Mme Christian Ndidiana Kiet Ọṇọ Abasi Ubọn̄
Mme Christian Ndidiana Kiet Ọṇọ Abasi Ubọn̄
“Ẹsịn ifịk ẹn̄wana ndimụm edidianakiet eke spirit n̄kama.”—EPH. 4:3.
1. Didie ke mme Christian ke esop Ephesus eset ẹkenọ Abasi ubọn̄?
EDIDIANAKIET emi okodude ke esop Christian ke Ephesus eset ama anam ẹnọ ata Abasi, kpa Jehovah, ubọn̄. Ke akwa obio mbubehe oro, etie nte ndusụk Christian ẹkedi mme imọ owo oro ẹnyenede ifịn, ke ini etiede nte mmọ eken ẹkedi ifịn emi ẹnen̄erede ẹbuene. (Eph. 6:5, 9) Ndusụk mmọ ẹkedi mme Jew oro ẹkebọde akpanikọ ke ufan̄ ọfiọn̄ ita emi apostle Paul ọkọkwọrọde ikọ ke synagogue mmọ. Mmọ eken ẹkesikpono Artemis ẹnyụn̄ ẹbre idiọn̄. (Utom 19:8, 19, 26) Imenen̄ede ikụt ke ata Ido Ukpono Christ atatan̄ nsio nsio owo adian kiet. Paul ama okụt ke edidianakiet oro okodude ke esop ama ọnọ Jehovah ubọn̄. Apostle oro ekewet ete: “Yak ubọn̄ enyene enye ebe ke esop.”—Eph. 3:21.
2. Nso ikoyom ndibiat edidianakiet nditọete ke esop Ephesus?
2 Edi enyene se ikoyomde ndibiat edidianakiet oro okodude ke esop Ephesus. Paul ama odụri mbiowo esop oro utọn̄ ete: “Mme owo ẹyedaha ẹda ke otu mbufo ẹtịn̄ ukwan̄ ikọ man ẹdụri mbet ẹnọ idemmọ.” (Utom 20:30) N̄ko, ndusụk nditọete ẹkesụk ẹnyenyene edu editọ ubahade, ntak edi oro Paul okodụride mmọ utọn̄ aban̄a ‘spirit oro anamde utom ke esịt nditọ ntụtutọn̄.’—Eph. 2:2; 4:22.
Leta Oro Aban̄ade Edidianakiet
3, 4. Didie ke leta oro Paul ekewetde esop Ephesus etịn̄ aban̄a edidianakiet?
3 Paul ama ọfiọk ke edieke anade mme Christian ẹka iso ẹnam n̄kpọ ke n̄kemuyo, ke ana owo mmọ kiet kiet esịn ukeme oyom edidianakiet. Abasi ama ọnọ Paul spirit ndiwet mbon esop Ephesus leta mban̄a edidianakiet. Ke uwụtn̄kpọ, Paul ama ewet aban̄a uduak Abasi “ndifiak ntan̄ kpukpru n̄kpọ ndọn̄ ọtọkiet ke Christ.” (Eph. 1:10) Enye akada mme Christian odomo ye nsio nsio itiat oro ẹdade ẹbọp ufọk, ete: “Ofụri ufọk, emi akpahade adiana kiet, ke ọkọri akabade edi edisana temple ọnọ Jehovah.” (Eph. 2:20, 21) Paul ama etịn̄ n̄ko aban̄a edidianakiet oro okodude ke ufọt mme Christian oro ẹdide mme Jew ye mme Gentile, onyụn̄ eti mmọ ke Abasi kiet okobot kpukpru mmọ. Enye okokot Jehovah “Ete, emi kpukpru ubon ke heaven ye ke isọn̄ ẹkerede enyịn̄ ẹnọ.”—Eph. 3:5, 6, 14, 15.
4 Nte idụn̄ọrede Ephesus ibuot 4, iyokụt ntak emi edidianakiet oyomde ukeme, ikụt nte Jehovah anamde idiana kiet, ye edu oro edinamde ika iso idiana kiet. Mbọk kot Ephesus ibuot 4 man ibuotikọ emi enen̄ede an̄wan̄a fi.
Ntak Emi Edidianakiet Oyomde Ọkpọsọn̄ Ukeme
5. Nso inam mme angel ẹdiana kiet ẹnam n̄kpọ Abasi, edi ntak emi ekemede ndinen̄ede nsọn̄ nnyịn ndinam emi?
5 Paul ama ekpe nditọete esie ke esop Ephesus ubọk ete “ẹsịn ifịk ẹn̄wana ndimụm edidianakiet eke spirit n̄kama.” (Eph. 4:3) Man ifiọk ntak emi edidianakiet oyomde ukeme, yak ida mme angel Abasi ke uwụtn̄kpọ. Ke isọn̄ emi, idụhe n̄kpọ-obot iba emi ẹdide ata ukem ukem, ntre owụt ifiọk ndinịm ke Jehovah onyụn̄ obot mme angel ntre n̄ko. (Dan. 7:10) Kpa ye oro, mmọ ke ẹdiana kiet ẹnam n̄kpọ Jehovah sia kpukpru mmọ ẹkopde uyo Esie, ẹnyụn̄ ẹnamde uduak Esie. (Kot Psalm 103:20, 21.) Ke ini mme angel ẹnyenede nsio nsio edu, mme Christian ẹnyene nsio nsio edu ye ndo n̄ko. Emi ekeme ndinam enen̄ede ọsọn̄ nnyịn ndidiana kiet.
6. Ewe edu edinam ikeme ndidiana kiet ye nditọete nnyịn emi ẹnyenede mmeme oro ẹkpụhọrede ye eke nnyịn?
6 Mme anana-mfọnmma owo ẹsisọp ẹnyene mfịna ke ini ẹdomode ndidiana kiet nnam n̄kpọ. Ke uwụtn̄kpọ, nso iditịbe edieke eyenete oro enyenede ifụre ifụre ido, edi oro esikade n̄kpọ ke idiọk ini odude esop kiet ye eyenete emi esikade n̄kpọ ke ini, edi emi ekpri n̄kpọ esisọpde ayat enye esịt? Eyenete emi enyenede ifụre ifụre ido mi ekeme ndikere ke edu eyenete enye eken ọdiọk akaha, edi efre ke ndisika n̄kpọ ke idiọk ini inyụn̄ idịghe eti n̄kpọ. Didie ke nditọete iba emi ẹkeme ndidiana kiet nnam n̄kpọ Jehovah? Se nte edu oro Paul ọdọhọde mmọ ẹnyene ekemede ndin̄wam mmọ. Ekem kere nte ndinyene mme edu emi ekemede ndinam idiana kiet. Paul ekewet ete: “Ami . . . n̄kpe mbufo ubọk nte ẹsan̄a nte odotde . . . ke ọyọhọ nsụhọdeidem ye ifụre ifụre ido, ye anyanime, ẹyọde kiet eken ke ima, ẹsịn ifịk ẹn̄wana ndimụm edidianakiet eke spirit n̄kama ke mbọbọ emem edidianakiet.”—Eph. 4:1-3.
7. Ntak emi ikpesịnde idem idiana kiet ye nditọete nnyịn emi ẹdide mme anana-mfọnmma owo?
7 Enen̄ede oyom ikpep ndidiana kiet nnam n̄kpọ Abasi ye nditọete nnyịn emi ẹnyụn̄ ẹdide mme anana-mfọnmma owo sia ido ukpono akpanikọ kiet kpọt odu nte Bible ọdọhọde mi ete: “Idem kiet odu, spirit kiet onyụn̄ odu, kpa nte ẹkekam ẹkotde mbufo ke idotenyịn kiet oro ẹkekotde mbufo ẹnọ; Ọbọn̄ kiet, mbuọtidem kiet, baptism kiet; Abasi kiet ye Ete kpukpru owo.” (Eph. 4:4-6) Omokụt do ke esop kiet kpọt ke Jehovah ada usụn̄, ọdiọn̄, onyụn̄ ọnọ spirit esie. Mmọdo, idem edieke owo anamde esịt ayat nnyịn ke esop, m̀mọ̀n̄ en̄wen ke ikpaka edieke ikpọn̄de esop? Idụhe ebiet en̄wen emi ikemede ndika n̄kokop ikọ nsinsi uwem.—John 6:68.
“Mme Owo nte Enọ” Ẹnam Edidianakiet Odu
8. Nso ke Christ ada ọsọn̄ọ nnyịn idem mbak ubahade edidu ke otu nnyịn?
8 Paul akada se mbonekọn̄ eyo mmọ ẹkesinamde owụt nte Jesus ọnọde “mme owo nte enọ” ke esop man ẹnam esop adiana kiet. Owoekọn̄ oro akande ke ekọn̄ ama esimụm mbuotekọn̄ ọnyọn̄ nte ofụn man edin̄wam n̄wan esie ke utom ufọk. (Ps. 68:1, 12, 18) Kpasụk ntre, Jesus ama akan ererimbot onyụn̄ ada ediwak owo emi ẹmade ndidi ifịn esie enyene. (Kot Ephesus 4:7, 8.) Nso ke enye akada mbuotekọn̄ emi anam? Ephesus 4:11-13 ọbọrọ ete: “Enye ọkọnọ ndusụk owo nte mme apostle, ndusụk owo nte mme prọfet, ndusụk owo nte mme ọkwọrọ eti mbụk, ndusụk owo nte mme ekpemerọn̄ ye mme andikpep, man ẹnen̄ede ndisana owo, man ẹsan̄a utom, man ẹbọp idem Christ ẹnam ọkọri, tutu kpukpru nnyịn ikabade idi kiet ke mbuọtidem.”
9. (a) Didie ke “mme owo nte enọ” ẹsin̄wam ndinam edidianakiet aka iso odu ke esop? (b) Ntak emi kpukpru owo ke esop ẹkpetienede ẹnam edidianakiet odu ke esop?
9 “Mme owo nte enọ” emi ẹdi ndima ekpemerọn̄ emi ẹnamde edidianakiet aka iso odu ke esop. Ke uwụtn̄kpọ, edieke ebiowo okụtde nte nditọete iba ‘ẹmiade mbuba,’ enye ekeme ndinam edidianakiet odu ke esop ke ndinọ mmọ item ke ndịbe man ‘enen̄ede mmọ ke ifụre ifụre ido.’ (Gal. 5:26–6:1) Nte mme andikpep, “mme owo nte enọ” emi ẹsida mme n̄kpọ emi Bible ekpepde ẹn̄wam nnyịn inen̄ede inyene mbuọtidem. Ntem ke mmọ ẹsinam edidianakiet odu ke esop ẹnyụn̄ ẹn̄wam nnyịn ikọri isịm ọyọhọ idaha. Paul ọkọdọhọ ke ẹnam emi man “nnyịn ikûdi aba nditọwọn̄, emi kpukpru ofụm ukpepn̄kpọ, eke abian̄a owo, eke n̄kari ndudue emi ẹtịbide ẹdi, ẹberide ẹsan̄a nte oyobio ẹnyụn̄ ẹmende ẹyo.” (Eph. 4:13, 14) Kpukpru Christian ẹkpenyene ndinam edidianakiet odu ke otu nditọete, ukem nte ndido kiet kiet ke idem owo ẹsidianade kiet ẹnam n̄kpọ.—Kot Ephesus 4:15, 16.
Nyene Mbufa Edu
10. Didie ke oburobụt ido ekeme ndisuan ufọk ye esop?
10 Ndi ama okụt ke Paul ekewet ke Ephesus ibuot 4 ete ke ndinyene ima edi ata akpan n̄kpọ emi edinamde nnyịn idiana kiet nte mme Christian oro ẹkọride ẹsịm ọyọhọ idaha? Enye ama etịn̄ n̄ko se ima edide. Ke uwụtn̄kpọ, ima idiyakke inam use ye obukpo ido. Paul ama ekpe nditọete esie ubọk ete “ẹkûka iso aba ẹsan̄a kpa nte mme idụt ẹsan̄ade,” koro “esịt mmọ ama okodoro ufiọn,” mmọ ẹma ẹnyụn̄ “ẹyak idem ẹnọ obukpo ido.” (Eph. 4:17-19) Imemke utom ndidiana kiet ke utọ oburobụt ererimbot emi. Mme owo ẹsida use ẹnam mbubru, ẹkwọ ke ikwọ, ẹse ke ekebe ndise nte owo ese mbre, ẹnyụn̄ ẹdedịbe ẹnam mîdịghe ẹnam ke eferife. N̄kpọ en̄wen emi ekemede ndinam ikpọn̄ Jehovah ye esop esie edi mfụmmfụm ima, oro edi, ndinyene udọn̄ ke idem owo emi owo mîduakke ndidọ. Ntak-a? Koro utọ edu emi ekeme ndinam owo ọsọp anam use. Ndisịn efịbe ke ntak mfụmmfụm ima ekeme ndidian̄ade nditọ n̄kpọn̄ ete ye eka mmọ onyụn̄ adian̄ade ebe ye n̄wan. Utọ n̄kpọ emi ọdiọk etieti. Oro esịn Paul ekewetde ete: “Edi idịghe ntre ke mbufo ẹkekpep nte Christ edide.”—Eph. 4:20, 21.
11. Nso ukpụhọde ke Bible esịn udọn̄ ọnọ mme Christian ete ẹnam?
11 Paul ama enen̄ede odụri nnyịn utọn̄ ete ikpọn̄ ekikere emi ekemede nditọ ubahade edi ikpep ndinyene nti edu emi ẹdinamde idu ke emem ye mbon en̄wen. Enye ọkọdọhọ ete: “[Ẹsio] akani owo ẹduọk emi asan̄ade ekekem ye akani ido uwem mbufo ke eyo oko emi onyụn̄ ọdiọn̄de-diọn̄ abiara nte ekemde ye mme abian̄a abian̄a udọn̄ esie; . . . ẹkabade ẹdi obufa ke odudu oro onụkde ekikere mbufo, ẹkpenyụn̄ ẹmen obufa owo ẹsịne emi ẹkebotde nte ekemde ye uduak Abasi ke ata edinen ido ye akpanikọ.” (Eph. 4:22-24) Didie ke ikeme ndidi ‘obufa ke odudu oro onụkde ekikere nnyịn’? Edieke itiede ikere se ikpepde ke Bible ye nti uwụtn̄kpọ nditọete nnyịn emi ẹma ẹkekọri ẹsịm ọyọhọ idaha, ukeme oro isịnde ayanam idi mbufa owo emi ẹbotde “nte ekemde ye uduak Abasi.”
Kpep Obufa Usụn̄ Utịn̄ikọ
12. Didie ke nditịn̄ akpanikọ anam edidianakiet odu, ndien ntak emi esisọn̄de ndusụk owo nditịn̄ akpanikọ?
12 Oyom kpukpru owo ke ubon ye ke esop ẹtịn̄ akpanikọ ẹnọ kiet eken. Nditịn̄ ikọ in̄wan̄-in̄wan̄ ye ke esịt akpanikọ ekeme ndidian mme owo ọtọkiet. (John 15:15) Edi nso iditịbe edieke eyenete osude nsu ọnọ eyenete esie? Ke ini eyenete esie edide edifiọk ke enye akababian̄a imọ, enye idinịmke enye aba ke akpanikọ. Omokụt do ntak emi Paul ekewetde ete: “Yak owo mbufo kiet kiet etịn̄ akpanikọ ọnọ mbọhọidụn̄ esie, koro nnyịn idi ndido idem kiet eken.” (Eph. 4:25) Ọyọsọn̄ owo emi ọkọtọn̄ọde ke ekpri osu nsu tutu nsu emehe enye nditọn̄ọ nditịn̄ akpanikọ. Edi esinem Jehovah ndin̄wam owo emi esịnde ukeme ndikpụhọde.
13. Nso ke owo akpanam man etre isụn̄i
13 Jehovah ekpep nnyịn ndikpono owo nnyụn̄ ndiana kiet ke esop ye ke ubon ke ndinam nnyịn ifiọk utọ ikọ oro nnyịn mîkpetịn̄ke. Ikọ esie ọdọhọ ete: “Ẹkûyak mbumbu ikọ ọwọrọ mbufo ke inua . . . Ẹsion̄o kpukpru ndotndot udu ye iyatesịt ye ifụtesịt ye mfiori ye ikọ isụn̄i ẹfep ke otu mbufo ọkọrọ ye kpukpru idiọkn̄kpọ.” (Eph. 4:29, 31) N̄kpọ kiet oro edinamde ikûtịn̄ ikọ emi abiakde owo edi ndidomo ndikpono mbon en̄wen. Ke uwụtn̄kpọ, owo oro esiwakde ndisụn̄i n̄wan esie ekpenyene ndikpụhọde edu esie, akpan akpan ke ini enye ọfiọkde nte Jehovah okponode iban. Abasi akam eyet ndusụk iban aran ke edisana spirit man ẹkpetiene Christ ẹkara nte ndidem ke heaven. (Gal. 3:28; 1 Pet. 3:7) Kpasụk ntre n̄ko, n̄wan oro esifioride n̄kpo ye ebe esie ekpenyene ndikpụhọde edu ke ama ekedi edifiọk nte Jesus okomụmde idem ke ini ẹkenamde se iyatde enye esịt.—1 Pet. 2:21-23.
14. Ntak emi iyatesịt ọdiọkde?
14 N̄kpọ en̄wen emi ọdiọkde nte isụn̄i edi iyatesịt. Emi n̄ko ekeme ndidian̄ade mme owo ke ubon ye ke esop. Iyatesịt etie nte ikan̄. Enye ekeme ndisak tutu owo ikemeke ndinịme, onyụn̄ abiat n̄kpọ etieti. (N̄ke 29:22) Owo emi ayatde esịt ke ntak n̄kpọ emi ẹnamde enye ekpenyene ndimụm esịt mbak nti ufan ẹdifen̄e ẹkpọn̄ enye. Akpana mme Christian ẹdomo ndifen nnọ kiet eken, ikamake udu m̀mê ndika iso ntịn̄ mfịna oro ama ekebe. (Ps. 37:8; 103:8, 9; N̄ke 17:9) Paul ọkọnọ nditọete ke Ephesus item emi ete: “Ẹyat esịt, edi ẹkûnam idiọkn̄kpọ; ẹkûyak utịn osụhọde edisịm mbufo ke idaha iyatesịt, ẹkûnyụn̄ ẹyak ufan̄ ẹnọ Devil.” (Eph. 4:26, 27) Edieke owo mîkemeke ndimụm esịt ke ini esịt ayatde enye, oro ekeme ndinọ Devil ufan̄ ndisịn utọk ye ubahade ke esop.
15. Nso iditịbe edieke imende n̄kpọ owo?
15 N̄kpọ en̄wen emi anamde edidianakiet odu ke esop edi ndikpono n̄kpọ owo. Bible ọdọhọ ete: “Yak eyịp inọ okûyịp aba.” (Eph. 4:28) Idụhe asan̄autom Jehovah emi ekpekerede ke ekemmọ eyenete ekeme ndimen n̄kpọ imọ. Mmọdo, edieke eyenete ọkpọsọn̄de esịt eyịp n̄kpọ eyenete, utọ idiọk ido oro ikpayakke eyenete enịm eyenete aba ke akpanikọ.
Ima Abasi Adian Nnyịn Ọtọkiet
16. Didie ke ikeme ndida nti ikọ nnam edidianakiet ọdọdiọn̄ odu ke otu nnyịn?
16 Se inamde edidianakiet odu ke esop Christian edi sia kpukpru owo ke esop ẹma Abasi ẹnyụn̄ ẹyom ndinam n̄kpọ ye kiet eken ke ima. Esịtekọm oro inyenede inọ mfọnido oro Jehovah ọfọnde ye nnyịn anam inen̄ede isịn ukeme ndinam se idude ke Ephesus 4:29, 32, emi ọdọhọde ete: “Etịn̄ se ededi oro ọfọnde ndibọp owo nnam ọkọri nte oyomde, man emi ọkpọnọ mme andikop se inọde ufọn. . . . Ẹfọn ido ye kiet eken, ẹtua owo mbọm, ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.” Edieke Jehovah akam efende ọnọ nnyịn emi idide mme anana-mfọnmma owo, nte nnyịn n̄ko ikpefenke inọ mbon en̄wen ke ini mmọ ẹduede nnyịn?
17. Ntak emi ikpesịnde ukeme idomo ndidiana kiet?
17 Edidianakiet ikọt Jehovah ọnọ enye ubọn̄. Spirit esie anam nnyịn inam nsio nsio n̄kpọ man edidianakiet odu. Nnyịn ididehedei inam n̄kpọ ekededi oro edibiọn̄ọde spirit emi. Paul ekewet ete: “Ẹkûyat edisana spirit Abasi esịt.” (Eph. 4:30) Edidianakiet etie nte n̄kpọuto oro ẹkpetịmde-tịm ẹkama. Kpukpru mbon oro ẹdianade kiet ẹsikop idatesịt, ndien emi esinọ Jehovah ubọn̄. “Mmọdo, ẹdi mme andikpebe Abasi, nte ndima nditọ, ẹnyụn̄ ẹka iso ẹsan̄a ke ima.”—Eph. 5:1, 2.
Didie ke Afo Ọkpọbọrọ?
• Ewe edu isinam mme Christian ẹdiana kiet?
• Didie ke edu nnyịn ekeme ndinam edidianakiet odu ke esop?
• Didie ke nte itịn̄de ikọ ekeme ndinam nnyịn idiana kiet?
[Mme Mbụme Ukpepn̄kpọ]
[Ndise ke page 17]
Mme owo oro ẹtode nsio nsio idụt ẹdiana kiet
[Ndise ke page 18]
Ndi ọmọfiọk afanikọn̄ oro mfụmmfụm ima ekemede ndisịn fi?