Ang Kristohanong Panaghiusa Nagahimaya sa Diyos
Ang Kristohanong Panaghiusa Nagahimaya sa Diyos
“Sa matinuoron, manlimbasog nga mosunod sa pagkausa sa espiritu.”—EFE. 4:3.
1. Sa unsang paagi ang unang-siglong mga Kristohanon sa Efeso naghimaya sa Diyos?
ANG panaghiusa sa kongregasyon sa Efeso naghimaya sa matuod nga Diyos, si Jehova. Nianang mauswagong sentro sa negosyo, ang pipila ka igsoon maoy adunahang mga tag-iyag ulipon, samtang ang uban maoy mga ulipon ug lagmit kabos kaayo. (Efe. 6:5, 9) Ang pipila maoy mga Hudiyo nga nakadangat sa kamatuoran sulod sa tulo ka bulan nga si apostol Pablo nagpakigpulong sa ilang sinagoga. Ang uban kanhing mga magsisimba ni Artemis ug mga salamangkero. (Buh. 19:8, 19, 26) Tin-aw nga ang matuod nga Kristiyanidad naghiusa sa lainlaing matang sa tawo. Giila ni Pablo nga ang panaghiusa sa kongregasyon naghimaya kang Jehova. Ang apostol misulat: “Ngadto kaniya ang himaya pinaagi sa kongregasyon.”—Efe. 3:21.
2. Unsay nagpameligro sa panaghiusa sa mga Kristohanon sa Efeso?
2 Apan, nameligro ang talagsaong panaghiusa sa kongregasyon sa Efeso. Si Pablo nagpasidaan sa mga ansiyano: “Gikan sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ngadto kanila.” (Buh. 20:30) Dugang pa, ang pipila ka igsoon nagpakita gihapog espiritu sa pagkabahinbahin nga, sumala sa gipasidaan ni Pablo, ‘nagalihok diha sa mga anak sa pagkadili-masinugtanon.’—Efe. 2:2; 4:22.
Sulat nga Nagpasiugda sa Panaghiusa
3, 4. Sa unsang paagi ang sulat ni Pablo sa mga taga-Efeso nagpasiugda sa panaghiusa?
3 Nahibaloan ni Pablo nga aron padayong magkahiusa ang mga Kristohanon, kinahanglan nga ang matag usa maningkamot pag-ayo sa pagpalambo sa panaghiusa. Ang Diyos nag-inspirar kang Pablo sa pagsulat sa mga taga-Efeso mahitungod sa panaghiusa. Pananglitan, misulat siya bahin sa katuyoan sa Diyos nga “tigomon pag-usab ang tanang butang diha kang Kristo.” (Efe. 1:10) Gitandi usab niya ang dinihogang mga Kristohanon ngadto sa lainlaing bato nga gigamit diha sa usa ka tinukod. “Ang tibuok tinukod, kay takdo nga pagkadugtong, nagatubo ngadto sa pagkahimong usa ka balaang templo alang kang Jehova.” (Efe. 2:20, 21) Lain pa, gipasiugda ni Pablo ang panaghiusa sa Hudiyo ug Hentil nga mga Kristohanon ug gipahinumdoman usab niya ang mga igsoon nga silang tanan gilalang sa Diyos. Iyang gitawag si Jehova ingong “Amahan, nga kaniya utang sa tanang kabanayan sa langit ug sa yuta ang ngalan niini.”—Efe. 3:5, 6, 14, 15.
4 Samtang atong susihon ang kapitulo 4 sa Efeso, atong makita kon nganong ang panaghiusa nagkinahanglag paningkamot, kon sa unsang paagi si Jehova nagtabang kanato nga magkahiusa, ug kon unsang mga tinamdan ang motabang kanato sa pagpabiling nahiusa. Nganong dili nimo basahon ang tibuok kapitulo aron mas makabenepisyo ka sa pagtuon niana?
Kon Nganong ang Panaghiusa Nagkinahanglag Tim-os nga Paningkamot
5. Nganong nahiusa ang mga manulonda sa pag-alagad sa Diyos, apan nganong mas lisod alang kanato nga magkahiusa?
5 Si Pablo nag-awhag sa iyang mga igsoon sa Efeso sa ‘pagpanglimbasog nga mosunod sa pagkausa sa espiritu.’ (Efe. 4:3) Aron masabtan kon nganong gikinahanglan ang pagpanglimbasog, tagda ang kahimtang sa mga manulonda sa Diyos. Ang matag buhing butang sa kalibotan managlahi gayod, busa makaingon kita nga si Jehova naglalang sa milyonmilyong manulonda nga lahi sa usag usa. (Dan. 7:10) Bisan pa niana, sila nahiusa sa pag-alagad kang Jehova tungod kay silang tanan namati kaniya ug nagbuhat sa iyang kabubut-on. (Basaha ang Salmo 103:20, 21.) Sama sa matinumanong mga manulonda ang mga Kristohanon adunay lainlaing hiyas, apan aduna usab silay lainlaing kahuyangan. Tungod niini, mas lisod silang magkahiusa.
6. Unsang mga tinamdan ang motabang kanato nga magmalipayon sa pag-alagad uban sa mga igsoon nga dunay mga kahuyangan nga lahi sa atoa?
6 Sa dihang ang dili-hingpit nga mga tawo magkauban, hayan motungha ang problema. Pananglitan, komosta kon ang usa ka malumo nga igsoon apan sagad ulahing moabot mag-alagad uban sa usa ka igsoon nga sayong moabot apan dali rang masuko? Ang matag usa mobati tingali nga dunay kinahanglang pauswagon ang iyang igsoon apan wala siya makahunahuna nga duna sab siyay kahuyangan. Sa unsang paagi sila magkahiusa sa pag-alagad? Matikdi kon sa unsang paagi makatabang kanila ang mga tinamdan nga gihisgotan sa sunod nga gisulti ni Pablo. Dayon palandonga kon sa unsang paagi nato mapalambo ang panaghiusa pinaagi sa pag-ugmad sa maong mga tinamdan. Si Pablo misulat: “[Ako] nangaliyupo kaninyo sa paglakaw nga takos . . . uban ang bug-os nga pagpaubos sa hunahuna ug kalumo, uban ang hataas-nga-pailob, nga mag-inantosay sa usag usa diha sa gugma, sa matinuoron manlimbasog nga mosunod sa pagkausa sa espiritu sa nagahiusang bugkos sa pakigdait.”—Efe. 4:1-3.
7. Nganong hinungdanon nga maningkamot kitang mahiusa sa ubang dili-hingpit nga mga Kristohanon?
7 Hinungdanon nga makakat-on kita sa pag-alagad sa Diyos uban sa dili-hingpit nga mga tawo tungod kay aduna lamay usa ka lawas sa matuod nga mga magsisimba. “Adunay usa ka lawas, ug usa ka espiritu, ingon sa pagtawag kaninyo diha sa usa ka paglaom nga alang niana kamo gipanagtawag; usa ka Ginoo, usa ka pagtuo, usa ka bawtismo; usa ka Diyos ug Amahan sa tanan.” (Efe. 4:4-6) Ang espiritu ug mga panalangin ni Jehova anaa sa bugtong kapunongan sa mga igsoon nga gigamit sa Diyos. Bisan pag dunay igsoon nga makapasilo kanato, asa man kita moadto? Wala nay laing dapit diin atong madungog ang mga pulong bahin sa kinabuhing walay kataposan.—Juan 6:68.
“Mga Gasa nga mga Lalaki” Nakaamot sa Panaghiusa
8. Kinsay gigamit ni Kristo aron mapalig-on kita batok sa makapabahing mga impluwensiya?
8 Si Pablo naghisgot sa sagad nga ginabuhat sa mga sundalo kaniadto sa pag-ilustrar kon sa unsang paagi si Jesus nagtaganag “mga gasa nga mga lalaki” aron sa paghiusa sa kongregasyon. Ang usa ka madaogong sundalo mahimong magdalag binihag gikan sa laing dapit aron himoong ulipon nga makatabang sa iyang asawa sa mga buluhaton sa panimalay. (Sal. 68:1, 12, 18) Sa susama, tungod sa pagdaog ni Jesus sa kalibotan, siya nakabatog daghang ulipon nga andam moalagad kaniya. (Basaha ang Efeso 4:7, 8.) Unsay iyang gipabuhat niining mahulagwayong mga binihag? “Iyang gihatag ang pipila ingong mga apostoles, ang pipila ingong mga manalagna, ang pipila ingong mga tig-ebanghelyo, ang pipila ingong mga magbalantay ug mga magtutudlo, alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo, hangtod kitang tanan makadangat sa pagkausa sa pagtuo.”—Efe. 4:11-13.
9. (a) Sa unsang paagi makatabang ang “mga gasa nga mga lalaki” nga mahuptan ang panaghiusa? (b) Nganong ang matag membro sa kongregasyon angayng makigkooperar niining bahina?
9 Ingong mahigugmaong mga magbalantay, kining “mga gasa nga mga lalaki” motabang nga mahuptan ang atong panaghiusa. Pananglitan, kon mamatikdan sa usa ka ansiyano ang duha ka igsoon nga ‘mag-indigay,’ makatabang siyag dako nga mahuptan ang panaghiusa sa kongregasyon pinaagi sa paghatag ug pribadong tambag ‘aron ipasibo sila pag-usab diha sa espiritu sa kalumo.’ (Gal. 5:26–6:1) Ingong mga magtutudlo, kining “mga gasa nga mga lalaki” motabang kanato sa pagpalig-on sa atong pagtuo pinasukad sa mga pagtulon-an sa Bibliya. Sa ingon, sila nagpalambo sa panaghiusa ug nagtabang kanato sa pag-uswag ngadto sa pagkahamtong. Si Pablo misulat nga sila gitagana “aron nga kita dili na magpabiling mga bata, nga samag gituyatuya sa mga balod ug gidala ngadto-nganhi sa matag hangin sa pagtulon-an pinaagi sa paglingla sa mga tawo, pinaagi sa kamalipatlipaton sa pagmugnag sayop.” (Efe. 4:13, 14) Ang matag Kristohanon angayng makigkooperar aron mahuptan ang panaghiusa, maingon nga ang matag sangkap sa lawas motabang sa pagtagana sa panginahanglan sa ubang bahin sa lawas.—Basaha ang Efeso 4:15, 16.
Ugmara ang Maayong Tinamdan
10. Nganong ang imoral nga panggawi nagpameligro sa atong panaghiusa?
10 Namatikdan ba nimo nga ang ikaupat nga kapitulo sa sulat ni Pablo sa mga taga-Efeso nagpakita nga ang pagpasundayag ug gugma maoy yawi sa pagkab-ot sa panaghiusa ingong hamtong nga mga Kristohanon? Dayon, gihisgotan niana kon unsay nalangkit sa gugma. Pananglitan, kon aduna kitay gugma atong likayan ang pakighilawas ug malaw-ayng panggawi. Giawhag ni Pablo ang iyang mga igsoon nga “dili na magpadayon sa paglakaw sama sa paglakaw usab sa kanasoran.” Ang maong mga tawo “nawad-an na sa tanang moral nga pagbati,” ug “ilang gitugyan ang ilang kaugalingon sa malaw-ay nga panggawi.” (Efe. 4:17-19) Ang imoral nga kalibotan nga atong gipuy-an nagpameligro sa atong panaghiusa. Ang mga tawo mangomedya bahin sa pakighilawas, moawit bahin niana, motan-aw niana ingong kalingawan, ug mobuhat niana sa tago o sa dayag. Gani, bisan ang pagbirigbirig—pagpakitag mga lihok nga daw nakagusto ka sa usa bisag wala kay intensiyon nga minyoan siya—mahimong magpahilayo kanimo kang Jehova ug sa kongregasyon. Ngano? Tungod kay dali ra kanang mosangpot sa pakighilawas. Dugang pa, ang pagbirigbirig nga moresulta sa pagpanapaw mahimong makabungkag sa pamilya. Makapatungha gayod kanag pagkabahinbahin! Mao diay nga si Pablo misulat: “Si Kristo wala ninyo hikat-oni nga ingon niana”!—Efe. 4:20, 21.
11. Unsang kausaban ang gidasig sa Bibliya nga himoon sa mga Kristohanon?
11 Gipasiugda ni Pablo nga angay natong biyaan ang makadaot nga panghunahuna ug ugmaron ang mga tinamdan nga motabang kanato nga magmakigdaiton sa uban. Siya miingon: “Inyong hukason ang daan nga pagkatawo nga nahiuyon sa kanhi ninyong paagi sa panggawi ug nadunot sumala sa iyang [ang daang pagkatawo] malimbongong mga tinguha; ug magbag-o kamo diha sa puwersa nga nagpalihok sa inyong kaisipan, ug magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” (Efe. 4:22-24) Sa unsang paagi kita ‘mabag-o diha sa puwersa nga nagpalihok sa atong kaisipan’? Kon kita mapabilhong mamalandong sa atong nakat-onan gikan sa Pulong sa Diyos ug sa maayong panig-ingnan sa hamtong nga mga Kristohanon, atong mabatonan ang bag-ong personalidad nga “gilalang sumala sa kabubut-on sa Diyos.”
Ugmara ang Maayong Sinultihan
12. Sa unsang paagi ang pagsulti sa tinuod makapalambo sa panaghiusa, ug nganong malisdan ang pipila nga magmatinud-anon?
12 Ang mga membro sa pamilya o sa kongregasyon kinahanglang mosulti sa tinuod. Ang prangka ug malulotong sinultihan makapasuod sa usag usa. (Juan 15:15) Apan komosta kon ang usa mamakak sa iyang igsoon? Kon mahibaloan kini sa iyang igsoon, mawala ang pagsalig niini. Maoy hinungdan nga si Pablo misulat: “Magsulti sa tinuod ang matag usa kaninyo sa iyang silingan, tungod kay kita mga sangkap nga iya sa usag usa.” (Efe. 4:25) Ang usa ka tawo nga naanad na sa pagpamakak, tingali sukad pa sa pagkabata, mahimong malisdan sa pagsulti sa tinuod. Apan kon maningkamot siya nga mag-usab, pabilhan kana ni Jehova ug Siya motabang kaniya.
13. Unsay nalangkit sa pagsalikway sa mapasipalahong sinultihan?
13 Si Jehova nagtudlo kanato sa pagpakitag pagtahod ug pagpatunhay sa panaghiusa diha sa kongregasyon ug sa pamilya pinaagi sa pagkontrolar sa atong dila. “Kinahanglang walay mangil-ad nga mga sulti nga mogula gikan sa inyong baba . . . Isalikway ninyo ang tanang mapangdaot nga kayugot ug kasuko ug kapungot ug sininggitay ug mapasipalahong sinultihan uban sa tanang pagkadaotan.” (Efe. 4:29, 31) Ang usa ka paagi nga malikayan ang dili-maayong sinultihan mao ang pag-ugmad ug pagtahod sa uban. Pananglitan, ang usa ka bana nga mosultig masakit nga mga pulong sa iyang asawa angayng maningkamot sa pagbag-o sa iyang tinamdan kaharmonya sa iyang nakat-onan kon sa unsang paagi si Jehova nagpasidungog sa mga babaye. Gani, gidihogan sa Diyos ang pipila ka babaye ug balaang espiritu, nga naghatag kanilag paglaom nga magmando uban kang Kristo. (Gal. 3:28; 1 Ped. 3:7) Sa susama, ang usa ka babaye nga kanunayng mosingka sa iyang bana angayng magbag-o kaharmonya sa iyang nakat-onan kon sa unsang paagi si Jesus nagpugong sa iyang kaugalingon sa dihang gipasipad-an.—1 Ped. 2:21-23.
14. Nganong peligroso ang pagpahungaw sa kasuko?
14 Ang dili pagpugong sa kasuko dakog kalambigitan sa mapasipalahong sinultihan. Kini makapatungha usab ug pagkabahinbahin. Ang kasuko samag kalayo. Kini dali rang mosilaob ug magpahinabog kadaot. (Prov. 29:22) Bisag ang usa adunay katarongan nga masuko, kinahanglang pugngan niya kini aron dili madaot ang maayong relasyon. Ang mga Kristohanon kinahanglang maningkamot nga magmapinasayloon, nga dili maghambin ug kayugot ug maghisgot pag-usab sa problema. (Sal. 37:8; 103:8, 9; Prov. 17:9) Si Pablo mitambag sa mga taga-Efeso: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efe. 4:26, 27) Kon dili nato pugngan ang atong kasuko, maghatag kanag kahigayonan sa Yawa sa pagpahinabog pagkabahinbahin ug panagbangi diha sa kongregasyon.
15. Unsay moresulta kon atong kuhaon ang butang nga dili atoa?
15 Ang dili-pagpanghilabot sa kabtangan sa uban makaamot sa panaghiusa sa kongregasyon. Atong mabasa: “Ang kawatan kinahanglan nga dili na mangawat.” (Efe. 4:28) Ang katawhan ni Jehova adunay pagsalig sa usag usa. Kon pahimuslan kana sa usa ka Kristohanon pinaagi sa pagkuha sa butang nga dili iyaha, iyang mabungkag ang maong malipayong panaghiusa.
Ang Atong Gugma sa Diyos Naghiusa Kanato
16. Sa unsang paagi ang makapalig-ong sinultihan makaamot sa panaghiusa?
16 Ang kongregasyon nahiusa tungod kay ang tanang membro niana gitukmod sa ilang gugma sa Diyos sa pagpakitag gugma sa uban. Ang atong pagpabili sa kalulot ni Jehova magpalihok kanato sa pagpaningkamot nga ipadapat ang tambag: “[Isulti ang] bisan unsang sulti nga maayo nga makapalig-on sumala sa gikinahanglan, aron makahatag kinig kaayohan sa mga magapatalinghog. . . . Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa ingon nga ang Diyos usab pinaagi kang Kristo kinabubut-on nga nagpasaylo kaninyo.” (Efe. 4:29, 32) Si Jehova malulotong magpasaylo sa dili-hingpit nga mga tawo sama kanato. Dili ba nga angay usab natong pasayloon ang uban sa ilang kahuyangan?
17. Nganong angay kitang maningkamot sa pagpalambo sa panaghiusa?
17 Ang panaghiusa sa katawhan sa Diyos naghimaya kang Jehova. Ang iyang espiritu nagpalihok kanato sa lainlaing paagi aron sa pagpalambo sa panaghiusa. Gusto gayod natong magpagiya sa maong espiritu. Si Pablo misulat: “Ayaw paguola ang balaang espiritu sa Diyos.” (Efe. 4:30) Ang panaghiusa maoy bahandi nga angayng panalipdan. Kana maghatag ug kalipay sa tanang nakatagamtam niana ug maghimaya kang Jehova. “Busa, mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma.”—Efe. 5:1, 2.
Unsay Imong Tubag?
• Unsang mga tinamdan ang makapalambo sa panaghiusa taliwala sa mga Kristohanon?
• Sa unsang paagi ang atong panggawi makapalambo sa panaghiusa diha sa kongregasyon?
• Sa unsang paagi ang atong sinultihan motabang kanato sa pagpakigkooperar sa uban?
[Mga Pangutana sa Pagtuon]
[Hulagway sa panid 17]
Nagkahiusa ang lainlaing matang sa mga tawo
[Hulagway sa panid 18]
Nahibalo ka ba sa mga kapeligrohan sa pagbirigbirig?