Kristian Inpumkhatna Chuan Pathian A Chawimawi
Kristian Inpumkhatna Chuan Pathian A Chawimawi
“Thlarau inpumkhatna chu vawng tûra bei . . . tûrin . . . ka ngên a che u.”—EPH. 4:1-3.
1. Engtin nge kum zabi khatnaa Ephesi khuaa Kristiante chuan Pathian an chawimawi?
HMAN lai Ephesi khuaa Kristian kohhran inpumkhatna chuan Pathian dik, Jehova chu a chawimawi a. Chu sumdâwnna khawpui hausa taka Kristian unau ṭhenkhat chu bâwih neitu hausa tak tak an nih laiin, mi dangte chu bâwih leh rethei tak takte niin an lang. (Eph. 6:5-9) Ṭhenkhat chu Juda mi an ni a, tirhkoh Paula’n an inkhâwmna ina thla thum chhûng châma thu a sawi laia thutak hria an ni a. Mi dangte chu tûn hmaa pathiannu Diani bia a, dawi hmang ṭhînte an ni. (Tirh. 19:8, 19, 26) Kristianna dik chuan mi chi hrang hrangte a hruai khâwm a ni tih a chiang hle. Paula chuan kohhran inpumkhatnain Pathian Jehova a chawimawi tih a hria a. “Kohhranho zârah chuan a hnênah chawimawina awm rawh se,” tiin a ziak a ni.—Eph. 3:21, New World Translation.
2. Engin nge Ephesi khuaa Kristiante inpumkhatna chu tiderthâwng?
2 Mahse, Ephesi kohhrana inpumkhatna duhawm tak chu tihderthâwn a ni a. Paula chuan upate chu heti hian a vaukhân a ni: “In zînga mi ngei pawh hi, zirtîrhote in hnêna pakaitîr tûrin thu hran sawi in lo la awm ang,” tiin. (Tirh. 20:30) Unau ṭhenkhat chuan Paula’n “âwih lo fate chhûnga thawk” tia a vuakhân, inṭhen hranna thlarau chu an la thlahthlam pumhlûm lo bawk a ni.—Eph. 2:2; 4:22.
Inpumkhatna Sawi Uartu Lehkha Thawn
3, 4. Engtin nge Ephesi mite hnêna Paula lehkha thawn chuan inpumkhatna a sawi uar?
3 Paula chuan Kristiante inrem taka awm chhunzawm zêl tûr chuan inpumkhatna awmtîr tûra theih tâwp an chhuah ṭheuh a ngai tih a hria a. Pathian thlarau chuan Paula chu Ephesi mite hnêna inpumkhatna sawi uartu lehkha thawn ziak tûrin a thâwk khum a ni. Entîr nân, Paula chuan Pathian thiltum—“engkim . . . Kristaa fâwk khâwm tûr”—chungchâng chu a ziak a. (Eph. 1:9, 10) Ani chuan Kristiante chu in atâna remkhâwm lung hrang hrangte nên a tehkhin bawk a ni. “Lung rem hrang ṭheuhte, rem taka chuktuahin, Lalpaah chuan biak in thianghlimah a chang zêl ṭhîn.” (Eph. 2:20, 21) Chu bâkah, Paula chuan Juda leh Jentail Kristiante inpumkhatna chu sawi uarin, an vaiin Pathian siam an nihzia a hrilh nawn bawk a ni; Pathian Jehova chu “Pa, lei leh vâna chhûngkaw tinrêng hming chawi chhana” tia kovin.—Eph. 3:5, 6, 14-19.
4 Ephesi bung 4-na kan bih chian hian, inpumkhatna nei tûra thawh rim a ṭûl chhan te, Pathian Jehova’n inpumkhat tûra min ṭanpui dân te, leh inpumkhata awm reng tûra min ṭanpui thei miziate chu kan hmu ang. Zirna chu i hlâwkpui lehzual theihna tûrin engvângin nge a bung pum pui chu i chhiar loh vang?
Inpumkhat Tûra Thawh Rim A Ngaih Chhan
5. Engvângin nge Pathian vântirhkohte chuan inpumkhata rawng an bâwl theih a; mahse, kan tân engvângin nge inpumkhata awm chu a harsat zual theih?
5 Paula chuan Ephesi khuaa a unaute chu “thlarau inpumkhatna chu vawng tûra bei” tûrin a ngên a. (Eph. 4:1-3) He mi chungchânga thawh rim a ṭûlzia hriatthiam nân, Pathian vântirhkohte chungchâng hi lo ngaihtuah ta ila. He leia nunna nei zîngah hian thil pahnih inang chiah chiah a awm lo va; chuvângin, Pathian Jehova chuan a vântirhkoh maktaduai tam takte chu inang vekin a siam lo vang tih a rinawm a ni. (Dan. 7:10) Chuti chung chuan, Pathian Jehova thu an ngaihthlâk avâng leh a duhzâwng an tih ṭheuh avângin inpumkhatin rawng an bâwl thei a ni. (Sâm 103:20, 21 chhiar rawh.) Vântirhkoh rinawmte’n mize hrang hrang an neih laiin, Kristiante chuan ṭhat famkim lohna chi hrang hrang an nei a. Chu chuan inpumkhata awm a tiharsa zual thei a ni.
6. Ṭhat famkim lohna dang nei unaute nêna hlim taka thawk tlâng thei tûrin eng miziate’n nge min ṭanpui ang?
6 Mihring ṭha famkim lote’n hna thawh tlân an tum hian, harsatna chu awlsam takin a chhuak ṭhîn. Entîr nân, unaupa zaidam tak hun vawng dik si lo leh hun vawng dik si a thinrim hma tak hian Pathian Jehova rawngbâwl dûn ta se, engtin nge ni ang? Anni chuan a pakhat zâwkin hmasâwnna tûr nei niin an hre ve ve mai thei a; mahse, mahni hmasâwn ngaihna lai chu an theihnghilh thei a ni. Engtin nge chutiang unau pahnih chuan lungrual taka rawng an bâwl dun theih ang? A dawta Paula sawi lan miziate hian anmahni a ṭanpui theih dân hi lo chhinchhiah ang che. Tichuan, chûng miziate neih chhohna hmanga inpumkhatna kan awmtîr theih dân chu ngaihtuah bawk ang che. Paula chuan: “Inngaihtlâwmna leh thuhnuairawlhna zawng zawng nei a, hmangaihnaa indawh tawn chunga dawhtheihna neia remna phuarnaah chuan thlarau inpumkhatna chu vawng tûra bei . . . tûrin . . . ka ngên a che u,” tiin a ziak a ni.—Eph. 4:1-3.
7. Engvângin nge mi ṭha famkim lo dangte nêna inpumkhata rawngbâwl tum chu thil pawimawh tak a nih?
7 Betu dik ho khat chauh a awm avângin, ṭha famkim lo mi dangte nêna inpumkhata Pathian rawngbâwl tlân dân zir chu a pawimawh hle. “A koh chhan che u beiseina hmunkhata koh in ni ang bawk khân taksa pakhat leh thlarau pakhat chauh a awm a; Lalpa pakhat, rinna hmunkhat, baptisma hmunkhat, engkim Pathian leh Pa pakhat chauh a awm a; ani chu engkim chungah a awm . . . a ni.” (Eph. 4:4-6) Pathian Jehova thlarau leh a malsâwmna chu a hman unau ho khat nên a inthlun zawm tlat a ni. Kohhrana tuemawin min tilung ni lo a nih pawhin, khawiah nge kan kal chuan ang? Hmun dang khawiah mah chatuan nunna thu hriat theihna kan nei lo.—Joh. 6:68.
‘Mihringte Hnêna Thil Pêkte’ Chuan Inpumkhatna An Awmtîr
8. Krista chuan inṭhen hranna do hneh tûra min ṭanpui tûrin eng nge a hman?
8 Paula chuan Isua’n kohhran inpumkhattîr tûra ‘mihringte hnêna thil pêkte’ a pêk dân hrilhfiah nân, hmân lai sipaite zînga an thiltih ṭhin dân chu a hmang a. Hnehna chang sipai chuan in lam sekrek khawihna kawnga a nupui ṭanpui tûrin ram dang mi a râl man chu a hruai haw a ni. (Sâm 68:1, 12, 18) Chutiang bawkin, Isua’n khawvêl a hnehna aṭangin rawngbâwl inhuam sal tam tak a man a ni. (Ephesi 4:7, 8 chhiar rawh.) Sal anga sawi theih chûng mite chu engtin nge a hman? “Rinna . . . kawngah chuan thu khat vua a, . . . kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân Krista taksa siam ṭha tûrin ṭhenkhatte chu tirhkoh atân te, ṭhenkhatte chu zâwlnei atân te, ṭhenkhatte chu chanchin ṭha hriltu atân te, ṭhenkhatte chu kohhran châwmtu leh zirtîrtu atân te a pe a.”—Eph. 4:11-13.
9. (a) Engtin nge ‘mihringte hnêna thil pêkte’ chuan kan inpumkhatna vawng tûra min ṭanpui? (b) Engvângin nge kohhrana mi tinte chuan inpumkhatna awmtîr tûrin an thawh ṭheuh vang?
9 Hmangaihna nei tak berâm vêngtu an nih angin, hêng ‘mihringte hnêna thil pêkte’ hian kan inpumkhatna vawng reng tûrin min ṭanpui a ni. Entîr nân, kohhran upa chuan unaupa pahnih chu an ‘incho tawn’ tih hre ta se, ‘thuhnuairawlh taka [anmahni] tungding leh’ tûra anni chu mi mal zilhna pein, kohhran inpumkhatna chu nasa takin a awmtîr thei a ni. (Gal. 5:26–6:1) Zirtîrtu an nih angin, hêng ‘mihringte hnêna thil pêkte’ hian Bible zirtîrna ṭanchhana kan rinna tinghet tûrin min ṭanpui a. Chutiang chuan inpumkhatna an awmtîr a, Kristian puitlin lam pan tûrin min ṭanpui a ni. Paula chuan “dik lohna ngamthlêmna angin, fing vervêka mihring bum chawpin, zirtîrna thli tinrênga lehlam lehlama vawrh leh len len naupang kan ni tawh lo” tiin a ziak a ni. (Eph. 4:14) Kan taksa pêng tinte chu a ṭûl ang anga an inṭanpui tawn ṭheuh angin, Kristian zawng zawngte chuan unaute zînga inpumkhatna awmtîr tûrin an thawk ṭheuh tûr a ni.—Ephesi 4:15, 16 chhiar rawh.
Rilru Put Hmang Thar Nei Rawh
10. Engtin nge nungchang bawlhhlawhna chuan kan inpumkhatna a tihderthâwn theih?
10 Ephesi mite hnêna Paula lehkha thawn bung li-na chuan hmangaihna nunpui chu Kristian puitlingte anga inpumkhatna neih theih dân bul ber a nihzia a târ lan hi i lo chhinchhiah em? A dawtah, hmangaihnaa thil telte chu a târ lang a ni. Entîr nân, hmangaihna kawng zawhna chuan inngaihna leh nungchang bawlhhlawhna a paih bo va. Paula chuan a unaute chu ‘Jentailte . . . awm anga awm’ lo tûrin a fuih a ni. Chûng mite chuan ‘inhriat chhuah theihna rêng rêng an nei lo va,’ anni chu “hurnaah an inpumpêk” a ni. (Eph. 4:17-19) Nungchang bawlhhlawhnaa khat kan chênna khawvêl hian kan inpumkhatna chu a tiderthâwng a. Mite chuan inngaihna chungchâng chu fiamthu thawh nân an hmang a, hlaahte an sa a, intihhlim nân an en a, a rûkin emaw, alang apauvin emaw an chîng bawk a ni. Mahse, inchhaiderna—neih tum si lova, tuemaw duh ang taka inlantîrna—mai pawh chuan Pathian Jehova leh a kohhran lak ata a hruai bo thei che a ni. Engvângin maw? Chu chuan awlsam taka inngaihna a thlen theih avângin. Chu bâkah, nupui pasal neite uirêtîr theitu inchhaiderna chuan nunrâwng takin naupangte chu nu leh pate hnên ata a la hrangin, nupate pawh a ṭhen thei a ni. Mite ṭhen hrangtu a va ni tak êm! Paula’n: “Nangni erawh chuan chutiangin Krista chu in zir lo ve,” tia a ziak pawh hi a mak lo ve!—Eph. 4:20, 21.
11. Bible chuan Kristiante chu eng ang inthlâkthlengna nei tûrin nge a fuih?
11 Paula chuan mi tichhe zâwng ngaihtuahna chu kalsan a, mi dangte nêna inrem taka min awmtîr thei miziate nei chho zâwk tûr kan nihzia a sawi uar a ni: “In hmân lai awm dân kawnga mihring hlui, bumna châkna anga chhe deuh deuh kha hlîp thla ula, in rilru thlarauvah chuan atharin lo awm ula, mihring thar, thutak felna leh thianghlimnaa Pathian anga siam khân inthuam bawk ula,” tiin. (Eph. 4:22-24) Engtin nge ‘kan rilru thlarauvah chuan athara kan awm’ theih ang? Pathian Thu leh Kristian puitlingte entawn tûr siam ṭha takte ngaihlu taka kan chhût a, kan thawh rim bawk chuan “Pathian anga siam” mihring thar chuan kan inthuam thei ang.
Ṭawng Dân Thar Hmang Rawh
12. Engtin nge thu dik sawi chuan inpumkhatna a awmtîr a, engvângin nge ṭhenkhat tân thu dik sawi chu a harsat?
12 Chhûngkua emaw, kohhran emawa inpêng tawnte tân thu dik an inhrilh tawn chu a pawimawh a. Tlang tak, inhawng tak, leh ngilnei taka thusawina chuan mite chu a hîp khâwm thei a ni. (Joh. 15:15) A nih leh, miin a unau hnênah dâwt hrilh ta se, engtin nge ni ang? A unauvin a hriat chhuah hun chuan, an inkâra awm inrin tawnna chu a kiam ngei ang. Chuvângin, Paula’n: “Mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a,” tia a ziah chhan hi i hre thiam thei a ni. (Eph. 4:25) A naupan lai aṭanga dâwt sawi chîng tân chuan thu dik han sawi ṭan chu a harsa mai thei a. Mahse, Pathian Jehova chuan a thawh rimna chu a hlutin, a ṭanpui ngei ang.
13. Sawichhiatna ṭawngkam ṭha lo tak bânsannaah chuan eng nge tel?
13 Pathian Jehova chuan kan ṭawng dân tûr chungchângah bituk chin siamin, kohhran leh in chhûng khura inzahna leh inpumkhatna awmtîr tûrin min zirtîr a ni: “Thu ṭha lo rêng in kâan chhuak suh se. . . . Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên,” tiin. (Eph. 4:29, 31) Mite tithinur zâwnga ṭawng kan pumpelh theih dân kawng khat chu mi dangte zah lehzualna rilru put hmang neih chhoh hi a ni. Entîr nân, ṭawngkam ṭha lo tak hmanga a nupui be ṭhîn mi chuan, a bîk takin Pathian Jehova’n hmeichhiate a chawimawi dân a hriat hnu chuan a nupui chunga a rilru put hmang chu thlâk a tum tûr a ni. Pathian Jehova chuan hmeichhe ṭhenkhat chu a thlarau thianghlima hriak thihin, Krista nêna lal anga rorêl theihna chanvo a pe hial si a. (Gal. 3:28; 1 Pet. 3:7) Chutiang bawkin, pasal ân khum chîng hmeichhia chuan tihthinura a awm laia Isua insûm tlat dân a hriat hnu chuan a inthlâk thleng tûr a ni.—1 Pet. 2:21-23.
14. Engvângin nge thinurna lan chhuahtîr chu a hlauhawm?
14 Sawichhiatna ṭawngkam ṭha lo tak leh thunun loh thinurna chu a inzawm hnaih hle a. He mizia pawh hian mite a ṭhen hrang thei bawk a ni. Thinurna chu kâng mei chhuak ang a ni a. Thunun theih loh a ni nghâl thuai thei a, chhiatna a thlen thei a ni. (Thuf. 29:22) A lungnih lohna lan chhuahtîr mai pawi ti lotu chuan inlaichînna hlu tak a tihchhiat loh nân a thinurna chu fîmkhur takin a thunun tûr a ni. Kristiante chuan inhuatna pai reng leh thinurna sawi chhuak leh ṭhîn lovin, ngaihdam peih tak ni tûrin ṭan an la tûr a ni. (Sâm 37:8; 103:8, 9; Thuf. 17:9) Paula chuan Ephesi mite chu: “Thinrim ula, sual erawh chu sual suh u; in thinur chu niin tlâkpui suh se; Diabola chu hmun kian hek suh u,” tiin thurâwn a pe a. (Eph. 4:26, 27) Miin a thinurna a thunun loh chuan, Diabola hnênah kohhrana inpumkhatna tihchhiat theihna leh innghirnghona awmtîr theihna hun remchâng a pe a ni ang.
15. Kan ta ni lo thil lâkna chuan eng nghawng nge a neih theih?
15 Mi dangte thil neih lâksak lohna chuan kohhranah inpumkhatna a awmtîr a. “Rûk hmang chuan ru tawh suh sela,” tiin kan chhiar a ni. (Eph. 4:28) Pathian Jehova mite zîngah chuan inrinna a awm tlângpui a. Kristian chuan a ta ni lo thil lain chu rinna chu hmang sual ta se, chu inpumkhatna hlimawm tak chu a tichhia ang.
Pathian Kan Hmangaihna Chuan Min Inpumkhattîr
16. Engtin nge kan inpumkhatna tihngheh nân mi tichak thei ṭawngkam kan hman theih?
16 Kristian kohhrana inpumkhatna a awm chhan chu Pathian kan hmangaihnain mi dangte hmangaih tûra min chêttîr ṭheuh vâng a ni. Pathian Jehova ngilneihna avânga kan lâwmna chuan he fuihna thu: “In kâan . . . a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân. . . . Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tih hi nunpui tûra theih tâwp chhuah tûrin min chêttîr a ni. (Eph. 4:29, 32) Pathian Jehova chuan keini ang mi ṭha famkim lote chu ngilnei takin a ngaidam ṭhîn a. Keini pawhin chutiang bawkin mi dangte ṭhat famkim lohna chu kan ngaidam ve tûr a ni lâwm ni?
17. Engvângin nge inpumkhatna awmtîr tûrin theih tâwp kan chhuah ang?
17 Pathian Jehova mite inpumkhatna chuan amah a chawimawi a. A thlarau chuan inpumkhatna awmtîr tûrin kawng hrang hrangin min chêttîr a ni. Chu thlarau min kaihhruaina do chu kan duh hauh lo vang. Paula chuan: “Pathian thlarau thianghlim chu tilungngai suh u,” tiin a ziak a ni. (Eph. 4:30) Kan inpumkhatna chu vênhim phu ro hlu tak a ni a. Chu chuan a neitu zawng zawngte hnênah hlimna a thlen a, Pathian Jehova a chawimawi bawk a ni. “Chutichuan a fa duh takte angin Pathian awm dân latute ni rawh u. . . . Hmangaihnaah awm rawh u.”—Eph. 5:1, 2. (w10-E 09/15)
Engtin Nge Kan Chhân Ang?
• Eng miziate’n nge Kristiante zîngah inpumkhatna awmtîr?
• Engtin nge kan nungchang chuan kohhranah inpumkhatna a awmtîr theih?
• Engtin nge kan ṭawngkam chuan mi dangte nêna inrem tûra min ṭanpui theih?
[Zirlai Atâna Zawhnate]
[Phêk 21-naa milem]
Mi chi hrang hrangte inpumkhatin an awm
[Phêk 22-naa milem]
Inchhaider hlauhawmzia i hre thiam em?