Ema kristaun nia unidade fó glória ba Maromak
Ema kristaun nia unidade fó glória ba Maromak
“Halo buat hotu-hotu atu imi bele sai laran ida deʼit iha espíritu.”—EF 4:3.
1. Oinsá mak unidade neʼebé ema kristaun iha Éfezu antigu iha, fó glória ba Maromak?
EMA kristaun iha kongregasaun Éfezu antigu iha unidade, no ida-neʼe fó glória ba Maromak Jeová. Sidade neʼe riku tebes, no iha ema kristaun balu neʼebé riku no iha atan sira, no mós iha ema kristaun balu neʼebé mak serbisu nuʼudar atan no karik kiak tebes. (Ef 6:5, 9) Ema kristaun sira seluk mak ema judeu neʼebé aprende lia-loos husi apóstolu Paulo kuandu nia hanorin iha sira-nia sinagoga durante fulan tolu. Sira seluk tan mak uluk adora maromak falsu Artemis no halo atividade matan-dook nian. (Apos 19:8, 19, 26) Klaru katak hanorin kristaun neʼebé loos dada ema husi situasaun moris nian neʼebé la hanesan atu hamutuk hodi adora Maromak. Paulo rekoñese katak kongregasaun nia unidade fó glória ba Maromak Jeová. Paulo hakerek: “Glória ba nia hori otas ba otas iha kreda.”—Ef 3:21.
2. Saida mak bele estraga ema kristaun nia unidade iha kongregasaun Éfezu?
2 Maibé iha buat ruma neʼebé bele estraga kongregasaun Éfezu nia unidade. Paulo fó avizu ba katuas iha kongregasaun neʼe hodi dehan: “Husi imi rasik, ema balun sei hamriik hodi hateten buat aat oioin atu dada sai eskolante sira ba sira-nia sorin.” (Apos 20:30) No mós, iha ema kristaun balu neʼebé seidauk tau hotu ba kotuk hanoin mundu nian neʼebé bele estraga unidade, no Paulo fó avizu katak hanoin neʼe “book an iha ema ulun-toos sira-nia laran”.—Ef 2:2; 4:22.
Karta ida neʼebé hanorin kona-ba unidade
3, 4. Oinsá mak Paulo nia karta ba ema kristaun iha Éfezu hanorin kona-ba unidade?
3 Paulo rekoñese katak se ema kristaun hakarak kontinua serbí hamutuk iha dame, sira ida-idak tenke ho laran tomak hakaʼas an atu haburas unidade. Maromak haleno Paulo atu hakerek karta ida ba ema kristaun iha Éfezu, no karta neʼe koʼalia liuliu kona-ba unidade. Porezemplu, Paulo hakerek kona-ba Maromak nia hakarak atu “halibur no tau iha Kristu nia liman atu ukun buat hotu iha lalehan no iha rai”. (Ef 1:10) Nia mós kompara ema kristaun kose-mina ho fatuk oioin neʼebé uza atu harii uma ida. Nia dehan: “Uma neʼe, neʼebé sai ida deʼit ona, sai boot daudaun atu sai templu santu ba Maromak Jeová.” (Ef 2:20, 21, MF) Liután neʼe, Paulo hatudu kona-ba unidade entre ema kristaun judeu no ema kristaun neʼebé laʼós judeu, no mós fó-hanoin katak sira hotu iha Kriadór ida deʼit. Nia temi Maromak Jeová nuʼudar Aman tanba liuhusi nia mak “família ida-ida iha lalehan eh iha rai simu nia naran”.—Ef 3:5, 6, 14, 15.
4 Nuʼudar ita haree hamutuk Efeso kapítulu 4, ita sei hatene tansá mak ita presiza hakaʼas an atu iha unidade, oinsá mak Maromak Jeová ajuda ita atu iha unidade, no hanoin ka hahalok saida mak sei ajuda ita atu nafatin iha unidade. Entaun diʼak tebes atu ita ida-idak lee kapítulu neʼe hotu hodi lisaun ida-neʼe bele ajuda no book ita-nia laran.
Presiza hakaʼas an atu iha laran ida deʼit
5. Tanbasá mak Maromak nia anju sira bele serbí nia ho unidade? Tanbasá mak karik susar liu ba ita atu iha unidade?
5 Ho laran Paulo husu ba ninia maluk kristaun iha Éfezu atu ‘halo buat hotu-hotu atu sai laran ida deʼit iha espíritu’. (Ef 4:3) Atu ajuda ita komprende tansá mak ita presiza hakaʼas an atubele iha laran ida deʼit, mai ita hanoin toʼok kona-ba Maromak nia anju sira. La iha kriatura rua iha rai neʼe neʼebé hanesan iha buat hotu, no tan neʼe ita mós bele fiar katak Maromak Jeová kria anju rihun ba rihun ho hahalok no hanoin neʼebé la hanesan. (Dan 7:10) Maibé, sira bele serbí Maromak Jeová ho unidade tanba sira hotu rona nia no halo tuir ninia hakarak. (Lee Salmo 103:20, 21. *) Hanesan anju sira neʼebé laran-metin, ita mós iha hahalok no hanoin neʼebé la hanesan, maibé nuʼudar sala-naʼin ita ema kristaun mós iha fraku oioin. Ida-neʼe bele halo susar liu ba ita atu iha unidade.
6. Hahalok saida mak sei ajuda ita atu serbisu hamutuk iha dame ho ita-nia maluk sira maski ita iha fraku neʼebé la hanesan?
6 Kuandu ema sala-naʼin koko atu serbisu hamutuk, fasil atu susar ruma mosu. Porezemplu, oinsá se irmaun ida neʼebé laran-maus maibé sempre tarde mak serbí hamutuk ho irmaun ida neʼebé nunka tarde maibé fasil atu sai hirus? Karik sira ida-idak hanoin katak nia maluk neʼe nia hahalok la loos no haluha tiha katak nia rasik nia hahalok mós la loos. Oinsá mak irmaun naʼin-rua neʼe bele serbisu hamutuk ho dame? Hanoin toʼok kona-ba hahalok sira neʼebé Paulo temi iha ninia karta neʼebé bele ajuda sira. No tuirmai hanoin oinsá mak ita rasik bele haburas unidade hodi hatudu hahalok sira-neʼe. Paulo hakerek: “[Haʼu] husu imi atu moris loloos . . . tulun malu ho domin, la hodi hanoin imi an rasik, maibé ho laran-kmaus no pasiénsia. Halo buat hotu-hotu atu imi bele sai laran ida deʼit iha espíritu, husi dame neʼebé halibur imi hamutuk.”—Ef 4:1-3.
7. Tanbasá mak importante atu hakaʼas an atu serbí iha unidade hamutuk ho maluk sala-naʼin?
7 Ita tenkesér aprende atu serbí Maromak iha unidade hamutuk ho maluk sala-naʼin tanba iha grupu ida deʼit neʼebé halaʼo adorasaun loos. Bíblia hatete: “Iha isin ida deʼit, espíritu ida deʼit, nuʼudar Maromak bolu imi hotu iha esperansa ida deʼit, wainhira Nia bolu imi. Iha Naʼi ida deʼit, fiar ida deʼit, batizmu ida deʼit, no Maromak ida deʼit. Nia mak ema hotu-hotu nia Aman.” (Ef 4:4-6) Maromak Jeová fó ninia espíritu no bensaun liuhusi deʼit organizasaun ida neʼebé nia uza. Se ema ida iha kongregasaun laran halo ita la kontente duni, ita sei bá loos neʼebé? La iha tan fatin seluk atu ita rona liafuan moris rohan-laek nian.—Joao 6:68.
“Kmanek oioin” neʼebé haburas unidade
8. Saida mak Kristu uza atu haburas unidade iha kongregasaun laran?
8 Paulo uza ai-knanoik ida atu esplika oinsá mak Jesus uza “kmanek oioin”, katak katuas sira, atu haburas unidade iha kongregasaun laran. Soldadu neʼebé manán funu dala ruma lori fali ba sira-nia rai ema dadur atu sai nuʼudar atan atubele ajuda ninia feen halo serbisu uma laran nian. (Sal 68:1, 12, 18) Nuneʼe mós, Jesus neʼebé manán hasoru mundu neʼe hetan ema dadur barak neʼebé hakarak atu sai nia atan. (Lee Efeso 4:7, 8.) Oinsá mak nia uza dadur sira-neʼe? Bíblia hatete: “Nia foti balun nuʼudar apóstolu, balun profeta, balun tan evanjelista no seluk tan bibi-atan no mestre, ba santu sira hotu nia diʼak loloos, ba serbisu ministériu nian no atu harii Kristu nia isin-lolon, toʼo tempu neʼebé ita hotu hetan laran ida deʼit iha fiar.”—Ef 4:11-13.
9. (a) Oinsá mak “kmanek oioin” ajuda ita atu nafatin iha unidade? (b) Tanbasá mak ema kristaun ida-idak tenke haburas unidade iha kongregasaun laran?
9 Nuʼudar bibi-atan neʼebé hadomi nia bibi sira, “kmanek oioin” neʼe ajuda ita atu nafatin iha unidade. Porezemplu, se katuas kongregasaun nian ida haree irmaun naʼin-rua “provoka malu”, nia bele ajuda atu haburas unidade iha kongregasaun laran hodi fó konsellu ba irmaun sira-neʼe atu “lori [sira] ho laran-kmaus ba dalan loos”. (Gal 5:26–6:1) Nuʼudar mestre sira, “kmanek oioin” neʼe mós ajuda ita atu iha fiar neʼebé metin ba hanorin husi Bíblia. Nuneʼe, sira haburas unidade no ajuda ita atu laʼo ba oin iha lia-loos. Paulo hakerek katak ida-neʼe atu ita la sai tan “hanesan labarik deʼit, eh ema ho laran namlele, ema neʼebé anin doutrina oioin nian huu bá huu mai, neʼebé ema lohidór sira bele book ho sira-nia hahalok no matenek aat”. (Ef 4:13, 14) Ema kristaun ida-idak tenke haburas unidade iha Maromak nia povu nia leet, hanesan ita-nia parte isin nian hotu neʼebé apoia malu nuʼudar isin ida deʼit.—Lee Efeso 4:15, 16.
Haburas hahalok foun
10. Oinsá mak hahalok foʼer bele estraga ita-nia unidade?
10 Iha kapítulu 4 husi Paulo nia karta ba ema iha Éfezu, ita bele haree katak hatudu domin mak dalan atu iha unidade nuʼudar ema kristaun. Tuirmai, nia esplika buat barak kona-ba domin neʼe. Porezemplu, hodi halo tuir dalan domin nian ita hasees an husi sala-foʼer no husi halo hahalok foʼer oioin. Paulo fó konsellu ba ninia maluk sira atu “labele moris tan hanesan jentiu sira”. Ema sira-neʼe nia “hanoin iha nakukun laran”, no tan neʼe “sira saran tiha an ba moris neʼebé la hatene moe”. (Ef 4:17-19) Tanba ita moris iha mundu neʼebé nakonu ho hahalok foʼer, ida-neʼe bele estraga ita-nia unidade. Ema halo kómiku kona-ba hahalok sala-foʼer, sira kanta kona-ba neʼe, haree ida-neʼe iha televizaun, no halo hahalok neʼe maski ema hatene ka subasubar deʼit. Tuir loloos, hodi hatudu sentimentu gosta ba ema ida maski ita ladún iha hanoin atu kaben ho nia, ida-neʼe mós bele hadook ita husi Maromak Jeová no ninia kongregasaun. Tanbasá? Tanba hahalok ida-neʼe bele dada ita atu halo sala-foʼer. No mós, se kaben-naʼin ida hatudu sentimentu gosta ba ema neʼebé laʼós ninia kaben, neʼe bele dada nia atu halo sala-foʼer no ninia rezultadu mak ninia oan sira no ninia kaben neʼebé la halo sala bele haketak an husi nia. Sala-foʼer mak hahalok neʼebé halakon duni unidade! Tan neʼe, Paulo hakerek: “Imi hatene katak Kristu la hanesan neʼe.”—Ef 4:20, 21, MF.
11. Bíblia fó laran-manas ba ema kristaun atu halo mudansa saida?
11 Paulo hatete katak ita tenke halakon tiha hanoin no hahalok neʼebé bele estraga unidade no haburas fali hanoin no hahalok neʼebé ajuda ita atu moris ho ema seluk iha dame laran. Nia hakerek: “Husik tiha imi-nia moris tuan nian, neʼebé aat tanba halo tuir hakarak aat sira. Hafoun imi-nia laran ho espíritu no simu tiha ema foun, neʼebé moris mai tuir Maromak nia ilas iha justisa no santidade lia-loos nian.” (Ef 4:22-24) Oinsá mak ita bele ‘hafoun ita-nia laran ho espíritu’? Se ita hafolin no hanoin kleʼan kona-ba buat neʼebé ita aprende husi Maromak nia Liafuan no husi ita-nia maluk kristaun nia ezemplu diʼak, hodi hakaʼas an ita bele sai hanesan ema foun neʼebé kria “tuir Maromak nia ilas”.
Haburas dalan foun atu koʼalia
12. Oinsá mak koʼalia buat neʼebé loos bele haburas unidade? Tanbasá mak susar ba ema balu atu koʼalia buat neʼebé loos?
12 Importante atu koʼalia buat neʼebé loos iha família laran no iha kongregasaun laran. Koʼalia nakloke, no ho laran-diʼak bele halo ema atu sai besik liután ba malu. (Joao 15:15) Maibé oinsá se ema ida koʼalia bosok ba ninia maluk kristaun? Kuandu ninia maluk hatene kona-ba neʼe, ida-neʼe sei hamenus sira-nia fiar ba malu. Tan neʼe mak Paulo hakerek: “Ema ida-ida koʼalia loloos ba malu, basá ema ida-ida liman ain ba malu.” (Ef 4:25) Ema ida neʼebé iha toman atu koʼalia bosok, karik nia iha problema neʼe husi kiʼik kedas, no dala ruma susar ba nia atu sai toman fali atu koʼalia buat neʼebé loos. Maibé Maromak Jeová sei hafolin ninia hakaʼas-an atu troka ninia hahalok no Maromak sei ajuda nia.
13. Hasees an husi koʼalia neʼebé hakanek ema envolve saida?
13 Maromak Jeová hanorin ita atu hatudu respeitu no haburas unidade iha kongregasaun no iha família laran. Nia halo ida-neʼe hodi fó matadalan kona-ba oinsá atu koʼalia ba malu. Bíblia hatete: “Keta husik liafuan aat sai husi imi-nia ibun . . . Hadook tiha husi imi leet laran-moras tomak, laran-hirus, laran-nakali, lia-aat no lia hasoru Maromak no mós laran-dodok.” (Ef 4:29, 31) Dalan ida atu hasees an husi koʼalia neʼebé hakanek ema mak hodi haburas respeitu ba ema seluk. Porezemplu, mane ida neʼebé koʼalia aat ba nia feen tenke hakaʼas an atu troka ninia hanoin kona-ba ninia feen, liuliu bainhira nia aprende liután kona-ba oinsá mak Maromak Jeová hatudu respeitu ba feto sira. Tuir loloos, Maromak kose mina ba feto balu ho espíritu santu, no fó sira oportunidade atu ukun nuʼudar liurai hamutuk ho Kristu. (Gal 3:28; 1 Ped 3:7) Nuneʼe mós, feto ida neʼebé iha toman atu hakilar ba ninia laʼen tenke troka ninia hahalok kuandu nia aprende oinsá Jesus kontrola nia an maski ema provoka nia.—1 Ped 2:21-23.
14. Tanbasá mak perigu atu hatudu sai laran-hirus?
14 Hahalok ida tan neʼebé aat mak la kontrola hirus. Hahalok neʼe mós bele haketak ema. Hirus mak hanesan ahi ida neʼebé susar atu kontrola no bele halakon buat barak. (Prov 29:22) Maski ema ida hanoin katak nia iha direitu atu hatudu sai ninia laran-hirus, maibé importante nafatin atu kontrola ninia hirus hodi la estraga relasaun neʼebé diʼak. Ema kristaun tenke hakaʼas an atu fó perdua ba malu, hodi la rai odi no koʼalia fali kona-ba buat neʼebé akontese. (Sal 37:8; 103:8, 9; Prov 17:9) Paulo fó konsellu ba ema kristaun iha Éfezu, hodi dehan: “Imi hirus karik, keta halo sala; keta husik loron monu ba imi-nia laran-nakali. Keta fó fatin ba Diabu.” (Ef 4:26, 27) Se ema ida la kontrola ninia hirus, ida-neʼe fó oportunidade ba Diabu atu halakon unidade no mós hamosu diskute-malu iha kongregasaun.
15. Foti sasán neʼebé laʼós ita-nian lori rezultadu saida?
15 Hodi hatudu respeitu ba ema seluk nia sasán mós bele haburas unidade iha kongregasaun. Bíblia hatete: “Ema neʼebé uluk naʼok, lalika naʼok tan.” (Ef 4:28) Iha Maromak Jeová nia povu nia leet, ita iha fiar ba malu. Maibé, se ema kristaun ida aproveita ita-nia fiar ba malu hodi foti ninia maluk nia sasán la ho lisensa, ida-neʼe sei estraga ita-nia unidade.
Iha unidade tanba ita hadomi Maromak
16. Oinsá mak ita bele koʼalia iha dalan neʼebé diʼak hodi bele hametin unidade?
16 Kongregasaun kristaun iha unidade tanba ita-nia domin ba Maromak book ita hotu atu hatudu domin ba ema seluk. Hodi hafolin Maromak Jeová nia laran-diʼak, ida-neʼe book ita atu ho laran tomak hakaʼas an atu halo tuir konsellu tuirmai neʼe: “Koʼalia deʼit liafuan neʼebé diʼak atu hametin imi-nia maluk nia fiar, atu nia bele halo diʼak ruma ba sira neʼebé rona nia.” (Ef 4: 29) No mós Bíblia hatutan hodi dehan: “Hatudu laran-diʼak ba malu, hanoin malu ho laran-sadiʼa, fó perdua ba malu ho laran hanesan Maromak mós ho laran fó perdua ba imi liuhusi Kristu.” (Ef 4:32, MF) Maromak Jeová ho laran-diʼak fó perdua ba ita ema sala-naʼin. Tan neʼe ita mós tenkesér fó perdua ba ema seluk kuandu sira halo sala ruma, loos ka lae?
17. Tanbasá mak ita tenke hakaʼas an ho laran tomak atu haburas unidade?
17 Maromak Jeová nia povu nia unidade fó glória ba nia. Ninia espíritu book ita iha dalan oioin atu haburas unidade. Ita hakarak duni atu halo tuir espíritu neʼe nia matadalan. Paulo fó konsellu ida-neʼe: “Keta halo Maromak nia espíritu laran susar.” (Ef 4:30) Unidade mak hanesan rikusoin neʼebé ita tenkesér proteje. Sira neʼebé moris iha unidade sente haksolok no unidade mós fó glória ba Maromak Jeová. Tan neʼe mai ita “banati-tuir Maromak, nuʼudar nia oan doben sira. [No kontinua] laʼo iha domin”.—Ef 5:1, 2.
[Nota–rodapé]
^ par. 5 Salmo 103:20, 21: “Fó glória ba Jeová, oh imi, ninia anju sira neʼebé iha forsa boot, neʼebé halo tuir ninia liafuan, hodi rona ba lian husi ninia liafuan. Fó glória ba Jeová, imi hotu, ninia tropa sira, imi, ninia atan sira, neʼebé halo ninia hakarak.”
Oinsá ita hatán?
• Saida mak bele ajuda ema kristaun atu serbí hamutuk ho dame?
• Hahalok saida deʼit mak bele estraga unidade iha kongregasaun?
• Oinsá mak ita-nia koʼalia ajuda ita atu serbisu hamutuk iha unidade?
[Pergunta estudu nian]
[Dezeñu iha pájina 17]
Ema husi situasaun oioin moris hamutuk ho unidade
[Dezeñu iha pájina 18]
Tanbasá mak perigu atu hatudu sentimentu gosta ba ema neʼebé laʼós ita-nia kaben?