‘Ún Ta Boso Lider, Esta, Kristu’

‘Boso no mester wòrdu yamá lider, pasobra ta ún ta boso Lider, esta, Kristu.’​—MAT. 23:10.

1. Ken Testigunan di Yehova ta rekonosé komo nan Lider, i dikon?

IGLESIANAN di kristiandat tin lidernan humano, manera papa di Roma i otro lidernan di vários iglesia i religion. En kambio, Testigunan di Yehova sí no ta rekonosé ningun ser humano komo nan lider. Nan no ta disipel ni siguidó di ningun hende. Esaki ta na armonia ku Yehova su palabranan profétiko tokante su Yu: “Mira, mi a hasié un testigu pa e pueblonan, un lider i komandante pa e pueblonan.” (Isa. 55:4) E kongregashon internashonal di kristiannan ungí i nan kompañeronan, e “otro karnénan,” no ke ningun otro lider ku no ta esun ku Yehova a duna nan. (Juan 10:16) Nan ta di akuerdo ku loke Hesus a bisa: “Ún ta boso Maestro [òf, “Lider,” NW], esta, Kristu.”​—Mat. 23:10.

E Angel Ku Tabata Prens di Israel

2, 3. Ki papel importante Dios su Yu a hunga den Israel?

² Siglonan promé ku a establesé e kongregashon kristian, Yehova tabatin un angel komo lider riba su pueblo Israel. Despues ku Yehova a saka e israelitanan for di Egipto, el a bisa nan: “Mira, mi ta bai manda un angel bo dilanti pa warda bo na kaminda, i pa hiba bo na e lugá ku mi a prepará. Paga bon tinu na dje i obedesé su bos; no sea rebelde kontra dje, pasobra e lo no pordoná boso transgreshon, komo ku mi nòmber ta den dje.” (Eks. 23:​20, 21) Ta lógiko ku e angel akí, kende tabatin ‘Yehova su nòmber den dje,’ tabata Dios su Yu primogénito.

³ Promé ku e Yu di Dios a nase komo un ser humano, tur kos ta indiká ku su nòmber tabata Miguel. E buki di Daniel ta referí na Miguel komo “[Israel su] prens.” (Dan. 10:21) Disipel Hudas a indiká ku Miguel tabata enbolbí den e asuntunan di Israel hopi tempu promé ku e dianan di Daniel. Despues di morto di Moisés, Satanas evidentemente a purba  usa e kurpa di e defuntu pa di un òf otro manera promové su propio interes, probablemente pa pone Israel kometé idolatria. Pero Miguel a intervení pa prevení esaki. Hudas ta relatá: “Ora ku e [arkangel Miguel] tabata pleita ku Diabel i tabata diskutí tokante di e kurpa di Moisés, [e] no a tribi pronunsiá un huisio di maldishon kontra dje, ma a bisa: ‘SEÑOR reprendé bo.’” (Hudas 9) Djis despues di esei, i promé ku e sitiamentu di Jeriko, sin duda Miguel, “e [prens] di SEÑOR su ehérsito,” tabata esun ku a aparesé na Josué pa sigur’é ku e tin Yehova su sosten. (Jos. 5:​13-15) Ora ku un demoño poderoso a purba stroba un angel di duna un mensahe importante na profeta Daniel, ta Miguel e arkangel a bai yuda e angel ei.​—Dan. 10:​5-7, 12-14.

E Lider Profetisá Ta Presentá

4. Ki profesia Yehova a duna tokante binida di e Mesias?

⁴ Promé ku e insidente akí, Yehova a manda angel Gabriel bai serka Daniel pa dun’é un profesia tokante binida di e “Mesias, e Prens [òf, “Lider,” NW].” (Dan. 9:​21-25) * Den lènte di aña 29 di nos era, presis manera a ser bisá, e profesia akí a haña su kumplimentu ora Juan a batisá Hesus. Spiritu santu a ser dramá riba Hesus i el a bira Esun Ungí—Kristu, e Mesias. (Mat. 3:​13-17; Juan 1:​29-34; Gal. 4:4) Komo Mesias, lo el a bira un Lider inkomparabel.

5. Kiko Kristu a hasi komo Lider durante su ministerio riba tera?

⁵ Desde komienso di su ministerio riba tera, Hesus a duna prueba ku e ta ‘Mesias, e Lider.’ Despues di un par di dia, el a kuminsá reuní su disipelnan, i el a hasi su promé milager. (Juan 1:35–2:11) Su disipelnan a kompañ’é tur kaminda ku el a bai pa prediká e bon notisia di Reino. (Luk. 8:1) El a instruí nan den e trabou di prediká i siña hende, i el a dirigí e trabou akí, poniendo un bon ehèmpel. (Luk. 9:​1-6) Ta bon pa ansianonan kristian sigui su ehèmpel den e aspekto akí.

6. Kon Kristu a demostrá ku e ta un Wardadó i Lider?

⁶ Hesus a hala atenshon na un otro aspekto di su liderato ora el a kompará su mes ku un wardadó di karné amoroso. Na Medio Oriente tabata e kustumber ku wardadónan di karné ta kana dilanti di nan tou. Den e buki The Land and the Book, W. M. Thomson a skirbi: “E wardadó di karné ta kana dilanti di su tou, no solamente pa indiká unda e karnénan tin ku bai, sino tambe pa hasi sigur ku kaminda nan tin ku pasa ta safe. . . . Ku [su] bara e ta dirigí i guia e tou na sabana bèrdè, i e ta defendé nan si surgi peliger.” Pa mustra ku e ta un berdadero Wardadó i Lider, Hesus a bisa: “Ami ta e bon wardadó; e bon wardadó ta duna su bida pa e karnénan. Mi karnénan ta tende mi bos, i mi konosé nan, i nan ta sigui mi.” (Juan 10:​11, 27) Manera Hesus a bisa, el a sakrifiká su bida pa su karnénan, pero Yehova “a resusit’é pa e ta lider i Salbador.”​—Echo. 5:31, New Jerusalem Bible; Heb. 13:20.

Superintendente di e Kongregashon Kristian

7. Kiko Hesus ta usa pa dirigí e kongregashon kristian?

⁷ Despues ku Hesus a resusitá, i poko promé ku el a subi na shelu, el a bisa su disipelnan: “Tur outoridat a wòrdu duná na mi den shelu i riba tera.” (Mat. 28:18) Yehova a laga Hesus duna su disipelnan spiritu santu pa fortalesé nan den e bèrdat kristian. (Juan 15:26) Hesus a drama e spiritu akí riba e promé kristiannan na Pentekòste di aña 33 di nos era. (Echo. 2:33) Esaki a marka e prinsipio di e kongregashon  kristian. Yehova a nombra su Yu lider di e kongregashon riba tera. (Lesa Efesionan 1:22; Kolosensenan 1:​13 i 18.) Hesus ta guia e kongregashon kristian mediante Yehova su spiritu santu, i e tin na su disposishon e angelnan ku “a wòrdu sometí na dje.”​—1 Ped. 3:22.

8. Ken Kristu a usa den promé siglo pa dirigí su disipelnan aki riba tera, i ken e ta usa awe?

⁸ Ademas, mediante spiritu santu, Kristu a duna “donnan [den forma di] hende,” algun komo “pastor [òf, wardadó] i siñadó” den kongregashon. (Efe. 4:​8, 11) Apòstel Pablo a konsehá superintendentenan kristian: “Perkurá pa boso mes i pa henter e tou, meimei di kual spiritu santu a pone boso komo wardadó, pa pastoriá e iglesia di Dios.” (Echo. 20:28) Ora e kongregashon kristian a kuminsá, tur e superintendentenan akí tabata hòmbernan ungí. E apòstelnan i e ansianonan di e kongregashon di Yerusalèm a fungi komo kuerpo gobernante. Kristu a usa e kuerpo gobernante akí pa dirigí henter e grupo di su ‘rumannan’ ungí riba tera. (Heb. 2:11; Echo. 16:​4, 5) Durante e tempu di fin akí, Kristu a konfia “tur su propiedatnan”—tur aktividat i poseshon di Dios su pueblo riba tera—na su “esklabo fiel i prudente” i su Kuerpo Gobernante, un grupo di hòmber kristian ungí. (Mat. 24:​45-47) Tantu e ungínan komo e otro karnénan ta rekonosé ku si nan sigui guia di e Kuerpo Gobernante djawe, de echo, nan ta siguiendo nan Lider: Kristu.

Kristu Ta Inisiá e Trabou di Prediká

9, 10. Kon Kristu a dirigí asuntu pa e bon notisia di Reino por a plama?

⁹ For di komienso, Hesus mes a dirigí e trabou di prediká i siña hende. El a establesé e sekuensia den kua mester a prediká e bon notisia di Reino na e habitantenan di tera. Durante su ministerio, el a instruí su apòstelnan: “No kohe e kaminda di e paganonan i no drenta ningun stat di e samaritanonan; ma mas bien, bai serka e karnénan pèrdí di e kas di Israel. I segun ku boso ta bai, prediká, bisando: ‘E reino di shelu ta serka.’” (Mat. 10:​5-7) Nan a prediká ku zelo entre e hudiunan i prosélitonan, spesialmente despues di Pentekòste di aña 33 di nos era.​—Echo. 2:​4, 5, 10, 11; 5:42; 6:7.

¹⁰ Despues, Hesus a usa spiritu santu pa ekspandé e trabou di prediká e Reino te na e samaritanonan i mas despues na otro hende ku no ta hudiu. (Echo. 8:​5, 6, 14-17; 10:​19-22, 44, 45) Pa e bon notisia por a plama entre e nashonnan, Hesus personalmente a hasi algu pa motivá Saulo di Tarso pa bira un kristian. Hesus a duna su disipel Ananias e siguiente instrukshon: “Lanta bai den e kaya ku yama Stret, i puntra na kas di Hudas pa un hòmber for di Tarso, ku yama Saulo . . . Bai, pasobra esaki ta un  instrumènt skohí di mi pa hiba mi nòmber na e paganonan i reinan i e yunan di Israel.” (Echo. 9:​3-6, 10, 11, 15) E “hòmber” akí a bira apòstel Pablo.​—1 Tim. 2:7.

11. Kon Kristu a usa spiritu santu pa ekspandé e trabou di prediká?

¹¹ Ora e tempu a yega pa prediká e Reino na e nashonnan ku no ta hudiu, spiritu santu a dirigí Pablo durante su biahenan komo misionero den Asia Menor i Europa. Lukas su relato den e buki di Echonan ta bisa: “Miéntras ku nan [profeta- i maestronan kristian di e kongregashon di Antiokia di Siria] tabata hasi nan sirbishi na Señor i tabata yuna, spiritu santu a bisa: ‘Apartá pa mi Barnabas i Saulo pa e trabou pa kual mi a yama nan.’ E ora ei, despues ku nan a yuna i a hasi orashon i a pone nan mannan riba nan, nan a manda nan bai.” (Echo. 13:​2, 3) Hesus personalmente a yama Saulo di Tarso pa sirbi komo Su “instrumènt skohí” pa hiba Su nòmber na e nashonnan; pues, ta Kristu, Lider di e kongregashon kristian, a duna e empuhe nobo akí na e trabou di prediká. Durante Pablo su segundo biahe komo misionero a bira masha bisto ku Hesus ta usa spiritu santu pa dirigí e trabou. E relato ta bisa ku “e spiritu di Hesus,” es desir, e spiritu santu ku Hesus a usa, a guia Pablo i su kompañero di biahe pa skohe nan ruta, i un vishon a guia nan pa sigui bai Europa.​—Lesa Echonan 16:​6-10.

Kon Hesus Ta Dirigí Su Kongregashon

12, 13. Kon e buki di Revelashon ta mustra ku Kristu ta sigui masha djaserka loke ta pasa den kada kongregashon?

¹² Den e promé siglo di nos era, Hesus a sigui masha djaserka loke tabata pasa den e kongregashonnan di su siguidónan ungí. E tabata bon na haltura den ki kondishon spiritual kada kongregashon tabata. Nos ta mira esaki klaramente ora nos lesa Revelashon kapítulo 2 i 3, kaminda e ta menshoná shete kongregashon di Asia Menor. (Rev. 1:11) Nos tin tur motibu pa kere ku e tabata konosé tambe e kondishon spiritual di e otro kongregashonnan di su siguidónan riba tera e tempu ei.​—Lesa Revelashon 2:23.

¹³ Hesus a elogiá algun di e kongregashonnan pa nan perseveransia, fieldat bou di prueba, lealtat na su palabra i pa e echo ku nan a rechasá apóstatanan. (Rev. 2:​2, 9, 13, 19; 3:8) Di otro banda, el a duna konseho firme na otro kongregashonnan pasobra nan amor p’e a fria, nan tabata tolerá idolatria, fornikashon i formashon di sekta. (Rev. 2:​4, 14, 15, 20; 3:​15, 16) Hesus, komo un superintendente spiritual amoroso—asta pa esnan ku el a reprendé fuertemente—a bisa: “Esnan ku mi ta stima, mi ta reprendé i disipliná; p’esei, sea ferviente i repentí.” (Rev. 3:19) Maske Hesus tabata den shelu, el a usa spiritu santu pa dirigí e kongregashonnan di su disipelnan riba tera. Na final di e mensahenan na e kongregashonnan ei, el a bisa: “Esun ku tin orea, lag’é tende loke e spiritu ta bisa e iglesianan.”​—Rev. 3:22.

14-16. (a) Kon Hesus a demostrá di ta un Lider yen di kurashi pa Yehova su pueblo riba tera? (b) Kiko ta e resultado di e echo ku Hesus ta “ku” su disipelnan “semper, te na fin di mundu”? (c) Kiko nos lo konsiderá den e siguiente artíkulo?

¹⁴ Manera nos a mira, Miguel (Hesus) a  demostrá di ta un Lider angelikal balente di Israel. I ora ku Hesus tabata riba tera, el a demostrá di ta un Lider ku kurashi i un Wardadó amoroso di su promé disipelnan. Durante su ministerio terenal, el a dirigí e trabou di prediká. I despues di su resurekshon, el a sigui supervisá e trabou di plama e bon notisia di Reino.

¹⁵ Ku tempu, Hesus a usa spiritu santu pa ekspandé e trabou di prediká te na e finnan di tera. Promé ku Hesus a subi na shelu, el a bisa su disipelnan: “Boso lo risibí poder ora spiritu santu bin riba boso, i boso lo ta mi testigunan na Yerusalèm i na henter Hudea i Samaria, i te na e parti mas alehá di mundu.” (Echo. 1:8; lesa 1 Pedro 1:12.) Bou di Kristu su guia, e kristiannan di promé siglo a duna un tremendo testimonio.​—Kol. 1:23.

¹⁶ Pero Hesus mes a indiká ku e trabou akí lo sigui te den tempu di fin. Despues ku el a duna su disipelnan e enkargo pa prediká i hasi hende di tur nashon disipel, Hesus a primintí nan: “Mi ta ku boso semper, te na fin di mundu.” (Mat. 28:​19, 20) Desde ku Kristu a haña poder komo Rei na 1914, e ta “ku” su disipelnan mas ku nunka i e ta aktivo komo nan Lider. Den e siguiente artíkulo nos lo analisá e trabou intensivo ku e ta hasiendo desde 1914.

[Nota]

Komo Repaso

• Kon e Yu di Dios a duna prueba di ta un Lider aktivo den Israel?

• Kiko Kristu ta usa pa dirigí su kongregashon riba tera?

• Kon Kristu a dirigí e trabou di plama e bon notisia?

• Kiko ta mustra ku Kristu ta sigui masha djaserka e kondishon spiritual di kada kongregashon?

[Preguntanan di Estudio]

[Plachi na página 24]

“Mi ta bai manda un angel bo dilanti”

[Plachi na página 26]

Meskos ku den pasado, Kristu ta usa “donnan [den forma di] hende” pa pastoriá su tou