A Kltarreng er a Rekristiano a Kobkellii a Dios
A Kltarreng er a Rekristiano a Kobkellii a Dios
“Bo le blak a rengmiu loba [kltarreng.]”—EFESUS 4:3.
1. A Rekristiano er a Efesus er a kot el dart el rak, te milekerang e kobkellii a Dios?
A KLTARRENG er a Rekristiano er a ongdibel er a Efesus a milengebkall er a mera el Dios el Jehovah. Ngar er a chelsel sel merau el beluu el klou a siobai er ngii, e a rebebil el Kristiano a mle meteet e betok a remesiungir, e a rekuk bebil a mle sibai e dirrek el kmal mle chebuul. (Efesus 6:5, 9) A rebebil a mle Rechijudea el silubii a klemerang er a chelsel aike el edei el buil el apostol el Paulus a ullisechakl er a blil a ongdibel er tir. A rebebil a kuk milengull er a chelid el Artemis e dirrek el mirruul a tekoi er a olai. (Rellir 19:8, 19, 26) Me ngbleketakl el kmo a mera el Klekristiano a oldak er a rechad el tir a kakerous a blekerdelel a klengar er tir. A Paulus a mle medengei el kmo a Jehovah a mukebkall el okiu a kltarreng er a ongdibel. Me ngii el apostol a milluches el kmo: “Ma klebkall le bo” er a Dios el okiu a ongdibel.—Efesus 3:21.
2. A Rekristiano er a Efesus te mlo ocherur a ngera el tellemall el kirel a kltarreng?
2 Me nguaisei, sel kltarreng er a ongdibel er a Efesus a mlo ocherur a tellemall. Misei a uchul me a Paulus a milengelechel er a remechuodel er a ongdibel el kmo: “Ma dirrek el mo duubech ra delongeliu ar chad el mengedecheduch a chebirukel tekoi, el mengurs rar Ubengkel a Jesus el mor tir.” (Rellir 20:30) Me a rebebil er a rudam a dirk millemolem er a klekakeakl er a delongelir el Paulus a ulemeklatk el kirir el kmo, te rudam el oba “reng el oureor er chelechang ra chelsir ar ngalek er chorrengesmengoit.”—Efesus 2:2; 4:22.
A Babier el Melisiich er a Kltarreng
3, 4. A babilengel a Paulus el mo er a Rekristiano er a Efesus ngmilekerang a lolisiich er a kltarreng?
3 A Paulus a mle medengei el kmo a Rekristiano a mo sebechir el dmak el oureor a lsekum a derta er tir a mo blak a rengrir el melisiich er a kltarreng. A Dios a ulemekrael er a Paulus el mo meluches er a babier el mo er a Rekristiano er a Efesus el milsaod el kirel a kltarreng. El ua tiang, ngmilluches el kirel a moktek er a Dios el kmo “a bo lturk a blsechel e ngodekdak a bek el tekoi ra eanged ma chutem el mo tang el ngara Kristus.” (Efesus 1:10) Ngdirrek el ulemekesiu er a Rekristiano er a kakerous el bad el ngii a sebechel el toketekii a blai el kmo: “El meteketek el ngara Kristus Jesus a blai el rokir el mo klou, el chedaol templo el ngara [Jehovah.]” (Efesus 2:20, 21) Me a lmuut el tang, a Paulus a millisiich er a kltarreng er a Rekristiano el Rechijudea me a Rechisentail, e dirrek el ulemeklatk er a rudam el kmo te rokui el ulebeob er a Dios. Ngdirrek el milsaod el kirel a Jehovah el kmo Ngii a “Chedam, el ngikel le mlungakl er ngii a bek el klebliil ra eanged ma chutem.”—Efesus 3:5, 6, 14, 15.
4 Sel donguiu er a 4 el bliongel er a Efesus, e ngsebeched el mesang sel uchul e ngkired el melisiich er a kltarreng e dirrek el mesa sel rolel e a Jehovah a ngosukid el mo oba kltarreng, e ua ngera el blekeradel a sebechel el ngosukid el mo melemolem el oba kltarreng. Moutekangel el menguiu er tia el bliongel me bo mngai a klungiolem er ngii.
A Blakerreng a Toketekii a Kltarreng
5. Ngera uchul me a rechanghel er a Dios a sebechir el mesiou el oba kltarreng, e ngera uchul me a kltarreng a meringel er kid el meleketek er ngii?
5 A Paulus a millisiich er a rudam er ngii er a Efesus el kmo “bo le blak a rengmiu loba [kltarreng.]” (Efesus 4:3) Ngsebeched el mo medengelii a klungel a ultutelel tia el tekoi sel dolatk el kirir a rechanghel er a Dios. A Jehovah a mileob a rokui el klengar er tia el chutem el kmal kakerous me ngsebeched el mesang el kmo ngulemeob er a rebetok el miliol el anghel el dirrek el kakerous a blekerdelir. (Daniel 7:10) Me nguaisei, e ngdi te mesiou er a Jehovah el oba kltarreng e le te olengesenges er ngii e meruul a soal. (Monguiu er a Psalm 103:20, 21.) Me alta e tirke el blak a rengrir el anghel a ngar er ngii a kakerous el blekerdelir, engdi a Rekristiano a kuk ngar er ngii a kakerous el chelitecheterir. Me tia el blekeradel a sebechel el rullii a kltarreng el mo meringel el meteketek.
6. Ngera el blekeradel a sebechel el ngosukid el mo dmeu a rengud el oureor el obengterir a rudam, el tir a ua ikid el ngar er ngii a chelitechetud?
6 Sel sekum a rediak el mecherrungel el chad a melasem el dmak el oureor e ngblechoel el mo duubech a chetituokel el tekoi. El ua tiang, ngera mo duubech a lsekum a ngariou a rengul el odam a blechoel el meoud el mei er a ongdibel e mesiou el obengkel a odam el olab a taem engdi ng bekongesengasech a rengul? A lta e a derta er tir a sebechel el mereched el mesa chelitechetul ngike el tang, e obes el kmo ngii me ngdirrek el ngar er ngii a chelitechetul. Ngmekerang e mo sebechir tirka el teru el odam el dmak el ta rengrir el mesiou? A tekingel a Paulus el kirel tia el blekeradel a sebechel el ngosukid el mo melebedebek el kmo kede mekerang e sebeched el meleketek er a kltarreng. Ngmilluches el kmo: Ak “mengelechel er kemiu el kmo, morael . . . loba klengariou ma delemedemek, e oba kllourreng, e mdul kilmekl a rengmiu loba bltikerreng, e bo le blak a rengmiu loba [kltarreng] el ulechull er chochull el budech.”—Efesus 4:1-3.
7. Ngera uchul me ngklou a ultutelel el dolasem el oureor el ta rengud kid me a rudam er kid el di ua ikid el diak el mecherrungel?
7 A dosuub el mo mesiou er a Dios el ngar er a kltarreng el obengterir a rediak el mecherrungel el chad a kmal klou a ultutelel e le ngdi tang a chelechad er a remera el mengull er a Dios. ‘A chelechad a di tang, ma reng me ngdi tang, el ua kemiu el mlokedong el mora tal omelatk er chokedongiu, a [Jehovah] a di tang, ma kloumerang a di tang, ma techolb a di tang, ma Dios el Demerir a rokuil chad.’ (Efesus 4:4-6) A oureor el klisichel a Jehovah me a klengeltengat er ngii a ngar er a delongelir a rudam er a chelsel a ongdibel er Ngii. Me a lsekum a ta el chad er a ongdibel a tomellii a rengud e kede mo er ker? Ngdiak a ngodech el basio el de bo er ngii e ngsebeched el remenges a tekoi er a diak a ulebengelel el klengar.—Johanes 6:68.
“Ar chad [el el llel] Ngat” a Melisiich er a Kltarreng
8. Ngmekerang a Kristus e ngosukid el mo mesisiich er aike el tekoi el sebechel el melemall er a kltarreng er kid?
8 A Paulus a uluusbech a osisiu el tekoi el kirir a resoldau er a irechar el omekesiu er sel rolel er a Jesus a loldurech er “ar chad a ngat” el olengeseu el melisiich er a kltarreng er a ongdibel. A soldau el mlo kats er a mekemad a ulterekokl el nguu a sibai el mei me ngmo mesiou er a bechil el meruul a ureor er a blil. (Psalm 68:1, 12, 18) Ngdi osisiu, a Jesus a mlo mesisiich er a beluulechad me ng ngilititerir a rebetok el chad el mo mesiungel. (Monguiu er a Efesus 4:7, 8.) Me ngmilekerang er a lousbech er tirka el sibai el lengilititerir? “Me ngmilsterir ar bebil chad a mo apostel, mar bebil a mo profet, mar bebil a mo omerk ra evangkelio, mar bebil a mo klekar a sib, mar bebil a mo sensei, me le mekedmokl ar mechedaol el kirel a ureor er chomesiou, me le meteketek a chelechedal a Kristus, el kirel dimerkmo de rokui el mo ngara kltang ra kloumerang ma klemedengei.”—Efesus 4:11-13.
9. (a) Te mekerang tirka el ‘ngat el chad’ e olengeseu el melisiich er a kltarreng? (b) E ngera uchul me a rokui el chedal a ongdibel a kirir el olengeseu el melisiich er a kltarreng?
9 Tirka el ‘chad el ngat’ a ua betik a rengul el mengkerengel a sib el olengeseu el melisiich er a kltarreng er kid. El ua tiang, a lsekum a ta er a remechuodel er a ongdibel a mesterir a reteru el odam “el kaiuengasechereng,” e ngsebechel el olengeseu el melisiich er a kltarreng er a ongdibel el oeak sel bo longedecheduch er tir el “oba reng ra delemedemek” el omeklemalt er tir. (Galatia 5:26–6:1) Tirka el ‘chad el ngat’ a ua resensei el ngosukid el omekeroul a klaumerang er kid el oeak a osisechakl el ngar er a Biblia. Ngoeak itiang e te melisiich er a kltarreng e ngosukid el mo meklou el chad er a tekingel a Dios. Me a Paulus a milluches el kmo “me bo lak de uaiar mekekerel ngalek, el oberius el mechetakl ra bek el eltel chosisechakl el duubech ra cheleblad rar chad, el ngara ulekbat el mengeuid.” (Efesus 4:13, 14) A rokui el Kristiano a kirir el mo melisiich er a kltarreng er a klodam, el di ua bek el klekedall er a bedenged el dmak el oureor me bo el sebechel el smisichii a bedenged.—Monguiu er a Efesus 4:15, 16.
Omekeroul a Ungil el Blekeradel
10. Ngmekerang a mekngit el omeruul e sebechel el tomellii a kltarreng er a delongeled?
10 Ngsebeched el mesang el kmo sel 4 el bliongel er a babilengel a Paulus el mo er a Rekristiano er a Efesus a ulechotii el kmo, a kot el ungil el rolel e ngsebeched el mukeroul el mo klou el chad er a tekingel a Dios a sel dolecholt er a bltikerreng. E dirrek el ouchais el kmo ngera uldimukl er tia el bltikerreng. Me a lmuut el tang, a doltirakl er a bltikerreng e ngdiak dekengei a deleboes me a mengelengalek el omeruul. A Paulus a dirrek el millisiich er a rudam er ngii el kmo “lako morael el uar Chisentail.” Tirka el chad a “diak lodenge rur, me te meruul a bek el mengelengalek loltirakl ra ngelbesel a rengrir.” (Efesus 4:17-19) Tia el beluulechad el mui er a mekngit el omeruul a kmal sebechel el tomellii a kltarreng er kid. A rechad a kaungelakel el mesaod a deleboes el omeruul, e mengitakl el kirel, e omes el mengelaod er tir, e dirrek el berrotel me a lechub e te di chemolt el meruul er ngii el tekoi. El mo lmuut er a klaiuengamech el ngii a sebechel el mo uchul e ngmelisiich a tekoi er a deleboes el chad a di soal el meruul e diak lolatk er a chebechiil me ngsebechel el mo uchul e a chad a mo cheroid er a Jehovah me a ongdibel er ngii. E ngera uchul? E le tiang a sebechel el mo uchul e a chad a ruebet er a deleboes el omeruul. Me tia el klaiuengamech a dirrek el sebechel el oremelii a bechiil el chad el mo ruebet er a laokreng el sebechel el mo uchul a chelebulir a rengalek me a bechil a chad el ngii a diak el uchul a telemellel a chebechiil. Tiang a mera el uchul a klekakeakl er a delongeled! Misei a uchul me a Paulus a milluches el kmo: “E ngdi kemiu a dimlak mosuub ra Kristus chouaisei!”—Efesus 4:20, 21.
11. A Biblia ngmelisiich er a Rekristiano el mo melodech a ngera el blekeradel?
11 A Paulus a millisiich er a tekoi el kmo ngkired el mengikiid er kid er a mekngit el uldasu e bai omekeroul a ungil el blekeradel, el ngii a sebechel el mo uchul a kltarreng er kid me a rebebil. Ngdilu el kmo: “Me ko medebedii el choitii ngikel mechut el chad el klekedellel a dimla blekerdeliu el longeuid er ngii a ngelbokl, me ngmora tellemall, ma reng er chomelebedebekiu bo le mukbeches, e moubail er ngikel beches el chad, el ulebeob el okesiul a Dios ra meral llemalt ma cheledaol.” (Efesus 4:22-24) Me kede mekerang e mo melodech a ‘omelebedebeked’? A lsekum e kede kerekikl el melebedebek a Tekingel a Dios el dosuub, e dirrek el oukerebai a ungil el blekerdelir a remeklou el chad el Kristiano, e ngmo sebeched el ngmodech a blekerdeled el oltirakl er a “okesiul a Dios.”
Omekeroul a Ungil el Rolel a Cheldecheduch
12. Ngmekerang a omelekoi el klemerang e smisichii a kltarreng, e ngera uchul me ngmeringel er a rebebil el mo melekoi a klemerang?
12 Ngklou a ultutelel el dolekoi a klemerang er a delongeled er a chelsel a telungalek me a lechub e ng ongdibel. A melemalt e bleketakl e medemedemek el cheldecheduch a sebechel el oldak er a rechad. (Johanes 15:15) E kuk mekerang a lsekum a chad a mulekngii a odam er ngii? Sel sekum ngike el ta er a odam a mo medengei e ngulterekokl el mo mechitechut a klaumerang er a delongelir. Me ngsebeched el mo medengelii a uchul me a Paulus a milluches el kmo: “Ma derta er kemiu bo longedecheduch a klemerang el mora ngar bita er tir, e kede mla mo dul kauklekedall.” (Efesus 4:25) A chad el mla mo meduch el omulak el locha ulemuchel er a dirk lengalek a mo meringel er ngii el melekoi a klemerang. Engdi a Jehovah a kmal dmeu a rengul el omes er ngii el melasem el melodech er a blekerdelel e mo olengeseu er ngii.
13. Ngerang a uldimukl er a dolasem el melodech a mekngit el omelekinged?
13 A Jehovah a osisecheklid el mo meduch el mengull e dirrek el oba kltarreng er a chelsel a ongdibel me a dirrek a chelsel a telungalek el oeak sel de kerekikl er a rolel a dongedecheduch. “Lak motebedii a mekngit el tekoi ra ngeriu . . . mchoit a rokuil cheluached, ma ngasechereng, ma klsiberreng, ma teloketok, ma chomelaes, ma ikel rokuil mekngit luldasu el bedul a chad.” (Efesus 4:29, 31) A ta er a rolel e kede mengikiid er kid er a mekngit el omelekoi a sel debekurulii a omengull er kid el mo er a rebebil. El ua tiang, a chad el mekngit a tekingel el mo er a bechil a kirel melodech er a blekerdelel, el ileakl a lsekum e ng suubii sel rolel a Jehovah a longebkall er a redil. Ngoeak a oureor el klisichel a Jehovah e ngdirrek el melilt er a redil el mo mengedereder el king el obengkel a Kristus. (Galatia 3:28; 1 Petrus 3:7) Me ngdi osisiu, a redil el blechoel el mekngit a tekingel el mo er a bechil a kirel el melodech er a blekerdelel sel lesubii a rolel a Jesus el mle sebechel el kilmeklii a rengul er a lemeasem.—1 Petrus 2:21-23.
14. Ngera uchul me ngkmal kdekudel a leblechoel el mo kesib a rengud?
14 A mekngit el omelekoi a mo uchul a ngasecherreng, e tia el omeruul a sebechel el omii er a rechad el tir a kirir el dmak. Me a ngasecherreng a di ua ngau el sekum e ngdiak dekerekikl er ngii e ngsebechel el mo uchul a klou el telemall. (Osisechakl 29:22) Me a chad el blechoel el olecholt er a ngesechel a rengul a kirel el mo kerekikl el omtebechel er ngii me lak el temall a ungil el deleuill er ngii me a rechad. A Rekristiano a kirir el oureor el kirel a klausubes, e diak longelmekl a mekngit el uldasu me a lechub e di losaod el kirel a tekoi el mlo chetirir. (Psalm 37:8; 103:8, 9; Osisechakl 17:9) A Paulus a milengelechel er a Rekristiano er a Efesus el kmo: “Lak bora klengit a bo le kesib a rengmiu; e lak di le kesib a rengmiu el mo ngmelt a sils, e lako bsa techellel a diabelong.” (Efesus 4:26, 27) A lsekum e ngdiak dekerekikl el omtebechel a ngesechel a rengud e ngsebeched el msang a techellel a Diabelong me ngmekurulii a klekakeakl me a lechub e ngklautok er a chelsel a ongdibel.
15. A omeruul el mo nguu a klalo el diak el klokled, ngerang sebechel el tomellii?
15 A dolecholt a omengull el mo er a rebebil el oeak a lak dorechorech a kloklir e ngdirrek el meleketek a kltarreng er a ongdibel. A bades a melekoi el kmo: “Me ngikel mlerechorech lekea lluut el mo merechorech.” (Efesus 4:28) A klaumerang a mla mukeroul er a delongelir a rechedal a Jehovah. Me a lsekum a Kristiano a mo tomellii tia el klaumerang el mo rucherechii a kloklel a chad e ngsebechel el tomellii tia el kltarreng.
A Bltikerreng el Mo er a Dios a Oldak er Kid
16. Kede mekerang e ousbech a ungil el cheldecheduch el melisiich er a kltarreng er kid?
16 A kltarreng er a chelsel a ongdibel er a Rekristiano a meteketek el oeak a bltkil a rengrir a rokui el chad el mo er a Jehovah, me te meruul a tekoi el mo er a rebebil el oeak a bltikerreng. A omereng el saul er kid el kirel a ungil el omerellel a Jehovah a smisichid el mo blak a rengud el oltaut er tia el uleklatk el kmo: “[Mongedecheduch a] lsekum ngkirel e moltobed a ungil tekoi el toketekii a klungiaol el morar chad el orrenges, me le nguu a klengeltengat. . . . Bo bekokuii e mchubechub ra delongeliu, e mdul kausubes el ua Dios el ngara Kristus el uluusubes a kngtmiu.” (Efesus 4:29, 32) A Jehovah a chubechub el blechoel el ousubes er kid el diak demecherrungel el chad. Me ngkmal kired el mo ua ingii el mo ousubes er a rebebil sel deues a chelitecheterir.
17. Ngera uchul me ngkired el mo blak a rengud el melisiich er a kltarreng?
17 A kltarreng er a delongelir a rechedal a Jehovah a mengebkall er Ngii. A oureor el klisichel a rullid me ngmo sebeched el melisiich er a kltarreng el oeak a betok el rolel. Ngkmal diak el soad el mo oltngakl a ulekrael el mla er a Jehovah el mei. A Paulus a milluches el kmo: “Lako mkingtir a rengul a [Jehovah.]” (Efesus 4:30) A kltarreng a mekreos el tekoi, el kired el kerekikl el melisiich er ngii. Nguchul a deurreng er tirke el melisiich er ngii, e dirrek el uchul a klebkall el mo er a Jehovah. “Misei e bo mteletelir ar ngalek el le betik a rengul er tir a Dios, el oltirakl ra Dios. E morael el ngara bltikerreng.”—Efesus 5:1, 2.
Ke Mekerang a Omonger?
• Ngera el blekeradel a melisiich er a kltarreng er a delongelir a Rekristiano?
• Ngmekerang a omerelled e sebechel el mo uchul a kltarreng er a chelsel a ongdibel?
• Ngmekerang a cheldechedechad e ngosukid el mo ungil el oureor el obengterir a rebebil?
[Aike el Ker er a Suobel]
[Siasing el ngar er a 21 el llel]
A rebetok el chad el mle kakerous a blekerdelel a klengar er tir er a uchei a mla mo oba kltarreng
[Siasing el ngar er a 22 el llel]
Kau, ke medengelii a telemellel a ulengamech el tekoi?