‘Pende Ruvicha ningo peteĩnte, haʼehína Cristo’

‘Ani peheja avave heʼi peẽme “che ruvicha”. Pende Ruvicha ningo peteĩnte, haʼehína Cristo.’ (MAT. 23:10, NM)

1. Mávapa testigos de Jehová Ruvicha, ha mbaʼérepa?

 HETA rrelihión heʼíramo jepe ojeroviaha Jesús rehe, omombaʼe kuimbaʼépente. Pór ehémplo oñemombaʼe umi paʼi, el pápa ha ambue tapicha omoakãvape rrelihión. Testigos de Jehovápe katu nomoakãi hapicha yvypóra, haʼekuéra osegi Ñandejára Raʼýpe. Mbaʼérepa? Jehová voi heʼivaʼekue Jesús rehe: ‘Che ahenói ha amoĩ chupe testígoramo, mburuvicha ha mboʼeháraramo tetãnguérape g̃uarã’ (Isa. 55:4, ÑÑB). Upéicharõ, entéro kongregasión oĩva ko yvy ape ári, tahaʼe umi unhído térã ‘ambue ovechakuéra’, oheja Jesús añoite omoakã chupekuéra, pe Mburuvicha Jehová oiporavovaʼekue (Juan 10:16). Jesús heʼi porã hemimboʼekuérape: ‘Pende Ruvicha ningo peteĩnte, haʼehína Cristo’ (Mat. 23:10, NM).

Pe ánhel oñangarekóva tetã Israel rehe

2, 3. Mbaʼéichapa Ñandejára Raʼy oñangareko Israel rehe?

² Yma oĩ mboyve pe kongregasión kristiána, Jehová omoĩ peteĩ ánhel oñangareko hag̃ua ipuévlore. Haʼe oguenohẽ rire umi Israelguápe Egíptogui heʼi chupekuéra: ‘Péina amondóta peteĩ ánhel pene renonderã, penemoirũ ha penemog̃uahẽ hag̃ua upe lugár ambosakoʼívape peẽme g̃uarã. Pejapo heʼíva ha ani pembohovái chupe. Cháke haʼe ojapohína opa mbaʼe cherérape, ha ndohejareimoʼãi pene rembiapo vaikue’ (Éxo. 23:20, 21). Mávapa rakaʼe upe ánhel? Jehová ningo heʼi hese: “Ojapohína opa mbaʼe cherérape”, upévare jaʼekuaa upe ánhel haʼeha Itaʼýra peteĩete.

³ Ou mboyve ko yvy ape ári, Ñandejára Raʼýpe oñehenoivaʼekue Miguel. Daniel kuatiañeʼẽme heʼi hese: ‘Ñandejára remimbou Miguel, Israel rehe oñangarekóva’ (Dan. 10:21). Ha Judas kuatiañeʼẽme oñemombeʼu yma guivéma voi Miguel oñangareko hague Ñandejára puévlore. Pór ehémplo  Moisés omanórõ guare, Satanás oiporusevaʼekue hetekue, amalisia umi Israelgua omombaʼeguasu hag̃ua upéva. Péro Miguel ndohejái Satanás ojapo upéicha. Judas omombeʼu: ‘Miguel, umi ánhel Ruvicha oñorairõrõ guare Moisés retekue rehe Satanás ndive, ndohovaʼapíri chupe, heʼínte: “Ejecha Ñandejárandi”’ (Jud. 9, ÑÑB). Upe rire, umi Israelgua ojagarra mboyvemi táva Jericó, pe ‘Israel rehe oñangarekóva’, térã Miguel oñeʼẽ Josué ndive ha heʼi chupe Ñandejára oĩha hendive (jaleemína Josué 5:13-15). Upéi proféta Daniel tiémpope peteĩ ánhel oguerahárõ guare marandu iñimportánteva Daniélpe, peteĩ demónio ipoderosoitereíva ojokose chupe. Upévo arkánhel Miguel ou oipytyvõ upe ánhelpe (Dan. 10:5-7, 12-14).

Oiko chugui ñande Ruvicha oñepromete haguéicha

4. Mbaʼépa ojekuaauka Daniélpe?

⁴ Ánhel Gabriel rupive Jehová oikuaaukavaʼekue Daniélpe mbaʼe tiémpopepa og̃uahẽvaʼerã ‘Mesías, pe Mburuvicha guasu’ (Dan. 9:21-25, ÑÑB). * Upéi pe profesía heʼi haguéicha, áño 29 opakuévoma Jesús ojevautisa ha henyhẽ espíritu sántogui. Ha oiko chugui pe Mesías térã Cristo, Ñandejára Rembiporavo (Mat. 3:13-17; Juan 1:29-34; Gál. 4:4). Ha oñepromete haguéicha, oiko chugui ñande Ruvicha ijojahaʼỹva.

5. Mbaʼéichapa Jesús ohechauka haʼeha peteĩ Mburuvicha ikatupyrýva?

⁵ Jesucristo oñepyrũ guive opredika ohechauka haʼeha ‘Mesías, pe Mburuvicha ikatupyrýva’. Ojevautisa riremínte oñepyrũ ombyaty idisipulorã ha ojapo pe primer milágro (Juan 1:35–2:11). Ha upéi hemimboʼekuérandima omombeʼu marandu porã Israel rupi (Luc. 8:1). Jesús ndahaʼéi heʼínteva chupekuéra opredika ha oporomboʼe hag̃ua, síno Haʼe voi ohechauka mbaʼéichapa ojapovaʼerã hikuái upe tembiapo (Luc. 9:1-6). Upéva hína peteĩ ehémplo umi ansiánope g̃uarã.

6. Mbaʼéichapa Jesús ohechauka haʼeha pe Ovecha rerekua imbaʼeporãva?

⁶ Jesús heʼi avei haʼeha pe Ovecha rerekua imbaʼeporãva. Medio Oriéntepe umi ovecha rerekua ojepokuaámi oguata ijovechakuéra renonderã. Peteĩ karai ohai: “Umi ovecha rerekua ndahaʼéi ohónteva tenonde ohechauka hag̃ua umi ovechápe moõ gotyopa ohovaʼerã, síno ohecha hag̃ua iporãpa upe tape ha ndaipeligrósoipa. [...] Oiporu peteĩ yvyra oñangareko hag̃ua ijovechakuérare pono umi mymba ñarõ ojapo hesekuéra mbaʼe vai. Ha ogueraha chupekuéra oĩháme kapiʼipe hovyũ asýva”. (The Land and the Book [La tierra y el libro], de William M. Thomson.) Añetehápe Jesús haʼevaʼekue peteĩ Ovecha rerekua imbaʼeporãva. Upévare heʼi: ‘Che haʼe pe Ovecha rerekua imbaʼeporãva. Pe ovecha rerekua imbaʼeporãva ningo omeʼẽ hekove ijovechakuéra rehe. Che ovechakuéra ohendu che ñeʼẽ, ha che aikuaa chupekuéra ha haʼekuéra oho che rapykuéri’ (Juan 10:11, 27, BNP). Ha omeʼẽvo hekove ñanderehehápe, Jesús ohechauka nopyrũiha iñeʼẽre, ojapo heʼi hagueichaite. Upéi Jehová omoingove jey Jesúspe ha omoĩ chupe ‘ñande Salvadór ha ñande Ruvicha guasúramo’ (Hech. 5:31; Heb. 13:20).

Ojesareko kongregasión rehe

7. Mbaʼe mbaʼérepa Jesús ojevale oisãmbyhy hag̃ua kongregasión?

⁷ Jesúspe oñemoingove jey rire ha oho mboyvemi yvágape Itúva rendápe, heʼi hemimboʼekuérape: ‘Opa mbaʼe oĩva yvága ha yvýpe oñemoĩ che poguýpe’ (Mat. 28:18, NM). Jehová oiporu itaʼýrape omeʼẽ hag̃ua espíritu sánto hembiguaikuérape ijerovia mbarete hag̃ua (Juan 15:26). Jesús ojapo upéva Pentecostés áño 33-pe, hemimboʼekuéra henyhẽrõ guare espíritu sántogui. Upéicha oñepyrũ pe kongregasión kristiána  (Hech. 2:33). Avei Jehová omoĩ Jesúspe omoakã hag̃ua kongregasión (jaleemína Efesios 1:22 ha Colosenses 1:13, 18). Ha yvága guive haʼe oisãmbyhyhína kongregasión. Upearã ojevale espíritu sánto ha anhelkuéra rehe, koʼãvape ‘oñemoĩmba avei ipoguýpe’ (1 Ped. 3:22, BNP).

8. Mbaʼéichapa Jesús yma omoakã hembiguaikuérape, ha mávapepa omoĩ koʼág̃a?

⁸ Cristo oiporu avei espíritu sánto omoĩ hag̃ua kuimbaʼe ikatupyrývape oñangareko hag̃ua kongregasión rehe. Umíva apytépe oĩ oservíva ‘ovecha rerekuáramo ha ambue katu mboʼeháraramo’ (Efe. 4:8, 11, ÑÑB). Apóstol Pablo oñemoñeʼẽrõ guare umi ansiánope heʼi: ‘Peñangareko pendejehe, ha opa ovecha atýre espíritu sánto penemoĩ haguépe herekuáramo. Peñangareko Jesucristo kongregasiónre, haʼe ojoguavaʼekue huguýre’ (Hech. 20:28). Upe tiémpope ningo enterovete umi ansiáno unhído vaʼekue. Ha Jesús oiporavo ijapyteguikuéra peteĩ grúpo omoakã hag̃ua entéro unhído oĩvape ko yvy ape ári. Ko grúpope oĩ apóstol ha ansiáno Jerusalengua (Heb. 2:11; Hech. 16:4, 5). Ko ára pahápe katu Jesús ‘omoĩ opa mbaʼe orekóva’ ko yvy ape ári ‘tembiguái jeroviaha’ ha Cuerpo Gobernante poguýpe. Pe Cuerpo Gobernante haʼehína peteĩ grúpo orrepresentáva umi unhídope (Mat. 24:45-47). Koʼã ohótava yvágape ha ambue ovechakuéra ohechakuaa, iñeʼẽrendúvo pe Cuerpo Gobernante-pe ojapoha ñande Ruvicha Jesucristo heʼíva.

Omoñepyrũ predikasión

9, 10. Mbaʼépa ojapo Jesucristo oñemombeʼu hag̃ua ohóvo pe marandu porã?

⁹ Jesús oñepyrũ guive opredika ha omboʼe umi héntepe, omoakã upe tembiapo. Heʼi mbaʼéichapa oñemombeʼuvaʼerã ohóvo pe marandu porã ko múndo tuichakuére. Ha peteĩ jey omondórõ guare umi hemimboʼépe opredika hag̃ua heʼi chupekuéra: ‘Aníkena peho tetã ambue gotyo, ha ani peike umi táva oĩva Samáriape. Tapeho guei umi Israelgua rendápe, oikóva ovecha herekuaʼỹvaicha. Tapeho pepredika ha peje: “Pe rréino yvagapegua hiʼag̃uíma”’ (Mat. 10:5-7, NM). Haʼekuéra ojapo Jesús heʼi haguéicha ha kyreʼỹme opredika umi hudío ha umi osegívape hudiokuéra rrelihión. Ha koʼýte opredika hikuái áño 33 guive (Hech. 2:4, 5, 10, 11; 5:42; 6:7).

¹⁰ Upe rire Jesús oiporu pe espíritu sánto ojepredika hag̃ua hetavépe. Tenonderã oñemog̃uahẽ pe marandu porã umi Samariayguápe ha upéi hetave tetãme (Hech. 8:5, 6, 14-17; 10:19-22, 44, 45). Jesús oiporavo Saulo de Társope oiko hag̃ua chugui hemimboʼe ha omog̃uahẽ hag̃ua pe marandu porã umi ndahaʼéivape hudío. Peteĩ visión rupive Jesús heʼi Ananíaspe: ‘Epuʼã ha tereho pe kálle héravape Recta, Judas rógape ha eporandu peteĩ kuimbaʼe Tarsoygua hérava Saulo rehe. Tereho katu, kóva ko che rembiporavo omoherakuãvaʼerã che réra tetã  ambueguápe, umi mburuvicha guasúpe, ha Israel raʼykuérape’ (Hech. 9:3-6, 10, 11, 15, BNP). “Ko kuimbaʼe” oiporavovaʼekue Jesús haʼehína apóstol Pablo (1 Tim. 2:7).

11. Mbaʼéichapa Jesús oiporu espíritu sánto ojepredikave hag̃ua?

¹¹ Ojepredikátarõ guare ambue tetãme, espíritu sánto rupive Jesús heʼi Páblope oho hag̃ua Asia Menor ha Európape. Hechos kuatiañeʼẽme Lucas ohai: ‘Peteĩ árape [umi proféta ha mboʼehára kongregasión Antioquía de Siriapegua] omombaʼeguasu aja Ñandejárape ha oajuna jave hikuái, espíritu sánto heʼi: “Pemboyke chéve g̃uarã Bernabé ha Sáulope. Areko ningo chupekuéra hembiaporã”. Upévo oñemboʼe ha oajuna rire, umi ansiáno omoĩ ipo hiʼarikuéra ha oheja oho hikuái’ (Hech. 13:2, 3). Jahecha haguéicha Jesús voi heʼi Saulo de Társope oiporavo hague chupe omombeʼu hag̃ua héra opa tetã rupi. Upéva ohechauka Cristo, pe kongregasión Ruvicha, omoakã hague pe tembiapo iñasãi hag̃ua marandu porã opárupi. Ha Pablo ojapórõ guare isegúndo viáhe opredika hag̃ua, ojekuaa porãvéntema mbaʼéichapa Jesús oiporu espíritu sánto oipytyvõ hag̃ua chupe hembiapópe. La Biblia heʼi “Jesús espíritu” térã espíritu sánto, oisãmbyhy hague Pablo ha iñirũnguérape oikuaa hag̃ua moõ rupípa opredikavaʼerã. Ha upéi peteĩ visión rupive heʼi chupekuéra oho hag̃ua Európape (jaleemína Hechos 16:6-10).

Jesús hína pe kongregasión Ruvicha

12, 13. Mbaʼéichapa Revelación ohechauka Jesucristo ojesarekoha káda kongregasión rehe?

¹² Primer síglope Jesús ojesarekovaʼekue umi unhídore ha ohecha mbaʼéichapa ojapo hikuái hembiapo. Avei oikuaa mbaʼéichapa oĩ káda kongregasión. Mbaʼérepa jaʼe upéva? Pór ehémplo Revelación kapítulo 2 ha 3 omombeʼu Jesús oñemoñeʼẽ hague umi 7 kongregasión oĩva Asia Menórpe (Rev. 1:11). Upévare jaʼekuaa oikuaa porã hague avei ambue kongregasión oĩvaʼekue upe tiémpope (jaleemína Revelación 2:23).

¹³ Umi 7 kongregasión apytégui oĩvaʼekue ojapóva heta mbaʼe porã. Pór ehémplo ogueropuʼaka heta mbaʼe ijetuʼúva, ndojeheʼái umi kristiáno guaʼúre ha iñeʼẽrendu Ñandejárape. Jesús oguerohoryvaʼekue umi kongregasiónpe (Rev. 2:2, 9, 13, 19; 3:8). Péro tekotevẽhápe oñemoñeʼẽ mbarete, upéicha ojapovaʼekue oĩrõ guare ndohayhuvéiva chupe, omombaʼéva taʼangakuéra, hekokyʼáva ha nomboʼéiva Ñandejára Ñeʼẽ heʼihaichaite (Rev. 2:4, 14, 15, 20; 3:15, 16). Jesús ningo ohayhúgui ijovechakuérape oñemoñeʼẽ chupekuéra, haʼe heʼi: ‘Che amongavaju ha ahekomboʼe opa ahayhúvape. Upévare eñemboʼe ha ejevy Ñandejára gotyo’ (Rev. 3:19). Upérõ Jesús noĩvéima ko yvy ape ári, upéicharõ jepe yvága guive oisãmbyhy idisipulokuérape espíritu sánto rupive. Upévare omohuʼãvo imarandu heʼi káda kongregasiónpe: ‘Ojapysakaséva guive tohendu pe espíritu heʼíva kongregasionkuérape’ (Rev. 3:22, JMP).

14-16. a) Mbaʼéichapa Jesús ohechauka haʼeha ñande Ruvicha? b) Mbaʼépa ojehupyty Jesús omoakã rupi hemimboʼekuérape? c) Mbaʼépa jahecháta pe artíkulo oúvape?

¹⁴ Jahecha haguéicha Miguel, Ñandejára  Raʼy, haʼevaʼekue pe ánhel oñangarekóva pyʼaguasúpe Israel rehe. Ha oúrõ guare ko yvy ape ári ohechauka haʼeha ñande Ruvicha ikatupyrýva ha Ovecha rerekua imbaʼeporãva. Jesús oikove aja ko yvy ape ári omoakã pe predikasión. Ha oñemoingove jey rire, yvága guive oisãmbyhy hemimboʼekuérape ojapo porã hag̃ua ko tembiapo.

¹⁵ Jesús ojevale espíritu sántore iñasãi hag̃ua ohóvo pe marandu porã oparupiete ko yvy ape ári. Upévare oho mboyve yvágape opromete hemimboʼekuérape: ‘Ág̃a pe espíritu sánto ou vove pende ári penemombaretéta ha peikuaaukáta che réra Judea ha Samáriape ha opa tetã oĩvape ko yvy ape ári’ (Hech. 1:8, JMP; jaleemína 1 Pedro 1:12). Síglo primérope oñemog̃uahẽ opárupi pe marandu porã Jesucristo omoakã rupi upe tembiapo (Col. 1:23).

¹⁶ Péro Jesús heʼivaʼekue ojesegitaha oñemombeʼu pe marandu porã og̃uahẽ meve huʼãme ko ára paha. Ha heʼi rire hemimboʼekuérape opredika ha oporomboʼe hag̃ua opa tetã rupi, opromete chupekuéra: ‘Che aiméta penendive ára ha ára og̃uahẽ meve huʼãme pe ára paha’ (Mat. 28:19, 20, NM). Jesucristo oñepyrũ guive ogoverna 1914-pe oisãmbyhy porãvéntema Ñandejára siervokuérape. Añetehápe haʼehína ñande Ruvicha. Pe artíkulo oúvape jahecháta mbaʼeichaitépa haʼe kyreʼỹme ombaʼapohína oñepyrũ guive ogoverna yvágape.

[Nóta]

Ñañemomanduʼa hag̃ua

• Mbaʼéichapa Israel tiémpope Jesús ohechauka haʼeha peteĩ Mburuvicha ikatupyrýva?

• Mbaʼe rehépa ojevale Jesús oisãmbyhy hag̃ua umi kongregasión oĩva ko yvy ape ári?

• Mbaʼéichapa Jesús oisãmbyhy hemimboʼekuérape iñasãi hag̃ua ohóvo pe marandu porã?

• Mbaʼérepa jaʼekuaa Jesucristo ojesarekoha káda kongregasión rehe?

[Porandu ñahesaʼỹijóva]

[Nóta oĩva taʼanga ndive páhina 21]

‘Péina amondóta peteĩ ánhel pene renonderã’

[Nóta oĩva taʼanga ndive páhina 23]

Yma guaréicha Jesús ojevale kuimbaʼe ikatupyrýva rehe oñangareko hag̃ua ijovechakuérare