. Mo hem i mekem olgeta oli tingbaot se God i wokem olgeta evriwan. Hem i talem se Jeova i “Papa blong yumi, we hem nomo i stamba blong fasin blong papa, nao olgeta famle long heven mo long wol oli stap tekem fasin ya long hem.”—Efes. 3:5, 6, 14, 15.

 ⁴ Bambae yumi lukluk gud long japta 4 long buk blong Efesas. Bambae yumi luksave from wanem yumi mas traehad sipos yumi wantem joengud. Bambae yumi luk olsem wanem Jeova i givhan long yumi blong joengud. Mo bambae yumi luk ol tingting mo fasin we oli save givhan long yumi blong joengud. I gud yu ridim japta 4 fulwan, nao bambae yu kasem plante moa gudfala samting long stadi ya.

?From Wanem Yumi Mas Traehad Bigwan Blong Joengud?

5. ?From wanem ol enjel oli joengud blong mekem wok blong God? ?Be from wanem i had moa blong ol Kristin oli joengud?

⁵ Pol i talem long ol Kristin long Efesas se, oli ‘mas traehad blong holem pis ya we tabu spirit i givim long olgeta, blong oli save joengud oltaem.’ (Efes. 4:3) Blong kasem save from wanem yumi mas traehad, i gud yumi tingbaot ol enjel blong God. Long wol, i no gat tu laef samting we tufala i sem mak stret. From samting ya, ating i stret blong talem se Jeova i mekem ol milian enjel blong hem tu, we olgeta wanwan oli defdefren. (Dan. 7:10) Nating se oli defdefren, olgeta evriwan oli joengud blong mekem wok blong Jeova, from we oli lesin long hem mo oli mekem samting we hem i wantem. (Ridim Ol Sam 103:20, 21.) Ol Kristin oli gat ol defdefren fasin olsem ol enjel. Be ol Kristin oli gat ol slak fasin tu. From samting ya, i had moa blong oli joengud.

6. ?Wanem ol fasin we bambae oli halpem yumi blong wokgud wetem ol brata, we ol slak fasin blong olgeta oli defren long ol slak fasin blong yumi?

⁶ Taem ol sinman oli traem wok gud tugeta, oli save fesem hadtaem. Traem tingbaot tu brata we tufala i mekem wok blong Jeova. Wan brata i kwaet man we i no save kros kwik, be klosap hem i kam let blong evri samting. Narafala brata i kam oltaem long stret taem, be hem i kwik blong faerap long kros. Maet wanwan long tufala i harem se fasin blong narawan i no stret, be i fogetem se sam fasin blong hem tu oli no stret. ?Olsem wanem tufala brata ya i save joengud blong mekem wok blong Jeova? Pol i gohed blong tokbaot sam fasin we oli save halpem tufala. Traem tingbaot olsem wanem yumi save joen gud sipos yumi traehad blong gat ol fasin ya. Pol i raetem se: “Mi mi talem strong long yufala, blong yufala i mekem fasin blong yufala i stret gud. . . . Long olgeta samting, tingting blong yufala i mas stap daon, mo yufala i mas kwaet man. Tingting blong yufala i mas longfala, mo yufala i mas lavlavem yufala, blong yufala i no raorao long yufala. Tabu Spirit, hem i stap mekem yumi evriwan i joen gud, mo hem i givim pis long yumi. Nao from samting ya, yumi mas traehad blong holem pis ya, blong yumi save joen gud oltaem.”—Efes. 4:1-3.

7. ?From wanem yumi mas lanem blong joengud wetem ol narafala Kristin we olgeta tu oli gat sam slak fasin?

⁷ Yumi mas lanem blong joengud wetem ol narafala blong mekem wok blong God, nating se oli gat sam slak fasin. I gat wan kampani nomo blong ol man we oli mekem wosip long tru God. Baebol i talem se: “Yumi olsem wan bodi nomo. I gat wan spirit nomo i stap long yumi, mo long sem fasin, God i bin singaot yumi evriwan, blong yumi putum tingting blong yumi i stap long wan promes nomo. Yumi gat wan Masta nomo, mo yumi gat wan tok nomo we yumi bilif long hem, mo i gat wan baptaes nomo. Mo i gat wan God ya nomo, we hem i Papa blong olgeta man.” (Efes. 4:4-6) Spirit blong Jeova mo blesing blong hem i stap wetem kampani blong ol man we hem i stap yusum. Nating se wan brata no wan sista long kongregesen i mekem yumi harem nogud, ?be yumi save go wea bakegen? I no moa gat wan ples we yumi save harem ol tok blong laef we i no save finis.—Jon 6:68.

‘Ol Presen We i Go Long Ol Man,’ Oli Givhan Long Kongregesen Blong i Joengud

8. ?Kraes i yusum hu blong mekem yumi strong blong blokem ol samting we oli save seraotem yumi?

⁸ Pol i tokbaot ‘ol presen we i go nomo long ol man.’ Jisas i givim ol presen ya blong oli givhan long kongregesen blong joengud. Blong mekem poen ya i klia moa, Pol i tokbaot wan samting we ol soldia long taem bifo oli mekem. Sipos wan soldia i win long faet, maet hem i karem wan man we hem i winim i go kalabus long ples blong hem. Maet man ya i kam wan slef, i givhan long woman blong soldia ya blong mekem ol wok blong hem. (Sam 68:1, 12, 18) Long sem fasin, taem Jisas i winim wol ya, i gat plante man we oli glad blong kam slef blong hem. (Ridim Efesas 4:7, 8.) Ol man ya we i olsem se Jisas i winim olgeta long faet, ?hem i yusum olgeta olsem wanem? “Long sam man, hem i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli ivanjelis. Mo long sam narafala man bakegen, hem i givim paoa blong oli pasta [“man blong  lukaot long ol sipsip blong God,” NW] mo tija. . . . Kraes i mekem olsem blong olgeta man blong hem bambae oli rere blong mekem ol wok blong hem, blong bambae olgeta ya we oli olsem bodi blong hem, oli strong moa. Long fasin ya, bambae yumi evriwan i save kam wan nomo.”—Efes. 4:11-13.

9. (a) ?Olsem wanem ‘ol presen we i go nomo long ol man’ oli givhan long kongregesen blong i joengud? (b) ?From wanem olgeta wanwan long kongregesen oli mas givhan blong mekem se kongregesen i joengud?

⁹ Ol ‘presen ya we i go long ol man,’ oli ol man blong lukaot long ol sipsip blong God, mo oli lavem ol sipsip ya. Ol man ya oli givhan long yumi blong joengud. Sipos wan elda long kongregesen i luk we tu brata i ‘stap mekem tufala nomo i kros long tufala,’ bambae hem i givim advaes long tufala wanwan, ‘blong stretem tufala long kwaet fasin.’ Long rod ya, elda i givhan bigwan blong mekem se kongregesen i gohed blong joengud. (Gal. 5:26–6:1) ‘Ol presen ya we i go long ol man,’ oli mekem wok blong tija tu. Oli mekem wok ya taem oli givhan long yumi blong gat wan bilif we i stanap strong long ol tijing blong Baebol. Olsem nao, oli mekem se yumi evriwan i gat wan tingting nomo, mo oli givhan long yumi blong kam ol Kristin we oli bigman long Kraes. Pol i raetem se, oli mekem olsem blong “bambae yumi no moa stap olsem pikinini. Ol giaman tijing blong ol man ya we oli save wokem ol trik, mo oli save lidim ol man oli go krangke, bambae i no save tantanem yumi i go olbaot olsem wan kenu we solwota i stap sakem i go olbaot, mo win i stap karem i go.” (Efes. 4:13, 14) Long prapa bodi blong man, ol wanwan haf oli givhan long ol narafala haf blong oli kasem ol samting we oli nidim blong wok strong. Long sem fasin, olgeta Kristin wanwan oli mas givhan blong mekem se fulwan kampani blong ol brata i joengud.—Ridim Efesas 4:15, 16.

Jenisim Ol Fasin Blong Oli Kam Niuwan

10. ?Olsem wanem ol rabis fasin blong man wetem woman oli save spolem fasin joengud?

¹⁰ ?Yu yu luk wanem we Pol i talem long japta fo blong leta ya we hem i raetem long ol Kristin long Efesas? Hem i talem se, blong joengud olsem ol Kristin bigman, yumi mas lavlavem yumi. Afta long hemia, Pol i tokbaot ol fasin we oli soemaot se yumi lavlavem yumi. Sipos yumi lavlavem yumi, yumi no save slip olbaot, mekem nogud wetem woman, mo mekem ol narafala krangke fasin. Pol i talem long ol Kristin ya se oli “no moa folem ol fasin blong ol hiten man.” Olgeta ya “oli no moa gat sem nating,” mo “oli stap gohed olbaot, oli stap ronem woman.” (Efes. 4:17-19) Ol rabis fasin raonabaot long yumi, oli save spolem fasin blong yumi blong joengud. Ol man blong wol oli tok plei long saed blong ol rabis fasin blong man wetem woman, oli singsing long saed ya, oli lukluk ol rabis fasin ya long televisin mo DVD. Mo oli mekem ol rabis fasin ya tu, sam oli haedem mo sam oli no traem haedem nating. Maet yu yu no mekem ol fasin ya. Be i gat wan narafala fasin tu we i save pulum yu yu go longwe long Jeova mo kongregesen, hemia taem yu pleplei wetem filing blong narafala. Maet yu mekem olsem se yu laekem narafala ya, be yu no gat tingting nating blong mared wetem hem. ?Olsem wanem fasin ya i save pulum yu yu gowe long Jeova? Sipos yu pleplei wetem filing blong narafala, i isi nomo blong yu foldaon mo mekem nogud wetem woman. Mo tu, taem wan man no woman we i mared finis i pleplei wetem filing blong wan narafala bakegen, samting ya i save  lidim hem blong i go slip wetem narafala ya. Nao hem i brekem mared blong hem, mo ol pikinini blong hem oli go stap longwe long hem. Hem i mekem evriwan long famle oli harem nogud bitim mak. !Tru ya, rabis fasin olsem i seraotem ol man! Tok ya we Pol i raetem i tru tumas, se: “Ol fasin olsem, yufala i no lanem nating long gud nius blong Kraes.”—Efes. 4:20, 21.

11. ?Baebol i pulum ol Kristin blong oli jenisim wanem?

¹¹ Pol i talem klia se yumi mas lego ol tingting we oli seraotem ol man. Mo yumi mas gat ol tingting we oli mekem se yumi stap long pis mo joengud wetem ol narafala. Pol i talem se: “Yufala i mas finis long olfala laef ya blong yufala bifo, we yufala i stap folem ol fasin blong yufala nomo. Olfala laef ya i stap mekem yufala i wantem tumas ol samting we oli blong giaman nomo, mo we oli stap spolem yufala nomo. Laef blong yufala mo tingting blong yufala i mas kam niuwan olgeta, nao bambae yufala i kam niufala man, we God i mekem yufala i kam olsem hem [“i wantem,” NW]. Nao bambae ol man oli save luksave se laef blong yufala i folem trutok blong hem, mo i stret gud, i tabu, i blong hem nomo.” (Efes. 4:22-24) ?Olsem wanem ‘laef mo tingting blong yumi i save kam niuwan’? Yumi mas glad long ol samting we yumi lanem long Tok blong God mo long gudfala eksampol blong ol Kristin we oli bigman finis, mo yumi mas tingting dip long ol samting ya. Sipos yumi mekem olsem, bambae yumi wantem traehad blong mekem ol samting we yumi lanem i wok long laef blong yumi, nao laef mo tingting blong yumi i save kam niuwan, ‘olsem God i wantem.’

Jenisim Fasin Blong Toktok

12. ?Olsem wanem yumi givhan long yumi blong joengud taem yumi tok tru? ?From wanem i had long sam man blong oli tok tru?

¹² Olgeta we oli blong wan famle no wan kongregesen, oli mas tok tru long olgeta. Ol man we oli tok stret, mo oli no haedem wan samting, mo oli tok kaen, olgeta ya oli joengud. (Jon 15:15) ?Be olsem wanem sipos wan long famle no kongregesen i giaman long narawan? Taem narafala ya i faenemaot giaman blong hem, bambae hem i no moa trastem hem. Yumi kasem save from wanem Pol i raetem se: “Yumi evriwan i olsem ol haf blong wan bodi nomo. Baebol i talem se, ‘Yufala i mas tok tru nomo long yufala.’” (Efes. 4:25) Maet wan man i lan finis blong giaman, from we hem i stat giaman taem hem i pikinini nomo. Sipos i olsem, ating bambae i had long hem blong lanem blong tok tru. Be Jeova bambae i glad sipos man ya i traehad blong jenisim fasin ya, mo bambae Jeova i halpem hem.

13. ?Wanem olkaen rabis tok we yumi no mas talem blong spolem narafala?

¹³ Jeova i talem se yumi mas lukaotgud long ol toktok blong yumi. Taem hem i talem olsem, hem i stap tijim yumi blong gat respek mo blong joengud long kongregesen mo long famle. Hem i talem se: “Long ol toktok blong yufala, yufala i no mas talem ol rabis tok we i save spolem man. . . . Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren  long yufala.” (Efes. 4:29, 31) Wan rod blong blokem ol nogud toktok, i blong traem respektem narafala moa long tingting blong yumi. Olsem nao, wan man we i stap tok nogud long woman blong hem, i mas traehad blong jenisim tingting we hem i gat long woman blong hem, antap moa, taem hem i lanem se Jeova i tinghae long ol woman. God i makemaot sam woman wetem tabu spirit, nao oli gat janis blong rul olsem ol king wetem Kraes. (Gal. 3:28; 1 Pita 3:7) Long sem fasin, wan woman we i stap singaot bigwan long man blong hem i mas wantem blong jenisim fasin ya, taem hem i lanem se Jisas i no kam kros mo i no tok nogud long olgeta we oli mekem i nogud long hem.—1 Pita 2:21-23.

14. ?From wanem yumi save mekem bigfala trabol sipos yumi kros nao yumi tok nogud long narafala?

¹⁴ Plante taem, man we i no blokem kros blong hem i talem ol rabis tok blong spolem narafala. Man we i no blokem kros blong hem, i save mekem famle no kongregesen i seraot. Kros i olsem faea, we i isi nomo blong i kam bigwan hareap, nao i mekem bigfala trabol i kamaot. (Prov. 29:22) Ating i gat sam taem we i stret nomo blong man i soemaot se hem i no glad long wan samting. Be hem i mas lukaotgud blong no tok kros. Sipos hem i no blokem kros blong hem, hem i save spolem ol gudfala fren blong hem. Ol Kristin oli mas traehad blong lanem blong fogivim narafala. Oli no mas stap kros longtaem long narafala, mo oli no mas toktok bakegen mo bakegen from wan mastik blong narafala. (Sam 37:8; 103:8, 9; Prov. 17:9) Pol i givim advaes ya long ol Kristin long Efesas se: “‘Sipos yufala i kros, yufala i no letem we kros ya i lidim yufala, blong yufala i mekem sin.’ Mo yufala i no stap kros, gogo kasem san i godaon. Yufala i mas no givim janis long Setan.” (Efes. 4:26, 27) Sipos yumi no blokem kros blong yumi, yumi givim janis long Setan blong mekem kongregesen i seraot, mo maet yumi mekem se samfala long kongregesen oli agensem sam narafala tu.

15. ?Sipos yumi tekem samting we i blong narafala, wanem i save hapen?

¹⁵ Sipos yumi respektem olting blong narafala, samting ya tu i save givhan blong mekem kongregesen i joengud. Yumi ridim se: “Man we i man blong stil, hem i mas lego fasin ya.” (Efes. 4:28) Ol man blong Jeova wanwan oli trastem ol narafala. Sipos wan Kristin i tekem samting we i blong narafala, bambae narafala ya i no moa trastem hem, nao hem i spolem glad mo fasin joengud.

Yumi Joengud From We Yumi Lavem God

16. ?Olsem wanem yumi save toktok gud blong mekem se yumi joengud?

¹⁶ Sipos yumi lavem God, yumi mekem samting blong soemaot se yumi lavem narafala tu. Taem yumi evriwan i mekem olsem, Kristin kongregesen i joengud. Taem Jeova i kaen long yumi, yumi mas glad mo tinghae long samting ya. Olsem nao, bambae yumi traehad blong folem advaes ya: “Yufala i mas talem ol gudfala tok we i save mekem ol man we oli slak oli kam strong moa. Tok olsem i save givhan moa long ol man we oli harem. Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” (Efes. 4:29, 32) Jeova i kaen mo i fogivim yumi from ol mastik blong yumi. Taswe yumi tu, yumi mas fogivim ol narafala we oli save mekem mastik.

17. ?From wanem yumi mas traehad bigwan blong mekem ol fasin we oli givhan long yumi blong joengud?

¹⁷ Taem ol man blong Jeova God oli joengud, oli leftemap nem blong hem. Spirit blong God i save pulum yumi blong mekem plante defren samting we oli givhan long yumi blong joengud. Yumi no mas blokem spirit ya, blong i no moa lidim yumi long rod ya. Pol i raetem se: “Yufala i no mas mekem Tabu Spirit blong God i harem nogud.” (Efes. 4:30) Fasin blong joengud i wan samting we i gud tumas. Yumi mas lukaotgud long hem. Fasin ya i givim glad long yumi mo i leftemap nem blong Jeova. Yes, “yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem. Yufala i mas lavem ol man.”—Efes. 5:1, 2.

?Bambae Yu Yu Ansa Olsem Wanem?

• ?Wanem ol fasin we oli save halpem ol Kristin blong oli joengud?

• ?Olsem wanem rabis fasin i save mekem se kongregesen i no moa joengud?

• ?Olsem wanem ol toktok blong yumi i save givhan long yumi blong wokgud wetem ol narafala?

[Kwestin]

[Tok blong pija long pej 21]

Olgeta we oli kamaot long ol defren ples mo fasin blong laef, oli joengud

[Tok blong pija long pej 22]

?Yu yu kasem save long bigfala trabol we yu save mekem, sipos yu pleplei wetem filing blong narafala?