“Zot annan en sel ‘Sef’, limenm Mesi”

“Pa fer apel zot ‘sef’ akoz zot annan en sel ‘Sef’, limenm Mesi.”—MAT. 23:9, 10.

1. Lekel ki Temwen Zeova i rekonnet konman zot Sef e akoz?

DAN bann larelizyon Kretyen, bann imen ki sef. Par egzanp, lepap an Ronm, bann patrias dan larelizyon Ortodoks e lezot larelizyon, zot osi zot annan zot sef. Temwen Zeova pa konsider okenn imen konman zot sef. Zot pa swiv okenn imen. Sa i anliny avek sa parol profetik ki Zeova ti dir konsernan son Garson: “Gete! Mon’n donn li konman temwen pour bann pep, konman en gid ek en komandan pour bann pep.” (Iza. 55:4) Bann Kretyen swazir dan lemonn antye, ensi ki zot konpanyon “lezot mouton” pa oule okenn sef apard sa enn ki Zeova in donn zot. (Zan 10:16, NW) Zot siport parol Zezi ki dir: “Zot annan en sel ‘Sef’, limenm Mesi.”—Mat. 23:10.

Prens Izrael

2, 3. Ki rol Garson Bondye ti zwe Izrael?

² Plizyer syek avan ki kongregasyon Kretyen ti ganny formen, Zeova ti servi en lanz pour gid son pep, Izrael. Apre ki i ti’n fer bann Izraelit sorti Lezip, Zeova ti dir zot: “La, mon pe anvoy en lanz par devan ou pour kit ou lo sa semen e anmenn ou dan sa landrwa ki mon’n prepare. Fer byen atansyon ou mannyer azir devan li e ekout li. Pa azir dan en fason rebel anver li akoz sinon i pa pou pardonn ou ou lofans; akoz i port mon non.” (Egz. 23:20, 21) I rezonnab pour krwar ki sa lanz ki ti ‘port non Zeova’ ti son Garson premye ne.

³ Avan menm ki i ti ne konman en imen, aparaman Garson Bondye ti annan sa non Misel oubyen Mikael. Dan liv Danyel, Misel i ganny apele “prens pep [Danyel],” setadir prens Izrael. (Dan. 10:21) Disip Zid ti endike ki Misel ti enplike dan bann keksoz ki ti annan pour fer avek Izrael depi byen byen lontan avan lepok Danyel. Apre ki Moiz ti mor, aparaman Satan ti annan lentansyon servi lekor mor Moiz dan kek fason pour son prop lentere, tre pro bab i ti anvi ensit bann Izraelit pour komet idolatri. Misel ti entervenir pour anpes sa arive. Zid i dir: “Dan son diskisyon avek dyab konsernan lekor Moiz, Misel pa ti oze kondann dyab avek bann parol lensilt, me selman i ti dir: ‘Ki Senyer i pini ou.’” (Zid 9) Pa tro bokou letan pli tar, avan ki lavil Zeriko ti ganny atake, ti san okenn dout Misel, “prens larme Zeova,” ki ti aparet avek Zozye pour reasir li ki Bondye ti pou dan son kote. (Lir Zozye 5:13-15. *) Kan en demon pwisan ti esey anpes en lanz anmenn en mesaz enportan kot profet Danyel, Misel sa arkanz ti vin delivre sa lanz.—Dan. 10:5-7, 12-14.

Sa Sef ki ti ganny predir i vini

4. Ki profesi ki koz konsernan larive Mesi?

⁴ Avan ki sa lensidan ti arive, Zeova ti’n anvoy lanz Gabriyel kot profet Danyel pour transmet li sa profesi konsernan “Mesi sa Gid” ki ti pou vini. (Dan. 9:21-25) * Sa profesi ti ganny akonplir zis dan sa letan egzakt ki ti tonm lannen 29 N.L., kan Zan ti batiz Zezi. Zezi ti resevwar lespri sen sa zour e i ti vin sa Enn ki ti ganny swazir, setadir Kris, sa Mesi. (Mat. 3:13-17; Zan 1:29-34; Gal. 4:4) I ti pou napa okenn lot Sef ki ti pou parey li konman sa Mesi.

5. Ki mannyer Kris ti azir konman en Gid oubyen Sef pandan son minister lo later?

⁵ Depi o konmansman son minister lo later, Zezi ti prouve ki i ti “Mesi sa Gid.” Detrwa zour apre ki i ti’n konmans son minister, i ti konmans rasanble son bann disip e i ti fer son premye mirak. (Zan 1:35–2:11) Son bann disip ti swiv li partou kot i ti vwayaze atraver sa pei pour pres sa bon nouvel lo Rwayonm. (Lik 8:1) I ti montre zot konman pour prese e i ti kit en bon legzanp pour zot swiv an rapor avek predikasyon ek lansennyman. (Lik 9:1-6) Bann ansyen ozordi i devret imit li dan sa domenn.

6. Dan ki fason Kris ti prouve ki i en Berze ek Sef?

⁶ Zezi ti fer resorti en lot laspe konsernan son rol konman Sef par konpar li avek en berze ranpli avek lanmour. Bann berze dan pei Les i vreman gid zot troupo. Dan sa liv The Land and the Book, William Thomson ti ekrir: “Bann berze i pas devan [zot troupo mouton], pa zis pour montre zot semen, me pour vwar si sa semen i kler e napa okenn danze. . . . I servi [son] baton pour konmann e gid sa troupo kot i annan zerb ver e protez zot kont zot bann lennmi.” Pour montre ki i en vre Berze ek Sef, Zezi ti dir: “Mwanmenm bon berze. Bon berze i donn son lavi pour son bann mouton. Mon bann mouton i ekout mon lavwa, mon konn zot e zot swiv mwan.” (Zan 10:11, 27) Parey i ti dir, Zezi ti mor konman en sakrifis pour son bann mouton, me Zeova ti “etabli [li] konman Sef ek Sover.”—Akt 5:31, Ebr. 13:20.

I sirvey kongregasyon Kretyen

7. Par ki fason Zezi i sirvey kongregasyon Kretyen?

⁷ Zis avan ki i mont dan lesyel apre ki i ti’n resisite, Zezi ti dir son bann disip: “Mon’n ganny tou pouvwar dan lesyel ek lo later.” (Mat. 28:18) Zeova ti fer Zezi vers lespri sen lo son bann disip pour fortifye zot lafwa dan bann lansennyman Kretyen. (Zan 15:26) Zezi ti vers lespri sen lo bann premye Kretyen zour Lapannkot lannen 33 N.L. (Akt 2:33) Lefet ki lespri sen ti pe ganny verse, sa i en laprev ki kongregasyon Kretyen ti pe ganny formen. Zeova ti donn son Garson lotorite dan lesyel lo bann kongregasyon ki lo  later. (Lir Efezyen 1:22; Kolosyen 1:13, 18.) Zezi i gid kongregasyon Kretyen atraver lespri sen Zeova e i osi servi bann lanz ki’n “ganny soumet avek li.”—1 Pyer 3:22.

8. Lekel ki Kris ti servi dan premye syek pour gid son bann disip e lekel ki i pe servi ozordi?

⁸ Atraver lespri sen, Kris ti osi donn “bann zonm konman kado,” serten i annan responsabilite “konman ansenyan ek berze” dan kongregasyon. (Efe. 4:8, 11, NW) Zapot Pol ti ankouraz bann sirveyan: “Vey byen zot lekor e pran swen troupo ki Sent-Espri in konfye zot konman bann gardyen. Pran swen [“kongregasyon,” NW] ki Bondye in gannyen par disan son prop Garson.” (Akt 20:28) Ler kongregasyon Kretyen ti konmanse, tou sa bann sirveyan ti bann zonm ki ti’n ganny swazir par lespri sen. Bann zapot ek ansyen ti lo konsey direkter Zerizalenm. Kris ti servi sa konsey direkter pour gid tou son bann “frer” swazir lo later. (Ebr. 2:11; Akt 16:4, 5) Dan sa letan lafen, Kris in konfye “tou son byen,” setadir tou bann keksoz ki relye avek lentere Rwayonm isi lo later, avek son “lesklav fidel e pridan” ek son reprezantan Konsey Direkter, ki en group zonm ki bann Kretyen swazir. (Mat. 24:45-47, NW) Sa bann Kretyen swazir ek zot konpanyon lezot mouton i rekonnet ki ler zot swiv gidans Konsey Direkter dan nou letan, zot an realite pe swiv zot Sef, Kris.

Kris ti konmans travay predikasyon

9, 10. Ki mannyer Kris ti diriz keksoz pour ki sa bon nouvel lo Rwayonm i ganny anonse?

⁹ Depi o konmansman, Zezi ti personnelman diriz sa travay predikasyon ek lansennyman dan lemonn antye. I ti etablir en lord dan lafason ki sa bon nouvel Rwayonm ti pou ganny anonse avek bann zabitan later. Pandan son minister, i ti donn son bann zapot sa lenstriksyon: “Pa bezwen al kot bann non-Zwif ni dan bann lavil Samari. Al plito, kot bann brebi egare pep Izrael. Ale, e prese ki, ‘Rwayonm lesyel i pros!’” (Mat. 10:5-7) Sirtou apre Lapannkot lannen 33 N.L., sanmenm ki zot ti fer avek devouman parmi bann Zwif ek bann ki ti’n konverti dan larelizyon Zwif.—Akt 2:4, 5, 10, 11; 5:42; 6:7.

¹⁰ Pli tar, atraver lespri sen ek gidans Zezi, predikasyon ti ganny fer avek bann ­Samariten e apre avek bann dimoun ki pa ti Zwif. (Akt 8:5, 6, 14-17; 10:19-22, 44, 45) Avek lentansyon ki sa bon nouvel i ganny anonse parmi bann nasyon, Zezi ti personnelman motiv Sol sorti Tars pour vin en Kretyen. Zezi ti donn Ananyas son disip sa lenstriksyon: “Al tou deswit dan semen ki apel Drwat, e dan lakaz Zida demande pour war en zonm ki apel Sol e ki sorti Tars. . . . Ale, akoz mon’n swazir sa zonm e mon pou servi li pour fer tou bann nasyon ek bann lerwa ek pep Izrael konn mwan.” (Akt 9:3-6, 10, 11, 15) “Sa zonm” ti pli tar vin zapot Pol.—1 Tim. 2:7.

11. Ki mannyer Kris ti servi lespri sen pour ki sa travay predikasyon i propaze dan plizyer landrwa?

 ¹¹ Ler ti’n ariv letan pour sa bon nouvel ganny prese avek bann nasyon ki pa ti Zwif, Pol ti ganny gidans sorti dan lesyel pour fer bann vwayaz misyonner dan Lazi Miner ek Lerop. Sa resi dan liv Akt ki Lik ti ekrir i dir: “En zour, letan zot [bann Kretyen ki ti profet ek ansenyan dan kongregasyon Antyos ki kapital Siri] ti pe ador Senyer e [“zennen,” NW], Sent-Espri ti dir, ‘Met Barnabas ek Sol apar, mon’n swazir zot pour akonpli sa misyon pour mwan.’ Alor zot ti priye e zennen; apre, bann zapot ti enpoz lanmen lo zot e les zot ale.” (Akt 13:2, 3) Zezi ti personnelman swazir Sol sorti Tars e “servi li” pour fer tou bann nasyon konn Li. Alor Kris, Sef kongregasyon ki ti par deryer sa travay predikasyon. I ti klerman evidan ki Zezi ti servi lespri sen pour diriz sa travay pandan dezyenm vwayaz misyonner ki Pol ti fer. Sa resi i dir ki “Lespri Zezi” setadir atraver led lespri sen, Zezi ti gid Pol ek son bann konpanyon dan teritwar kot zot ti pou ale, e dan en vizyon zot ti ganny demande pour al Lerop.—Lir Akt 16:6-10.

Lotorite Zezi lo son kongregasyon

12, 13. Ki mannyer liv Revelasyon i montre ki Kris pe sirvey atantivman sa ki pe pase dan sak kongregasyon?

¹² Zezi ti pe obzerv byen sa ki ti pe pase dan bann kongregasyon son bann disip swazir dan premye syek N.L. I ti konn tre byen kondisyon spirityel sak kongregasyon. Nou remark sa byen kan nou lir Revelasyon sapit 2 ek 3. I ti mansyonn set kongregasyon par zot non, e tou sa bann kongregasyon ti dan Lazi Miner. (Rev. 1:11) Nou annan tou rezon pour krwar ki i ti byen okouran kondisyon spirityel son bann disip dan lezot kongregasyon lo later sa letan.—Lir Revelasyon 2:23.

¹³ Zezi ti felisit serten kongregasyon pour zot landirans, zot fidelite malgre leprev, lefet ki zot ti reste atase avek son parol e osi lefet ki zot ti rezet bann aposta. (Rev. 2:2, 9, 13, 19; 3:8) De lot kote, i ti donn konsey serye detrwa kongregasyon akoz zot lanmour pour li ti’n diminyen, zot ti pe toler idolatri, limoralite seksyel ek bann fo lansennyman. (Rev. 2:4, 14, 15, 20; 3:15, 16) Konman en sirveyan ranpli avek lanmour, menm avek bann dimoun ki i ti konseye severman, Zezi ti dir: “Tou sa bann ki mon kontan, mon reprimann e mon koriz zot. Ou bezwen ganny bokou lantousyas, e sanz ou konportman.” (Rev. 3:19) Menm si i dan lesyel, Zezi ti diriz son bann disip dan kongregasyon lo later atraver lespri sen. Ver lafen son mesaz pour sa bann kongregasyon, i ti dir: “Sa ki annan zorey, ekout sa ki Lespri i dir avek bann [“kongregasyon,” NW].”—Rev. 3:22.

14-16. (a) Dan ki fason Zezi ti montre ki i en Sef kouraze pour pep Zeova lo later? (b) Lefet ki Zezi i “avek” son bann disip toulezour ziska konklizyon sa sistenm. Ki rezilta sa in anmennen? (c) Ki nou pou egzaminen dan lartik swivan?

¹⁴ Nou’n vwar ki Misel (Zezi) ti prouve ki i ti sa lanz kouraze ki ti Sef nasyon Izrael. Pli tar, Zezi ti en Sef kouraze ek en Berze ranpli avek lanmour pour son bann premye disip. Pandan son minister lo later, i ti diriz sa travay predikasyon. Apre son rezireksyon i ti  sirvey atantivman sa travay ki ti pe ganny fer pour ki sa bon nouvel lo Rwayonm i propaze.

¹⁵ Atraver lespri sen, Zezi ti pou finalman fer ki sa travay predikasyon i ganny fer ziska bann landrwa pli lwen lo later. Avan ki i ti mont dan lesyel, Zezi ti dir son bann disip: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8; lir 1 Pyer 1:12.) Anba gidans Kris, en gran temwannyaz ti ganny donnen dan premye syek.—Kol. 1:23.

¹⁶ Me Zezi ti dir ki sa travay ti pou kontinyen ziska letan lafen. Apre ki i ti’n demann son disip pour al prese e fer disip parmi bann nasyon, Zezi ti promet zot: “Mwan mon avek zot toulezour, ziska lafen.” (Mat. 28:19, 20) Depi ki i’n ganny pouvwar konman Lerwa an 1914, plis ki zanmen oparavan, Kris i “avek” son bann disip e i pe kontinyen travay konman zot Sef. Bann keksoz ekstraordiner ki i’n fer depi 1914 pou ganny egzaminen dan lot lartik.

[Not anba lo paz]

Revizyon

• Konman Garson Bondye ti prouve ki i en Sef ki kontinyen gid pep Izrael?

• Lekel Zezi i servi pour diriz son kongregasyon lo later?

• Ki mannyer Kris in gid sa travay predikasyon pour ki i propaze?

• Kwa ki montre ki Kris pe sirvey atantivman kondisyon spirityel sak kongregasyon?

[Kestyon]

[Portre lo paz 24]

“Mon pe anvoy en lanz par devan ou”

[Portre lo paz 26]

Parey dan lepase, Kris i servi “bann zonm konman kado” pour pran swen avek son troupo