Jaikóramo peteĩ ñeʼẽme ñamombaʼeguasu Ñandejárape
Jaikóramo peteĩ ñeʼẽme ñamombaʼeguasu Ñandejárape
‘Ñañehaʼãmbaitékena jaiko peteĩ ñeʼẽme.’ (EFE. 4:3)
1. Mbaʼéichapa síglo primérope omombaʼeguasurakaʼe Ñandejárape pe kongregasión oĩva Éfesope?
SÍGLO primérope oĩvaʼekue peteĩ kongregasión omombaʼeguasúva Ñandejárape oikógui peteĩ ñeʼẽme. Upéva hína pe kongregasión oĩva Éfesope. Upe távape ningo oĩ heta negósio, ha umi kristianokuéra apytépe oĩ iplátava ha orekóva tembiguái. Péro upépe oĩ avei umi kristiáno oikóva tembiguáiramo ha imboriahunerakaʼe hikuái (Efe. 6:5, 9). Ijapytepekuéra oĩ avei umi ermáno hudío oikovaʼekue chugui kristiáno Pablo opredika rire tres mése aja sinagógape. Ha oĩ avei umi tetã ambuegua omombaʼeguasuvaʼekue Ártemispe ha ojapovaʼekue máhia (Hech. 19:8, 19, 26). Péicha jahecha pe rrelihión añeteguápe oike hague opaichagua tapicha. Ha apóstol Pablo ohechakuaa oiko rupi hikuái peteĩ ñeʼẽme omombaʼeguasuha Jehovápe, upévare haʼe ohai: ‘Toñemombaʼeguasu chupe kongregasión rupive’ (Efe. 3:21).
2. Mbaʼépa ikatu rakaʼe omomombyry ojuehegui umi kristiáno Efesoyguápe?
2 Péro upe tiémpope oiko peteĩ mbaʼe ikatúva omomombyry ojuehegui umi kristiáno Efesoyguápe. Apóstol Pablo omombeʼúmakuri upéva umi ansiánope heʼívo: ‘Pende apytégui voi opuʼãvaʼerã oporomboʼéva japu, ogueraha hag̃ua hapykuéri umi ojeroviávape Jesús rehe’ (Hech. 20:30). Oĩ avei umi ermáno ndohejáiva pe ilája ha oikovaiséva gueteri hapichándi, apóstol Pablo heʼi umi naiñeʼẽrendúiva Ñandejárape oikoha upéicha (Efe. 2:2; 4:22).
Peteĩ kárta ñanepytyvõva jaiko hag̃ua peteĩ ñeʼẽme
3, 4. Mbaʼépa Pablo ohechauka pe kárta ohaivaʼekuépe umi Efesoyguápe?
3 Apóstol Pablo ohechakuaa kristianokuéra akóinte oiko hag̃ua peteĩ ñeʼẽme tekotevẽha káda uno oñehaʼãmbaite. Pe espíritu sánto rupive ohai peteĩ kárta umi kristiáno Efesoyguápe ha ohechauka tekotevẽha oiko hikuái peteĩ ñeʼẽme. Upépe omombeʼu Ñandejára rembipota heʼívo: ‘Haʼe ombyatypase jey Cristo poguýpe opaite mbaʼe’ (Efe. 1:10). Apóstol Pablo ombojoja avei unhidokuérape umi ita ojeporúvare oñemopuʼã hag̃ua óga, upévare heʼi: ‘Pe óga ojejapóva ohóvo oñemopuʼã opa peve oiko hag̃ua chugui peteĩ témplo marangatu Jehovápe g̃uarã’ (Efe. 2:20, 21). Pablo ohechauka umi kristiáno hudío ha ambue tetãygua oikoha peteĩ ñeʼẽme Jehová haʼégui ijapoharekuéra. Haʼe heʼi Jehová ‘rupive oikoveha mayma oĩva yvágape ha ko yvy ape ári’ (Efe. 3:5, 6, 14, 15).
4 Ñahesaʼỹijóvo Efesios kapítulo 4, jahecháta mbaʼérepa tekotevẽ ñañehaʼãmbaite jaiko hag̃ua peteĩ ñeʼẽme, mbaʼéichapa Jehová ñanepytyvõ akóinte jaservi hag̃ua chupe upéicha ha mbaʼépa jajapovaʼerã upearã. Upévare ideprovechove hag̃ua ñandéve ko artíkulo iporãta jalee raẽ pe kapítulo 4.
Ñañehaʼãvaʼerã akóinte jaiko peteĩ ñeʼẽme
5. Mbaʼéicha rupípa umi ánhel oservi Jehovápe peteĩ ñeʼẽme, ha mbaʼérepa ñandéve hasyve upéva?
5 Apóstol Pablo ojerure asy umi kristiáno Efesoyguápe akóinte ‘oñehaʼãmbaite hag̃ua oiko peteĩ ñeʼẽme’ (Efe. 4:3). Ñañembojojáramo umi ánhel rehe jahechakuaáta mbaʼérepa tekotevẽ ñañehaʼãmbaite. Jaikuaa ndaiporiha mokõi yvypóra peteĩchaitéva, upévare ikatu jaʼe umi anhelkuéra idiferenteha avei ojuehegui (Dan. 7:10). Upéicharõ jepe oservi hikuái Jehovápe peteĩ ñeʼẽme. Mbaʼéicha rupípa upéva? Iñeʼẽrendúgui Jehovápe ha ojapo rupi hembipota (jaleemína Salmo 103:20, 21). Péro ñande jajoguáramo jepe umi ánhelpe heta mbaʼépe, hasyve ñandéve jaiko hag̃ua peteĩ ñeʼẽme jarekógui heta defékto.
6. Mbaʼépa ñanepytyvõta ñambaʼapo porã hag̃ua peteĩ ermáno idiferéntevandi ñandehegui?
6 Ñane imperfékto rupi ikatu jajoavy ñambaʼapo jave oñondive. Ñamoĩ chupe peteĩ ermáno itrankiloitereíva ha tárdemante og̃uahẽva jepi, ombaʼapoha ótro ermáno oraitére oikóvandi péro ipyʼatarováva. Mbaʼépa ikatu oiko upéicharõ? Ikatu voi haʼekuéra ojesareko ojodeféktorente ha ndohechakuaái mbaʼépepa ojavyhína hikuái. Mbaʼépa ojapovaʼerã mokõivéva ombaʼapo porã hag̃ua oñondive? Oñehaʼãvaʼerã ojapo umi mbaʼe Pablo heʼivaʼekue. Jaleévo umi mbaʼe jahecha raẽ vaʼerã mbaʼéichapa ikatu oipytyvõ chupekuéra oiko hag̃ua peteĩ ñeʼẽme ha upéi jahecha mbaʼéichapa ikatu ñanepytyvõ avei ñandéve. Apóstol Pablo ohai: ‘Ajerure peẽme peiko hag̃ua hekoitépe, ñemomirĩ ha pyʼaporãme, penepasiénsia ha peñoaguanta hag̃ua mborayhúpe ha peñehaʼã akóinte peiko peteĩ ñeʼẽme ha pyʼaguapýpe’ (Efe. 4:1-3).
7. Mbaʼérepa tekotevẽ jaservi Jehovápe peteĩ ñeʼẽme ñane ermanokuérandi ñane imperféktoramo jepe?
7 Tekotevẽterei jaservi Jehovápe peteĩ ñeʼẽme ñane ermanokuérandi ñane imperféktoramo jepe, jaikuaa ningo kongregasiónpe añoite jatopataha umi kristiáno teetéva. Apóstol Pablo ohai voi: ‘Peteĩ kongregasión ha peteĩ espíritunte oĩ, ha peẽ peñehenói pereko hag̃ua peteĩ esperánsa oñemoĩva peẽme g̃uarã; peteĩ Mburuvicha, peteĩ jerovia, peteĩ vautísmo; ha peteĩ Ñandejára enterove Ru’ (Efe. 4:4-6). Upéicharõ Jehová nañanderovasamoʼãi ni nomeʼẽmoʼãi ñandéve ijespíritu nañaiméiramo isiervokuéra apytépe. Upévare, oĩramo jepe peteĩ ermáno ndajaguerohorypáiva, ñañemomombyrýtapa kongregasióngui? Ñasẽramo kongregasióngui Jehová nañanerekomboʼemoʼãi jaikove hag̃ua opa ára g̃uarã (Juan 6:68).
Ansianokuéra ñanepytyvõ jaiko hag̃ua peteĩ ñeʼẽme
8. Mbaʼépa Jesús omeʼẽ ikatu hag̃uáicha jaiko peteĩ ñeʼẽme?
8 Apóstol Pablo heʼi Jesús omeʼẽ hague ‘umi kuimbaʼépe jopóiramo’ ikatu hag̃uáicha jaiko peteĩ ñeʼẽme kongregasiónpe. Péicha Pablo ombojoja chupekuéra umi soldádo ojapomivaʼekuére yma. Oúvo umi soldádo gerrahágui ogueru umi prisionéro hembiguairã, oipytyvõ hag̃ua hembirekokuérape ogapýpe (Sal. 68:1, 12, 18). Upéicha avei Jesús ipuʼakávo ko múndore okonsegi heta tembiguái oservíva chupe kyreʼỹme (jaleemína Efesios 4:7, 8). Mbaʼépa omeʼẽ chupekuéra hembiaporã? Apóstol Pablo heʼi: ‘Oĩ omoĩva oiko hag̃ua chugui apóstol, ambuégui katu proféta. Ótrope omoĩ omombeʼu hag̃ua marandu porã, ambuépe katu omoakã ha omboʼe hag̃ua. Péicha oipytyvõ umi ojeroviávape Ñandejárare ha ombosakoʼi chupekuéra ojejokuái ha ojapo hag̃ua Ñandejára rembipota. Ha upéicha omombarete Cristo kongregasión enterove oiko hag̃ua peteĩ ñeʼẽme’ (Efe. 4:11-13).
9. a) Mbaʼéichapa ñanepytyvõ jaiko hag̃ua peteĩ ñeʼẽme umi kuimbaʼe Jesús omeʼẽvaʼekue jopóiramo? b) Mbaʼépa káda uno jajapovaʼerã jaiko hag̃ua peteĩ ñeʼẽme kongregasiónpe?
9 Koʼã kuimbaʼépe Jesús omoĩ avei omoakã hag̃ua pe kongregasión ikatu hag̃uáicha ojeiko peteĩ ñeʼẽme. Pór ehémplo, mbaʼépa ikatu ojapo peteĩ ansiáno ohechakuaáramo mokõi ermáno ojohasaseha oikóvo? Oñemoñeʼẽvaʼerã chupekuéra haʼeñohápe. Ha pyʼaporãme omokyreʼỹvo chupekuéra okambia hag̃ua, pe ansiáno oñangarekohína ojeiko hag̃ua peteĩ ñeʼẽme kongregasiónpe (Gál. 5:26–6:1). Umi kuimbaʼe Jesús ‘omeʼẽva jopóiramo’ ñanemboʼe avei ikatu hag̃uáicha ñamombarete ñane jerovia la Biblia heʼívare. Péicha ñanepytyvõ jaiko hag̃ua peteĩ ñeʼẽme ha jasegi hag̃ua jajeroviave. Apóstol Pablo heʼi umi kuimbaʼe ñanepytyvõha ‘anivéma hag̃ua jaiko ku mitãicha, ha anivéma ku oládaicha yvytu oipejuha gotyónte jaha, jagueroviágui opa mbaʼe rei heʼíva umi mboʼehára japu ñandereityséva mbaʼe vaípe’ (Efe. 4:13, 14). Upéicharõ jepe, káda uno ñaipytyvõvaʼerã ikatu hag̃uáicha jaiko peteĩ ñeʼẽme kongregasiónpe, tekotevẽháicha ñane korasõ, ñane rriñón ha ambue mbaʼe oĩva ñande retére ombaʼapo porã oñondive ñaneresãi hag̃ua (jaleemína Efesios 4:15, 16).
Ñakambiákena tekotevẽramo
10. Mbaʼérepa ñamboykevaʼerã tekovai ha tekokyʼa?
10 Umi versíkulo jaleevaʼekue Efesios kapítulo 4-pe, Pablo ohechauka ñaikotevẽha mborayhu jaiko hag̃ua peteĩ ñeʼẽme ha ñande jerovia imbarete hag̃ua. Upéi ohechauka mbaʼéichapa oikovaʼerã umi oguatáva mborayhu rapére. Haʼe heʼi ñamboykevaʼerãha tekovai ha tekokyʼa. Apóstol Pablo heʼi iñermanokuérape ‘anivéma hag̃ua oiko umi ojeroviaʼỹva oikoháicha’. Upérõ la hénte oñemeʼẽ ‘opaichagua tekovaípe’ ha ‘opaichagua tekokyʼápe’ (Efe. 4:17-19). Koʼág̃a rupi avei la hénte oikóva ñandejerére hekovai ha upéva ikatu ñandereity ha ndajaikovéi peteĩ ñeʼẽme. Pe tekovai rehe ningo oñeñeʼẽ umi pukarãme, purahéi ha pelíkulape. Ha heta hénte oiko upéicha, tahaʼe ñemihápe térã notĩri voi hekovai hag̃ua. Aníkena ñanderesarái ñamakaneáramo peteĩ ermáno térã ermánandi, péro nañapensái ñamenda hese, ikatuha ñañemomombyry Jehovágui ha kongregasióngui. Mbaʼérepa? Jaikuaágui ñamakaneáramo péicha ikatuha ñanderekovai. Ha oimérõ omendáva pe omakaneáva, ikatuete omoakãratĩhína hembirekópe térã iménape. Upévare ikatu ojopoi hikuái ha ombohasa asy ifamíliape ohejávo chupekuéra isy térã ituvaʼỹre. Péicha jajapóramo hasýta jaiko hag̃ua peteĩ ñeʼẽme. Upéicha rupi apóstol Pablo heʼivaʼekue: ‘Peẽ ndapeikuaaivaʼekue Cristo péicha oiko hague’ (Efe. 4:20, 21).
11. Mbaʼépa heʼi apóstol Pablo jajapovaʼerãha?
11 Apóstol Pablo heʼi avei ñakambiavaʼerãha ñapensa lája anive hag̃ua jaikovai ñande rapichándi, ha jajapo umi mbaʼe ñanepytyvõtava jaiko hag̃ua pyʼaguapýpe enterovéndi. Haʼe heʼi: ‘Peheja pende reko tuja ha anive peiko yma guaréicha. Ani peñembotavy pendejupe voi ha penderekokyʼave pehóvo. Upéva rangue pembopyahupaitékena pende pyʼapýpe perekóva ha pepensa lája, pemoñepyrũ pende reko pyahu pejapo rupi Ñandejára rembipota ha peiko tekojojápe ha hekopete’ (Efe. 4:22-24). Péro mbaʼéicha piko ikatúta ‘ñambopyahu ñapensa lája’? Upearã tekotevẽ jajepyʼamongeta umi mbaʼe ñaaprendévare la Bíbliagui ha umi ermáno ijerovia mbaretéva ehémplore. Ha ñañehaʼãmbaitéramo katuete ‘ñande reko pyahúta jajapo rupi Ñandejára rembipota’.
Ñañatendevaʼerã ñane ñeʼẽrãre
12. Mbaʼérepa nañandejapuivaʼerã, ha mbaʼérepa hetápe ijetuʼu okambia hag̃ua?
12 Akóinte jaiko porãmba hag̃ua ñande rogapýpe ha kongregasiónpe nañandejapuivaʼerã. Añetehápe umi oñemongeta porãva ha ndaijapúiva ojogueraha porã (Juan 15:15). Péro mbaʼépa oikóta japilláramo peteĩ ñande rogaygua térã peteĩ ermáno ijapuha ñandéve? Hasýma jajeroviave hag̃ua hese. Upévare apóstol Pablo ohai: ‘Ani pendejapu pende rapichápe, pórke ñande ningo oñopehẽngue’ (Efe. 4:25). Oĩ voi umi ijapusetereíva ha imitã guivéma oikóva upéicha, upévare ijetuʼu chupekuéra okambia hag̃ua. Péro Jehová omombaʼeterei oñehaʼã haguére okambia hikuái ha katuete oipytyvõta chupekuéra.
13. Mbaʼépa jajapovaʼerã anive hag̃ua ñane ñeʼẽ arhél?
13 Jehová ningo oipota jajorrespeta ha jaiko porãmba oñondive kongregasiónpe ha ñande rogapýpe. Upévare heʼi ñandéve mbaʼépa ndovaléi jajapo ñañemongeta jave. Haʼe heʼi: ‘Ani osẽ pendejurúgui mbaʼeveichagua ñeʼẽ tieʼỹ. Pehapoʼóke pendejehegui pyʼaro, pochyvai, sapukái, juruguasu ha opaichagua ñaña’ (Efe. 4:29, 31). Ani hag̃ua ñane ñeʼẽ arhél ñande rapichápe ñañehaʼãvaʼerã japororrespetave. Pór ehémplo, umi iñeʼẽ arhélva hembirekópe oñehaʼãvaʼerã okambia opensa lája ha ohechakuaa Jehová omombaʼetereiha kuñanguérape. Haʼe oiporavo voi heta kuñáme oho hag̃ua yvágape ogoverna Jesucristo ndive (Gál. 3:28; 1 Ped. 3:7). Upéicha avei umi tembireko ojepokuaáva osapukái iménape, oñehaʼãvaʼerã okambia ha imanduʼa mbaʼéichapa Jesús ojejokokuaavaʼekue oĩ jave ombopochyséva chupe (1 Ped. 2:21-23).
14. Mbaʼépa ikatu oiko ndajajejokóiramo ha ñandepochyvai?
14 Umi iñeʼẽ arhélva ningo katuete ipochyvai jepi avei. Peichagua ndojejokóiramo, ikatu oikovai umi iñamigoiténdi jepe. Jaʼekuaa pe pochyvai ojoguaha pe tatarendy ndaikatúivape jajoko, sapyʼaitépe sarambi ikatu ojapo (Pro. 29:22). Heta vése ningo ikatu hendápe porã jajekeha, péro ñañatendevaʼerã ani ñandepochyvai, ikatúgui ñambopochyete umi jahayhúvape. Ñande kristianokuéra ñañoperdonavaʼerã ñande pyʼaite guive, ani ñandepyʼaro, ha ani jahekýi ojupe ñane rembiapo vaikue (Sal. 37:8; 103:8, 9; Pro. 17:9). Apóstol Pablo heʼi umi kristiáno Efesoyguápe: ‘Pendepochýramo ani pejapo ivaíva. Ani peheja kuarahy oike jepe pendepochy poi hag̃ua. Ani pemeʼẽ juruja Satanáspe’ (Efe. 4:26, 27). Umi ndojejokóiva ha ipochyvaíva omeʼẽhína juruja Satanáspe omoingovai hag̃ua ermanokuérape.
15. Mbaʼépa oiko oĩrõ peteĩ opokóva mbaʼeahénore?
15 Nañanembaʼeavykýiramo ñanepytyvõta avei jaiko hag̃ua peteĩ ñeʼẽme kongregasiónpe. Upévare apóstol Pablo heʼi: ‘Umi imondavaʼekue anivéma omonda’ (Efe. 4:28). Jehová siervokuéra apytépe oĩ pyʼaguapy ha ndaipóri imondáva. Péro oĩrõ peteĩ opokóva mbaʼeahénore, upéva ndoikovéima peteĩ ñeʼẽme ermanokuérandi.
Jahayhúgui Ñandejárape jaiko peteĩ ñeʼẽme
16. Mbaʼépa ñañehaʼãvaʼerã jajapo jaiko hag̃ua peteĩ ñeʼẽme?
16 Ñande kristiáno jaiko peteĩ ñeʼẽme jahayhúgui Jehovápe, upévare jajotrata mborayhúpe. Ha jaagradesévo ñande pyʼaite guive Ñandejárape imbaʼeporã haguére ñanendive, ñañehaʼãmbaitéta jajapo koʼápe heʼíva: ‘Peje umi mbaʼe porã omombaretétava umi ikangývape, ha oipytyvõtava pende rapichápe. Penembaʼeporãkena oñondive ha pejoporiahuvereko. Ha peñoperdona Ñandejára peneperdona haguéicha Cristo rupive’ (Efe. 4:29, 32). Jehová ñandeporiahuvereko rupi, imanduʼa ñane imperfektoha ha ñaneperdona. Ha mbaʼére piko upéicharõ ñande nañaperdonamoʼãi ñande rapichápe?
17. Mbaʼérepa ñañehaʼãvaʼerã jaiko peteĩ ñeʼẽme?
17 Jaiko rupi peteĩ ñeʼẽme ñamombaʼeguasuñaína Jehovápe oñondivepa. Ha ijespíritu sánto ñanepytyvõ jajogueraha porã hag̃ua, upévare jahejavaʼerã ñanesãmbyhy. Apóstol Pablo heʼi voi: ‘Ani pemoñembyasy Ñandejára espíritu sántope’ (Efe. 4:30). Iporãiterei ningo jaiko peteĩ ñeʼẽme ñane ermanokuérandi, ha akóintekena jaiko upéicha. Javyʼaiterei voi jaiko porãmba haguére oñondive, hiʼarive ñamombaʼeguasuñaína upéicha Jehovápe. Upéicharõ jajapókena ko konsého oñemeʼẽva ñandéve: ‘Pehaʼangákena Ñandejárape, haʼe ningo pende Ru penderayhuetéva, ha akóinte peguata pe mborayhu rapére’ (Efe. 5:1, 2).
Ñambohovaimi koʼã porandu
• Mbaʼépa ñanepytyvõta jaiko hag̃ua peteĩ ñeʼẽme?
• Mbaʼépa jajapovaʼerã jaiko porãmba hag̃ua oñondive kongregasiónpe?
• Mbaʼéichapa ñañeʼẽvaʼerã ñande rapichápe jaiko porã hag̃ua oñondive?
[Porandu ñahesaʼỹijóva]
[Nóta oĩva taʼanga ndive páhina 17]
Hénte opa tetãygua oiko peteĩ ñeʼẽme oñondivepa
[Nóta oĩva taʼanga ndive páhina 18]
Mbaʼérepa ndovaléi ñamakanea avavéndi nañapensáirõ ñamenda hese?