Kuba Munye KwemaKhristu Kukhatimulisa Nkulunkulu
Kuba Munye KwemaKhristu Kukhatimulisa Nkulunkulu
‘Nibokhutsalela kugcina bunye bemoya ngesibopho sekuthula.’—EF. 4:3.
1. EmaKhristu angelikhulu lekucala leminyaka labekaphila e-Efesu, amkhatimulisa njani Nkulunkulu?
BUNYE lobebuyinala ebandleni lebuKhristu lase-Efesu lasendvulo, bebukhatimulisa Nkulunkulu weliciniso longuJehova. Leyondzawo, bekuyindzawo yemabhizinisi ledvumile. EmaKhristu labekatfolakala khona bekamihibahiba, lamanye abegcilatwa kutsandza imali, lamanye wona abedla imbuya ngelutsi. (Ef. 6:5, 9) Ekhatsi kwalamaKhristu bekukhona langemaJuda labekamukele inkholo yebuKhristu ngesikhatsi umphostoli Pawula avakashela lisinagoge laleyondzawo tinyanga letintsatfu. Lamanye kulamaKhristu bekake akhonta nkulunkulu longuDiyana asengakakholwa futsi abesebentisa nemilingo. (Imis. 19:8, 19, 26) Kuyakhanya-ke kutsi inkholo yebuKhristu yadvonsa bantfu labamihibahiba. Loko kwabangela umphostoli Pawula waveta kutsi bunye belibandla lebuKhristu bebukhatimulisa Jehova. Lomphostoli wabhala watsi: “Akube ludvumo ebandleni naKhristu Jesu.”—Ef. 3:21.
2. Yini lebeyisongela libandla lebuKhristu lebelitinte endzaweni yase-Efesu?
2 Noko, kukhona lobekusongela bunye belibandla lase-Efesu. Pawula wadvonsa ngendlebe emadvodza lamadzala alelobandla watsi: “Emkhatsisini wenu kuyawuvela bantfu labayawufundzisa lokuphambene neliciniso badvonse emakholwa lamanyenti alandzele bona.” (Imis. 20:30) Kulokunye, labanye bazalwane bebasengakawushiyi umoya wekuba nhlalunhlalu, Pawula lawuchaza ngekutsi ‘ngumoya losebenta kubantfu labangamlaleli Nkulunkulu.’—Ef. 2:2; 4:22.
Incwadzi Legcamisa Bunye
3, 4. Incwadzi Pawula layibhalela libandla lase-Efesu, ibugcizelela njani bunye?
3 Bekumkhanyela bha Pawula kutsi bunye belibandla lebuKhristu nekubambisana, bebungachubeka bukhona nangabe umKhristu ngamunye afaka umfutfo kute abutfutfukise. Nkulunkulu waphefumulela Pawula kutsi abhalele libandla lase-Efesu incwadzi lebeyidzingidza kakhulu kuba munye. Sibonelo saloko kutsi Pawula wabhala ngenhloso yaNkulunkulu ‘yekuhlanganisa konkhe ngaJesu.’ (Ef. 1:10) Waphindze wafananisa emaKhristu nematje lahlukahlukene lasetjentiselwa kwakha indlu. Watsi: “Sakhiwo sonkhe sihlanganiselwe kuye, siyakhula, siyawudzimate sibe lithempeli lelingcwele leNkhosi [Jehova].” (Ef. 2:20, 21) Pawula waphindze wagcizelela kutsi bunye lobebukhona emkhatsisini wemaKhristu langemaJuda, nalangasiwo emaJuda, bebuyinkhomba yekutsi bonkhe bantfu badalwa nguNkulunkulu. Wachaza Jehova ngekutsi ‘nguBabe lokwetsiwe ngaye yonkhe imindeni yasezulwini nasemhlabeni.’—Ef. 3:5, 6, 14, 15.
4 Njengobe sesitawuhlatiya sehluko 4 sencwadzi ya-Efesu, sitawutfola kutsi bunye belibandla budzinga sifake umfutfo, sitfole kutsi Jehova ungumtfombo wekuthula nekutsi ngutiphi timfanelo lokufanele sibe nato kute sibe nebunye. Kungaba kuhle kutsi ufundze sonkhe lesehluko sesine kute utfole inzuzo lenkhulu.
Sizatfu Lesenta Kutsi Bunye Budzinge Kufakwe Umfutfo
5. Yini lebangela kutsi tingilosi taNkulunkulu timkhonte ngebunye, kodvwa kungani kuyinsayeya ngatsi kumkhonta ngebunye?
5 Pawula wancenga emaKhristu asebandleni lase-Efesu kutsi ‘akhutsalele kugcina bunye bemoya ngesibopho sekuthula.’ (Ef. 4:3) Kute uyivisise indzaba yesidzingo sekufaka umfutfo lokuholela ebunyeni, cabanga ngalokwenteka etingilosini taNkulunkulu. Endalweni yaJehova iyonkhe, kute sidalwa sakhe lesifanana nse nalesinye. Kungako kunengcondvo kutsi sitsi ingilosi ngayinye kuletitigidzi letikhona atifanani. (Dan. 7:10) Nanobe tingilosi timihibahiba, tinebunye ngobe tiyalalela tiphindze tinesifiso sekwenta intsandvo yaJehova. (Fundza Tihlabelelo 103:20, 21.) Tingilosi letetsembekile tinetimfanelo letingafanani, bese kutsi emaKhristu wona abe netimfanelo letingafanani kanye nebutsakatsaka. Loko kungabangela kutsi bunye belibandla bube yinsayeya.
6. Ngutiphi timfanelo letitasisita kute sibambisane nebazalwane labanebutsakatsaka lobehlukile kubetfu?
6 Kwenta imetamo yekubambisana kwebantfu labanemaphutsa, kungaba netinkinga. Sibonelo saloko ngunaba bazalwane lababili labakhonta Jehova. Munye wabo akahlutfuki melula, kodvwa akasigcini sikhatsi. Lona lomunye uyasigcina sikhatsi, kodvwa usheshe ahlutfuke. Kungenteka kutsi ngamunye kubo ukhomba lomunye emehlweni, babe bobabili banalokutsite emphilweni yabo lokufanele bakulungise. Labazalwane lababili bangabambisana njani ngebunye? Nakisisa kutsi timfanelo lakhuluma ngato Pawula tingabasita njani. Yifakele tibuko lendzaba, ucabange kutsi leto timfanelo tingabutfutfukisa njani bunye natisetjentiswa. Pawula wabhala watsi: ‘Ngiyanincenga kutsi nihambe ngalokufanele . . . Nikhombise lutsandvo lwenu ngekubeketelelana, ngekutfobeka konkhe, nangebumnene, nangekucinisela. Nibokhutsalela kugcina bunye bemoya ngesibopho sekuthula.’—Ef. 4:1-3.
7. Kungani kumcoka kutsi sibambisane nasisebentelana nemaKhristu lanemaphutsa?
7 Kutifundzisa kukhonta Nkulunkulu ngebunye njengebantfu labanemaphutsa kumcoka, ngobe silicembu linye-vo letikhonti teliciniso. Pawula watsi: ‘Munye umtimba, munye nemoya, njengobe lilinye nelitsemba lenabitelwa kulo. Yinye iNkhosi, kunye kukholwa, munye umbhabhatiso; munye Nkulunkulu, longuBabe wetfu sonkhe.’ (Ef. 4:4-6) Umoya longcwele waJehova kanye netibusiso, kuhlobene nekutihlanganisa nebazalwane labakhonta Nkulunkulu. Nanobe kungenteka kutsi kukhona longasiphatsi kahle ebandleni, leso akusiso sizatfu sekushiya Nkulunkulu. Ayikho lenye indzawo lapho singeva khona kukhulunywa ngematsemba ekuphila lokuphakadze ngaphandle kwasebandleni lebuKhristu.—Joh. 6:68.
‘Tipho Letibantfu’ Titfutfukisa Bunye
8. Yini Khristu layisebentisako kute asisite kutsi silwisane nemikhuba lengasenta sibe nhlalunhlalu?
8 Pawula wakhuluma ngaloko lokwakwentiwa ngemasotja akadzeni nakafananisa indlela Jesu lalungiselele ngayo ‘tipho letibantfu’ kute tisite ekutseni kube nebunye ebandleni. Lisotja lelincobile belingase libuye naloyo lobekatfunjiwe emtini walo, kute atewusita umfati walo emsebentini wasekhaya. (Hla. 68:1, 12, 18) Nangendlela lefananako, kuncoba kwaJesu live kumente watfola tinceku letinyenti tekutitsandzela. (Fundza Efesu 4:7, 8.) Utisebentisa njani leto titfunjwa letingumfanekiso? Pawula watsi: “Nguye futsi lowapha labanye kutsi babe baphostoli, labanye babe baphrofethi, labanye babe bavangeli, labanye babe belusi, labanye babe bafundzisi. Loko wakwentela kutsi labangcwele bahlonyiselwe umsebenti wabo wekukhonta, kuze kwakheke umtimba waKhristu, size sifinyelele sonkhe ebunyeni bekukholwa.”—Ef. 4:11-13.
9. (a) ‘Tipho letibantfu’ tisifaka njani sandla kute tisisite sibe nebunye? (b) Kungani kufanele onkhe emalunga elibandla afake sandla kute alente libe nebunye?
9 Njengebelusi labanelutsandvo, ‘tipho letibantfu’ tiyasisita kute sibe nebunye. Nasi sibonelo kulendzaba: Nangabe umzalwane lomdzala ebandleni, acaphela kutsi bazalwane lababili ‘bajojotela kuncintisana lomunye kulomunye,’ angafaka sandla ekwenteni libandla libe nebunye ngekutsi abanikete seluleko sangansense, ‘abephule, akwente loko ngemoya wekutfobeka.’ (Gal. 5:26–6:1) Njengebafundzisi, ‘tipho letibantfu’ tisisita kutsi sibe nekukholwa lokucinile etimfundzisweni teliBhayibheli. Tisenta sibe nebunye futsi tisisite sivutfwe ngakamoya. Pawula wabhala: “Ngako-ke ngeke sisaba bantfwana, sigujuteliswe ngemagagasi sipheshulwe ngimimoya yonkhe yetimfundziso tekukhohlisa kwebantfu labanebucili bekudukisa.” (Ef. 4:13, 14) Onkhe emaKhristu kufanele afake sandla kute akhe bunye nalabanye, njengobe nemalunga lehlukene emtimba abambisana nalamanye kute asitane.—Fundza Efesu 4:15, 16.
Tfutfukisa Timfanelo Letinsha Tesimo Sengcondvo
10. Kutiphatsa lokubi ngekwelicasi, kungabusongela njani bunye lesinabo?
10 Unakile yini kutsi sehluko sesine sencwadzi Pawula layibhalela libandla lase-Efesu, siyakhombisa kutsi kubonisa lotsite lutsandvo kuyindlela lehamba embili yekwakha bunye njengemaKhristu lavutsiwe. Iphindze isikhombise kutsi yini lokufanele siyente kute sibe nelutsandvo. Kukhombisa labanye lutsandvo kutawusibangela kutsi sikubalekele kutiphatsa kabi ngekwelicasi kanye nemikhuba lengcolile. Pawula wancenga bazalwane kutsi ‘bangabe basahamba njengalabanye betive.’ Labo bantfu ‘bebabutfuntfu,’ futsi ‘batinikela emanyaleni.’ (Ef. 4:17-19) Lomhlaba lesiphila kuwo lohlanyiswa kutiphatsa lokubi, uyabutsikameta bunye lesinabo. Kutiphatsa lokubi ngekwelicasi bantfu sebakutfola intfo yekudlala, bahlabela ngako, batenetisa ngekukubukela baphindze bakwente ebaleni kala-hha nobe emasitseleni. Ngetulu kwaloko, nekudlala ngelutsandvo wente shengatsi umuntfu lotsite uyamtsandza kodvwa ube ungakatimiseli kumshada, kungabangela kutsi buhlobo bakho naJehova kanye nelibandla bulotse nya. Ngani? Ngobe kungenta kutsi utiphatse kabi ngekwelicasi melula. Ngetulu kwaloko, kudlala ngelutsandvo lokungaze kwente kutsi umuntfu adzimate aphinge, kungaletsa lusizi ebantfwaneni labangehlukana nebatali babo. Kungaletsa lusizi ngisho nakumlingani wemshado longenacala. Vele kuyehlukanisa! Pawula abenesizatfu lesinemandla sekubhala lamavi: “Kepha nine anizange nimfundze Khristu kanjalo.”—Ef. 4:20, 21.
11. LiBhayibheli likhutsata emaKhristu kutsi ente luphi lushintjo?
11 Pawula wagcizelela kutsi kufanele siyijikijele ngelifasitelo imikhuba lemibi, esikhundleni sayo silwele kuba netimfanelo letitawusenta siphile ngekuthula nalabanye. Watsi: “Khumulani umuntfu lomdzala wesimilo sakucala, lose onakala ngetinkhanuko tenkhohliso, [umuntfu lomdzala] nentiwe nibe basha emoyeni nasengcondvweni yenu. Yembatsani umuntfu lomusha, lowadalwa wafuta Nkulunkulu ngekulunga nangebungcwele beliciniso.” (Ef. 4:22-24) Yini lengasenta kutsi ‘sibe basha emoyeni nasetingcondvweni tetfu’? Nasichubeka sizindla ngaloko lesikufundza evini laNkulunkulu, kuhlanganise naloko lesikufundza kumaKhristu lavutsiwe, singaba nebuntfu lobusha ‘lobadalwa bafuta Nkulunkulu wekulunga.’
Tfutfukisa Tindlela Letinsha Tekukhuluma
12. Kungani kukhuluma liciniso kwenta bantfu kutsi babe nebunye, futsi yini lebangela kutsi kube ngumcansa ngalabanye kukhuluma liciniso?
12 Kukhuluma liciniso kuyintfo lebalulekile kubantfu bemndeni kanye nasebandleni. Kucoca nje nikhululekile, kungenta kutsi nibe ngematse nelulwimi. (Joh. 15:15) Kodvwa kutsiwani nangabe lomunye acala emanga ngalomunye umKhristu? Ngalesikhatsi nje lona lobekukhulunywa ngaye emanga eva, kutawuphela kwetsembana emkhatsini wabo. Loku kusenta sisibone sizatfu lesenta Pawula wabhala lamavi: “Akube ngulowo nalowo akhulume liciniso kumzalwane wakhe, ngobe sonkhe singemalunga lomunye kulomunye emtimbeni munye.” (Ef. 4:25) Kukhuluma liciniso kungaba matima kumuntfu lonemlandvo wekucala emanga nobe kulowawamunya ebeleni lenina. Kodvwa Jehova angajabula kakhulu nangabe lowo muntfu afaka umfutfo kute awayekele, futsi angamsita kute akhone kuwayekela.
13. Kufaka ekhatsi ini kulahla inkhulumo lembi?
13 Jehova usifundzisa kutsi sibe nenhlonipho nebunye ebandleni nasemindenini yetfu ngekutsi silawule indlela lesikhuluma ngayo. Pawula watsi: “Akungabe kusaphuma nalinye livi lelibolile emlonyeni wenu . . . Konkhe lokubabako, nelulaka, nekutfukutsela, nemsindvo, nekuhlambalata akususwe kini, kanye nako konkhe lokubi.” (Ef. 4:29, 31) Lenye indlela longabalekela ngayo kukhuluma kabi ngalabanye, kutsi ulwele kubahlonipha. Nasi sibonelo kulendzaba: Indvodza lehlukumeta umfati wayo ngekutsi imkhulumise kabi, nayo kufanele ilwele kuwuyekela loyo mkhuba, ikakhulukati njengobe ifundza kutsi Jehova uyabahlonipha labasikati. Phela Nkulunkulu uze agcobe labanye labasikati ngemoya wakhe longcwele, abanike litsemba lekuba ngemakhosi kanye naKhristu. (Gal. 3:28; 1 Phet. 3:7) Ngendlela lefananako, umfati lonemkhuba wekukhulumisa kabi indvodza yakhe kufanele akuyekele kwenta njalo njengobe afundza ngaloko Jesu lakwenta nakacansulwa ngulabanye.—1 Phet. 2:21-23.
14. Kungani kuyingoti kwehluleka kulawula kutfukutsela?
14 Lokunye lokwenta umuntfu akhulume inkhulumo lembi, kwehluleka kulawula intfukutselo. Kutfukutsela kungehlukanisa bantfu labangematse nelulwimi. Kutfukutsela kufanana nemlilo. Nangabe wehluleka kukulawula, loko kungabanga umonakalo lomkhulu. (Taga 29:22) Umuntfu lokhuluma ngaloko lokumphetse kabi, aketame kulawula kutfukutsela kwakhe kute agweme konakalisa buhlobo lobuligugu nalabanye. EmaKhristu kufanele atsetselele, angabambi emagcubu futsi akubalekele kuhlala akhuluma ngaloko lokuwaphetse kabi. (Hla. 37:8; 103:8, 9; Taga 17:9) Eluleka base-Efesu, umphostoli Pawula watsi: “Tfukutselani, kodvwa ningoni; lilanga lingashoni solomane nitfukutsele. Ningamniki Sathane litfuba.” (Ef. 4:26, 27) Kwehluleka kulawula kutfukutsela kunika Develi litfuba lekuhlanyela kwehlukana kanye nekucabana ebandleni.
15. Kutsatsa tintfo letingasito tetfu kungaba namiphi imiphumela?
15 Kuhlonipha tintfo talabanye, kwenta kutsi kube nebunye ebandleni. LiBhayibheli litsi: “Lisela alingabe liseba.” (Ef. 4:28) Umcondvo wekwetsembana ukhona emkhatsini webantfu baJehova. Nangabe umKhristu atsatsa tintfo letingasito takhe, angabucedza lobo bunye lobujabulisako.
Lutsandvo Lwetfu NgaNkulunkulu Lusenta Sibe Nebunye
16. Singawasebentisa njani emavi lakhako kuze sitfutfukise bunye lesinabo nalabanye?
16 Bunye lobusebandleni lebuKhristu bubangelwa kuba nelutsandvo ngaNkulunkulu. Lolo tsandvo lusenta kutsi siphatse labanye ngelutsandvo. Kujabulela umusa waJehova kusenta sitimisele kute sisebentise nasi seluleko seBhayibheli: ‘[Kukhuluma kwenu] akulungele kwakha njengalokuswelekile, kuze kubavetele umusa labevako. . . . Phatsanani ngebumnene, nihawukelane, nitsetselelane, njengobe naNkulunkulu wanitsetselela ngaKhristu.’ (Ef. 4:29, 32) Jehova uyabatsetselela bantfu labanesono njengatsi. Natsi akukafaneli yini sente lokufananako nasibona emaphutsa alabanye?
17. Kungani kufanele sitimisele kute sitfutfukise bunye?
17 Bunye lobusemkhatsini webantfu baNkulunkulu bukhatimulisa Jehova. Umoya wakhe usenta sifune kutfutfukisa bunye ngetindlela letehlukahlukene. Sonkhe siyafuna kucondziswa ngumoya. Pawula wabhala: ‘Ningawudzabukisi umoya longcwele.’ (Ef. 4:30) Bunye buligugu futsi kufanele sibuvikele. Buletsa injabulo kubo bonkhe labanako, futsi bukhatimulisa Jehova. Pawula watsi: “Njengobe nibantfwana baNkulunkulu, futsi naye anitsandza, yetamani kutsi nibe njengaye. Niphile imphilo yelutsandvo.”—Ef. 5:1, 2.
Ungaphendvula Njani?
• Ngutiphi timfanelo letingatfutfukisa bunye kumaKhristu?
• Indlela lesitiphatsa ngayo, ingabutfutfukisa njani bunye lobusebandleni?
• Indlela lesikhuluma ngayo, ingasisita njani kutsi sibe nebunye nalabanye?
[Imibuto Yesihloko Lesifundvwako]
[Sitfombe ekhasini 20]
Bantfu labamihibahiba, banebunye
[Sitfombe ekhasini 23]
Uyatati yini tingoti tekudlala ngelutsandvo?