Yãmb taoor soab yaa a ye bala, yaa Kiristã
Yãmb taoor soab yaa a ye bala, yaa Kiristã
“Da kɩt-y tɩ nebã bool yãmb tɩ taoor dãmb ye, bala, ned a yen tãa n yaa taoor soaba, yaa Kirist.”—MAT. 23:10, KÃAB-PAALGÃ KOE-NOOGO.
1. Ãnd soab la a Zeova Kaset rãmbã geelgd wa b taoor soaba, la bõe yĩnga?
KIRIS-NEB ne yʋʋrã tũudum toɛy-toɛyã tara ninsaalb sẽn yaa b taoor dãmba. Wala makre, Papã sẽn be Rommã, n paas egiliiz rãmb toor-toor taoor dãmbã. La a Zeova Kaset rãmbã yẽ pa geelgd ninsaal baa a ye wa b taoor soab ye. B pa tũud ninsaal baa a yembr ye. Woto zemsa ne a Zeova sẽn kɩt tɩ b pĩnd n togs bũmb ning a Biigã zugã. A kɩtame tɩ b yeel woto: “Gese, mam kõo yẽ t’a yɩ kaset soaba, la buudã fãa naab la b soaala.” (Ezai 55:4) Kiris-neb nins sẽn paam vʋʋsem sõng zaeebã ne a Zezi “piis a taabã” pa baood taoor soab n zʋʋg a soab ning a Zeova sẽn kõ-bã ye. (Zã 10:16) B sakda a Zezi sẽn yeel bũmb ningã. A yeela woto: “Ned a yen tãa n yaa taoor soaba, yaa Kirist.”—Mat. 23:10, Kãab-paalgã Koe-noogo.
Malɛk sẽn da lʋɩt Israɛll nebã taoore
2, 3. Bõe la Wẽnnaam Biigã maan Israɛll nebã sõngr yĩnga?
2 Yʋʋm wʋsg nand tɩ b lugl kiris-neb tigingã, a Zeova ra yãka malɛk t’a lʋɩt Israɛll sẽn da yaa a nin-buiidã taoore. A Zeova sẽn yiis Israɛll nebã Eziptã poore, a yeel-b-la woto: “Gese, mam tʋma malɛk t’a lʋɩ fo taoore, n gũ foom sor zugu, n taas foom zĩig ningã mam sẽn seglã. Gũus-y neere, n sak koɛɛg ningã fãa yẽ sẽn na n togs yãmbã. La y ra kɩt tɩ yẽ sũur yik ye. Tɩ bõe, mam yʋʋr bee ne yẽnda.” (Yik. 23:20, 21) D tõe n yeelame tɩ malɛk kãngã sẽn da tar a Zeova yʋʋrã yaa Wẽnnaam Bi-ribl sẽn ka to wã.
3 Nand tɩ b rog Wẽnnaam Biigã tẽngã zugu, wõnda b ra boond-a lame t’a Mikaɛlle. A Daniɛll sebrã pʋgẽ, b boond-a lame t’a Daniɛll rãmba, rat n yeel tɩ Israɛll nebã “naab a Mikaɛlle.” (Dan. 10:20, 21) Karen-biig a Ziid goma gomd sẽn wilgd t’a Mikaɛll ra sɩng n sõngda Israɛll nebã, yʋʋm wʋsg sẽn deng a Daniɛll wakatã. A Moiiz kũumã poore, wõnda wa a Sʋɩtãan makame n na n tũnug ne a Moiiz yĩngã n pids a meng raabo. Tõe t’a ra ratame n kɩt tɩ Israɛll nebã wa tũnugd ne a Moiiz yĩngã n pʋʋsdẽ. A Mikaɛll kẽesa a toogo, tɩ rẽ pa tõog ye. A Ziid yeela woto: “La malɛk rãmbã naab a Mikaɛll sẽn zab ne Sʋɩtãanã n wẽ no-koeemd a Moiiz kũum poorẽ wã ka tar noor tɩ gom yẽ wẽng ye, la bãmb yeelame yaa: ‘Bɩ Zusoabã [zab, NW ] foom.’ ” (Ziid 9) Nand tɩ Israɛll nebã zab ne Zeriko nebã, yaa vẽeneg tɩ “Saasẽ-pãng-soabã sodaas naabã” a Zozue sẽn yã wã yaa a Mikaɛlle. A wa n kenga a Zozue raoodo, tɩ kɩt t’a bãng tɩ Wẽnnaam bee ne-ba. (Karm-y Zozue 5:13-15.) Wakat n wa n zĩnd tɩ zĩn gɩdg malɛk sẽn na yɩl t’a ra tõog n taas no-rɛɛs a Daniɛll koɛɛg sẽn tar yõod ye. La malɛgsã naab a Mikaɛll wa n sõnga malɛk kãngã.—Dan. 10:5-7, 12-14.
Taoor soab ning b sẽn da pʋlmã waoongo
4. Bõe la b togse, tɩ ra wilgd Mesi wã sẽn na n wa wakat ningã?
4 Sẽn deng wakat ning a Mikaɛll sẽn kẽng n tɩ sõng malɛkã, a Zeova tʋma malɛk a Gabriyɛll t’a tɩ taas no-rɛɛs a Daniɛll bãngr-gomde, sẽn na n wilg Mesi wã “sẽn yaa naabã” sẽn na n wa wakat ningã. (Dan. 9:21-25) * Wakat ning b sẽn togs tɩ Mesi wã segd n waame wã, rat n yeel tɩ yʋʋmd 29 soabã saab sẽnesã sẽn wa n ta wã, a Zã lisa a Zezi. Wẽnnaam kõo a Zezi a vʋʋsem sõngã, tɩ kɩt t’a lebg ned ning a sẽn yãkã, rat n yeel tɩ Kiristã bɩ Mesi wã. (Mat. 3:13-17; Zã 1:29-34; Gal. 4:4) Woto kɩtame t’a na n yɩ taoor soab sẽn ka to.
5. Kiristã sẽn wa n moond koɛɛgã, wãn to la a wilg t’a yaa taoor soaba?
5 A Zezi sẽn wa n sɩng koɛɛgã mooneg tẽngã zugã, a maana yɛl wʋsg sẽn wilgd t’a sɩd yaa Mesi wã “sẽn yaa naabã.” Rasem a wãn poor bal a sẽn sɩng a koe-moonegã, a sɩnga neb sẽn na n yɩ a karen-biis baoobo, la a maan a pipi yel-solemde. (Zã 1:35–2:11) A sẽn wa n gilgd n moond Wẽnnaam Rĩungã koe-noogã, a karen-biisã tũ-a lame n saag zĩis wʋsgo. (Luk 8:1) A zãms-b-la koɛɛgã moonego, la a lʋɩ taoor koɛɛgã mooneg la karen-biisã maaneg pʋgẽ n kõ-b mak-sõngo. (Luk 9:1-6) Kãsem dãmbã segd n dɩka a Zezi togs-n-taar rẽ wɛɛngẽ.
6. Bõe la Kiristã maan tɩ wilgd t’a yaa pe-kɩɩm la taoor soaba?
6 A Zezi maka a meng ne pe-kɩɩm sẽn nong a piis wʋsgo, sẽn na yɩl n wilg bũmb a sẽn na n maane, a sẽn yaa taoor soabã yĩnga. Yaang pe-kɩɩmbã sɩd lʋɩta taoore, tɩ b piisã pʋgd-ba. A William Thomson yeela a sebr a ye [La terre et le Livre (ãngil.)] pʋgẽ woto: “Pe-kɩɩmã lʋɩta a piisã taoore. Pa sẽn na yɩl n wilg-b sor bal ye. Yaa sẽn na yɩl n bãng sorã b sẽn tũudã sã n yaa sõma me. . . . A lekda piisã ne a rasaarã, n talld-b n kẽnd yam-maas zĩigẽ, la a kogend piisã.” A Zezi wilgame tɩ yẽ yaa pe-kɩɩm la taoor soab hakɩka, n yeel woto: “Mam yaa pe-kɩɩm sõngo. Pe-kɩɩm sõng kõta a vɩɩm a piis yĩnga. Mam piisã wʋmda mam koɛɛga. Mam mii bãmba, la bãmb tũuda maam.” (Zã 10:11, 27) A Zezi sakame n ki tɩ yɩ maoong a piisã yĩnga, tɩ wilgd t’a sẽn yeelã yaa sɩda. La a Zeova zẽk-a lame t’a lebg “Rĩm la Fãagda.”—Tʋʋ. 5:31; Heb. 13:20.
Kiris-neb tigingã yel-gɛta
7. Ne bõe maasem la a Zezi get kiris-neb tigingã yelle?
7 A Zezi vʋʋgrã poore, nand t’a rʋ saasẽ a yeela a karen-biisã woto: “B kõo maam pãng fãa sẽn be [saasẽ] la sẽn be dũniyã.” (Mat. 28:18) A Zeova kɩtame t’a Zezi kõ a karen-biisã vʋʋsem sõngã, sẽn na yɩl n keng-b tɩ b kell n tũ Kirist sẽn zãms-b bũmb ninsã. (Zã 15:26) A Zezi kõo pipi kiris-nebã vʋʋsem sõngã yʋʋmd 33 Pãntekotã raare. (Tʋʋ. 2:33) Yaa rẽ n yɩ kiris-neb tigingã luglgu. A Zeova kɩtame t’a Biigã be saasẽ n get tigingã sẽn be tẽngã zugã yelle. (Karm-y Efɛɛz rãmb 1:22; Kolos rãmb 1:13, 18.) A Zezi wilgda tigingã sor ne a Zeova vʋʋsem sõngã maasem. A tara malɛgs me sẽn sakd-a.—1 Pɩɛ. 3:22.
8. Pipi kiris-nebã wakatẽ, ãnd la Kiristã tũnug n wilg a karen-biisã sore, la ãnd la a tũnugd ne rũndã-rũndã?
8 Ne vʋʋsem sõngã maasem me, Kiristã kõo “kũun sẽn yaa neba.” Kẽer yaa “pe-kɩɩmb la karen-saam dãmb” n be tigingã pʋgẽ. (Ef. 4:8, 11, NW ) Tʋm-tʋmd a Poll sagla kiris-neb nins sẽn yaa yel-gɛtbã woto: “Bɩ y gũus y mens ne piis nins fãa sɩɩg sõng sẽn kõ yãmbã, la bɩ y rɩlg Zusoabã tẽedbã.” (Tʋʋ. 20:28) Kiris-neb tigingã sɩngrẽ wã, neb nins sẽn da yaa yel-gɛtbã fãa ra paama vʋʋsem sõngã zaeebo. Tʋm-tʋmdbã n paas kãsem dãmbã sẽn da be Zerizalɛmmã n da yaa kiris-nebã taoor lʋɩtb sulli. Kiristã ra tũnugda ne nin-kãensã n wilgd a “ba-biisã” sẽn da paam vʋʋsem sõngã zaeeb n be tẽngã zugã sore. (Heb. 2:11; Tʋʋ. 16:4, 5) Masã sẽn yaa saabã wakatã, Kiristã rɩka a paoongã fãa, rat n yeel tɩ bũmb nins b sẽn sigl tẽngã zug Rĩungã yĩngã, n gũnug “tʋm-tʋmd sẽn tũud sɩd la sẽn tar yamã,” ne Siglgã taoor lʋɩtb Sull sẽn yaa rap sẽn paam vʋʋsem sõng zaeeb sẽn gomd tʋm-tʋmdã yʋʋr yĩngã. (Mat. 24:45-47) Kiris-neb nins sẽn paam vʋʋsem sõngã zaeebã, la piis a taabã fãa sak n deegame tɩ b sã n tũud rũndã-rũndã Siglgã taoor lʋɩtb Sull sor-wilgrã, yaa Kirist sẽn yaa b taoor soabã sor-wilgr la b tũuda.
Yaa Kiristã n sɩng koɛɛgã moonegã
9, 10. Wãn to la Kiristã ges tɩ Rĩungã koe-noogã ta dũniyã buud fãa?
9 Hal koɛɛgã mooneg sɩngrẽ, a Zezi mengã sɩng n geta koe-moonegã la karen-biisã maaneg dũniyã gill zugã yelle. Yaa yẽ n wilg b sẽn segd n moon Rĩungã koe-noog to-to, tɩ wa ta dũniyã buud fãa. A sẽn wa n be tẽngã zugã, daar a ye a yeela a tʋm-tʋmdbã woto: “Bɩ y ra kẽng bu-zẽmsã sʋk ye, la y ra kẽ Samari nebã tẽnsẽ ye. La sẽn yɩɩda bɩ y kẽng Israɛll nebã sẽn wẽnd wa piis sẽn menemã nengẽ. Bɩ y kẽng n moone n yeel tɩ [saasẽ] soolem kolgame.” (Mat. 10:5-7) B sɩd moona zʋɩf rãmbã la neb nins sẽn da tuub n sakd zʋɩf rãmbã tũudmã ne yẽesem, sẽn yɩɩd fãa, yʋʋmd 33 Pãntekotã poore.—Tʋʋ. 2:4, 5, 10, 11; 5:42; 6:7.
10 Kaoosg zugẽ, a Zezi tũnuga ne vʋʋsem sõngã n kɩt tɩ koɛɛgã mooneg ta Samari nebã, tɩ rẽ poore, a wa kɩt tɩ b moon neb sẽn pa zʋɩf rãmb me. (Tʋʋ. 8:5, 6, 14-17; 10:19-22, 44, 45) A Zezi sẽn wa n dat tɩ koɛɛgã mooneg ta dũniyã buud fãa wã, a mengã maana bũmb tɩ kɩt tɩ Tars rao a Soll lebg kiris-neda. A Zezi yeela a karen-biig a Ananias woto: “Yik n kẽng sor ning sẽn boond tɩ tɩrgã n ta a Zida roogẽ n bao a Soll sẽn yi Tarsã. . . . Kẽnge, tɩ bõe, yẽ yaa mam nin-tũusdg sẽn na n wilg neb sẽn ka Zʋɩf buudu, la rĩm dãmba, la Israɛll yagensã mam yʋʋre.” (Tʋʋ. 9:3-6, 10, 11, 15) Yaa ra-kãngã la b sẽn wa n boond tɩ tʋm-tʋmd a Pollã.—1 Tɩm. 2:7.
11. Wãn to la Kiristã tũnug ne vʋʋsem sõngã n kɩt tɩ koɛɛgã ta zĩis wʋsgo?
11 Wakat sẽn wa n ta tɩ b segd n moon Rĩungã koɛɛg wʋsg neb nins sẽn pa zʋɩf rãmbã sʋkã, a Zeova vʋʋsem sõngã wilga a Poll sor t’a kẽng Aazimineer la Erop soolmẽ wã n tɩ moone. A Luk yeela Tʋʋm sebrã pʋgẽ woto: “Bãmb [rat n yeel tɩ kiris-neb nins sẽn da yaa no-rɛɛsdb la karen-saamb dãmb Siiri Ãntios tigingã pʋgẽ wã] sẽn maan Zusoabã tʋʋmd la b loet noore, sɩɩg sõng yeelame: ‘Bɩ y yãk a Barnabas ne a Soll toore, tɩ b maan tʋʋm ningã mam sẽn bool bãmb tɩ b maanã.’ La bãmb loee noor n pʋʋse, n yaool n tik bãmb ne b nusi, n pʋʋs bãmb yĩng n bas bãmb tɩ b kẽnge.” (Tʋʋ. 13:2, 3) A Zezi mengã ra boola Tars rao a Soll t’a “nin-tũusdga,” a sẽn yãk t’a moon buudã fãa yẽ yʋʋre. Rẽnd d tõe n yeelame tɩ yaa Kirist sẽn yaa tigingã taoor soabã n kɩt tɩ b maan bõn-kãngã sẽn da na n kɩt tɩ koɛɛgã mooneg pãng paasã. Bũmb nins sẽn maan a Poll so-toak a yiib-n-soabã sasa wã kɩtame tɩ b bãng vẽeneg t’a Zezi tũnugda ne vʋʋsem sõngã n get koɛɛgã mooneg yelle. Kibarã wilgame t’a “Zezi sɩɩgã,” rat n yeel tɩ ne vʋʋsem sõngã maasem, a Zezi wilga a Poll ne neb nins sẽn da tũud-a wã b sẽn da segd n tees zĩig ningã, la bõn-makr pʋgẽ me, a kɩtame tɩ b kẽng Erop soolmẽ wã.—Karm-y Tʋʋm 16:6-10.
A Zezi sẽn lʋɩt a tigingã taoor to-to
12, 13. Wãn to la Wilgr sebrã wilgd tɩ Kiristã gũusdame n get yɛl nins sẽn maand tiging fãa pʋgẽ wã?
12 Pipi kiris-nebã wakate, a Zezi ra gũusdame n get bũmb nins sẽn da maand a karen-biis nins sẽn paam vʋʋsem sõngã zaeebã tigimsã pʋsẽ wã. A ra mii tiging fãa yɛl sẽn da yaa to-to. D sã n karem Wilgr sak a 2 ne a 3, d yãta rẽ vẽenega. A sõdga tigims a yopoe, tɩ tigim-kãens fãa ra be Aazimineere. (Wil. 1:11) D tõe n kɩsa sɩd me t’a ra mii tigims a taabã sẽn da be tẽngã zug sasa kãngã yɛl sẽn da yaa to-to.—Karm-y Wilgr 2:23.
13 A Zezi pẽga tigims kẽere, b sẽn tõog toogã, b sẽn sak yẽ gomdã ne b sũur fãa wã, b sẽn kell n sak a Zeova namsg sasa wã, la b sẽn pa sak n kelg neb nins sẽn wa n lebg sɩdã kɩɩsdbã. (Wil. 2:2, 9, 13, 19; 3:8) La a sagla tigims kẽere, b nonglmã sẽn da maagã, b sẽn da bas tɩ b neb kẽer pʋʋsd bõn-naands la b yoodã, la b sẽn da bas me tɩ welgr be b sʋkã. (Wil. 2:4, 14, 15, 20; 3:15, 16) A Zezi yaa yel-gɛt sẽn nong a neba, la baa neb nins a sẽn saglã. Woto kɩtame t’a yeel woto: “Mam lengda mam sẽn nong-b rãmbã la m sɩbgd bãmba. Woto yĩnga, bɩ y nang pãng la y tek yam n kos sugri.” (Wil. 3:19) Baa ne a Zezi sẽn be saasẽ wã, a ra tũnugda ne vʋʋsem sõngã n get a karen-biisã tigimsã sẽn da be tẽngã zugã yell la a wilgd-b sore. Koees nins a sẽn taas tigim-kãensã baasgẽ, a yeela woto: “Sẽn tara tʋba, bɩ a kelg bũmb nins sɩɩg sõng sẽn togsd mam tẽedbã.”—Wil. 3:22.
14-16. a) Wãn to la a Zezi wilg t’a yaa a Zeova nin-buiidã sẽn be tẽngã zugã taoor lʋɩt sẽn tar daoodo? b) A Zezi sẽn be ne a karen-biisã n na n tãag “wakat sɛɛbã” kɩtame tɩ b tõogd n maand bõe? d) Bõe yell la sõsg ning sẽn pʋgdã gomda?
14 D yãame t’a Mikaɛll sẽn yaa a Zezi wã wilgame t’a yaa malɛk sẽn tar raoodo, la sẽn da lʋɩt Israɛll nebã taoore. A Zezi sẽn wa tẽngã zugã, a sɩd wilgame t’a yaa taoor lʋɩt sẽn tar daoodo, la pe-kɩɩm sẽn nong a pipi karen-biisã. A sẽn wa n be tẽngã zugã, a lʋɩɩ taoor koɛɛgã mooneg pʋgẽ. A vʋʋgrã poor me, a kell n gesame tɩ Rĩungã koɛɛgã mooneg saag zĩig fãa.
15 Bilf-bilfu, a Zezi kell n tũnuga ne vʋʋsem sõngã n kɩt tɩ koe-noogã ta dũniyã tɛk fãa. Nand t’a rʋ saasẽ, a yeela a karen-biisã woto: “Sɩɩg sõng sã n wa yãmb zutu, yãmb na reeg pãnga. La yãmb na n yɩɩ mam kaset dãmb Zerizalɛm, ne Zide la Samari ne dũniyã tɛk fãa.” (Tʋʋ. 1:8; Karm-y 1 Pɩɛɛr 1:12.) Kiristã sɩd gesame tɩ b moon koɛɛgã dũniyã fãa pipi kiris-nebã wakate.—Kol. 1:23.
16 La a Zezi mengã wilgame tɩ b na n kell n moona koɛɛgã n tãag saabã wakate. A sẽn yeel a karen-biisã tɩ b moon koɛɛgã la b maan neb buud fãa tɩ b yɩ yẽ karen-biisã poore, a pʋlem-b-la woto: “Mam bee ne yãmb wakat fãa hal tɩ ta wakat sɛɛbo.” (Mat. 28:19, 20) Kiristã sẽn deeg naam yʋʋmd 1914 tɛka, a “bee” ne a karen-biisã n sõngd-b wʋsg la a lʋɩt b taoore. Sõsg ning sẽn pʋgdã gomda a sẽn maand bũmb nins yʋʋmd 1914 tɛkã yelle.
[Tẽngr note]
^ sull 4 Y sã n dat n wʋm bãngr-gom-kãngã võor sõma n paase, bɩ y ges Prêtons attention à la prophétie de Daniel ! sebrã sak 11.
Yãmb tẽrame bɩ?
• Wãn to la Wẽnnaam Biigã ra wilg t’a yaa Israɛll taoor lʋɩt sẽn tʋm wʋsgo?
• Bõe la Kiristã tũnugd ne n get a tigingã sẽn be tẽngã zugã yell la a wilg-a sore?
• Wãn to la Kiristã ges tɩ koe-noogã saag zĩig fãa?
• Bõe n wilgd tɩ Kiristã gũusd n geta yɛl nins sẽn maand tiging fãa pʋgẽ wã?
[Zãmsgã sogsgã]
[Foto, seb-neng 24]
“Mam tʋma malɛk t’a lʋɩ fo taoore”
[Foto, seb-neng 26]
Wa Kiristã sẽn maan pĩnd wẽndẽ wã, a tũnugda ne “kũun sẽn yaa neb” n get a bãgrã yelle