‘Ataaseq Siulersuisoraarsi, Missiarsi’

“‘Siulersuisunik’ taagortissanngilasi, ataasermi Siulersuisoraarsi, Missiarsi.” — MATTHÆUSI 23:10, NV.

1. Jehovap Nalunaajaasuisa kina siulersuisumissut isigaat, aamma sooq?

KRISTUMIUUNERARTUT ilagiivi nunamiusunik siulersuisoqarput, soorlu paavi Romamiittoq, ilagiinni ortodoksini patriarkit biskoppillu upperisarsioqatigiinnilu allani siuttut. Jehovap Nalunaajaasuisa inuit siulersuisumissut isiginngilaat. Inummut kimulluunniit ajoqersugaanngillat. Tamanna Jehovap Kristusi pillugu siulittuutaanut matumunnga naapertuuppoq: ‘Takuat, inunnut ilisimannittuutippara, siulersortigitillugu inatsisigitillugulu inunnut.’ (Esaja 55:4, 1900) Silarsuaq tamakkerlugu ilagiit kristumiut tanitat taakkualu suleqataat, ‘savat allat’, Jehovap imminnut siulersuisussanngortitaanik taamaallaat siulersuisoqarusupput. (Johannesi 10:16) Jiisusip oqaasii uku aalajangiusimavaat: ‘Ataaseq Siulersuisoraarsi, Missiarsi.’ — Matthæusi 23:10, NV.

Israelikkunnut naalagaanertaq

2, 3. Guutip ernera Israelikkut oqaluttuarisaaneranni pingaarutilimmik qanoq inissisimaffeqarpa?

² Ilagiit kristumiut pilersinneqarnerat ukiunik hundredelinnik sioqqullugu Jehovap inngili innuttaminik, Israelikkunnik, siulersuinermut atorpaa. Jehovap Israelikkut Egyptenimit anineranni siulersoreerlugit ima oqarfigai: “Inngilimik siunikkut aallartitsiumaarpunga aqqutissanni paareqqullutit apuutiteqqullutillu illit nunassattut piareersakkannut. Inngili taanna mianeralugu naalassavat! Anneruniarfigissanngilat, pinerluttuliasi ilaginnaannassanngimmagit atera taassumaniimmat.” (2 Mosesi 23:20, 21) Tunngavissaqarluarpoq isumaqassalluni inngili taanna Guutip ernituarigaa, ‘Jehovammi aqqa taassumaniippoq’.

³ Guutip ernera inuttut inunngunngikkallarami Mikaelimik ateqarunarpoq. Danielip allagaani Israelikkunnut ‘naalagaanertatut’ taaneqarpoq. (Danieli 10:21) Ajoqersugaq Judasi naapertorlugu Mikaeli Danielip nalaa sioqquterujussuarlugu Israelikkunnut tunngassuteqartunut akuusarpoq. Mosesip toqunerata kingorna Saatanip Mosesip timaa toqungasoq nammineq soqutigisaminik siuarsaaniarnermini atorniarsimagunarpaa, immaqa Israelikkut guutipilussiortunngortinniarlugit. Mikaeli akuliuppoq tamanna pinngitsoortinniarlugu. Judasi ima allappoq: “Taamani inngiliunerup Mikaelip Mosesip timaa toqungasoq pillugu Diaavulu saqitsaakkamiuk mitalliutaasumik oqaaseqarnissani sapiiserfiginagu  oqarfigiinnarpaa: ‘[Jehovap] pillarilisit!’” (Judasi 9) Kingusinnerusukkut Jerikop unguneqannginnerani qularnanngitsumik Mikaeli taannaavoq ‘Jehovap katersaarsuinut naalagaanertaatitaasoq’ Josvamut saqqummersoq, taanna uppernarsaavigalugu Guutimit tapersersorneqarneranik. (Atuakkit Josva 5:13-15). Anersaapiluup nukittuup inngili pruffiitimut Danielimut tusarliussassamik pingaarutilimmik tusarliinngitsoortinniarsarimmagu inngiliunerup Mikaelip inngili taanna ikiorpaa. — Danieli 10:5-7, 12-14.

Siulersuisoq siulittuutigisaq tikiuppoq

4. Missiarsip tikiunnissaa pillugu siulittuut suna Danielip allagaaniippa?

⁴ Tamanna sioqqullugu Jehovap inngili Gabrieli pruffiitimut Danielimut aallartippaa piffissaq ‘Missiarsip siulersuisup’ (1900) tikiuffissaa pillugu siulittuummik tusarleeqqullugu. (Danieli 9:21-25) * Ukiumi 29-mi ukiakkut Kr.in.king., piffissaq eqqoqqissaarlugu, Jiisusi Johannesimit kuisippoq. Anersaaq illernartoq taassumunnga kuineqarpoq, tassaalerporlu Tanitaq — Missiarsi, imaluunniit Kristusi. (Matthæusi 3:13-17; Johannesi 1:29-34; Galatiamiut 4:4) Missiarsiugami siulersuisunngussaaq asseqanngitsoq.

5. Jiisusi nunarsuarmi kiffartornermini qanoq ililluni siulersuisutut iliorpa?

⁵ Jiisusi nunarsuarmi kiffartuleqqaarmalli erseqqippoq taanna tassaasoq ‘Missiarsi siulersuisoq’. Ullualuit ingerlaneranni ajoqersukkani siulliit ajoqersuganngortippai siullerpaamillu tupinnartuliorluni. (Johannesi 1:35–2:11) Ajoqersugaasa taanna Guutip naalagaaffia pillugu nutaarsiassamik nuannersumik oqaluussissutiginnitsillugu nuna tamakkerlugu angalaqatigaat. (Lukasi 8:1, 2) Taassuma taakku ilinniartippai, takutillugit qanoq oqaluussillutillu ilinniartitsissasut, taamaalillunilu taakkununnga maligassaalerluni. (Lukasi 9:1-6) Ullumikkut utoqqaanertat kristumiut silatusaassapput tamatumunnga tunngatillugu taassuma maligassiaanik malinnikkunik.

6. Jiisusip qanoq ililluni ersersippaa savanik paarsisuullunilu siulersuisuulluni?

⁶ Jiisusi aamma allatigut siulersuivoq, soorlu nammineq tamanna eqqaagaa. Savanik paarsisumut isumassuisumut imminut assersuuppoq. Kangiani savanik paarsisut savaatimik siornatungaanniittarput. Atuakkiortoq W.M. Thomson atuakkiamini The Land and the Book-imi ima allappoq: “Savanik paarsisoq siuttuusarpoq, aqqutissiuiinnarniarnani aammali aqqut isumannaallunilu ingerlavigineqarsinnaanersoq takuniarlugu. . . . Ajaappiani atorlugu savat mangiarfissaannut qorsooqqissunut ingerlatillugillu siulersortarpai akeraannullu illersortarlugit.” Jiisusip assersuusiorluni ersersippaa ilumut savanik paarsisuullunilu siulersuisuulluni, ima oqarluni: “Uanga tassaavunga savanik paarsisoq ajunngitsoq. Paarsisup ajunngitsup savaatini illersorniarlugit inuunini akigiumasarpaa. Savaatima nipiga tusartarpaat, uangalu ilisimavakka, malittarpaanngalu.” (Johannesi 10:11, 27) Jiisusi oqaatsini naapertorlugit savaatimi iluaqutissaannut pilliutitut toquvoq, Jehovalli makitippaa ‘siulersuisunngortillugu annaassisunngortillugulu’. — Apustilit Suliaat 5:31, 1936; Hebræerit 13:20.

Ilagiinnik kristumiunik nakkutilliisoq

7. Jiisusi ilagiinnik kristumiunik qanoq nakkutilliiva?

⁷ Jiisusip makititaasimasup qilalianngitsiarluni ajoqersukkani ima oqarfigai: “Qilammilu nunamilu pissaaneq tamarmi uannut tunniussaavoq.” (Matthæusi 28:18) Jehovap Jiisusi ajoqersukkaminut anersaamik illernartumik kuisitippaa kristumiussusermi sallusuissummi taakku nakussatsinniarlugit. (Johannesi 15:26) Ukiumi 33-mi piinsip ulluani Jiisusip anersaaq kristumiunut siullernut kuivaa. (Apustilit Suliaat 2:33) Tamatumuuna ersersinneqarpoq ilagiit kristumiut pilersinneqarnerat. Jehovap ernini qilammiittoq ilagiinnut nunarsuarmiittunut siulersuisunngortippaa. (Atuakkit Efesosimiut 1:22; Kolossemiut 1:13, 18). Jiisusip ilagiit kristumiut siulersorpai Jehovap anersaava illernartoq iluaqutigalugu, aamma inngilit ‘imminut naalatsigititaasut’ ikiortigisinnaavai. — 1 Petrusi 3:22.

8. Jiisusi nunarsuarmiittut kikkut atorlugit ukiuni hundredelinni siullerni ajoqersukkaminik siulersuiva, ullumikkullu kikkut atorpai?

⁸ Aamma anersaaq illernartoq iluaqutigalugu Jiisusi ‘tunisivoq inunnik tunissutaasunik’, taakkualu  ilaat ilagiinni ‘paarsisuullutillu ajoqersuisuupput’. (Efesosimiut 4:8, 11, NV) Apustilip Paulusip nakkutilliisut kristumiut ima oqaaqqissaarpai: “Immissinnut misissugariniaritsi savaatittaarlu tamaasa misissugaralugit; Anersaammi Illernartup taakkununnga nakkutilliisunngortippaasi Guutip ilagiissai . . . paareqqullugit.” (Apustilit Suliaat 20:28) Ilagiit kristumiut pilersinneqarmata nakkutilliisut taakku tamarmik anersaamik tanitaapput. Apustilit Jerusalemimilu ilagiinni utoqqaanertat siulersuisoqatigiiupput. Jiisusi siulersuisoqatigiit taakku atorlugit “qatanngutiminik” tanitanik nunarsuarmiittunik tamanik siulersuivoq. (Hebræerit 2:11; Apustilit Suliaat 16:4, 5) Ullumikkut naggatissap nalaani Jiisusip Kristusip ‘pigisani tamaasa’ — Guutip naalagaaffianut attuumassuteqartut nunarsuarmiittut tamaasa — ‘inussiaatiminut aalajaallunilu silatuumut’ (NV) taassumalu siulersuisoqatigiivinut angutinik kristumiunik tanitanik ilaasortalinnut paarisassanngortippai. (Matthæusi 24:45-47) Tanitat taakkualu suleqataasa, savat allat, paasillugulu akueraat nalitsinni Siulersuisoqatigiit siulersuinerannik malinninnermikkut siulersuisortik, Jiisusi Kristusi, ilumoortumik malittarlugu.

Jiisusip oqaluussineq aallartippaa

9, 10. Nutaarsiassap nuannersup siammarnissaa anguniarlugu Jiisusi pisunik qanoq aqutsiva?

⁹ Silarsuaq tamakkerlugu oqaluussillunilu ilinniartitsineq Jiisusip aallaqqaammulli nammineq siulersorpaa. Guutip naalagaaffia pillugu nutaarsiassap nuannersup inunnut nunarsuarmiittunut tamanut tusarliunneqarnissaanut tunngatillugu qanoq tulleriissaarisoqassanersoq aalajangerpaa. Oqaluussinermut tunngatillugu apustilit ima ilitsersorpai: “Guutimik nalusunut aqqut atussanngilarsi, Samariamiullu illoqarfiinut isissanngilasi; ornissigilli savat tammarsimasut Israelikkuusut. Oqaluussiartoritsi ima: Qilaap Naalagaaffia qanillivoq!” (Matthæusi 10:5-7) Peqquneqarnermissut juutinut juutillu upperisaannut ilanngussimasunut aallussilluarlutik oqaluussipput, ingammik ukiumi 33-mi piinsip kingorna. — Apustilit Suliaat 2:4, 5, 10, 11; 5:42; 6:7.

¹⁰ Kingusinnerusukkut Jiisusip anersaaq illernartoq iluaqutigalugu Samariamiuttaaq kingornalu juutiunngitsut allat tamaasa Guutip naalagaaffia pillugu oqaluussiffigineqartussanngortippai. (Apustilit Suliaat 8:5, 6, 14-17; 10:19-22, 44, 45) Nutaarsiassap nuannersup Guutimik nalusunut siammarnerunissaa anguniarlugu, Jiisusi Saulusi Tarsusimioq kristumiunngornissamut kajumissisinniarlugu nammineq iliuuseqarpoq. Jiisusip ajoqersugaq Anania ima oqarfigaa: “Aqqusinermut Narlusuumukarit Judasillu illuani Saulusi Tarsusimioq apeqqutigalugu. . . . Aallarit! Taannaavormi qinersimasara sakkugiumallugu aterma saqqummiunneqarnissaanut Guutimik nalusunut, kunnginut Israelillu kinguaavinut.” (Apustilit Suliaat 9:3-6, 10, 11, 15) Eqqartugaa ‘taanna’ apustilinngorpoq Paulusi. — 1 Timotheusi 2:7.

11. Jiisusip oqaluussisoqarnerulernissaa anersaaq illernartoq atorlugu qanoq ililluni isumagaa?

¹¹ Inuiannut juutiunngitsunut nutaarsiassamik nuannersumik oqaluussissutiginninnissamut piffissanngormat Paulusi Asiaaqqamut Europamullu ajoqersuiartortitatut angalanissamut qilammit siulersorneqarpoq. Apustilit Suliaanni Lukasi ima allaatiginnippoq: ‘[Pruffiitit ilinniartitsisullu kristumiut Antiokiami Syriamiittumi ilagiinniittut] Jehovamut kiffartortillugit iisinnginniartillugillu Anersaaq Illernartoq oqarpoq: “Barnaba Saulusilu toqqarsigit suliassaq qaaqqusissutigisara suliareqqullugu.” Iisinnginniarlutillu qinoreeramik assamminnillu patereeramikkit aallartippaat.’ (Apustilit Suliaat 13:2, 3) Jiisusip Saulusi Tarsusimioq atermi Guutimik nalusunut saqqummiunneqarnissaanut “sakkugiumallugu” nammineq ‘qinersimavaa’. Oqaluussinermut tunngatillugu kajumissaarut nutaaq tamanna Jiisusimit Kristusimeersuuvoq, ilagiinnik siulersuisumit. Jiisusip oqaluussinermik siulersuinermut anersaamik illernartumik atuinera Paulusip aappassaanik ajoqersuiartortitatut angalanerani erseqqippoq. Oqaluttuarineqarpoq ‘Jiisusip anersaavata’, tassa Jiisusip anersaaq illernartoq atorlugu, Paulusi angalaqataalu siulersorai angalanissamut pilersaarusiorneranni, takorruugarlu pissutigalugu taakku Europamut ingerlaqqipput. — Atuakkit Apustilit Suliaat 16:6-10.

 Jiisusip ilagiissini qanoq siulersortarai

12, 13. Saqqummersitani qanoq erserpa Jiisusip ilagiinni tamani pisut malinnaavigeqqissaartarai?

¹² Jiisusip ukiuni hundredelinni siullerni ilagiinni ajoqersukkani tanitani pisut malinnaavigeqqissaarpai. Ilagiit tamarmik immikkut anersaakkut qanoq innerat nalunngilluarpaa. Tamanna Saqqummersitani kapitalit aappaanni pingajuannilu erseqqippoq. Ilagiit arfineq-marluk, tamarmik Asiaaqqamiittut, eqqaavai. (Saqqummersitat 1:11) Tamatuma nalaani ilagiit kristumiut nunarsuarmiittut allat anersaakkut qanoq innerannik taamatulli nalunnginnilluartigisimasorinissaanut pissutissaqarluarpugut. — Atuaruk Saqqummersitat 2:23.

¹³ Jiisusip ilagiit ilaat nersualaarpai pinertusaarnerat, misilinneqarnerminni aalajaannerat, oqaatsiminut ilumoorfiginninnerat tunussisunillu akuerinninnginnerat pillugu. (Saqqummersitat 2:2, 9, 13, 19; 3:8) Aammali ilagiit arlallit naveerpai imminik asanninnerat nillertunngorsimammat, guutipilussiortoqarnera kinguaassiuutitigullu inuunerluttoqarnera sianiginngitsuusaarmassuk ilagiinnillu immikkoorniartoqarnera akuersaarmassuk. (Saqqummersitat 2:4, 14, 15, 20; 3:15, 16) Jiisusi anersaakkut ittunik nakkutilliisuugami asannittoq — sukannersumik oqaaqqissaakkaminut allaat — ima oqarpoq: “Asasakka tamaasa pillarlugillu anusinngorsartarpakka. Ilungersorit allamillu isumataarlutit!” (Saqqummersitat 3:19) Jiisusip qilammiikkaluarluni ilagiit nunarsuarmiittut anersaaq illernartoq atorlugu siulersorpai. Ilagiinnut arfineq-marlunnut taakkununnga tusarliussani ima naggaserpai: “Siuteqartup tusarligit Anersaap ilagiinnut oqaaserisai.” — Saqqummersitat 3:22.

14-16. (a) Jiisusi qanoq ililluni Jehovap innuttaanut nunarsuarmiittunut siulersuisuusimava sapiitsoq? (b) Jiisusip ajoqersukkaminik ‘pissutsit aaqqissuussaanerata naggataatungaanut allaat ullut tamaasa najuisimanera’ qanoq kinguneqarpa? (c) Allaaserisami tulliuttumi suna sammissavarput?

¹⁴ Paasereerparput inngiliunerup Mikaelip (Jiisusip) Israelikkut inoqajuitsumiinneranni sapiilluni siulersorai. Kingusinnerusukkut Jiisusi ajoqersukkaminut siullernut siulersuisuuvoq sapiitsoq paarsisuullunilu asannittoq. Nunarsuarmi kiffartornermini oqaluussinermi siuttuuvoq. Makititaareeramilu Guutip naalagaaffia pillugu nutaarsiassamik nuannersumik siammarterinermik nakkutilleeqqissaarpoq.

¹⁵ Taassuma anersaaq illernartoq atorlugu oqaluussineq naggataatigut nunarsuup isuinut anngutitissavaa. Qilaliannginnermini ajoqersukkani ima oqarfigai: “[Anersaap] Illernartup tikippasi pissatsitaajumaarpusi, nalunaajaasigissavassilu Jerusalemimi Judæamilu tamarmi Samariamilu nunarsuullu isua tikillugu allaat.” (Apustilit Suliaat 1:8; Atuaruk 1 Petrusi 1:12). Ukiuni hundredelinni siullerni Kristusip siulersuineratigut nalunaajaanersuaqarpoq. — Kolossemiut 1:23.

¹⁶ Jiisusili nammineq oqamisaarpoq oqaluussineq tamanna naggatissap nalaata tungaanut ingerlaannassasoq. Ajoqersukkani oqaluusseqqoreerlugit inunnillu inuiannit tamaneersunik ajoqersuganngortitsiortoqqoreerlugit ima neriorsorpai: “Ullut tamaasa najorpassi pissutsit aaqqissuussaanerata naggataatungaanut allaat.” (Matthæusi 28:19, 20, NV) Jiisusi Kristusi 1914-imi kunnginngortinneqaramili ajoqersukkaminik siulersuisutut taakku aatsaat taama ‘najortigai’. Allaaserisami tulliuttumi 1914-ip kingorna taanna sunik suliaqarsimanersoq sammineqassaaq.

[Quppernerup ataani ilanngussaq]

Uteqqiineq

• Guutip ernera Israelikkunnik qanoq siulersuisuua?

• Jiisusip ilagiissini nunarsuarmiittut suna aamma kikkut atorlugit siulersortarpai?

• Jiisusi nutaarsiassamik nuannersumik siammarterinermi qanoq siulersuisimava?

• Sumit erserpa Jiisusip ilagiit tamarmik immikkut anersaakkut qanoq innersut nakkutigeqqissaartaraa?

[Atuaqqissaarnermi apeqqutit]

[Qupp. 25-mi assiliartaq]

“Inngilimik siunikkut aallartitsiumaarpunga”