Burukuk eo an Dri Kristian ro Ej Kaibujuij Anij

‘Kate kom joñan wõt ami maroñ, bwe komin buru wõt juõn ilo kajur eo an Anij.’​—EP. 4:3, UBS.

1. Ewi wãwen an kar dri Kristian ro ilo Epesõs kaibujuij Anij?

 BURUKUK eo an congregation eo an dri Kristian ro ilo kar Epesõs ear kaibujuij Anij eo emol, Jeova. Ilo kar jikin kwelok in emweie, jet dri Kristian ro rar mweie im ear lõñ air dri korijer, im bar jet dri Kristian ro rar dri korijer im bwelen rar lukkun jeramel. (Ep. 6:​5, 9) Jet ian rein rar dri Ju ro im rar katak mol eo iomin aliñ ko jilu Paul ear katakin ir ilo imõn kwelok ko air. Im jet rekin kabuñ ñõn anij wan eo Artemis im anijnij. (Jerb. 19:​8, 19, 26) Elukkun alikar bwe kabuñ eo emol an dri Kristian ro ear kakuktok elõñ kain armij ro. Paul ear kile bwe burukuk eo an congregation in ear kaibujuij Jeova. Paul ear ba bwe ‘ñõn E aibujuij ilo congregation.’​—Ep. 3:​21.

2. Etke burukuk eo an dri Kristian ro ilo Epesõs ear ber ilo kauwatata?

² Bõtab, burukuk eo an dri Kristian ro ilo Epesõs ear ber ilo kauwatata. Paul ear kakkil elder ro: “Jet iami re naj jutõk, im konono men ko rankeke, bwe ren karel ro dri kalor ilokair.” (Jerb. 20:30) Bareinwõt, jet ian dri Kristian rein rar kwalok wõt lemnok in jibil jen dron, eo me Paul ear kakkil bwe ej “jerbal ilo ro dri kiblia.”​—Ep. 2:2; 4:​22.

 Juõn Letter Ej Kwalok kin Aurõkin Burukuk

3, 4. Ewi wãwen an Paul kwalok kin aurõkin burukuk ilo letter eo an ñõn dri Epesõs ro?

³ Paul ear kile bwe ñõn an dri Kristian ro wõnmanlok wõt im jerbal iben dron, kajjojo iair ej aikwij kate joñõn wõt an maroñ ñõn kõmõn bwe en or burukuk. Anij ear kakõrmol Paul ñõn je juõn letter ñõn dri Epesõs ro im kwalok kin aurõkin burukuk. Ñõn wanjoñok, Paul ear jeje kin karõk eo an Anij ñõn “kobaik men ko otemjej ilo Kraist.” (Ep. 1:​10) Ear kõkkar kin dri Kristian ro einwõt dreka ko im rej kajerbali ñõn kalek juõn im. Ear ba bwe emwij aintok ir im kalek ir einwõt “juõn tempel ekwojarjar ilo Iroij.” (Ep. 2:​20, 21) Kobalok iben men in, Paul ear kwalok bwe dri Kristian ro rej dri Ju im dri ailiñ ko rej aikwij burukuk iben dron, im ear bar kakememej ir bwe Anij ear kõmõnmõn ir aolep. Ear jitõñlok ñõn Jeova einwõt eo “Jemer, jen Eo nukin otemjej i lõñ im i lõl emwij naetair.”​—Ep. 3:​5, 6, 14, 15.

⁴ Ilo ar naj etale japter 4 ilo buk in Epesõs, jenaj lo unin ar aikwij kate kij ñõn kwalok burukuk, im wãwen Jeova ej jibõñ kij bwe jen burukuk. Bareinwõt, jenaj etale karkar ko jej aikwiji ñõn ar drebij wõt burukuk eo ar. Etke kwojjab riiti aolepen japter 4 bwe en laplok am bõk tokjen jen katak in?

Unin Ar Aikwij Kate Kij ñõn Buru Wõt Juõn

5. Etke enjel ro an Anij remaroñ jerbal iben dron ilo burukuk, ak etke ebin an armij ro kõmõne men in?

⁵ Paul ear rejañ dri Epesõs ro jein im jãtin bwe ren ‘kate ir joñan wõt air maroñ, bwe ren buru wõt juõn ilo kajur eo an Anij.’ (Ep. 4:3, UBS) Bwe jen melele kin unin ar aikwij kate kij ilo wãwen in, jen lale joñok eo an enjel ro an Anij. Ejelok menin kõmõnmõn ko an Anij ilo lõl in rej einwõt juõn, kin men in jemaroñ ba bwe Jeova ear kejerammõn kajjojo ian million enjel ro an bwe ren oktõk jen dron. (Rev. 5:​11) Bõtab, remaroñ burukuk ilo air jerbal ñõn Jeova kinke aolepeir rej roñjake im kõmõnmõn ankilan. (Riit Sam 103:20, 21.) Karkarin enjel ro retiljek reoktõk jen dron, ilo okõtõn eor an dri Kristian ro mõjino me reoktõk jen dron. Men in emaroñ kõmõn bwe en bin an dri Kristian ro burukuk iben dron.

6. Ta karkar ko remaroñ jibõñ kij bwe jen burukuk wõt iben ro jeer im jãter meñe eoktõk mõjino ko air jen kij?

⁶ Ñe armij ro rejjab wãppen rej kajeoñ in burukuk iben dron, ebiruru an walok abañ ko. Ñõn wanjoñok, ta eo emaroñ walok elañe juõn eman eo etã buruen bõtab emakijkij an rumij ñõn ien ej jerbal ñõn Jeova iben juõn eman eo emõkõj ñõn ien bõtab ejaje drebij an illu? Juõn emaroñ lemnok bwe  mõnit ko an eo juõn ejakkar, ilo an jab kile bwe e bareinwõt eor an mõjino. Ewi wãwen dri Kristian rein ruo remaroñ jerbal iben dron ilo burukuk? Jen lale ewi wãwen karkar kein Paul ej rejañ kij bwe jen kwaloki remaroñ jibõñ irro. Inem kalomõnlokjen kin wãwen jemaroñ kwalok burukuk ilo ar kadrek karkar kein. Paul ear je: ‘Ij akwelab ñõn kom bwe komin ettã im inemõn im kijenmij ien otemjej. Komin kwalok ami yokwe ilo ami jibañ dron. Komin kate kom joñan wõt ami maroñ, bwe komin buru wõt juõn ilo kajur eo an Anij, kin ainemmõn eo ej lukoj kom ibben dron.’​—Ep. 4:​1-3, UBS.

7. Etke eaurõk bwe jen kate kij jerbal ilo burukuk iben dri Kristian ro jet rejjab wãppen?

⁷ Elukkun aurõk bwe jen katak jerbal ñõn Jeova ilo burukuk iben armij ro rejjab wãppen, kinke dri kabuñ ro remol rej juõn wõt enbwin. ‘Juõn enbwin, im juõn Kajur, einwõt e bar emwij kir kom ilo juõn kejatrikrik in An kir kom: Juõn Iroij, juõn tõmak, juõn baptais, juõn Anij im Jemen otemjej.’ (Ep. 4:​4-6) Kajur eo an Jeova im kejerammõn ko jen e rej ber ilo rolul in jimjãn jimjãtin eo ibelakin lõl me Anij ej kajerbale. Meñe juõn ilo congregation eo emaroñ kaillu kij, ebar or ke jikin en jemaroñ bõk jibõñ jene? Ejelok bar jikin emaroñ katakin kij ñõn bõk mour indrio.​—Jon 6:​68.

Eman ro im Rej “Menin Letok” Rej Kõmõn Burukuk

8. Wõn ro Kraist ej kajerbale ir ñõn jibõñ kij bwe jen burukuk wõt?

⁸ Paul ear jitõñlok ñõn juõn mõnit me ekkã an dri tõrinae ro etto kõmõne ñõn kemelele kin wãwen an kar Jisõs letok man ro ñõn jibõñ bwe congregation eo en burukuk wõt. Juõn dri tõrinae eo ear anjo emaroñ bõktok juõn dri jebokwe bwe en jibõñ lio iben kin jerbal ko ilo mweo. (Sam 68:​1, 12, 18) Eindreinlok wõt, anjo eo an Jisõs ion lõl ear kõmõn bwe en lõñ an dri korijer ro remõnõnõ in jerbal ñõn e. (Riit Epesõs 4:​7, 8.) Ewi wãwen an kar Jisõs kajerbale dri korijer rein ilo kõkkar? “E ar letok jet bwe ren dri jilik; im jet, dri kanan; im jet, dri evanjel; im jet, [s̃eperd, NW] im dri kaki; Bwe En kowãppenlok ro remõn, kin jerbal in jibõñ, kin kalek enbwinin Kraist: Mae aruij tõbare juõn wõt tõmak.”​—Ep. 4:​11-​13.

9. (a) Ewi wãwen an elder ro jibõñ drebij burukuk eo ar? (b) Etke aolep ro uan congregation eo rej aikwij kõmõne ijo kwonair ñõn kõmõn bwe en or burukuk?

⁹ Einwõt s̃eperd ro reyokwe, eman rein rej jibõñ kij drebij wõt ar burukuk. Ñõn wanjoñok, elañe juõn elder ej kile bwe ruo jeer im  jãter man rej “kaillu dron,” emaroñ kõmõn bwe en or burukuk ilo an jijõt iben kajjojo iairro im lelok nan in kakabilek ko ñõn ‘kajime rein ilo inemõn.’ (Gal. 5:⁠26–​6:1) Einwõt dri katakin ro, eman rein rej jibõñ kij ñõn kakajurlok tõmak ko ar im rej berber ion katak ko jen Baibel. Ilo wãwen in, rej kõmõn bwe en or burukuk im jibõñ kij ñõn ebakelok wõt Jeova Anij. Paul ear ba bwe eaurõk men in kinke “jen jab ajiri, im jibliklik einwõt no ko, im makõtkit kin jabrewõt kõto in katak, ilo jela mon an armij, ilo etao eo ej tellok ñõn keien bwir.” (Ep. 4:​13, 14.) Aolep dri Kristian ro rej aikwij kõmõne ijo kwonair bwe en or burukuk, einwõt an aolep mõtõn ko ilo enbwiner jerbal iben dron.​—Riit Dri Epesõs 4:​15, 16.

Kadrek Karkar ko Remõn

10. Ewi wãwen mour etton emaroñ kokkure burukuk eo ar?

¹⁰ Kwoj ke kile bwe japter emen ilo letter eo an Paul ñõn dri Epesõs ro ej kwalok bwe yokwe ej ki eo ñõn an dri Kristian ro burukuk iben dron? Ej wõnmanlok wõt im kwalok kin lukkun melelen yokwe. Ñõn wanjoñok, elañe jej yokwe jeban lejen ak kõmõni mõnit ko rejakkar. Paul ear rejañ ro jein im jãtin bwe ren jab “mour einwõt ri pagan rõn,” kinke armij rein “ejjelok air jook ñõn jidrik” im “rej kõmmõni aoleb men ko rekajjõjõ.” (Ep. 4:​17-​19, UBS) Burukuk eo ar ej ber ilo kauwatata kinke jej mour ilo jukjuk im ber in enana. Armij ro rej kõmõn kejak kin mour etton, al kake, aluije ilo T.V, im kõmõne ilo ittino ak ilobwilij. Katoojoj ej mõnit eo me juõn ej kõmõne ñõn bar juõn einwõt ñe ekõnan mareiki ak ilo mol ejjab kõnan. Men in emaroñ kattolok armij eo jen Jeova im congregation eo. Etke? Kinke ebiruru an men in maroñ tellok juõn ñõn an mour etton. Bareinwõt, katoojoj emaroñ tellok juõn ñõn an lejen, im men in emaroñ kejibil dri belele ro im ajiri ro jen jemeir im jineir. Men in ejjab kwalok burukuk! Eñin unin dri jilik Paul ear ba: “E jab eindrein ami katak kin Kraist.”​—Ep. 4:​20, 21.

11. Ta oktõk eo Baibel ej rejañ dri Kristian ro ñõn kõmõne?

¹¹ Paul ear rejañ kij bwe jen jolok aolep lemnok ko rej kõmõn jibil, im kadrek karkar ko remaroñ kõmõn bwe jen mour iben dron ilo burukuk. Ear ba: “Innem komin utik mour eo ami mokta, eo kom kin mour kake, mour eo emor, eo ear jorrãn jen mõm ko an [armij eo mokta] renana. Buruõmi im lemnak ko ami ren lukkun kãl. Komin kõnak mour eo ekãl, eo kõmõnmõn ilo nememin Anij, im ej make walok ilo mour eo emol, eo ejimwe im erreo.” (Ep. 4:​22-​24, UBS) Ewi wãwen jemaroñ kõkãl ‘lemnak ko ar’? Elañe jej kalomõnlokjen im kamolol kin men ko jej katak jen Nan in Anij im joñok ko an dri Kristian ro elap iminene ko ibeir, ilo ar kate kij jemaroñ bõk karkar ko remõn, “eo kõmõnmõn ilo nememin Anij.”

Konono ilo Erreo im ilo Mol

12. Ewi wãwen konono ilo mol ej kõmõn bwe en or burukuk, im etke ebin iben jet ñõn konono ilo mol?

¹² Eaurõk bwe ro uan baamle im congregation ko ren konono wõt ilo mol. Konono ilo mol im joij ej kõmõn bwe armij ro ren ebake dron. (Jon 15:15) Ta elañe juõn ejjab mol ilo an konono ñõn eo jein im jãtin? Elañe eo jein im jãtin enaj kile men in, enaj driklok an liki armij eo. Eñin unin Paul ear  je: “Kin men in, ke emwij ami jolok riõp, komin konono mol, kom otemjej, ñõn dri turumi: bwe kij ran dron.” (Ep. 4:25) Juõn eo eminene in riõp, bwelen ear jino riõp ke ear drik, emaroñ bin ñõn an jino konono ilo mol. Bõtab, elañe ej kate e ñõn kõmõn oktõk, Jeova enaj jibõñ e.

13. Ta eo juõn ej aikwij kõmõne ñõn bwijrõk jen an konono ilo erro?

¹³ Jeova ej katakin kij bwe jen kwalok burukuk im koutiej ilo baamle im congregation ko ilo ar lukkun lemnok mokta jen ar kennan. “Ejelok nan etton en waloktok jen loñimi. . . . En joko jen kom meo otemjej, im libõpne, im illu, im airwaro, im konono nae, kab kakitõtõ otemjej.” (Ep. 4:​29, 31) Juõn wãwen jemaroñ kejbãrok bwe jen jab kwalok nan ko rerro ej ilo ar kalaplok ar koutiej ro jet. Ñõn wanjoñok, juõn eman eo erro an konono ñõn lio belen ej aikwij ukot wãwen an kõmõn ñõn lio belen, elaptata elañe ej katak bwe Jeova ej koutiej kõra ro. Ikijen kajur eo an, Anij ear kãlet jet kõra ro, im lelok ñõn ir kejatrikrik eo ñõn iroij ilõñ iben Kraist. (Gal. 3:​28; 1 Pit. 3:7) Eindreinlok wõt, juõn kõra eo ekkã an buroñe leo belen ej aikwij kõmõn oktõk ko ilo an katak kin wãwen an kar Jisõs emakõt ke rar kaillu e.​—1 Pit. 2:​21-​23.

14. Etke ekauwatata elañe jej kwalok ar illu?

¹⁴ Konono ilo erro ej einlok wõt jaje drebij ar illu, kinke men in bareinwõt emaroñ kejibil armij ro jen dron. Illu ej einwõt juõn kijeek. Ebiruru an mõñãñe im kõmõn elap jorran. (Ken. 29:22) Juõn eo eor unin an kwalok an inebata kin juõn men ear walok ej aikwij drebij an illu bwe en bõprae an jorran kõtan eo an iben ro jet. Dri Kristian ro rej aikwij jeorlok an dron bwir, jab drebij wõt air illu im jab bar bõkliñtak men ko remotlok. (Sam 37:8; 103:​8, 9; Ken. 17:9) Paul ear rejañ dri Epesõs ro: “Komin illu im jab jerawiwi: al en jab tulok ion ami illu; Im komin jab najikin devil eo.” (Ep. 4:26, 27) Elañe juõn ejjab drebij an illu, enaj birurulok an Devil eo kõmõn bwe en or bwoktak ak jibil ilo congregation eo.

15. Ta eo emaroñ walok elañe juõn ej bõk men ko rejjab mweien?

¹⁵ Enaj laplok burukuk ilo congregation eo elañe jej kaurõk men ko mweien ro jet. Baibel eo ej ba: “Eo e ar kwot en jab bar kwot.” (Ep. 4:28) Armij ro dron Jeova elap air liki dron. Elañe juõn dri Kristian ej bõke men ko rejjab mweien, ro jet reban liki e im enaj kokkure burukuk eo an dri Kristian ro.

Yokwe Anij Ej Kaburukuk Kij

16. Ewi wãwen jemaroñ kajerbal nan ko rekõkãtõk ñõn kakajurlok burukuk eo ar?

¹⁶ Yokwe Anij ej kamakõt kij ñõn kwalok yokwe ñõn ro jet, im men in ej kõmõn bwe en or burukuk ilo congregation eo. Elap ar kamolol Anij kin joij eo an, im men in ej kamakõt kij ñõn kate kij joñõn wõt ar maroñ ñõn jerbale nan in kakabilek in: “[Kajerbal wõt nan] emõn im nan in kalek ekar ñõn aikwij, bwe en lelok joij ñõn eo ej roñjake. Im komin joij ñõn dron, en emõn buruemi, jolok nana jen dron, einwõt Anij ilo Kraist E ar jolok ami nana.” (Ep. 4:29, 32) Jeova ej mõnõnõ in jeorlok bwir ko ar meñe jejjab wãppen. Men in en kar jab ke kamakõt kij ñõn jolok an ro jet bwir?

17. Etke jej aikwij kate kij joñõn wõt ar maroñ ñõn kwalok burukuk?

¹⁷ Burukuk eo an dri Kristian ro ej kaibujuij Jeova. Kajur eo an ej kamakõt kij ilo elõñ wãwen ñõn kwalok burukuk. Jejjab kõnan bõprae an kajur eo an Anij tel kij. Paul ear ba bwe jen ‘jab kaburomõj kajur eo an Anij.’ (Ep. 4:​30) Burukuk ej juõn men eaurõk im jej aikwij kejbãroke. Ej bõktok lõñliñ ñõn armij ro im aibujuij ñõn Jeova. Kin men in jen “kajeoñwe Anij, einwõt ajiri re jitenburu; Im etetal ilo yokwe.”​—Ep. 5:​1, 2.

Ewi Wãwen Kwonaj Uak?

• Ta karkar ko rej kõmõn bwe en or burukuk ibwiljin dri Kristian ro?

• Ewi wãwen kõmõn ko ar remaroñ kõmõn bwe en or burukuk ilo congregation eo?

• Ewi wãwen ar konono emaroñ jibõñ kij ilo ar burukuk iben ro jet?

[Kajitõk ko ñan katak]

[Pija ilo peij 17]

Armij ro jen ailiñ otemjej rej burukuk

[Pija ilo peij 18]

Kwojela ke kin kauwatata ko kin katoojoj?