Bumo Bwa Bwine Kidishitu Butumbijanga Leza
Bumo Bwa Bwine Kidishitu Butumbijanga Leza
“Ne mityima mutele kulama bumo bwa Mushipiditu.”—EF. 4:3.
1. Lelo Bene Kidishitu ba mu myaka katwa kabajinji ba mu Efisesa bātumbije Leza namani?
BUMO bwa kipwilo kya Bwine Kidishitu kya mu Efisesa wa kala bwātumbije Yehova Leza wa bine. Mobimwekela, mu kino kité kya busunga, batutu bamo Bene Kidishitu bādi bampeta badi ne bapika ba kwibengidila, bakwabo nabo bādi bapika ne padi balanda’tu ba poso. (Ef. 6:5, 9) Bamo bādi Bayuda bāfundile bubinebine mu bula bwa myeji isatu yāfundije mutumibwa Polo mu yabo shinakoka. Bakwabo bādi bidi batōta Alatemise ne kulonga bya majende. (Bil. 19:8, 19, 26) Na bubine, Bwine Kidishitu bwa bine bwābungakenye bantu ba miswelo ne miswelo. Polo wāyukile amba Yehova ukatumbijibwa kupityila ku bumo bwa kipwilo. Wāsonekele amba: “Kudi aye nanshi kupebwe ntumbo monka mu kipwilo.”—Ef. 3:21.
2. Le i ditompo’ka dyātompele bumo bwa Bene Kidishitu ba mu Efisesa?
2 Inoko, dyese dya kwikala umbumo bwa kipwilo kya mu Efisesa dyātompelwe. Polo wādyumwine bakulumpe amba: “Kadi ne ku bānwe bene nako kukemutalukilanga bantu bakwisamba byalupatalupata, mwanda wa kukokela bāna-babwanga ko badi’mba, betulonde.” (Bil. 20:30) Kadi banabetu bamo kebālekelepo mushipiditu wa kwiketaketa wādyumwine Polo amba, i mushipiditu “wa kulonga mudi bāna bampikwa kikōkeji.”—Ef. 2:2; 4:22.
Mukanda Ukomeneja Bumo
3, 4. Le mukanda wa Polo ku Bene Efisesa ukomeneja bumo muswelo’ka?
3 Polo wājingulwile amba pa kusaka Bene Kidishitu bendelele kwingidila pamo, nankyo umo ne umo umbukata mwabo ufwaninwe kulonga bukomo bwa kushinsakanya bumo. Leza wāpele Polo bukomo bwa mushipiditu asonekele Bene Efisesa mukanda wādi wisambila mpata pa bumo. Kimfwa, wāsonekele pa mwanda utala mpango ya Leza ya kubungakanya “bintu byonso monka mudi Kidishitu.” (Ef. 1:10) Kadi wādingakenye Bene Kidishitu na mabwe meshileshile ashimikilwe nao kishimikwa. “Kishimikwa kyonso biyampe, senene, shē, kyenda kilepa ke njibo īkola ya Leza monka mudi Mfumwetu.” (Ef. 2:20, 21) Pakwabo kadi, Polo wākomeneje bumo bwa Bayuda na Bene Kidishitu Bajentaila ne kuvuluja banabetu amba kobatambile i kumo. Wātelele Yehova amba i “[Tata, kwandi] ko kwainikilwe misaka yonso ya mūlu, ne ya panopanshi mīne kumo.”—Ef. 3:5, 6, 14, 15.
4 Potubandaula Efisesa shapita 4, tusa kumona mwanda waka bumo bulomba kulonga bukomo, muswelo witukwasha Yehova twikale umbumo, ne ngikadilo iketukwasha tushale nyeke umbumo. Le ubulwe’po kutanga shapita yense mutuntulu mwanda wa umwene bininge mu kifundwa kyobe?
Kinenenwa Amba Bumo Bulomba Kulonga Bukomo
5. Mwanda waka bamwikeulu ba Leza babwanya kwingila umbumo, ino mwanda waka batwe tukokeja kukomenwa kulama bumo?
5 Polo wēsāshīle banabetu Bene Efisesa ‘bate mutyima ku kulama bumo bwa Mushipiditu.’ (Ef. 4:3) Pa kwimvwanija kine kisakilwa kulonga bukomo mu uno mwanda, tala kimfwa kya bamwikeulu ba Leza. I kutupu bintu byūmi bibidi pano panshi biifwene mu byonso, o mwanda tubwanya kufula ku kunena amba Yehova i mwesele midiyo ne midiyo ya bamwikeulu madyese wa andi, wa andi. (Dan. 7:10) Inoko, babwanya kwingidila Yehova mu bumo mwanda bonso bamwivwananga ne kulonga kiswa-mutyima kyandi. (Tanga Mitōto 103:20, 21.) Enka mwikadile bamwikeulu ba kikōkeji na ngikadilo mishileshile, Bene Kidishitu nabo badi na kutupatupa kwishileshile. Kino kikokeja kulengeja bumo bwikale bukomo kulama.
6. Le i ngikadilo’ka iketukwasha twingidile pamo na banabetu badi na kutupatupa kwishidile na kwetu?
6 Kitatyi kitompa bantu bakubulwa kubwaninina kwingidila pamo, i bipēla kobadi kwikoleja. Kimfwa, bikala namani shi mwanetu mutūkije ino utyelewanga divule wingidilanga Yehova pamo na mwanetu ufikanga pa kitatyi ino keje kuloba? Umo ne umo ukalanga amba mwiendelejo wa mukwabo i wampikwa kwendela’mo ino wailwa amba nandi mwikadila kampanda wadi nao ke mwendele’mopo. Lelo bano banabetu babidi bakengidila pamo umbumo namani? Tala mwikadilo usoñenye Polo mu binenwa byandi bilonda’ko moukokejeja kwibakwasha. Tulangulukilei pa muswelo otubwanya kushinsakanya bumo na kutamija ino ngikadilo. Polo wāsonekele amba: “Nemwisashilapo na’mba, mwendele monka biya biya, senene, . . . ne mutyima wa bumvubumvu, ne kikōkeji, ne kutūkija mutyima, ne kwifudila bānwe bene na bene mu lusa; ne mityima mutele kulama bumo bwa Mushipiditu monka mu kikwatyijo kya kubambakanya kya ndoe.”—Ef. 4:1-3.
7. Mwanda waka tufwaninwe kulonga bukomo pa kusaka twikale umbumo na bakwetu Bene Kidishitu bakubulwa kubwaninina?
7 Kwifunda kwingidila Leza mu bumo na bantu bakwabo bakubulwa kubwaninina i kwa mvubu mwanda twi batōtyi ba bine babundile ngitu imo kete. “Kudi ngitu īmo, ne Mushipiditu umo onka, monka mo mwaityilwe ne bānwe mu kukulupila kumo kwa lwito lwenu. Mfumwetu umo, ne kwitabija kumo, ne lubatyijo lumo, ne Leza umo enka Shandya bonso.” (Ef. 4:4-6) Mushipiditu wa Yehova ne madyese andi byendelanga pamo na bumo bwa banabetu baingidija. Nanshi shi umo mu kipwilo wetufityija mutyima, le i kwepi kukwabo kotukenda? Kekudipo kukwabo kotukemvwana binenwa bya būmi bwa nyeke.—Yoa. 6:68.
“Byabuntu ku Bantu” Bishinsakanyanga Bumo
8. I bika bingidija Kidishitu mwanda wa kwitukwasha tukomene lupusa lwa kwiketaketa?
8 Polo wāingidije mwādi mulongelanga bashidika ba pa kala mwanda wa kwelekeja muswelo upene Yesu “byabuntu ku bantu” amba bakwashe pa kulama bumo bwa kipwilo. Mushidika mushindañani wādi usela musungi ke mupika wa kukwasha wandi mukaji mu twaji twa njibo. (Mit. 68:1, 12, 18) Muswelo umo onka, kushinda kushindile Yesu ntanda i kumulengeje ekale na bapika bengila na mutyima tō. (Tanga Efisesa 4:7, 8.) Lelo i mwingidije namani bano bapika ba kyelekejo? “Wapene bamobamo ke batumibwa; ne bamobamo bakwabo bapolofeto, ne bangi nabo bamobamo basapudi; kadi bamobamo bakwabo nabo bakilelo, bangi nabo bafundiji; pa mwanda wa kukankamija bapandulwemo ku mīngilo ya bwingidi, bwa kutamija ngitu ya Kidishitu; tufikidile bātwe bonso ku bumo bwa kwitabija.”—Ef. 4:11-13.
9. (a) Lelo “byabuntu ku bantu” bitukwashanga namani tulame bumo bwetu? (b) Mwanda waka bantu bonso badi mu kipwilo bafwaninwe kutuntwila ku buno bumo?
9 Byobadi bakumbi ba buswe, bino “byabuntu ku bantu” bitukwashanga tulame bumo bwetu. Kimfwa, mukulumpe mu kipwilo wayuka amba banabetu babidi ‘abekolomona abo bene na bene,’ ukatuntwila ku bumo bwa kipwilo na kwibapa madingi a pafula, ne ‘kwibaluja badi namino na mutyima wa kikōkeji.’ (Ngat. 5:26–6:1) Byobadi bafundiji, bino “byabuntu ku bantu” bitukwashanga tukomeje lwitabijo lwetu lwimanine pa bufundiji bwa Bible. Mu uno muswelo, bashinsakanyanga bumo ne kwitukwasha tutame ku mushipiditu. Polo wāsonekele amba i pa mwanda “ketukikēkalapo pano bu-bāna-ba-lukeke kusunkanibwa, ne kupūlulwa ku bivula byonso bya lufundijo, ku budyumuku bwa bantu bwa buzazangi, monka mwikadile kubembeka kwa kyongo.” (Ef. 4:13, 14) Bene Kidishitu bonso bafwaninwe kutuntwila ku bumo bwa bu bana na bana, monka mwikwashijanga bipindi bya ku ngitu yetu, kimo na kikwabo.—Tanga Efisesa 4:15, 16.
Tutamijei Ngikadilo Mipya
10. Lelo mwiendelejo wa busekese onanga bumo bwetu namani?
10 Lelo ubamone amba shapita wa buná wa mukanda wa Polo kudi Bene Efisesa ulombola amba buswe bwa binebine i lufungulo lwa kwikala umbumo bwa bantu batame ku mushipiditu? Kadi ulombola ne bine bilombwa pa kwikala na buno buswe. Kimo bidi, kulonda dishinda dya buswe kufundwilanga kulampe busekese ne kulondalonda bya mutyima umbi. Polo wāsoñenye banababo amba: “Kemukinanga pamo na munangila baJentaila.” Bano bantu bādi “bampikwa mityima,” ne bepāne mu “byakulondalonda bya mutyima umbi.” (Ef. 4:17-19) Ntanda yampikwa kulama bijila yotushikete’mo yonanga bumo bwetu. Bantu bakayanga na busekese, bebwimba mu ñimbo, bebumona bu kwipwija mukose, ne kulonga’bo mu bufyafya ne patōkelela. Kadi nansha ke kwiselembeja kwine, mubadilwa bilongwa bya kulangula masenda a kulonga busekese na muntu o kulangapo kwisonga nandi, kubwanya kukupalula kudi Yehova ne ku kipwilo. Mwanda waka? Mwanda kekwijengapo kutwala ku busekese. Kadi, kwiselembeja kutwala muntu musonge nansha musongwe ku kulonga makoji, kusansanyanga bibi bana ku bambutwile ne mwikadi wambulwa mambo ku mwinē pandi. Bine kukalañanyanga bapwene! Ke kya kutulumukapo shi Polo wāsonekele amba: “Kemwafundijibwepo aye Kidishitu namino, mhm”!—Ef. 4:20, 21.
11. Le Bible ukankamika Bene Kidishitu bashinte namani?
11 Polo wānene ukoma amba tufwaninwe kujila ino milangwe ya kyonakanya, ino tutamije ngikadilo itukwasha twikale umbumo na bakwetu. Wānene amba: “Mupange bobwa bu-muntu bwa kala bwa owa muswelo wa kala, o mwadi mwikele nabo, bwende bubola mwikadile byakilokoloko bya kyongo [bya bu-muntu bwa kala]. . . . Musambukilwe monka mu mushipiditu wa mutyima wenu, muvwale ne muntu mupya wakupangibwa umboloke, ne bu-ujila bwa binebine, mwikadile Leza.” (Ef. 4:22-24) I muswelo’ka otubwanya ‘kusambukilwa monka mu mushipiditu wa mutyima wetu’? I na kusangela byobya byotwifunda mu Kinenwa kya Leza ne kulonda kimfwa kiyampe kya Bene Kidishitu batame ku mushipiditu, shi tulonge bukomo, tubwanya kuvwala muntu mupya “wakupangibwa umboloke, ne bu-ujila bwa binebine, mwikadile Leza.”
Tutamijei Muneneno Mupya
12. Kwisamba bya binebine kushinsakanyanga bumo namani, ne mwanda waka bamo i bakomenwe kwisamba bya binebine?
12 Kwisamba bubinebine kudi na mvubu ku bantu badi mu kisaka kimo ne mu kipwilo. Kunena pambulwa kafinda, patōkelela, ne na kanye kubwanya kusambakanya bantu pamo. (Yoa. 15:15) Lelo bikekala namani shi muntu wabepela mwanabo? Shi mwanabo webuyuka, kikulupiji kyobadi bekulupile kikatyepa. Ubaivwanija mwanda waka Polo wāsonekele amba: “Mwisambe byabinebine wa ku mukwabo, wa ku mukwabo.” (Ef. 4:25) Muntu udi na kibidiji kya kubepa, padi washilwile ukidi mwanuke, ubwanya kukomenwa kushilula kwisamba bya bine. Inoko Yehova ukasangela bukomo bwalonga bwa kushinta ne kadi ukamukwasha.
13. Lelo kufundwila kulampe muneneno wa kafutululo kulomba bika ne bika?
13 Yehova witufundijanga mwa kulamina bulēme ne bumo mu kipwilo ne mu kisaka na kwitutūdila mikalo misumininwe mu muswelo otunena. “Kemukīkala kuleka kinenwa kibole kulupuka mu kyakanwa kyenu, mhm, . . . mufundulei ko mudi bululu bonso, ne bukalabale, ne kufuna bulobo, ne lupotopoto, ne lubabo, ne kiji kyonsololo kumo.” (Ef. 4:29, 31) Muswelo umo wa kwepuka muneneno usansa i kutamija mwikadilo wa kulēmeka bakwabo. Kimfwa, muntu ufutulula wandi mukaji ufwaninwe kwielela’ko kushinta mwamumwena, nakampata kitatyi kyaefunda mulēmekele Yehova bana-bakaji. Leza i mushinge’nka ne kushinga bana-bakaji bamo māni a mushipiditu sandu, ne kwibapa kyepelo kya kubikala bu balopwe pamo na Kidishitu. (Ngat. 3:28; 1 Pet. 3:7) Mo monka ne mukaji usanukila wandi mulume, ufwaninwe kushinta kitatyi kyaefunda muswelo wādi wifula Yesu pobādi bamukolomona.—1 Pet. 2:21-23.
14. Mwanda waka kukalabala kuleta kyaka?
14 Kintu kitwala mpata ku muneneno wa kafutululo i bulobo bwampikwa kubeja. Buno nabo bukalañanyanga bapwene. Bulobo budi pamo bwa mudilo. Bubwanya kukanda bukidibukidi ne kuleta musala. (Nk. 29:22) Muntu ulubilwe ne usaka kulombola mobimusanshila ufwaninwe kubeja bulobo bwandi kutyina kona kipwano kya mvubu. Mwine Kidishitu ukeelela’ko kwikala na lulekelo, kuleka kulama kiji nansha kujokelajokela mu mwanda. (Mit. 37:8; 103:8, 9; Nk. 17:9) Polo wādingile Bene Efisesa amba: “Funai bulobo kemukapīlaimo mambo ponka; kemukashikija dyuba’nka na bukalabale bwenu, mhm! nansha dyabola kemukamujikwila kyaba, mhm.” (Ef. 4:26, 27) Shi muntu wakomenwa kutalaja bulobo bwandi, kejepo kushitwila Dyabola kyaba kya kupalakanya bumo pakwabo ne kuleta mfika mu kipwilo.
15. Lelo kusela kintu kekyetu kubwanya kuleta bika?
15 Kulēmeka bintu bya bakwetu kutuntwilanga ku bumo bwa kipwilo. Tutanga amba: “Wakwiba nandi ēbuleke bwivi bwandi.” (Ef. 4:28) Mu kikonge, bantu ba Yehova i bekulupile umo ku mukwabo. Shi Mwine Kidishitu waone kino kikulupiji na kusela kintu kekyandi, ukona buno bumo bwa nsangaji.
Kusanswa Leza Kwitwikadijanga mu Bumo
16. I muswelo’ka otukokeja kwingidija muneneno utamija mwanda wa kuningija bumo bwetu?
16 Bumo bwa kipwilo kya Bwine Kidishitu i kipa kilupukile ku kutononwa na buswe bwa Leza bwa kuswa bakwetu. Kufwija’ko Yehova pa kanye kandi kwitutononanga tulonge bukomo bwa kulonda madingi andi anena’mba: “[Mwisambei kyokya] kilumbuluke kyonka kyakwimutamija biyampe, senene, amba kipane buntu kudi boba babwivwana. Mwikale ne kanye bānwe bene na bene, ne mutyima wa kukōka, mwikale kwilekela bānwe bene, monka mwemulekele aye Leza mudi Kidishitu.” (Ef. 4:29, 32) Yehova ulekelanga na kanye bantu bakubulwa kubwaninina pamo bwa batwe. Tubulwe’po netu kulekela bakwetu kitatyi kyotumona kubulwa kubwaninina kwabo?
17. Mwanda waka tufwaninwe kulonga bukomo bwa kushinsakanya bumo?
17 Bumo bwa bantu ba Yehova Leza bumutumbijanga. Mushipiditu wandi witutononanga mu miswelo palapala tushinsakanye bumo. Na bubine ketusakangapo kulwa na bwendeji bwa mushipiditu. Polo amba: “Kemukīkala kufītyija ku mutyima aye Mushipiditu Sandu wa Leza.” (Ef. 4:30) Bumo i kyabuleme kyotufwaninwe kulama. Buletelanga boba badi’mo nsangaji ne kutumbija Yehova. Nanshi, “mwikale bakulonda Leza bu-bāna bakuswedibwa. Munangile monka mu lusa.”—Ef. 5:1, 2.
Usa Kulondolola Namani?
• Le i ngikadilo’ka ishinsakanyanga bumo mu Bene Kidishitu?
• Lelo mwiendelejo wetu ubwanya kushinsakanya bumo mu kipwilo namani?
• Lelo muneneno wetu witukwashanga namani twingidile pamo na bakwetu?
[Bipangujo bya Kifundwa]
[Kifwatulo pa paje 20]
Bantu ba miswelo ne miswelo abaikala mu bumo
[Kifwatulo pa paje 23]
Le ubamone kyaka kidi mu kwiselembeja?