“Moetapele wa Lena ke o Tee, Kriste”
“Moetapele wa Lena ke o Tee, Kriste”
“Le se ke la bitšwa ‘baetapele,’ gobane Moetapele wa lena ke o tee, Kriste.”—MAT. 23:9, 10.
1. Ke mang yoo Dihlatse tša Jehofa di mo lebelelago e le Moetapele, gona ka baka la’ng?
DIKEREKE tša Bojakane di etelelwa pele ke batho, ba bjalo ka mopapa wa Roma, bapatriareka le bapišopo ba dikereke tša Orthodox ya ka Bohlabela. Dihlatse tša Jehofa ga di lebelele motho wa nama e le moetapele wa tšona. Ga se tšona barutiwa goba balatedi ba motho wa nama. Se se dumelelana le seo Jehofa a porofetilego ka sona ge a be a bolela ka Morwa wa gagwe gore: “Le tsebê, ke beile yêna, xore e bê hlatse ya dithšaba, e bê yêna kêta-pele le molai wa dithšaba.” (Jes. 55:4) Phuthego ya lefaseng ka bophara ya Bakriste ba tloditšwego le bagwera ba bona ba “dinku tše dingwe” ga ba nyake moetapele yo mongwe ge e se yoo ba mo neilwego ke Jehofa. (Joh. 10:16) Ba kwa mantšu a Jesu a rego: “Moetapele wa lena ke o tee, Kriste.”—Mat. 23:10.
Kgoši ya Moya ya Isiraele
2, 3. Ke karolo efe e kgolo yeo Morwa wa Modimo a ilego a e kgatha mehleng ya Baisiraele?
2 Nywaga-kgolo e mentši pele ga go hlongwa ga phuthego ya Bokriste, Jehofa o ile a dira gore morongwa a etelele pele Baisiraele. Ka morago ga go ntšha Baisiraele Egipita, Jehofa o ba boditše gore: “Tseba xore ke roma Morongwa wa-ka a Xo êtê-pele, a Xo dišê tseleng ya xaxo, a Xo fihlišê felô mo ke xo lokišitšexo. O itôtê Ò lebane naê’; O kwê se a se bolêlaxo; O se kê wa mo xana; ka xobane a ka se kê a lesa xo Le ôtla xe Le fapoxa, ka xobane leina la-ka lè le mo xo yêna.” (Ek. 23:20, 21) Go a kwagala go dumela gore morongwa yoo, yo a bego a e-na le ‘leina la Jehofa mo go yena,’ e be e le Morwa wa Modimo wa leitšibulo.
3 Pele Morwa wa Modimo a ka belegwa e le motho wa nama, o be a bitšwa Mikaele. Ka pukung ya Daniele, Mikaele o bitšwa ‘kgošana ya batho ba mehleng ya Daniele’ e lego Baisiraele. (Dan. 10:21, bapiša le PK.) Morutiwa Juda o bontšha gore Mikaele o be a tšea karolo dilong tšeo di diragalelago Baisiraele nako e telele pele ga mehla ya Daniele. Ka morago, go bonagala Sathane a ile a leka go diriša setopo sa Moše go phetha merero ya gagwe, mohlomongwe go hlohleletša Baisiraele go rapela medimo ya diswantšho. Mikaele o ile a tsena ditaba gare go thibela se. Juda o anega ka gore: “Ge Mikaele morongwa yo mogolo a be a fapana le Diabolo gomme ba ngangišana ka setopo sa Moše, ga se a ka a beta pelo a mo ahlola ka mantšu a gobošago, eupša o itše: ‘A Jehofa a go kgalemele.’” (Juda 9) Ga go pelaelo gore nakwana ka morago, pele ga thakelelo ya Jeriko, Mikaele, “molaodi wa madirá a Morêna,” yo a ilego a tšwelela go Jošua o ile a mo kgonthišetša gore Modimo o tla mo thekga. (Bala Jošua 5:13-15.) Ge kgošana ya batemona e be e leka go thibela morongwa go iša molaetša o bohlokwa go moporofeta Daniele, Mikaele yo e lego morongwa yo mogolo o ile a thuša morongwa yoo.—Dan. 10:5-7, 12-14.
Go Tšwelela ga Moetapele yo go Porofetilwego ka Yena
4. Go porofetilwe’ng mabapi le go tla ga Mesia?
4 Pejana ga tiragalo ye, Jehofa o ile a romela Morongwa wa gagwe Gabariele go ya go moporofeta Daniele go mmotša boporofeta mabapi le “Motlotšwa Mo-êta-pele” yoo a tlago. (Dan. 9:21-25) * Ka nako e beilwego, lehlabuleng la 29 C.E., Jesu o ile a kolobetšwa ke Johane. Moya o Mokgethwa o ile wa tšhollelwa go Jesu, wa dira gore e be Motlotšwa—Kriste yoo e lego Mesia. (Mat. 3:13-17; Joh. 1:29-34; Bagal. 4:4) Ka ge e le Mesia, o ile a ba Moetapele yo a ka se bapišwego.
5. Kriste o ile a bontšha bjang gore ke Moetapele nakong ya bodiredi bja gagwe bja lefaseng?
5 Go tloga mathomong a bodiredi bja gagwe bja lefaseng, Jesu o ile a hlatsela gore ke yena “Motlotšwa Mo-êta-pele.” Matšatši a mmalwa ka morago, o ile a kgoboketša barutiwa ba gagwe gomme a dira mohlolo wa gagwe wa mathomo. (Joh. 1:35–2:11) Barutiwa ba gagwe ba ile ba mo šala morago ge a dutše a dikologa lefase, a bolela ditaba tše dibotse tša Mmušo. (Luka 8:1) O ile a ba tlwaetša modiro wa boboledi gomme a etelela pele go boleleng le go ruteng, a bea mohlala o mobotse. (Luka 9:1-6) Lehono, bagolo ba Bakriste ba swanetše go mo ekiša tabeng ye.
6. Kriste o ile a hlatsela bjang gore ke yena Modiši le Moetapele?
6 Jesu o ile a šupa karolo e nngwe ya bolaodi bja gagwe ka go itshwantšha le modiši yo lerato. Badiši ba bohlabela ba eta pele mehlape ya bona ka tsela ya kgonthe. W. M. Thomson o ngwadile ka pukung ya The Land and the Book gore: “Modiši o eta pele, e sego feela go šupa tsela, eupša gape le go bona ge e ba tsela yeo e sepelega e bile e šireletšegile. . . . O laola le go hlahla mohlape ka molamo [wa gagwe] go o iša mafulong a matala, le go o šireletša go manaba.” Ge Jesu a be a bontšha gore ke Modiši wa kgonthe le Moetapele, o itše: “Ke nna modiši yo bolo; modiši yo bolo o gafa moya wa gagwe ka baka la dinku. Dinku tša-ka di theetša lentšu la-ka e bile ke a di tseba, gomme di a ntatela.” (Joh. 10:11, 27) Go bile feela bjalo, Jesu o ile a hwa lehu la sehlabelo a hwela dinku tša gagwe, eupša Jehofa o ile a “mo tsoša gore e be moetapele le Mophološi.”—Dit. 5:31, New Jerusalem Bible; Baheb. 13:20.
Balebeledi ba Phuthego ya Bokriste
7. Jesu o diriša’ng go okamela phuthego ya Bokriste?
7 Pejana ga ge Jesu yo a tsošitšwego a ka rotogela legodimong, o boditše barutiwa ba gagwe gore: “Ke neilwe matla ka moka legodimong le lefaseng.” (Mat. 28:18) Jehofa o dirile gore Jesu a tšhollele moya o mokgethwa go barutiwa ba gagwe gore a ba matlafatše therešong ya Bokriste. (Joh. 15:26) Jesu o ile a tšhollela moya wo go Bakriste ba lekgolong la pele la nywaga ka Pentekoste ya 33 C.E. (Dit. 2:33) Go tšhollwa moo ga moya o mokgethwa go ile gwa swaya go hlongwa ga phuthego ya Bokriste. Jehofa o ile a kgetha Morwa wa gagwe gore e be moetapele wa phuthego ya lefaseng. (Bala Baefeso 1:22; Bakolose 1:13, 18.) Jesu o hlahla phuthego ya Bokriste ka moya o mokgethwa wa Jehofa gomme o hlankelwa ke barongwa bao ba ilego “ba dirwa gore ba ikokobeletše yena.”—1 Pet. 3:22.
8. Ke bomang bao Kriste a ba dirišitšego mo lefaseng lekgolong la pele la nywaga gore ba etelele pele barutiwa ba gagwe gomme o diriša bomang lehono?
8 Le gona Kriste ka moya o mokgethwa o re neile ‘dimpho tšeo e lego banna,’ tše dingwe e le “badiši le barutiši” ka phuthegong. (Baef. 4:8, 11) Moapostola Paulo o kgothaleditše balebeledi ba Bakriste gore: “Itlhokomeleng gomme le hlokomeleng le mohlape ka moka, woo moya o mokgethwa o le beilego balebeledi gare ga ona, gore le diše phuthego ya Modimo.” (Dit. 20:28) Ge phuthego ya Bokriste e be e thoma, balebeledi ba ka moka e be e le banna bao ba tloditšwego ka moya. Baapostola le bagolo ba phuthego ya Jerusalema ba be ba hlankela e le sehlopha se bušago. Kriste o ba dirišitše gore ba etelele sehlopha ka moka sa ‘bana babo’ ba ba tloditšwego mo lefaseng. (Baheb. 2:11; Dit. 16:4, 5) Mehleng ye ya bofelo, Kriste o neile “dilo tša gagwe ka moka”—dikgahlego ka moka tša Mmušo tša mo lefaseng—go “mohlanka [wa gagwe] yo a botegago le wa temogo” le moemedi wa gagwe e lego Sehlopha se Bušago, sehlopha sa banna bao ba tloditšwego ba Bakriste. (Mat. 24:45-47) Batlotšwa le bagwera ba bona ba dinku tše dingwe ba a lemoga gore ge ba latela boetapele bja Sehlopha se Bušago sa mehleng yeno, ge e le gabotse ba latela Moetapele wa bona, Kriste.
Kriste o Thoma Modiro wa Boboledi
9, 10. Kriste o ile a etelela pele bjang modiro wa go phatlalatša ditaba tše dibotse tša Mmušo?
9 Go tloga mathomong, Jesu ka boyena o be a hlahla modiro wa boboledi wa lefase ka bophara le wa go ruta. O ile a thea mokgwa woo ditaba tše dibotse tša Mmušo di swanetšego go bolelwa ka wona go badudi ba lefase. Nakong ya bodiredi bja gagwe, o ile a laela baapostola ba gagwe gore: “Le se ke la ya tseleng ya ba ditšhaba, gomme le se ke la tsena motseng wa Basamaria; eupša, go e na le moo, tšwelang pele le e-ya dinkung tše di timetšego tša ntlo ya Isiraele. Ge le dutše le sepela, le bolele le re, ‘Mmušo wa magodimo o batametše.’” (Mat. 10:5-7) Ba dirile se ka mafolofolo gare ga Bajuda le basokologi, kudu-kudu ka morago ga Pentekoste ya 33 C.E.—Dit. 2:4, 5, 10, 11; 5:42; 6:7.
10 Nakwana ka morago, Jesu o ile a diriša moya o mokgethwa go phatlalatša modiro wa go bolela ka Mmušo go Basamaria le go ba bangwe bao e sego Bajuda. (Dit. 8:5, 6, 14-17; 10:19-22, 44, 45) E le go hlohleletša ba bangwe go phatlalatša ditaba tše dibotse gare ga ditšhaba, Jesu o ile a kgodiša Saulo wa Tareso gore e be Mokriste. Jesu o ile a laela morutiwa wa gagwe Ananiase gore: “Ema o ye mokgotheng wo o bitšwago wa go Loka, gomme ntlong ya Judase o nyake monna yo a bitšwago Saulo wa Tareso. . . . Sepela, gobane monna yo ke sebjana se ke se kgethilego gore se iše leina la-ka ditšhabeng gotee le go dikgoši le go bana ba Isiraele.” (Dit. 9:3-6, 10, 11, 15) “Monna yo” o ile a fetoga moapostola Paulo.—1 Tim. 2:7.
11. Kriste o ile a diriša bjang moya o mokgethwa go katološa modiro wa boboledi?
11 Ge go be go fihla nako ya gore go katološwe modiro wa go bolela ka Mmušo go bao e sego Bajuda, Paulo o ile a hwetša tlhahlo e tšwago legodimong ge a be a le maetong a boromiwa go tloga Asia Minor go fihla Yuropa. Pego ya Luka ye e lego go Ditiro e re: “Ge [baporofeta le barutiši ba Bakriste phuthegong ya Antiokia ya Siria] ba be ba dutše ba direla Jehofa phatlalatša e bile ba ikona dijo, moya o mokgethwa wa re: ‘Go batho ka moka, nkgetheleng Baranaba le Saulo bakeng sa modiro wo ke ba bileditšego wona.’ Ke moka ba ikona dijo le go rapela gomme ba ba bea diatla, ba ba lesa ba sepela.” (Dit. 13:2, 3) Jesu ka boyena o ile a bitša Saulo wa Tareso go ba ‘sebjana sa Gagwe seo a se kgethilego’ gore a tsebatše leina la Gagwe gare ga ditšhaba; ka gona, tlhohleletšo ye ya modiro wa boboledi e tšwa go Kriste, Moetapele wa phuthego. Nakong ya leeto la Paulo la bobedi la boromiwa, go ile gwa ba molaleng gore Jesu o diriša moya o mokgethwa go hlahla modiro. Pego e re “moya wa Jesu,” ke gore, Jesu a diriša moya o mokgethwa, o ile a hlahla Paulo le basepedi-gotee le yena ge ba be ba kgetha gore ba tla ya kae le gona neng gomme pono e ile ya ba hlahla gore ba ye Yuropa.—Bala Ditiro 16:6-10.
Boetapele bja Jesu Phuthegong ya Gagwe
12, 13. Puku ya Kutollo e bontšha bjang gore Kriste o tseba gabotse seo se diregago ka phuthegong e nngwe le e nngwe?
12 Jesu o be a tseba selo se sengwe le se sengwe seo se bego se direga ka diphuthegong tša balatedi ba gagwe bao ba tloditšwego ba lekgolong la pele la nywaga C.E. O be a tseba gabotse boemo bja moya bja phuthego e nngwe le e nngwe. Se se bonagala gabotse ge re bala Kutollo dikgaolo 2 le 3. O biditše diphuthego tše šupago ka maina, tšeo ka moka di lego kua Asia Minor. (Kut. 1:11) Re na le mabaka a kwagalago a go dumela gore o be a tseba boemo bja moya bja diphuthego tše dingwe tša mehleng yeo tša balatedi ba gagwe ba lefaseng.—Bala Kutollo 2:23.
13 Jesu o ile a reta diphuthego tše dingwe ka baka la kgotlelelo ya tšona, go botega ga tšona ka tlase ga diteko, go kgomarela seo a se boletšego le go gana bahlanogi. (Kut. 2:2, 9, 13, 19; 3:8) Ka lehlakoreng le lengwe, o ile a nea diphuthego tše mmalwa keletšo e matla ka gobane di be di se sa hlwa di mo rata go swana le pele, di be di thekga borapedi bja medimo ya diswantšho le bootswa e bile di e-na le dihlotswana. (Kut. 2:4, 14, 15, 20; 3:15, 16) Ka ge e le molebeledi yo lerato wa moya—gaešita le go bao a ba neilego keletšo e matla—Jesu o itše: “Ke sola le go laya ka moka bao ke nago le maikwelo a borutho ka bona. Ka gona, fišega gomme o itshole.” (Kut. 3:19) Gaešita le ge Jesu a le legodimong, o be a hlahla diphuthego tša barutiwa ba gagwe bao ba lego lefaseng a diriša moya o mokgethwa. Mafelelong a molaetša wa gagwe o yago diphuthegong tše, o itše: “Yo a nago le tsebe a kwe seo moya o se botšago diphuthego.”—Kut. 3:22.
14-16. (a) Jesu o hlatsetše bjang gore ke Moetapele yo a nago le sebete wa batho ba Jehofa bao ba lego lefaseng? (b) Mafelelo e bile afe ge Jesu a be a ‘e-na’ le barutiwa ba gagwe “matšatši ka moka go fihla bofelong bja tshepedišo ya dilo”? (c) Re tla ahla-ahla’ng sehlogong se se latelago?
14 Re bone gore Mikaele (Jesu) o ipontšhitše e le Moetapele yo matla wa morongwa kua Isiraeleng. Ka morago, Jesu o ile a ba Moetapele yo a nago le sebete le Modiši yo lerato wa barutiwa ba gagwe ba pele. Nakong ya bodiredi bja gagwe bja lefaseng, o ile a etelela pele modiro wa boboledi. Ke moka ka morago ga tsogo ya gagwe, o ile a okamela modiro wa go tsebatša ditaba tše dibotse tša Mmušo.
15 A diriša moya o mokgethwa, mafelelong Jesu o be a tla katološa modiro wa go nea bohlatse go fihla magomong a lefase. Pele Jesu a rotogela legodimong, o boditše barutiwa ba gagwe gore: “Le tla amogela matla ge moya o mokgethwa o fihla godimo ga lena, gomme le tla ba dihlatse tša-ka Jerusalema le Judea ka moka le Samaria le go fihla karolong ya kgole ya lefase.” (Dit. 1:8; bala 1 Petro 1:12.) Ka tlase ga tlhahlo ya Kriste, go ile gwa newa bohlatse bjo bogolo lekgolong la pele la nywaga.—Bakol. 1:23.
16 Eupša Jesu ka boyena o ile a bolela gore modiro wa gagwe o be o tla tšwela pele go fihla mehleng ya bofelo. Ka morago ga go laela barutiwa ba gagwe go bolela le go dira barutiwa ditšhabeng ka moka, Jesu o ile a ba holofetša gore: “Ke na le lena matšatši ka moka go fihla bofelong bja tshepedišo ya dilo.” (Mat. 28:19, 20) Ka morago ga go putswa ka matla a bogoši ka 1914, Kriste o “na le” barutiwa ba gagwe go feta le ge e le neng pele gomme o tšwela pele e le Moetapele wa bona. Modiro wa gagwe o mogolo go tloga ka 1914 o tla hlahlobja sehlogong se se latelago.
[Mongwalo wa tlase]
^ ser. 4 Mabapi le go hlahlobja ga boporofeta bjo, bona kgaolo 11 ya Ela Hloko Boporofeta bja Daniele!
E le Poeletšo
• Morwa wa Modimo o ile a ipontšha bjang gore ke Moetapele kua Isiraeleng?
• Kriste o hlahla bjang phuthego ya gagwe yeo e lego lefaseng?
• Kriste o hlahlile bjang modiro wa go phatlalatša ditaba tše dibotse?
• Ke’ng seo se bontšhago gore Kriste o tseba gabotse boemo bja moya bja phuthego e nngwe le e nngwe?
[Dipotšišo tša Thuto]
[Seswantšho go letlakala 21]
“Ke roma Morongwa wa-ka a Xo êtê-pele”
[Seswantšho go letlakala 23]
Go swana le nakong e fetilego, Kriste o diriša ‘dimpho tšeo e lego banna’ go diša mohlape wa gagwe