“An Saindong Lider Saro, an Cristo”

“Dai kamo . . . magpaapod na ‘mga lider,’ huli ta an saindong Lider saro, an Cristo.”—MAT. 23:9, 10.

1. Siisay an minimidbid kan Mga Saksi ni Jehova bilang Lider, asin taano?

AN MGA iglesia nin Kakristianohan may mga lider na tawo, arog kan papa sa Roma, asin iba pang lider nin manlaenlaen na iglesia asin relihion. An Mga Saksi ni Jehova mayong minimidbid na tawong lider. Bako sindang disipulo o parasunod nin siisay man na tawo. Kaoyon ini kan hulang sinabi ni Jehova mapadapit sa saiyang Aki: “Uya! Bilang saksi sa mga nasyon sia itinao ko, bilang lider asin komandante sa mga nasyon.” (Isa. 55:4) An internasyonal na kongregasyon nin linahidan na mga Kristiano asin an kairiba nindang “ibang mga karnero” dai na nagmamawot nin ibang lider apuera sa itinao sa sainda ni Jehova. (Juan 10:16) Minaoyon sinda sa sinabi ni Jesus: “An saindong Lider saro, an Cristo.”—Mat. 23:10.

An Espiritung Prinsipe nin Israel

2, 3. Nagkaigwa nin anong aktibong papel sa Israel an Aki nin Dios?

² Dakol na siglo bago maestablisar an Kristianong kongregasyon, igwa si Jehova nin anghel na lider sa saiyang banwaan na Israel. Pagkatapos na iluwas an mga Israelita hale sa Egipto, si Jehova nagsabi sa sainda: “Uya isinusugo ko an sarong anghel sa enotan mo tanganing giyahan ka sa dalan asin darahon ka sa lugar na sakuyang inandam. Magmaan ka huli sa saiya asin kuyogon mo an saiyang tingog. Dai ka magtumang sa saiya, huli ta dai nia papatawadon an saindong paglapas; huli ta an sakuyang ngaran yaon sa saiya.” (Ex. 23:20, 21) Rasonable sanang isipon na an anghel na ini, na ‘sa saiya yaon an ngaran ni Jehova,’ iyo an panganay na Aki nin Dios.

³ Bago mamundag bilang tawo an Aki nin Dios, minalataw na may ngaran siang Miguel. Sa libro nin Daniel, inaapod si Miguel na “prinsipe” kan banwaan ni Daniel, an Israel. (Dan. 10:21) Ipinaparisa ni disipulo Judas na kalabot si Miguel sa mga aktibidad kan Israel haloy pa bago kan panahon ni Daniel. Pagkagadan ni Moises, minalataw na plinano ni Satanas na gamiton an bangkay kaini tanganing sutsutan an Israel na gumibo nin idolatriya. Inolang ini ni Miguel. Si Judas nagsabi: “Kan si Miguel na arkanghel dai nagkakasinabotan kan Diablo asin nakikidiskutir dapit sa hawak ni Moises, dai sia nangahas na maghokom tumang sa saiya sa mapang-abusong  mga pananaram, kundi nagsabi: ‘Sagweon ka logod ni Jehova.’” (Jud. 9) Paghaloyhaloy, bago salikopan an Jerico, mayong duda na si Miguel, na “prinsipe kan hukbo ni Jehova,” an nagpaheling ki Josue tanganing aseguraron ini kan suporta nin Dios. (Basahon an Josue 5:13-15.) Kan an sarong prinsipe na demonyo magprobar na olangon an sarong anghel sa pagpaabot nin importanteng mensahe ki propeta Daniel, tinabangan kan arkanghel na si Miguel an anghel na iyan.—Dan. 10:5-7, 12-14.

Nag-abot an Ihinulang Lider

4. Anong hula an itinao mapadapit sa pag-abot kan Mesiyas?

⁴ Bago kan pangyayaring idto, isinugo ni Jehova an anghel niang si Gabriel tanganing ipaabot ki propeta Daniel an sarong hula mapadapit sa pag-abot kan “Mesiyas na Lider.” (Dan. 9:21-25) * Eksakto nanggad, kan tigrakdag nin 29 C.E., si Jesus binautismohan ni Juan. Ibinubo ki Jesus an banal na espiritu, kaya sia nagin an Linahidan—an Cristo, na Mesiyas. (Mat. 3:13-17; Juan 1:29-34; Gal. 4:4) Huli kaiyan, sia magigin daing kapantay na Lider.

5. Paano si Cristo huminiro bilang Lider durante kan saiyang ministeryo sa daga?

⁵ Poon sa kapinonan kan ministeryo nia sa daga, pinatunayan ni Jesus na sia an “Mesiyas na Lider.” Sa laog nin pira sanang aldaw, pinonan niang magtipon nin mga disipulo, asin ginibo nia an enot niang milagro. (Juan 1:35–2:11) Kaibanan nia an saiyang mga disipulo sa pagduman sa dakol na lugar, na ihinuhulit an maogmang bareta kan Kahadean. (Luc. 8:1) Sinanay nia sinda sa paghuhulit asin nangenot sia sa paghuhulit asin pagtotokdo, na nagpapaheling nin marahay na halimbawa. (Luc. 9:1-6) An Kristianong kamagurangan ngonyan maninigo na arogon sia sa bagay na ini.

6. Sa anong paagi na si Cristo nagin sarong Pastor asin Lider?

⁶ Itinokdo ni Jesus an saro pang aspekto kan saiyang pagigin lider paagi sa pagkomparar nia kan saiyang sadiri sa sarong mamomoton na pastor. An mga pastor sa Sirangan literal na ginigiyahan an mga aripompon ninda. Sa The Land and the Book, si W. M. Thomson nagsurat: “An pastor naeenot, bako sanang tanganing itokdo an dalan, kundi tanganing maheling kun baga praktikal asin ligtas iyan. . . . Paagi sa [saiyang] sogkod pinangengenotan asin ginigiyahan nia an aripompon pasiring sa berdeng mga sabsaban saka iliniligtas sa mga kaiwal kaini.” Sa pagpaheling na sia sarong tunay na Pastor asin Lider, si Jesus nagsabi: “Ako iyo an marahay na pastor; an marahay na pastor minatao kan saiyang kalag para sa mga karnero. An sakong mga karnero naghihinanyog sa sakong tingog, asin midbid ko sinda, patin sinda nagsusunod sa sako.” (Juan 10:11, 27) Siring kan sinabi nia, si Jesus nagadan bilang atang para sa saiyang mga karnero, alagad “ilinangkaw sia [ni Jehova] bilang lider asin paraligtas.”—Gibo 5:31, An Marahay na Bareta Biblia; Heb. 13:20.

Paraataman kan Kristianong Kongregasyon

7. Paagi sa ano pinangangatamanan ni Jesus an Kristianong kongregasyon?

⁷ Kan madali nang magsakat sa langit an binuhay liwat na si Jesus, sinabi nia sa saiyang mga disipulo: “An gabos na autoridad sa langit asin sa daga itinao na sa sako.” (Mat. 28:18) Paagi ki Jesus, itinao ni Jehova an banal na espiritu sa mga disipulo tanganing pakosogon an saindang pagtubod. (Juan 15:26) Ibinubo ni Jesus an espiritung ini sa enot na mga Kristiano kan Pentecostes 33 C.E. (Gibo 2:33) An pagbubong iyan kan banal na espiritu nagin tanda kan pagkaestablisar kan Kristianong kongregasyon. Tinawan ni Jehova nin kapangyarihan an saiyang Aki na magin langitnon na lider kan kongregasyon sa daga. (Basahon an Efeso 1:22; Colosas 1:13, 18.) Ginigiyahan ni Jesus an Kristianong kongregasyon paagi sa banal na espiritu ni Jehova, asin katabang nia an mga anghel na “ipinasakop sa saiya.”—1 Ped. 3:22.

8. Anong grupo sa daga an ginamit ni Jesus kan enot na siglo tanganing giyahan an saiyang mga disipulo, asin siisay an ginagamit nia ngonyan?

⁸ Paagi man sa banal na espiritu, nagtao si Cristo  nin “balaog na mga lalaki,” an nagkapira “bilang mga pastor asin paratokdo” sa kongregasyon. (Efe. 4:8, 11) Sinadol ni apostol Pablo an Kristianong mga paraataman: “Tawan nindo nin atension an saindong sadiri asin an bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios.” (Gibo 20:28) Kan magpoon an Kristianong kongregasyon, an gabos na paraataman na ini mga lalaking linahidan nin espiritu. An mga apostol asin kamagurangan kan kongregasyon nin Jerusalem nagserbing namamahalang grupo. Ginamit ni Cristo an grupong ini tanganing giyahan an bilog na kongregasyon na kompuesto kan linahidan na “mga tugang” nia sa daga. (Heb. 2:11; Gibo 16:4, 5) Sa panahon na ini kan katapusan, ipinagkatiwala ni Cristo an “gabos niang rogaring”—an gabos na daganon na intereses kan Kahadean—sa saiyang “maimbod asin mapagmansay na oripon” saka sa representante kaiyan na Namamahalang Grupo, na kompuesto nin linahidan na Kristianong mga lalaki. (Mat. 24:45-47) Nasasabotan kan mga linahidan asin kan kairiba nindang ibang mga karnero na paagi sa pagsunod sa paggiya kan Namamahalang Grupo sa presenteng panahon, sinda sa katunayan nagsusunod sa saindang Lider, si Cristo.

Pinonan ni Cristo an Paghuhulit

9, 10. Anong mga areglo an ginibo ni Cristo may koneksion sa pagpalakop kan maogmang bareta kan Kahadean?

⁹ Poon sa kapinonan, personalmenteng giniyahan ni Jesus an pambilog na kinaban na paghuhulit asin pagtotokdo. Inestablisar nia an areglo kun paano ipapaabot sa mga nag-iistar sa daga an maogmang bareta kan Kahadean. Durante kan saiyang ministeryo, ininstruksionan nia an saiyang mga apostol: “Dai kamo magduman sa dalan kan mga nasyon, asin dai kamo maglaog sa siudad nin mga Samaritano; kundi, imbes, padagos kamong magduman sa nalagalag na mga karnero kan kamag-anakan nin Israel. Sa pagduman nindo, maghulit kamo, na nagsasabi, ‘An kahadean kan kalangitan harani na.’” (Mat. 10:5-7) Maigot nindang ginibo ini sa mga Judio asin proselito, nangorogna pagkatapos kan Pentecostes 33 C.E.—Gibo 2:4, 5, 10, 11; 5:42; 6:7.

¹⁰ Kan huri, paagi sa banal na espiritu, ipinaabot ni Jesus an paghuhulit kan Kahadean sa mga Samaritano dangan sa iba pang bakong Judio. (Gibo 8:5, 6, 14-17; 10:19-22, 44, 45) Sa katuyohan na ikapalakop an maogmang bareta sa mga nasyon, personalmenteng pinahiro ni Jesus si Saulo nin Tarso tanganing magin Kristiano. Ininstruksionan ni Jesus an saiyang disipulo na si Ananias: “Buhat, pumaduman ka sa kalyeng inaapod na Tanos, asin sa harong ni Judas hanapon mo an sarong tawo na an ngaran Saulo, taga Tarso. . . . Lakaw, huli ta an tawong ini sarong piniling lalagan para sa sako tanganing magdara kan sakong ngaran sa mga nasyon saka sa mga hade asin mga aki ni Israel.” (Gibo 9:3-6, 10, 11, 15) “An tawong ini” nagin si apostol Pablo.—1 Tim. 2:7.

11. Paagi sa banal sa espiritu, paano ni Cristo pinahiwas an paghuhulit?

¹¹ Kan mag-abot an panahon na kaipuhan nang ihulit an Kahadean sa mga nasyon na bakong Judio, giniyahan kan banal na espiritu si Pablo na magmisyonero sa Asia Minor dangan  sagkod sa Europa. An pagkasaysay ni Lucas sa Gibo nagsasabi: “Mantang sinda [an Kristianong mga propeta asin paratokdo sa kongregasyon sa Antioquia sa Siria] hayag na naglilingkod ki Jehova asin nag-aayuno, an banal na espiritu nagsabi: ‘Sa gabos na tawo laena nindo para sa sako si Bernabe asin si Saulo para sa gibohon na pinag-apodan ko sa sainda.’ Dangan sinda nag-ayuno asin namibi asin ipinatong an saindang mga kamot sa sainda patin pinalakaw sinda.” (Gibo 13:2, 3) Personalmenteng inapod ni Jesus si Saulo nin Tarso na magin Saiyang “piniling lalagan” tanganing magdara kan ngaran Nia sa mga nasyon; kaya an bagong pampahiro na ini sa pagpapatotoo naggikan ki Cristo, an Lider kan kongregasyon. An paggamit ni Jesus kan banal na espiritu tanganing giyahan an gibohon nagin malinaw nanggad durante kan ikaduwang pagbiahe ni Pablo bilang misyonero. An pagkasaysay nagsasabi na an “espiritu ni Jesus,” an boot sabihon, si Jesus paagi sa banal na espiritu, naggiya ki Pablo asin sa kairiba kaini sa pagbiahe kun noarin asin kun saen sinda maduman, asin sarong bisyon an naggiya sa sainda na magpasiring sa Europa.—Basahon an Gibo 16:6-10.

An Pangengenot ni Jesus sa Kongregasyon Nia

12, 13. Paano ipinapaheling kan libro nin Kapahayagan na maingat na sinusubaybayan ni Cristo an nangyayari sa lambang kongregasyon?

¹² Maingat na sinubaybayan ni Jesus an nangyayari sa laog kan mga kongregasyon kan saiyang linahidan na mga parasunod kan enot na siglo C.E. Aram niang marhay an espirituwal na kamugtakan kan lambang kongregasyon. Maririsa ini kun babasahon niato an Kapahayagan kapitulo 2 asin 3. Pitong kongregasyon an nasambitan nia, na yaon gabos sa Asia Minor. (Kap. 1:11) Rasonable kitang makakapagkongklusyon na arog man sia kaiyan kapamilyar sa espirituwal na kamugtakan kan iba pang kongregasyon kan saiyang mga parasunod sa daga kan panahon na idto.—Basahon an Kapahayagan 2:23.

¹³ Kinomendaran ni Jesus an nagkapira sa mga kongregasyon huli sa saindang pakatagal, kaimbodan sa ibong nin pagbalo, pagigin maimbod sa saiyang tataramon, asin pagsikwal sa mga apostata. (Kap. 2:2, 9, 13, 19; 3:8) Sa ibong na lado, marigon na naghatol si Jesus sa nagkapirang kongregasyon huling nawara na an saindang pagkamoot sa saiya asin kinonsinte ninda an idolatriya, pakikisaro, asin sektaryanismo. (Kap. 2:4, 14, 15, 20; 3:15, 16) Bilang mamomoton na espiritung paraataman—dawa sa mga tinawan nia nin mapuersang konseho—si Jesus nagsabi: “An gabos na padangat ko sinasagwe ko asin dinidisiplina. Kun siring magmaigot ka asin magsolsol.” (Kap. 3:19) Minsan ngani nasa langit, ginigiyahan ni Jesus an mga kongregasyon kan saiyang mga disipulo sa daga paagi sa banal na espiritu. Sa pagtatapos kan mga mensahe sa mga kongregasyon na idto, sinabi nia: “An may talinga magdangog sa sinasabi kan espiritu sa mga kongregasyon.”—Kap. 3:22.

14-16. (a) Paano si Jesus nagin makosog an boot na Lider sa banwaan ni Jehova sa daga? (b) Ano an resulta huling si Jesus “kaiba” kan saiyang mga disipulo “sa gabos na aldaw sagkod sa pagtatapos kan sistema nin mga bagay”? (c) Ano an sisiyasaton niato sa sunod na artikulo?

¹⁴ Naheling niato na si Miguel (si Jesus) nagin pusoan na anghel na Lider sa Israel. Kan huri, si Jesus nagin makosog an boot na Lider asin mamomoton na Pastor kan saiyang enot na mga disipulo. Durante kan saiyang ministeryo sa daga, pinangenotan nia an paghuhulit. Asin pagkatapos na buhayon sia liwat, maingat niang pinangatamanan  an pagpalakop kan maogmang bareta kan Kahadean.

¹⁵ Paagi sa banal na espiritu, ipapaabot ni Jesus an pagpapatotoo sagkod sa mga poro kan daga. Bago magsakat sa langit, sinabi ni Jesus sa saiyang mga disipulo: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.” (Gibo 1:8; basahon an 1 Pedro 1:12.) Sa paggiya ni Cristo, pambihirang patotoo an ikinatao kan enot na siglo.—Col. 1:23.

¹⁶ Alagad ipinarisa mismo ni Jesus na magpapadagos an gibohon na ini sagkod sa panahon kan katapusan. Pagkasugo sa saiyang mga parasunod na maghulit asin maggibo nin mga disipulo sa gabos na nasyon, nanuga si Jesus sa sainda: “Ako kaiba nindo sa gabos na aldaw sagkod sa pagtatapos kan sistema nin mga bagay.” (Mat. 28:19, 20) Poon kan tawan nin kapangyarihan bilang hade kan 1914, ngonyan orog kisa kasuarin man si Jesus “kaiba” kan saiyang mga disipulo asin aktibo bilang saindang Lider. Sisiyasaton sa sunod na artikulo an dakol niang ginigibo poon kan 1914.

[Nota sa Ibaba]

Bilang Repaso

• Paano an Aki nin Dios nagin aktibong Lider sa Israel?

• Sa anong paagi ginigiyahan ni Cristo an saiyang kongregasyon sa daga?

• Paano ginigiyahan ni Cristo an pagpalakop kan maogmang bareta?

• Ano an nagpapaheling na maingat na sinusubaybayan ni Cristo an espirituwal na kamugtakan kan lambang kongregasyon?

[Mga Hapot Para sa Pag-adal]

[Ritrato sa pahina 21]

“Isinusugo ko an anghel sa enotan mo”

[Ritrato sa pahina 23]

Arog kan nakaagi, ginagamit ni Cristo an “balaog na mga lalaki” tanganing pastoran an aripompon nia