A wánfasi fu Kresten e gi Gado glori
A wánfasi fu Kresten e gi Gado glori
„Un musu du bun furu muiti fu tan abi wán fasi fu denki.”—EF. 4:3.
1. Fa den fosi Kresten fu Efeise ben e gi Gado glori?
NA INI owruten, a wánfasi di ben de na ini a Kresten gemeente Efeise ben e gi glori na Yehovah, a tru Gado. Na ini a gudu bisnis foto dati, son Kresten brada ben de gudusma di ben abi srafu. Ma tra Kresten brada ben de srafu èn kande den ben pôti srefisrefi (Ef. 6:5, 9). Sonwan fu den ben de Dyu di ben kon sabi a tru bribi na ini den dri mun di na apostel Paulus ben e preiki na ini a snoga fu den. Fosi, sonwan fu den ben e anbegi Artemis èn den ben e du bonuwroko (Tori. 19:8, 19, 26). A de krin fu si taki a tru Kresten bribi ben e tyari sma fu difrenti kulturu kon na wán. Paulus ben sabi taki Yehovah e kisi glori te wánfasi de na ini a gemeente. Na apostel ben skrifi: „Na en musu kisi glori nanga yepi fu a gemeente.”—Ef. 3:21.
2. Sortu sani ben kan pori a wánfasi fu den Kresten na ini Efeise?
2 Ma problema ben de di ben kan pori a moi wánfasi fu a gemeente na ini Efeise. Paulus ben warskow den owruman: „Sma sa opo na un mindri, èn den sa taki kruktu sani fu hari den disipel kon na den baka” (Tori. 20:30). Boiti dati, son brada ben tan du sani di ben e tyari prati kon, èn Paulus ben warskow den taki a yeye dati ’e wroko na ini den sma di e trangayesi Gado’.—Ef. 2:2; 4:22.
Wan brifi di e sori o prenspari wánfasi de
3, 4. Fa a brifi fu Paulus e sori o prenspari wánfasi de?
3 Paulus ben sabi taki efu Kresten wani tan wroko bun nanga makandra, dan ibriwan fu den musu du tranga muiti fu tyari wánfasi kon. Gado ben meki Paulus skrifi wan brifi gi den Efeisesma, di ben e sori o prenspari wánfasi de. Fu eksempre, Paulus ben skrifi taki Gado ben o „tyari ala sani kon makandra baka na ondro Krestes” (Ef. 1:10). Paulus ben agersi Kresten tu nanga difrenti ston fu wan gebow. A ben taki: „A heri oso di seti kon tron wán, e gro teleki a kon tron wan santa tempel gi Yehovah” (Ef. 2:20, 21). Boiti dati, Paulus ben poti prakseri na a wánfasi di ben de na mindri den Dyu nanga den Kresten di no ben de Dyu. A memre den tu taki na Gado ben meki den alamala. A ben taki dati Yehovah na „a Tata, di gi ibri famiri na hemel èn na grontapu a nen fu den”.—Ef. 3:5, 6, 14, 15.
4 Te wi sa poti prakseri na kapitel 4 fu Efeisesma, dan wi o si fu san ede wi musu meki muiti fu de na ini wánfasi. Wi o si tu fa Yehovah e yepi wi fu de wán, èn sortu fasi wi musu kweki fu man tan na ini wánfasi. A ben o bun fu leisi a heri kapitel, so taki yu kan kisi moro wini fu a studie.
Fu san ede wi musu meki muiti fu abi wán fasi fu denki?
5. Fu san ede den engel fu Gado kan dini en na ini wánfasi? Ma fu san ede a moro muilek gi wi fu de na ini wánfasi?
5 Paulus ben gi den Kresten brada nanga sisa fu Efeise a deki-ati fu „du bun furu muiti fu tan abi wán fasi fu denki” (Ef. 4:3). Fu man frustan fu san ede wi musu du muiti fu tan na ini wánfasi, dan meki wi luku den engel fu Gado. Ibri sani di e libi na grontapu de tra fasi leki wan trawan. Fu dati ede wi kan frustan taki Yehovah meki ibriwan fu den milyunmilyun engel na so wan fasi taki den abi den eigi fasi (Dan. 7:10). Toku den kan dini Yehovah na ini wánfasi fu di den alamala e arki en èn den e du a wani fu en. (Leisi Psalm 103:20, 21.) Ma tra fasi leki den engel, Kresten abi difrenti swakifasi. A sani disi kan meki en moro muilek gi den fu de na ini wánfasi.
6. Sortu fasi wi musu kweki fu man wroko makandra nanga wi Kresten brada nanga sisa di abi tra swakifasi leki wi?
6 Te sondusma e pruberi fu wroko makandra, dan problema kan opo kon makriki. Fu eksempre, wan brada di abi safri-ati gwenti fu doro lati na presi. Now a musu du diniwroko gi Yehovah makandra nanga wan brada di lobi fu de biten, ma di e atibron esi-esi. Fa sani o waka? Ibriwan fu den ben kan feni taki a trawan musu wroko na ensrefi, ma den e frigiti taki ibriwan fu den musu tyari kenki kon. Fa den tu brada disi kan sorgu taki den e wroko makandra na ini wánfasi? Luku sortu fasi den musu kweki, soleki fa den wortu fu Paulus o sori. Baka dati, prakseri fa den fasi dati kan yepi wi fu sorgu taki wánfasi de. Paulus ben skrifi: „[Mi] e begi unu fu waka na wan fasi di fiti . . . èn mi e begi unu fu abi sakafasi dorodoro nanga safri-atifasi, nanga langa pasensi, èn fu frudrage makandra nanga lobi. Un musu du bun furu muiti fu tan abi wán fasi fu denki, so taki unu kan abi a vrede di e tyari sma kon na wán.”—Ef. 4:1-3.
7. Fu san ede a de tumusi prenspari taki wi e du muiti fu de na ini wánfasi nanga tra sondu Kresten?
7 A de tumusi prenspari taki wi e leri fu dini Gado na ini wánfasi makandra nanga tra sondusma, fu di wán skin fu tru anbegiman nomo de. Bijbel e taki: „Wán skin de, èn wán yeye, soleki fa unu ben kisi a kari gi a wán howpu di unu ben kisi; wán Masra de, wán bribi, wán dopu; wán Gado de di de a Tata fu ala sma” (Ef. 4:4-6). Yehovah e gi en yeye soso na wán grupu sma di a e gebroiki, èn a e blesi soso a grupu dati. Awansi wan sma na ini a gemeente e hati den firi fu wi, toku nowan tra presi no de pe wi kan yere den wortu di e gi sma têgo libi.—Yoh. 6:68.
’Libisma di de leki presenti’ e yepi fu sorgu taki wánfasi de
8. San Krestes e gebroiki fu yepi wi so taki sani no e pori a wánfasi fu wi?
8 Paulus ben taki fu wan sani di srudati ben gwenti du na ini owruten. A ben gebroiki na eksempre dati fu sori fa Yesus gi „libisma leki presenti” fu yepi tyari wánfasi kon na ini a gemeente. Wan srudati di ben wini a feti ben kan tyari wan katiboman go na en oso fu wroko leki srafu, so taki a ben kan yepi en wefi nanga na osowroko (Ps. 68:1, 12, 18). Na so a de tu taki fu di Yesus wini grontapu, meki a kisi furu srafu di de klariklari fu dini en. (Leisi Efeisesma 4:7, 8.) Fa a gebroiki den agersi srafu disi? Bijbel e taki: „Son sma a poti leki apostel, son sma leki profeiti, son sma leki preikiman fu a bun nyunsu, son sma leki skapuman nanga leriman. A du disi fu poti den santawan na tapu a reti pasi baka, fu du diniwroko, èn fu meki a skin fu Krestes kon tranga, teleki wi alamala kon de wán na ini a bribi.”—Ef. 4:11-13.
9. (a) Fa den ’libisma di de leki presenti’ e yepi fu sorgu taki wánfasi de na wi mindri? (b) Fu san ede ibri sma na ini a gemeente musu yepi fu sorgu taki wánfasi de?
9 Leki lobi-ati skapuman, den ’libisma di de leki presenti’ e yepi wi fu tan na ini wánfasi. Fu eksempre, efu wan gemeente owruman e si taki tu brada „lobi strei nanga makandra”, dan a kan du furu fu yepi taki a wánfasi e tan na ini a gemeente. Iya, a kan taki nanga ibriwan fu den aparti, èn a musu du dati ’na wan safri-ati fasi fu tyari den kon na tapu a reti pasi baka’ (Gal. 5:26–6:1). Leki leriman, den ’libisma di de leki presenti’ e yepi wi fu kon abi wan tranga bribi na ini den leri fu Bijbel. Na so den e sorgu taki wánfasi de èn den e yepi wi fu tron lepi Kresten. Paulus ben skrifi taki den e du dati so taki „wi no sa de leki beibi moro, di e degedege neleki te winti e naki skwala go na ala sei èn di sma e bedrigi nanga ala sortu leri; èn sma no sa kori wi nanga den triki fu den, noso nanga den lei di den sidon prakseri” (Ef. 4:13, 14). Neleki fa ibri pisi fu wi skin e du san de fanowdu so taki a skin e kon tranga, na so ibri Kresten musu du muiti fu sorgu taki wánfasi de na wi mindri.—Leisi Efeisesma 4:15, 16.
Kweki bun fasi
10. Te sma e tyari densrefi na wan fasi di no fiti, dan fa dati kan pori a wánfasi fu wi?
10 Yu no si taki a di fu fo kapitel fu Efeisesma e sori taki lepi Kresten musu sori lobi gi makandra fu man de na ini wánfasi? A brifi e sori tu san lobi wani taki. Fu eksempre, te wi e sori lobi gi trawan, dan wi no o du hurudu èn wi no o libi wan yayolibi. Paulus ben gi den Kresten brada nanga sisa fu en a rai fu no „libi moro leki den grontapusma”. Den sma dati „no sabi moro san bun, noso san ogri”, èn „den e gi densrefi abra na wan yayolibi” (Ef. 4:17-19). A grontapu disi pe furu sma e tyari densrefi na wan fasi di no fiti, kan pori a wánfasi fu wi. Sma e meki lafutori nanga singi di abi fu du nanga hurudu, èn den e luku den sortu felem dati. Boiti dati, den e du hurudu, awansi na kibrikibri noso awansi tra sma e si den. Ma srefi te yu e prei nanga den firi fu wan trawan, sondro taki yu e prakseri fu trow nanga a sma dati, dan dati kan meki taki yu e drifi gowe fu Yehovah nanga a gemeente. Fu san ede dati de so? Fu di wan sma kan fadon makriki na ini hurudu te a e prei nanga den firi fu trawan. Boiti dati, a sani disi e tyari furu sari kon fu di a kan prati pikin fu den papa nanga mama, èn a kan prati trowpatna. Iya, te sma e prei nanga den firi fu trawan, dan dati e tyari prati kon trutru! Fu dati ede, Paulus ben abi bun reide fu skrifi: „Unu no ben leri sabi Krestes so”!—Ef. 4:20, 21.
11. Sortu kenki Kresten musu tyari kon, soleki fa Bijbel e sori?
11 Paulus ben taki krin dati wi no musu abi takru fasi fu denki moro, ma wi musu kweki fasi di e yepi wi fu libi na ini wánfasi nanga trawan. A ben taki: „Un musu kenki a fasi fa unu ben de fosi; dati na a fasi fa unu ben gwenti tyari unsrefi, iya, a fasi disi kon pori fu di unu ben abi takru lostu; . . . a krakti di e pusu un frustan musu meki unu kon nyun, èn un musu tron wan nyun sma di de soleki fa Gado wani, nanga trutru regtfardikifasi èn loyaalfasi” (Ef. 4:22-24). Fa a ’krakti di e pusu wi frustan kan meki wi kon nyun’? Wi musu de nanga tangi gi den sani di wi e leri fu Gado Wortu èn gi a moi eksempre fu lepi Kresten. Te wi e denki dipi fu den sani disi, dan dati kan yepi wi fu tron nyun sma „di de soleki fa Gado wani”.
Leri fu taki na wan fasi di fiti
12. Te sma e taki san tru, dan fa dati e yepi fu sorgu taki wánfasi de? Fu san ede a muilek gi son sma fu taki san tru?
12 A de tumusi prenspari taki den memre fu wan osofamiri noso fu wan gemeente e taki san tru. Te sma e taki sani krin èn na wan switi fasi, dan dati kan meki taki den tron mati (Yoh. 15:15). Ma fa a de te wan sma e lei gi en brada? Te a trawan kon si dati, dan a no o frutrow en moro. Yu kan frustan fu san Paulus ben skrifi: „Ibriwan fu unu musu taki san tru te unu e taki nanga trawan, bika wi na wan pisi fu a srefi skin èn wi de fu makandra” (Ef. 4:25). Wan sma di gwenti lei, kan feni en muilek fu bigin taki san tru. Kande a ben bigin nanga a gwenti dati di a ben pikin. Ma Yehovah e warderi en te a sma e du muiti fu kenki, èn A o yepi en.
13. San wi musu du fu no kosi trawan moro?
13 Yehovah e leri wi fa wi kan sorgu taki lespeki nanga wánfasi de na ini a gemeente èn na ini na osofamiri. Dati meki a e sori wi krin fa wi no musu taki. Bijbel e taki: „No taki takru sani nanga un mofo . . . Puru ala takru bita-ati nanga mandi nanga atibron nanga babari nanga kosikosi na un mindri, èn sosrefi ala takrudu” (Ef. 4:29, 31). Wán fasi fa wi kan sorgu taki wi no e taki sani di kan hati den firi fu trawan, na te wi e kon abi moro lespeki gi den. Fu eksempre, wan man di e kosi en wefi musu du tranga muiti fu handri tra fasi nanga en, spesrutu te a e leri taki Yehovah e gi grani na umasma. Gado e salfu son umasma srefi nanga santa yeye, so taki den abi a howpu fu tiri leki kownu makandra nanga Krestes (Gal. 3:28; 1 Petr. 3:7). Na so a de tu taki wan uma di gwenti bari en masra, musu du muiti fu kenki den fasi fu en te a e leri fa Yesus ben hori ensrefi di sma ben e kosi en.—1 Petr. 2:21-23.
14. Fu san ede wi musu hori wisrefi te wi e atibron?
14 Te wan sma e kosi trawan, dan nofo tron dati e kon fu di a no man hori ensrefi te a e atibron. A sani disi kan tyari prati kon tu na ini a gemeente noso na ini wan osofamiri. Atibron de leki wan faya. A kan kon moro bigi esi-esi, èn a kan tyari bigi rampu kon (Odo 29:22). Wan sma di abi reide fu atibron nanga trawan, musu sorgu taki a e hori ensrefi, so taki a no e pori a bun matifasi di a abi nanga trawan. Kresten musu du muiti fu gi trawan pardon, den no musu hori trawan na ati, èn den no musu taki moro fu a tori (Ps. 37:8; 103:8, 9; Odo 17:9). Paulus ben gi den Efeisesma a rai disi: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi” (Ef. 4:26, 27). Wan sma di no man hori ensrefi te a e atibron, ben o gi Didibri okasi fu tyari prati kon na ini a gemeente, èn srefi trobi ben kan kon.
15. San kan pasa te wi e teki sani di no de fu wi?
15 Wan tra sani di e yepi fu sorgu taki wánfasi de na ini a gemeente, na te wi no e teki sani di no de fu wi. Bijbel e taki: „A sma di e fufuru, no musu fufuru moro” (Ef. 4:28). Moro furu a de so taki den anbegiman fu Yehovah e frutrow makandra. Efu wan Kresten e teki wan sani di no de fu en, dan trawan no o frutrow en moro, èn a sani dati kan pori a moi wánfasi fu wi.
Lobi gi Gado e meki taki wi de na ini wánfasi
16. Fa den bun sani di wi e taki kan yepi wi fu tan na ini wánfasi?
16 A Kresten gemeente de na ini wánfasi fu di a lobi di wi alamala abi gi Gado e meki taki wi e handri na wan lobi-ati fasi nanga trawan. Fu di wi abi warderi gi a switifasi di Yehovah e sori gi wi, meki wi e du tranga muiti fu gi yesi na a rai disi: „Taki sani di bun, so taki unu kan gi sma deki-ati te a de fanowdu; na so fasi den sma di e arki, kan yere sani di bun gi den. . . . Tron sma di e du bun gi makandra, èn sori sari-ati na wan lobi fasi; un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes” (Ef. 4:29, 32). Na wan switi fasi Yehovah e gi pardon na sondusma leki wi. Fu dati ede wi musu gi trawan pardon tu te wi e si den swakifasi fu den, a no so?
17. Fu san ede wi musu du tranga muiti fu sorgu taki wi de na ini wánfasi?
17 A wánfasi fu a pipel fu Yehovah e gi glori na En. A yeye fu en e meki taki wi e du difrenti sani fu sorgu taki wánfasi de. A no de fu taki dati wi no musu weigri fu teki a tiri fu a yeye. Paulus ben skrifi: „No meki Gado en santa yeye sari” (Ef. 4:30). Wánfasi na wan warti sani di wi musu kibri. Den wan di de na ini a wánfasi disi de koloku, èn Yehovah e kisi glori fu di a wánfasi dati de. „Fu dati ede, waka baka na eksempre fu Gado leki pikin di a lobi; tan lobi makandra.”—Ef. 5:1, 2.
San yu ben sa piki?
• Sortu fasi Kresten musu abi fu man de na ini wánfasi?
• Fa wi musu tyari wisrefi fu sorgu taki wánfasi de na ini a gemeente?
• Fa wi musu taki fu man wroko bun nanga trawan?
[Aksi fu a tori disi]
[Prenki na tapu bladzijde 17]
Sma fu difrenti kulturu de na ini wánfasi
[Prenki na tapu bladzijde 18]
Yu e frustan fu san ede a no bun fu prei nanga den firi fu trawan?