‘Ita-nia ulun-naʼin ida deʼit, Kristu’
‘Ita-nia ulun-naʼin ida deʼit, Kristu’
“Keta husik ema hanaran imi ‘ulun-naʼin’, basá imi-nia Ulun-Naʼin ida deʼit, Kristu.”—MT 23:10, MF.
1. Testemuña ba Jeová simu sé nuʼudar sira-nia Ulun-Naʼin? Tanbasá?
IGREJA sira neʼebé bolu an nuʼudar kristaun iha ema neʼebé sai nuʼudar ulun-naʼin, hanesan papa husi Roma, ulun-naʼin husi igreja ortodoksu, no ulun-naʼin ba relijiaun seluk. Testemuña ba Jeová la haree ema ida nuʼudar sira-nia ulun-naʼin. Sira laʼós ema nia dixípulu no sira la halo tuir deʼit ema ida. Ida-neʼe tuir buat neʼebé Maromak Jeová fó-hatene nanis kona-ba ninia Oan: “Haree! Haʼu fó tiha ona nia nuʼudar testemuña ba nasaun sira, nuʼudar ulun-naʼin no komandante ba nasaun sira.” (Isa 55:4) Grupu kose-mina iha mundu tomak no sira-nia maluk “bibi seluk” simu ulun-naʼin ida deʼit neʼebé Maromak Jeová hili ona ba sira. (Joao 10:16) Sira halo tuir Jesus nia liafuan neʼebé hatete: “Imi-nia Ulun-Naʼin ida deʼit, Kristu.”—Mt 23:10, MF.
Liurai-oan ba Izraél
2, 3. Maromak nia Oan halo saida deʼit atu apoia nasaun Izraél?
2 Tinan atus ba atus antes harii kongregasaun kristaun, Maromak Jeová uza anju ida nuʼudar ulun-naʼin atu tau matan ba ninia povu Izraél. Depois lori tiha ema Izraél sai husi Ejitu, Maromak Jeová hatete ba sira: “Haʼu haruka anju ida atu laʼo iha imi-nia oin atu proteje imi iha dalan no lori imi tama iha fatin neʼebé haʼu prepara ona ba imi. Kuidadu imi-nia an tanba nia no halo tuir ninia lian. Keta halo hahalok neʼebé kontra nia, tanba nia sei la perdua imi-nia sala; tanba haʼu-nia naran mak iha nia laran.” (Êx 23:20, 21) Ita bele fiar katak anju neʼe, neʼebé iha ‘Maromak Jeová nia naran iha nia laran’, mak Maromak nia Oan-Mane boot.
3 Antes nia moris nuʼudar ema, ita komprende katak Maromak nia Oan neʼe iha naran Miguel. Iha livru Daniel, Miguel bolu nuʼudar “liurai-oan ba [Daniel nia] povu”, Izraél. (Dan 10:21) Dixípulu Judas hatudu katak Miguel envolve an hodi ajuda nasaun Izraél kleur antes Daniel nia tempu. Depois Moisés mate, Satanás karik hanoin atu uza Moisés nia isin-mate atu halo kumpre ninia hakarak, karik hodi book ema Izraél atu halaʼo adorasaun falsu. Miguel hapara nia atu halo ida-neʼe. Judas hatete: “Arkanju Miguel, wainhira nia halo funu hasoru Diabu atu manán Moisés nia isin, la hateten liafuan aat ba nia, maibé nia dehan: ‘Maromak sei fó kastigu ba ó!’” (Jud 9) Tuirmai, antes nasaun Izraél manán sidade Jerikó, “liurai-oan husi tropa Maromak Jeová nian” mosu ba Josué atu fó fiar ba nia katak Maromak apoia nia. Ita bele fiar katak liurai-oan neʼe mak Miguel. (Lee Josué 5:14. *) Kuandu liurai-oan anju aat nian koko atu hapara Maromak nia anju atu lori mensajen importante ba profeta Daniel, arkanju Miguel mai atu ajuda anju neʼe.—Dan 10:5-7, 12-14.
Ulun-naʼin neʼebé fó-hatene nanis mosu mai
4. Saida mak profeta Daniel fó-hatene nanis kona-ba Mesias?
4 Antes Miguel ajuda anju ida-neʼe, Maromak Jeová haruka anju Gabriel atu fó-hatene ba profeta Daniel kona-ba tempu neʼebé “Mesias, Ulun-Naʼin” atu mai. (Dan 9:21-25) * Hanesan fó-hatene nanis ona, besik tinan 29 nia rohan, João fó batizmu ba Jesus. Espíritu santu tun ba Jesus no neʼe hatudu katak nia mak Kristu, ka Mesias, Ida neʼebé hetan kose-mina. (Mt 3:13-17; Joao 1:29-34; Gal 4:4) No nia sei sai Ulun-Naʼin neʼebé boot liu.
5. Nuʼudar Ulun-Naʼin, saida mak Kristu halo durante nia halaʼo ninia serbisu iha rai?
5 Husi tempu neʼebé Jesus hahú nia serbisu iha rai, nia hatudu katak nia mak “Mesias, Ulun-Naʼin”. Iha loron balu nia laran deʼit, Jesus komesa hili ninia dixípulu sira, no halo ninia milagre primeiru. (Joao 1:35–2:11) Ninia dixípulu sira laʼo tuir nia nuʼudar nia laʼo ba sidade oioin iha Izraél atu haklaken lia-foun Reinu nian. (Lc 8:1) Nia fó treinu ba sira atu halaʼo serbisu haklaken no hatudu ezemplu diʼak ba sira kona-ba haklaken no hanorin. (Lc 9:1-6) Ohin loron diʼak atu katuas kristaun sira halo tuir Jesus nia ezemplu diʼak neʼe.
6. Iha dalan saida deʼit mak Kristu hatudu katak nia mak Bibi-Atan no Ulun-Naʼin?
6 Jesus hatudu buat ida tan kona-ba ninia knaar nuʼudar ulun-naʼin hodi kompara ninia an nuʼudar bibi-atan neʼebé hadomi ninia bibi sira. Iha rai balu, inklui rai-Izraél, bibi-atan sira mak laʼo iha bibi sira-nia oin. Iha livru The Land and the Book, W. M. Thomson hakerek: “Bibi-atan laʼo iha bibi sira-nia oin, laʼós deʼit atu hatudu dalan, maibé atu haree se dalan neʼe diʼak ba bibi sira atu laʼo no seguru. . . . Hodi uza ai-tonka nia kontrola no lori bibi-lubun ba duʼut matak, no proteje sira husi sira-nia inimigu.” Jesus hatudu katak nia mak Ulun-Naʼin no Bibi-Atan neʼebé loos hodi hatete: “Haʼu mak bibi-atan diʼak. Bibi-atan diʼak saran nia moris ba nia bibi sira. Haʼu-nia bibi sira rona haʼu-nia lia; haʼu hatene sira, no sira tuir haʼu.” (Joao 10:11, 27) Jesus kumpre duni liafuan sira-neʼe hodi saran ninia moris ba nia bibi sira, maibé Maromak Jeová fó moris-hiʼas ba nia no “foti nia . . . nuʼudar naʼi-ulun no Maksoin”.—Apos 5:31; Ebr 13:20.
Ulun-naʼin ba kongregasaun kristaun
7. Saida mak Jesus uza atu tau matan ba kongregasaun kristaun?
7 Antes Jesus saʼe ba lalehan, nia hatete ba ninia dixípulu sira: “Kbiit tomak iha lalehan no rai fó tiha ona mai haʼu.” (Mt 28:18) Maromak Jeová fó espíritu santu ba Jesus no Jesus uza espíritu neʼe atu hametin dixípulu kristaun sira iha lia-loos. (Joao 15:26) Jesus fakar espíritu neʼe ba ema kristaun iha loron Pentekostes tinan 33 liutiha Kristu. (Apos 2:33) Ida-neʼe mak sinál ida neʼebé hatudu katak kongregasaun kristaun harii ona. Maromak Jeová fó knaar ba ninia Oan nuʼudar ulun-naʼin iha lalehan atu tau matan ba kongregasaun hotu iha rai. (Lee Efeso 1:22; Koloso 1:13, 18.) Hodi uza Maromak Jeová nia espíritu santu Jesus dirije kongregasaun kristaun, no mós nia “ukun anju sira” neʼebé halaʼo serbisu ba nia.—1 Ped 3:22.
8. Sé mak Kristu uza iha apóstolu sira-nia tempu atu dirije ninia dixípulu sira? Sé mak nia uza agora?
8 No mós liuhusi espíritu santu, Kristu uza mane balu nuʼudar “kmanek oioin”, neʼebé serbí nuʼudar “bibi-atan no mestre” iha kongregasaun laran. (Ef 4:8, 11) Apóstolu Paulo fó konsellu ba katuas kristaun sira hodi dehan: “Tau matan ba imi-nia an no ba luhan tomak neʼebé espíritu santu saran ba imi atu tau matan; tau matan ba Maromak nia kreda [“kongregasaun”, MF].” (Apos 20:28) Kuandu kongregasaun kristaun foin harii, sira hotu neʼebé tau matan ba kongregasaun mak mane sira neʼebé hetan kose-mina. Apóstolu sira no katuas sira husi kongregasaun iha Jeruzalein serbí nuʼudar grupu administradór. Kristu uza grupu neʼe atu dirije ema kose-mina hotu neʼebé mak nuʼudar ninia “alin” sira iha rai. (Ebr 2:11; Apos 16:4, 5) Iha loron ikus sira-neʼe, Kristu saran “nia rikusoin tomak”, katak buat hotu iha rai neʼebé uza atu apoia ninia Reinu, ba atan “laran-metin no matenek”. Sira neʼebé reprezenta atan neʼe mak Grupu Administradór, no sira neʼebé serbí iha grupu neʼe mak mane kristaun neʼebé hetan kose-mina. (Mt 24:45-47) Ema kose-mina no sira-nia maluk bibi seluk rekoñese katak hodi halo tuir matadalan husi Grupu Administradór, neʼe hatudu katak sira halo tuir Kristu, sira-nia Ulun-Naʼin.
Kristu hahú serbisu haklaken
9, 10. Oinsá mak Kristu dirije serbisu atu habelar lia-foun diʼak Reinu nian?
9 Jesus mak hahú serbisu haklaken, no nia rasik mak kontinua dirije serbisu haklaken no hanorin iha nasaun hotu. Nia halo arranju kona-ba oinsá mak lia-foun Reinu sei habelar toʼo mundu tomak. Durante nia halo ninia serbisu haklaken iha rai, nia fó-hatene nia apóstolu sira: “Imi keta tuir jentiu sira-nia dalan, keta tama iha samaritanu sira-nia sidade, maibé imi buka uluk bibi sira neʼebé lakon husi umakain Israel nian. Tuir dalan, haklaken bá katak reinu lalehan besik ona.” (Mt 10:5-7) Dixípulu sira halo nuneʼe hodi haklaken ho laran-manas ba ema judeu sira no sira neʼebé tuir relijiaun ema judeu nian, liuliu depois Pentekostes 33.—Apos 2:4, 5, 10, 11; 5:42; 6:7.
10 Liutiha neʼe, hodi uza espíritu santu, Jesus haluan serbisu haklaken kona-ba Reinu ba ema samaritanu no tuirmai ba ema seluk neʼebé laʼós ema judeu. (Apos 8:5, 6, 14-17; 10:19-22, 44, 45) Tanba Jesus hakarak atu lia-foun diʼak habelar ba nasaun hotu, nia rasik hili Saul husi Tarso atu sai ema kristaun. Jesus fó-hatene ba ninia dixípulu ida naran Ananias: “Hamriik bá no laʼo ba dalan naran ‘Loos’; buka iha Judas nia uma-laran ema ida naran Saul husi rai Tarso. . . . Ó laʼo bá, basá ema neʼe hanesan matadalan neʼebé haʼu fihir atu lori haʼu-nia naran ba ema jentiu sira, ba liurai sira no Israel nia oan sira.” (Apos 9:3-6, 10, 11, 15) Ikusmai ema koñese “ema neʼe” nuʼudar apóstolu Paulo.—1 Tim 2:7.
11. Oinsá mak Kristu habelar serbisu haklaken hodi uza espíritu santu?
11 Kuandu toʼo ona tempu atu haluan liután serbisu haklaken Reinu nian ba nasaun seluk, liuhusi espíritu santu Jesus fó matadalan ba Paulo atu halo viajen misionáriu nian ba Ázia Menór no mós ba rai-Europa. Iha livru Apostolu, Lucas hakerek: “Wainhira sira [profeta kristaun sira no mestre sira iha kongregasaun iha sidade Antiokia iha rai-Síria] hanaʼi Naʼi no halo jejún, espíritu santu lia tun ba sira: ‘Imi haketak Barnabé ho Saul ba haʼu atu halo serbisu neʼebé haʼu bolu sira naʼin-rua.’ Halo tiha jejún no hamulak, sira tula liman ba sira no haruka sira bá.” (Apos 13:2, 3) Jesus rasik mak hili Saul husi Tarso atu lori ninia naran ba nasaun sira. Hodi uza Saul, ka Paulo atu halaʼo arranju foun neʼe, Kristu nafatin hatudu nia an nuʼudar Ulun-Naʼin ba kongregasaun. Liuhusi Paulo nia viajen misionáriu nian ba dala segundu ita bele haree ho klaru katak Jesus uza espíritu santu atu dirije serbisu haklaken. Livru Apostolu dehan “Jesus nia espíritu”, neʼe katak hodi uza espíritu santu, Jesus fó matadalan ba Paulo no ninia maluk sira kona-ba bainhira no kona-ba fatin neʼebé sira atu bá, no liuhusi vizaun, sira simu matadalan neʼebé haruka sira atu laʼo ba rai-Europa.—Lee Apostolu 16:6-10.
Jesus dirije ninia kongregasaun
12, 13. Oinsá mak livru Apokalipse hatudu katak Kristu hatene didiʼak saida mak akontese iha kongregasaun ida-idak?
12 Jesus haree buat hotu neʼebé akontese iha kongregasaun kristaun kose-mina iha apóstolu sira-nia tempu. Nia hatene didiʼak kongregasaun ida-idak nia situasaun. Ita bele haree ezemplu kona-ba neʼe hodi lee Apokalipse kapítulu 2 no 3. Jesus temi kongregasaun hitu nia naran, sira hotu iha Ázia Menór. (Apok 1:11) Ita bele fiar katak Jesus mós hatene didiʼak situasaun iha kongregasaun sira seluk iha tempu neʼebá.—Lee Apokalipse 2:23.
13 Jesus gaba kongregasaun balu tanba sira tahan no laran-metin maski hasoru susar, sira kaer metin ba ninia liafuan, no sira mós la simu ema neʼebé kontra lia-loos. (Apok 2:2, 9, 13, 19; 3:8) Maibé, nia fó konsellu neʼebé makaʼas ba kongregasaun balu tanba sira-nia domin ba nia sai malirin ona, sira la fó dixiplina ba ema neʼebé adora lulik no halo sala-foʼer, no sira simu hanorin falsu. (Apok 2:4, 14, 15, 20; 3:15, 16) Nuʼudar ulun-naʼin Jesus hadomi ema sira hotu iha kongregasaun, neʼe inklui sira neʼebé nia fó konsellu makaʼas. Jesus dehan: “Ida neʼebé haʼu hadomi, haʼu siʼak no dixiplina. Neʼe duni, hakribi tebetebes ó-nia sala bá no laran badinas bá.” (Apok 3:19) Maski Jesus iha lalehan, nia dirije kongregasaun kristaun iha rai hodi uza espíritu santu. Iha ninia liafuan ikus ba kongregasaun sira, nia hatete: “Sé mak iha tilun, rona ba buat neʼebé espíritu dehan ba kreda sira.”—Apok 3:22.
14-16. (a) Oinsá mak Jesus tau matan ba Maromak Jeová nia povu iha rai nuʼudar Ulun-Naʼin neʼebé brani? (b) Tanba Jesus “hamutuk” ho ninia dixípulu “toʼo mundu nia rohan”, neʼe lori rezultadu saida? (c) Saida mak ita sei aprende iha lisaun tuirmai?
14 Ita haree ona katak Miguel (Jesus) mak anju ida neʼebé brani nuʼudar Ulun-Naʼin ba nasaun Izraél. Tuirmai, Jesus mós sai nuʼudar Ulun-Naʼin neʼebé brani no Bibi-Atan neʼebé hadomi ninia dixípulu sira. Kuandu nia halo nia knaar iha rai, nia mak dirije serbisu haklaken. No depois nia moris fali, nia tau matan nafatin ba serbisu atu habelar lia-foun diʼak Reinu nian.
15 Liuhusi espíritu santu, Jesus dirije serbisu haklaken atubele halaʼo toʼo rai nia rohan. Antes nia saʼe ba lalehan, Jesus hatete ba ninia dixípulu sira: “Wainhira espíritu santu tun ba imi, imi sei simu kbiit; imi sei sai haʼu-nia sasin iha Jeruzalein, iha Judeia no Samaria tomak toʼo rai nia rohan.” (Apos 1:8; lee 1 Pedro 1:12.) Tanba Kristu mak dirije serbisu haklaken, ema barak iha apóstolu sira-nia tempu rona kona-ba lia-foun diʼak Reinu nian.—Kol 1:23.
16 Maibé Jesus rasik hatudu katak serbisu haklaken sei kontinua halaʼo toʼo loron ikus sira. Depois fó tiha mandamentu ba ninia dixípulu sira atu haklaken no hanorin ema husi nasaun hotu-hotu, Jesus promete ba sira: “Haʼu sei hela nafatin hamutuk ho imi, toʼo mundu nia rohan.” (Mt 28:19, 20) Husi tempu neʼebé Kristu sai liurai iha tinan 1914, nia halo buat barak liután neʼebé hatudu katak nia “hamutuk” nafatin ho ninia dixípulu sira nuʼudar sira-nia Ulun-Naʼin. Iha lisaun tuirmai ita sei estuda kona-ba serbisu sira neʼebé Kristu halo husi tinan 1914 toʼo agora.
[Nota–rodapé]
^ par. 3 Josué 5:14: “Nia hatán: ‘Lae, haʼu mak ulun-naʼin ba Maromak Jeová nia tropa, no ohin haʼu mai.’ Nuneʼe Josué hakruʼuk taka oin ba rai no hatete ba nia: ‘Saida mak haʼu-nia naʼi hakarak hatete ba atan haʼu?’”
^ par. 4 Atu hetan informasaun liután kona-ba profesia neʼe, haree kapítulu 11 iha livru Perhatikanlah Nubuat Daniel!
Hodi hanoin fali
• Oinsá mak Maromak nia Oan serbí nuʼudar Ulun-Naʼin ba ema Izraél?
• Saida mak Kristu uza atu dirije ninia kongregasaun iha rai?
• Kristu halo saida atu habelar lia-foun diʼak toʼo rai nia rohan?
• Saida mak hatudu katak Kristu hatene didiʼak situasaun iha kongregasaun ida-idak?
[Pergunta estudu nian]
[Dezeñu iha pájina 21]
“Haʼu haruka anju ida atu laʼo iha imi-nia oin”
[Dezeñu iha pájina 23]
Hanesan iha tempu uluk, Kristu uza mane balu nuʼudar “kmanek oioin” atu tau matan ba ninia bibi-lubun