Kiris-nebã sẽn zemsd taabã waoogda Wẽnnaam
Kiris-nebã sẽn zemsd taabã waoogda Wẽnnaam
“Bɩ y mao tɩ [y] fãa sak sɩɩg sõngo.”—EF. 4:3.
1. Wãn to la pipi kiris-neb nins sẽn da be Efɛɛzã ra kõt Wẽnnaam waoogre?
PĨND wẽndẽ Efɛɛz kiris-nebã sẽn da zemsd taabã, ra waoogda Wẽnnaam a Zeova. Tẽn-kãng sẽn da yaa leebg zĩig t’a neb wʋsg me ra tar ligdã pʋgẽ, tõe tɩ kiris-neb kẽer da tara arzɛk la yembse, tɩ kẽer ra yaa yembse, la naong rãmba. (Ef. 6:5, 9) Kẽer da yaa Zʋɩf rãmb sẽn sak sɩdã, wakat ning tʋm-tʋmd a Poll sẽn wa n dɩk kiuug a tã n da kẽnd n sõsd ne-b b karen-doogẽ wã. Kẽer ra pʋʋsda wẽn-poak a Artemis la b ra bʋgd bagre. (Tʋʋ. 19:8, 19, 26) Dẽnd Kirist tũudmã kɩtame tɩ neb buud toor-toor zems taaba. A Poll bãngame tɩ tigingã neb sẽn zemsd taabã kõta a Zeova waoogre. Rẽ n so t’a yeel tɩ bɩ Wẽnnaam “paam waoogr a Zezi tẽedbã nengẽ” wã.—Ef. 3:21.
2. Bõe n da rat n sãam zems-n-taar ning Efɛɛz tigingã neb sẽn da tarã?
2 La zems-n-taar ning Efɛɛz tigingã neb sẽn da tarã wa n dat n sãamame. A Poll ra keooga kãsem dãmbã woto: “Neb na n yika yãmb sʋk n zãms nebã sẽn ka sɩda, n belg karen-biisã tɩ b tũ bãmba.” (Tʋʋ. 20:30) Sẽn paase, saam-biis kẽer ra pa bas yam-tagsa nins sẽn wat ne welgrã fasɩ ye. Yaa yam-tags kãens la a Poll sẽn yeel tɩ ‘tʋmda zãgsdbã fãa pʋsẽ wã.’—Ef. 2:2; 4:22.
Lɛtr sẽn gomd zems-n-taar yelle
3, 4. Wãn to la lɛtr ning a Poll sẽn tool Efɛɛz kiris-nebã gomd zems-n-taarã yelle?
3 A Poll ra miime tɩ sẽn na yɩl tɩ kiris-nebã naagd taab n tʋmdẽ, b ned kam fãa segd n modgame tɩ zems-n-taar zĩnd b sʋka. Wẽnnaam vẽnega a Poll t’a gʋls lɛtr sẽn gomd zems-n-taar yell n tool Efɛɛz kiris-nebã. Wala makre, a Poll yeelame tɩ Wẽnnaam sẽn dat yaa a tigim ‘bũmb fãa sẽn be yĩngr la sẽn be dũniyã tɩ b sak Kiristã.’ (Ef. 1:10) A leb n maka kiris-nebã ne kug toor-toor b sẽn tall n me roogo. A yeela woto: ‘Roogã bũmb fãa sẽn tongd taab sõma ne meebã lebgda ro-sõng Zusoabã yĩnga.’ (Ef. 2:20, 21) Sẽn paase, a Poll goma Zʋɩf rãmb la bʋ-zemsã neb nins sẽn lebg kiris-nebã zems-n-taarã yelle, la a tẽeg saam-biisã tɩ yaa Wẽnnaam n naan b fãa. A goma a Zeova yell me, n bool-a tɩ Ba ning “yĩngr bũmb fãa la dũniyã bũmb fãa sẽn paamd bãmb yʋy a soab nengẽ wã.”—Ef. 3:5, 6, 14, 15.
4 D na n goma Efɛɛz rãmb sak a 4 yelle. Rẽ na n sõng-d lame tɩ d bãng bũmb ning sẽn kɩt tɩ yɩl n tõog n zems taabã baood modgre. Leb n na n sõnga tõnd tɩ d bãng a Zeova sẽn sõngd-d to-to tɩ d zemsd taabã, la zʋg-sõma nins sẽn tõe n sõng-d tɩ d kell n zemsd taabã. Sẽn na yɩl n wʋm zãmsgã võor sõma, y tõe n deng n karma sakã tõre.
Bõe yĩng tɩ tõog n zems taabã baood modgre?
5. Bõe yĩng tɩ malɛgsã tõogd n zemsd taaba, la bõe yĩng tɩ mi n yaa toog tɩ d tõog n zems taaba?
5 A Poll kosa Efɛɛz saam-biisã tɩ b fãa “mao n sak sɩɩg sõngo.” (Ef. 4:3) Sẽn na yɩl n wʋm bũmb ning sẽn kɩt tɩ woto baood modgrã võore, d tẽeg Wẽnnaam malɛgsã sẽn maand bũmb ninga. Sẽn mik tɩ tẽngã zugu, bõn-vɩɩsã fãa yaa toor-toorã yĩnga, d tõe n yeelame t’a Zeova naana malɛgs milyõ rãmbã me tɩ b yaa toor-toore. (Dan. 7:10) Baasgo, b tõogd n zemsda taab n maand a raabã, b sẽn kelgd-a la b tũud a noyã yĩngã. (Karm-y Yɩɩl Sõamyã 103:20, 21.) Malɛgs nins sẽn yaa sakdbã tara zʋg-sõma toɛy-toɛya, tɩ kiris-nebã yẽ ned kam fãa tar a pãn-komsem. Woto kɩtame tɩ mi n yaa toog tɩ b tõog n zems taaba.
6. D ned kam fãa sẽn tar a pãn-komsmã yĩnga, zʋg-sõma bʋs n tõe n sõng tɩ zems-n-taar zĩnd tõnd ne d saam-biisã sʋka?
6 Ninsaalb sẽn pa zems zãng sã n wa naag taab n na n maan bũmbu, b moorã tõe n yõsga taab nana-nana. D rɩk makre. Saam-biig sẽn yaa sũ-bʋgsem soab n yaool n yaa maasg sã n wa rat n naag saam-biig sẽn tʋʋl t’a sũurã yaool n yikd tao-tao n tʋme, na n yɩɩ wãna? B ned kam fãa tõe n tagsdame t’a to wã segd n demsa yɛl kẽer a manesmã pʋgẽ, n yaool n yĩm tɩ yẽ me segd n demsa yɛl kẽere. Wãn to la saam-bi-kãensã tõe n naag taab n tʋme? Ges-y a Poll goam nins sẽn pʋgdã sẽn tõe n sõng-b to-to. Rẽ poor bɩ y tags n ges zʋg-sõma kãens tallg sẽn tõe n sõng tõnd to-to tɩ zems-n-taar zĩnd d sʋka. A Poll yeela woto: “Mam kota yãmb tɩ y kẽn wa sẽn zems . . . ne sik-m-menga, la sũ-bʋgsem, la ne sũ-mare, la y sak taab ne nonglem. La bɩ y mao tɩ [y] fãa sak sɩɩg sõng ratem tɩ laafɩ zĩndi.”—Ef. 4:1-3.
7. Bõe yĩng tɩ yaa tɩlae tɩ d mao tɩ zems-n-taar zĩnd tõnd ne d saam-biisã sʋka, baa d fãa sẽn yaa koangdbã?
7 Tara yõod wʋsg tɩ d mao sẽn na yɩl n tõog n naagd neb sẽn yaa koangdbã wa tõnd n maand a Zeova raabã, bala yaa sul-yɛng bal neb n waoogd Wẽnnaam ne sɩda. A Poll yeela woto: “Yĩng a yembr bala la sɩɩg sõng a yembr bal n be, a wa b sẽn bool yãmb me tɩ y paam tẽeb a yembr bal ne yãmb boolgã. Zusoab a yembr bala, la tẽeb a yembr bala, la lisg a yembr bal n be. Wẽnnaam a yembr bal n be sẽn yaa fãa Ba.” (Ef. 4:4-6) Yaa siglg a ye bal la a Zeova tũnugd ne n ningd a nin-buiidã bark la a kõt-b a vʋʋsem sõngã. Woto yĩnga, baa tigingã ned sã n wa maan bũmb tɩ yik d sũuri, d na n tũnuga ne rẽ n bas siglgã sɩda? Zĩig a to ka be d sẽn tõe n tɩ paam vɩɩm sẽn ka sɛt goam n kelg ye.—Zã 6:68.
Neb sẽn sõngd tɩ d zems-n-taarã pãng paasdẽ
8. Bõe la Kiristã maan sẽn na yɩl n sõng tɩ d ra welg taaba?
8 A Poll tika bũmb a yembr pĩnd wẽndẽ sodaasã sẽn da wae n maandẽ zugu, n wilg a Zezi sẽn maan to-to n kõ “kũun sẽn yaa neba,” sẽn na yɩl tɩ zems-n-taar zĩnd tigingã neb sʋka. Sodaag sã n da tɩ tõog zabre, a tõe n yõgã neb tɩ b wa yɩ a yembse, n sõngd a pagã n tʋmdẽ. (Yɩɩl 68:1, 12, 18, NW ) A Zezi me sẽn tõog dũniyã, kɩtame t’a paam neb wʋsg sẽn kõ b mens ne yamleoog n lebg a yembse. A Poll yeela woto: “Masã, b maana tõnd ned kam fãa lohorem tɩ zems ne kũun ning Kirist sẽn mak n kõ-d zaalmã. Woto yĩnga, a yeelame: ‘A zẽkrã wakate, a wʋka yembse, la a kõo kũun sẽn yaa neba.’ ” (Ef. 4:7, 8, NW ) La tʋʋm-bʋs la a kõ yemb-kãensã? A “kõo kẽer tɩ yɩ tʋm-tʋmdba, la kẽer bãmb no-rɛɛsdba, la kẽer koe-moondba, la kẽer pe-kɩɩmba, la kẽer karen-saam dãmba, Wẽnnaam nebã bɩɩb yĩnga, la Wẽnnaam tʋʋmdã yĩnga, la Kirist yĩngã sõngr yĩnga, hal tɩ tõnd fãa paam tẽeb a yembre.”—Ef. 4:11-13.
9. a) Wãn to la “kũun sẽn yaa nebã” sõngd tõnd tɩ d zemsd taaba? b) Bõe yĩng tɩ tigingã ned kam fãa segd n sõng tɩ zems-n-taar zĩndi?
9 Nin-kãensã sẽn yaa pe-kɩɩmb sẽn nong tõndã sõngd-d lame tɩ d zemsd taaba. Wala makre, tigingã kãsem soab sã n wa yã tɩ saam-biis a yiib maanda “sũ-kiir ne taaba,” a tõe n bool-b lame n ‘sagl-b ne sũ-maasem,’ sẽn na yɩl n wilg t’a ratame tɩ tigingã neb zemsd taaba. (Gal. 5:26–6:1) Nin-kãensã sẽn yaa karen-saam dãmb me wã sõngda tõnd tɩ d wʋmd Biiblã goam võore, tɩ kɩt tɩ d tẽebã pãng paasdẽ. Dẽnd b kɩtdame tɩ d zemsd taaba, la b sõngd tõnd tɩ d bɩɩsd d tẽebã. A Poll yeelame tɩ woto yaa sẽn na yɩl tɩ tõnd ra “leb n yɩ wa kamb sẽn ka yam sẽn sakd kareng buud toor-toor wa sobg sẽn dɩkd bũmbu, la nebã belgre, la b sɩlem wẽngã b sẽn baood weer tɩ belg nebã ye.” (Ef. 4:13, 14) Kiris-ned fãa segd n sõngame tɩ zems-n-taar zĩnd d sʋk wa ninsaal yĩngã wil toor-toorã sẽn tʋmd n sõngd tɩ yĩngã tõr bɩtẽ wã.—Karm-y Efɛɛz rãmb 4:15, 16.
D bao zʋg-sõma
10. Wãn to la manesem wẽnsã tõe n sãam d zems-n-taarã?
10 Y sã n gũus n gese, y mikdame tɩ Efɛɛz rãmb sak a naasã wilgdame tɩ sẽn na yɩl tɩ kiris-nebã tõog n zems taabã, yaa tɩlae tɩ b nong taaba. Rẽ poore, a wilga nonglem sẽn baood tɩ d maan bũmb ninsã. Wala makre, a wilgame tɩ nonglem segd n kɩtame tɩ d zãag d meng ne yoobo, la ne yel-manesem a taab sẽn yaa wẽnse. A Poll sagla a tẽed-n-taasã tɩ b “ra le kẽn wa neb sẽn ka pʋʋsd Wẽnnaam sẽn kẽndã,” bala “wẽng fãa sẽn ka le sãamd bãmb sũyã, bãmb sakame n kẽ raglem yembdo.” (Ef. 4:17-19) D sẽn vɩ ne neb sẽn nong yoobã yĩnga, tõe n yɩɩ toog tɩ d modg n zemsd taaba. Nebã goam la b yɩɩl pʋsẽ, b rɩka yoobã n maan reem bũmbu. B wae n geta filim la foto rãmb sẽn wilgd yoob yɛla. Kẽer solgd n yoodame, tɩ sãnda pʋd n yood vẽeneg-vẽenega. Baa y sã n tar rolsem manesem ne ned a to, rat n yeel tɩ y maanda wa y rata a soabã n yaool n miẽ tɩ y pa rat n kẽ kãadem ne-a, tõe n wa kɩtame tɩ y bas a Zeova la a tigingã. Bõe yĩnga? Bala tõe n kɩtame tɩ y yo. Baa ned sẽn kẽ kãadem sã n maand woto, tõe n wa kɩtame t’a yo, tɩ rẽ me tõe n kao b kãadmã tɩ nams ned ning sẽn pa yo-a wã, la nams b kambã me. Ad yoob sɩd wata ne welgre! Dẽnd a Poll bee bʋʋm la a sẽn tẽeg tõnd tɩ d “ka paam Kirist zãmsg woto” wã.—Ef. 4:20, 21.
11. Toeen-bʋg la Biiblã sagend kiris-nebã tɩ b maane?
11 A Poll leb n wilgame tɩ d segd n basa tagsa nins fãa sẽn tõe n sãam d zems-n-taarã, la d bao zʋg-sõma sẽn tõe n sõng-d tɩ d zems ne d taabã. A sagla kiris-nebã n yeel-b tɩ b bas b “pĩnd tʋʋmã sẽn yaa nin-kʋdgã rẽndã sẽn sãamd [bãmb] ne a ratem wẽngã fãa sẽn yaa belgrã, . . . la tɩ [b] paam tagsg manegre, n yeelg nin-paalgã Wẽnnaam sẽn naan wa bãmb wẽnegã ne tɩrlem la pʋ-peelem sẽn wat ne sɩda.” (Ef. 4:22-24) Wãn to la d tõe n modg n ‘paam tɩ d tagsgã manege’? D sã n bʋgsd bũmb nins d sẽn karemd Wẽnnaam Gomdã pʋgẽ wã zug neere, la d modgd n dɩkd kiris-neb nins sẽn bɩ tẽebã pʋgẽ wã mak-sõngo, d na n tõog n yeelga nin-paalgã “Wẽnnaam sẽn naan wa bãmb wẽnegã.”
D modgdẽ tɩ d goamã yaa sõma
12. D sã n togsd sɩda, wãn to la rẽ tõe n kɩt tɩ d zemsd taaba, la bõe yĩng tɩ yaa toog ne neb kẽer tɩ b togsd sɩda?
12 Zakã pʋgẽ wall tigingã pʋgẽ, tara yõod wʋsg tɩ d togsd taab sɩda. Neb sã n pelgd b pʋs n gomd ne taaba, la b gomd ne waoogre, b zems-n-taarã pãng paasdame. (Zã 15:15) La ned sã n yag a zakã ned bɩ tigingã ned ziri yẽ? A to wã sã n wa bãng tɩ yaa ziri la a sẽn yag-a wã, a pa na n le kɩs sɩd ne-a ye. Dẽnd y wʋmda a Poll sẽn yeel tɩ “ned kam fãa togs sɩd ne a yaka; tɩ bõe, tõnd fãa yaa yĩng a yembr wil ne taabã” võore. (Ef. 4:25) Ned sã n minim n yagd ziri, tõe meng t’a sɩnga rẽ t’a paooda, tõe n yɩɩ toog t’a bas ziri yagb la a togsd sɩda. La a sã n modgd n dat n toeeme, a Zeova sũur na n yɩɩ noog ne-a, la a na n sõng-a lame.
13. Sẽn na yɩl n da tall goam sẽn pa sõma baoodame tɩ d maan bõe?
13 A Zeova zãmsda tõnd d sẽn segd n gom to-to ne d zakã rãmba, la ne tigingã neb sẽn na yɩl tɩ d waoogd taab la d zemsd taaba. Wala makre, a yeela woto: “Da sak-y tɩ goam sẽn ka sõma yi yãmb noorẽ ye; . . . Bɩ y bas sũ-toog ne kisgri, la sũ-yikri, la no-koɛɛma, la kãnegre, la pʋ-toog fãa.” (Ef. 4:29, 31) Bũmb a ye d sẽn tõe n maan tɩ sõng-d tɩ d ra wa gomd n paoogd d taabã yaa d sẽn na n tall waoogr manesem ne-ba. Wala makre, rao sã n wae n gomd n paoogd a pagã, a segd n modg n toeemame. Bũmb sẽn na n sõng-a n yɩɩd yaa a sẽn na n tagsd a Zeova sẽn waoogd pagbã to-to wã yelle. Wẽnnaam pʋd n zaeya pagb kẽer ne a vʋʋsem sõngã tɩ b saagd n na n tɩ naag Kiristã n dɩ naam. (Gal. 3:28; 1 Pɩɛ. 3:7) Pag me sã n wae n tãsd a sɩda, a sã n maag a yĩng n ges a Zezi sẽn da yõkd a meng to-to b sã n da mi n maan bũmb sẽn tõe n yik a sũurã, na n sõng-a lame t’a bao n toeeme.—1 Pɩɛ. 2:21-23.
14. Bõe yĩng tɩ ned sũur sã n yik t’a pa tõog-a bɩ tõe n wa ne yelle?
14 Ned sũur sã n yik t’a pa tõog a menga, tõe n kɩtame t’a gom goam sẽn pa sõma. Woto me tõe n kɩtame tɩ neb welg taaba. D tõe n dɩka sũ-yikr n mak ne bugum. F sã n pa tõog-a, a tõe n sãama bũmb wʋsg zĩig pʋgẽ. (Yel. 29:22) Ned sũur sẽn sãam sã n wa togsd a tagsgo, baa sã n mikame t’a tara bʋʋm, a segd n modg n tõoga a sũ-yikrã, sẽn na yɩl n da wa sãam b zems-n-taarã ye. Kiris-nebã segd n modgdame n kõt taab sugri. B pa segd n talld sũ-kẽk ne taaba, wall b ket n gomd bũmb ning sẽn kɩt tɩ b moorã yõsg taabã yell ye. (Yɩɩl 37:8; 103:8, 9; Yel. 17:9) A Poll sagla Efɛɛz nebã, n yeel woto: “Yãmb sũyã sã n yiki, bɩ y ra maan yel-wẽnd ye, la y ra sak tɩ wĩndg lʋɩ tɩ yãmb sũyã ket n ka sig ye. La bɩ y ra kõ Sʋɩtãanã weer ye.” (Ef. 4:26, 27) Ned sũur sã n yik t’a pa tõog a menga, a Sʋɩtãan tõe n tũnuga ne rẽ n welg tigingã neba, wall a kɩt meng tɩ b zab taaba.
15. D sã n dɩk bũmb d sẽn pa so, yel-bʋg la rẽ tõe n wa ne?
15 D sã n pa rɩkd d to bũmb la d gũusd sẽn na yɩl n da wa sãam d to bũmbu, na n kɩtame tɩ zems-n-taar zĩnd tigingã pʋgẽ. Biiblã yeta woto: “Ned ning sẽn da zuuda, bɩ a ra le zu ye.” (Ef. 4:28) Bas-yard bee a Zeova nin-buiidã sʋka. La kiris-ned sã n dɩk bũmb a sẽn pa so, na n sãama bas-yard la zems-n-taar ning sẽn be d sʋkã.
D sẽn nong Wẽnnaamã kɩtdame tɩ d zemsd taaba
16. Wãn to la d tõe n gomd goam sẽn kengd d taabã raoodã, tɩ paasd d zems-n-taarã pãnga?
16 Bũmb ning sẽn kɩt tɩ kiris-nebã zemsd taab tigingã pʋgẽ wã yaa b sẽn nong Wẽnnaam tɩ kɩt tɩ b nong b taabã. D sã n tar mi-beoog ne a Zeova, a sẽn maand d neerã yĩngã, na n kɩtame tɩ d modgd n tũud saglg a Poll sẽn kõ. A yeela woto: “Bɩ y gom sẽn yaa sõma sõngr yĩnga, t’a zĩnd bark neb nins fãa sẽn wʋmdã yĩnga. . . . Bɩ yãmb maan taab neere, la paam sũ-bʋgsem, la kõ taab sugri, wa Wẽnnaam sẽn kõ yãmb sugr Kirist yĩngã.” (Ef. 4:29, 32) A Zeova maanda neere, n kõt tõnd sẽn yaa koangdbã sugri. Rẽ yĩnga tõnd taabã me sã n wa maan sẽn yaa kɛgre, d pa segd n sak n kõ-b sugri, d sẽn mi tɩ b yaa koangdbã yĩng sɩda?
17. Bõe yĩng tɩ d segd n modg tɩ zems-n-taar zĩnd d sʋka?
17 A Zeova nin-buiidã sẽn zemsd taabã waoogda a Zeova. A kõta tõnd a vʋʋsem sõngã tɩ sõngd tõnd ne manesem buud toor-toor tɩ d zemsd taaba. Yaa vẽeneg tɩ d pa rat n kɩɩs Wẽnnaam vʋʋsem sõngã sor-wilgrã ye. A Poll yeela woto: “Bɩ y ra beeg Wẽnnaam sɩɩg sõngã ye.” (Ef. 4:30) D zems-n-taarã tara yõod wʋsgo, n segd ne koglgo. A kõta tõnd sũ-noog la a waoogd a Zeova. A Poll yeelame: “Woto yĩnga, bɩ yãmb yɩ Wẽnnaam togs-n-taas wa kom-nongdse, la y kẽn ne nonglem.”—Ef. 5:1, 2.
Y na n leokame tɩ bõe?
• Zʋg-sõma bʋs n kɩtd tɩ kiris-nebã zemsd taaba?
• Wãn to la d manesmã tõe n kɩt tɩ zems-n-taar zĩnd tigingã pʋgẽ?
• Wãn to la d no-goamã tõe n sõng tõnd tɩ d zemsd taab n tʋmdẽ?
[Zãmsgã sogsgã]
[Foto, seb-neng 20]
Neb buud toor-toor tõog n zemsa taaba
[Foto, seb-neng 23]
Yãmb mii rolsem manesmã sẽn tõe n wa ne yɛl ninsã bɩ?