‘Hoê roa o outou Aratai, o te Mesia’
‘Hoê roa o outou Aratai, o te Mesia’
‘Eiaha e titau ia parauhia outou e aratai; hoê roa hoi o outou Aratai, o te Mesia.’—MAT. 23:10.
1. O vai ta te mau Ite no Iehova e farii ei Aratai, e no te aha?
E TAATA te mau aratai a te Amuiraa faaroo Kerisetiano, mai te pâpa no Roma, e te tahi atu mau aratai o te mau haapaoraa rau. Ua taa râ i te mau Ite no Iehova e e ere to ratou aratai i te hoê taata. E ere ratou i te mau pǐpǐ na te tahi taata. Te tuati ra ïa te reira i te parau tohu a Iehova no nia i ta ˈna Tamaiti: “Inaha, ua horoa vau ia ˈna ei ite no te taata nei; ei aratai, e ei faaau ture na te mau fenua.” (Isa. 55:4) Hoê anaˈe iho aratai to te amuiraa nunaa rau o te mau Kerisetiano faatavaihia e to ratou mau hoa o te mau “mamoe ê atu” maoti ta Iehova i horoa na ratou. (Ioa. 10:16) Te farii ra ratou i ta Iesu parau: ‘Hoê roa o outou Aratai, o te Mesia.’—Mat. 23:10.
Te aratai melahi o Iseraela
2, 3. Eaha te tuhaa ohipa a te Tamaiti a te Atua no Iseraela?
2 E senekele hou a haamauhia ˈi te amuiraa Kerisetiano, ua aratai Iehova i to ˈna nunaa Iseraela maoti te hoê melahi. A faarue ai ratou ia Aiphiti, ua parau atu Iehova: “Inaha, te tono nei au i te hoê melahi i mua ia oe, ei tiai ia oe i te eˈatia ra, ei aratai hoi ia oe i te vahi i haapaohia e au ra. E ara oe ia ˈna, e faaroo i ta ˈna parau, eiaha e faaooo atu ia ˈna, e ore hoi oia e faaore mai i ta oe hara, no te mea tei ia ˈna to ˈu nei iˈoa.” (Exo. 23:20, 21) Mea tano ia tiaturi e o te Tamaiti fanau tahi a te Atua teie melahi no te mea ‘tei ia ˈna to Iehova iˈoa.’
3 Hou to ˈna fanauraa ei taata, e au ra e o Mikaela te iˈoa o te Tamaiti a te Atua. I roto i te buka a Daniela, ua parauhia Mikaela “to outou arii,” to Iseraela. (Dan. 10:21) Ia au i te pǐpǐ Iuda, i ohipa na Mikaela no Iseraela na mua roa i to Daniela tau. Ua opua ino Satani e faaohipa i te tino pohe o Mose ma te turai ia Iseraela i roto i te haamoriraa idolo. Ua tapea râ Mikaela i te reira. Te faatia ra Iuda: “Aita . . . te melahi rahi ra o Mi[k]aela a mârô ai raua o te diabolo i te tino o Mose ra i pari faaino atu ia ˈna, na ô atura râ e, Na te Fatu [Iehova] e patoi atu ia oe.” (Iuda 9) Tau taime i muri aˈe, hou te haaatiraahia Ieriko, eita e ore e o Mikaela, te “raatira no te nuu a Iehova,” tei fa ˈtu ia Iosua no te haapapu e e turu te Atua ia ˈna. (A taio i te Iosua 5:13-15.) I to te hoê demoni puai tamataraa i te tapea i te hoê melahi eiaha ia faaite i te hoê poroi faufaa roa i te peropheta Daniela, ua tauturu ïa Mikaela te melahi rahi ia ˈna.—Dan. 10:5-7, 12-14.
Haereraa mai o te Aratai tohuhia
4. Eaha te parau tohu no nia i te haereraa mai o te Mesia?
4 Hou tera tupuraa, i tono na Iehova i ta ˈna melahi o Gaberiela e faaite ia Daniela te peropheta i te parau tohu o te haereraa mai o “te Mesia te Arii,” aore ra Aratai. (Dan. 9:21-25) * I te tau mau, i te pae hopea o te matahiti 29, ua bapetizohia Iesu e Ioane. Ua niniihia te varua moˈa i nia ia Iesu ma te faatavai ia ˈna ei Mesia. (Mat. 3:13-17; Ioa. 1:29-34; Gal. 4:4) E aratai otahi ïa te Mesia.
5. Mea nafea te Mesia i ohipa ˈi ei Aratai i to ˈna taviniraa i te fenua?
5 Mai te haamataraa o ta ˈna taviniraa i te fenua, ua haapapu Iesu e o ˈna te Mesia te Aratai. Maa mahana noa i muri aˈe, ua haamata oia i te haaputuputu i te mau pǐpǐ, e ua rave oia i ta ˈna semeio matamua. (Ioa. 1:35–2:11) Ua apee ta ˈna mau pǐpǐ ia ˈna na te fenua ma te poro i te parau maitai o te Basileia. (Luka 8:1) Ua faaineine oia ia ratou no te pororaa e ua faaite i te hiˈoraa maitai ma te aratai i te pororaa e te haapiiraa. (Luka 9:1-6) Ia pee ïa te mau matahiapo Kerisetiano i teie mahana i to ˈna hiˈoraa e tia ˈi.
6. Mea nafea to te Mesia haapapuraa e o ˈna te Tiai mamoe e te Aratai?
6 Ua faaau Iesu ia ˈna i te hoê tiai mamoe î i te here no te faataa i te tahi atu tuhaa o ta ˈna aratairaa. I roto i Te fenua e te buka (Beretane), ua faataa William Thomson e nafea te mau tiai mamoe no Hitia o te râ e aratai ai i ta ratou mau nǎnǎ. Ua papai oia: “E haere te tiai i mua i te mau mamoe, eiaha no te faaite noa i te eˈa, ia papu râ ia ˈna e e nehenehe te mau mamoe e haere na reira ma te fifi ore. . . . E aratai oia i te nǎnǎ e [ta ˈna] tootoo i te mau aua heeuri, e e paruru ia ratou i te mau enemi.” Ma te faaite e e Tiai mamoe mau oia e e Aratai, ua parau Iesu: “O vau te tiai mamoe maitai. E horoa te tiai mamoe maitai i to ˈna iho ora no te mamoe. E faaroo mai ta ˈu ra mamoe i to ˈu reo, o ta ˈu i parau atu ia outou ra, ua ite au ia ratou, e e pee mai hoi ratou ia ˈu.” (Ioa. 10:11, 27) Ia au i ta ˈna parau, ua pohe Iesu ei tusia no ta ˈna mau mamoe, tera râ, ‘ua faateitei Iehova ia ˈna ei Arii [aore ra Aratai] e ei Faaora.’—Ohi. 5:31; Heb. 13:20.
Tiaau o te amuiraa Kerisetiano
7. Te tiaau nei Iesu i te amuiraa Kerisetiano maoti te aha?
7 Hou rii to ˈna haereraa i nia i te raˈi, ua parau Iesu tei faatiahia mai i ta ˈna mau pǐpǐ: “O te mana atoa i te raˈi e te ao atoa nei ua pûpûhia mai tei ia ˈu anaˈe.” (Mat. 28:18) Ua tufa ˈtu Iehova i te varua moˈa ia Iesu no te faaitoito ia ratou i roto i te parau mau Kerisetiano. (Ioa. 15:26) Ua ninii Iesu i taua varua ra i nia i te mau Kerisetiano matamua i te Penetekose 33. (Ohi. 2:33) Ua riro te reira ei tapao o te haamataraa o te amuiraa Kerisetiano. Ua faatoroa Iehova i ta ˈna Tamaiti ei aratai i nia i te raˈi i te amuiraa i te fenua. (A taio i te Ephesia 1:22; Kolosa 1:13, 18.) Te aratai nei Iesu i te amuiraa Kerisetiano maoti te varua moˈa o Iehova, e ua tuuhia te mau melahi ‘i raro aˈe ia ˈna.’—Pet. 1, 3:22.
8. Eaha te ravea ta te Mesia i faaohipa i te fenua no te aratai i ta ˈna mau pǐpǐ i te senekele matamua, e i teie mahana?
8 Maoti atoa te varua moˈa, ‘e tiai e e orometua’ te mau ‘taata horoahia mai’ e te Mesia i roto i te amuiraa. (Eph. 4:8, 11) Ua aˈo te aposetolo Paulo i te mau tiaau Kerisetiano: ‘E ara ia outou iho, e te nǎnǎ atoa i faarirohia ˈi outou e te varua maitai ei tiaau i nia ihora, ia faaamu hoi outou i te amuiraa o te Atua.’ (Ohi. 20:28) I te haamataraa te amuiraa Kerisetiano, e tane faatavaihia i te varua teie mau tiaau atoa. Ua ohipa te mau aposetolo e te mau matahiapo o te amuiraa i Ierusalema ei tino aratai. Ua faaohipa te Mesia i teie ravea no te aratai i te taatoaraa o te pǔpǔ o to ˈna mau “taeae” faatavaihia i te fenua. (Heb. 2:11; Ohi. 16:4, 5) I teie tau hopea, ua horoa te Mesia i “te mau taoˈa atoa na ˈna,” oia hoi te taatoaraa o te mau mea tei taaihia i te Basileia, i ta ˈna “tavini haapao maitai e te paari” e te Tino aratai, te hoê pǔpǔ tane Kerisetiano faatavaihia, e tia ra no ratou. (Mat. 24:45-47) Ua taa i tei faatavaihia e to ratou mau hoa o te mau mamoe ê atu e ia auraro ratou i te Tino aratai o teie tau, te auraro ra ïa ratou i te Mesia ei Aratai.
To te Mesia haamataraa i te pororaa
9, 10. Mea nafea to te Mesia faanahoraa ia parare te evanelia o te Basileia?
9 Na Iesu i faanaho i te pororaa e te haapiiraa na te ao atoa mai te haamataraa iho â. Na ˈna i faataa i teihea mau taata o te fenua e faaite ai na mua i te evanelia o te Basileia. I te roaraa o ta ˈna taviniraa, ua faaue oia i ta ˈna mau aposetolo: “Eiaha e haere noa ˈtu i te eˈa o te mau Etene ra, e eiaha atoa e tomo atu i te oire o to Samaria ra: e haere tia ˈtu râ i te mau mamoe i moe i te utuafare ra o Iseraela. E poro haere outou, e na ô atu, Te fatata mai nei te basileia” o te raˈi. (Mat. 10:5-7) Ua poro mau â ratou ma te itoito rahi i te ati Iuda e te mau peroseluto, i muri aˈe i te Penetekose 33 iho â râ.—Ohi. 2:4, 5, 10, 11; 5:42; 6:7.
10 I muri aˈe, ua faatae Iesu i te pororaa o te Basileia i to Samaria e i muri iho i te feia e ere i te ati Iuda maoti te varua moˈa. (Ohi. 8:5, 6, 14-17; 10:19-22, 44, 45) Ia parare te evanelia i ǒ te mau nunaa, na Iesu iho i turai ia Saulo no Tareso ia riro mai ei Kerisetiano. Ua faaue oia ia Anania ta ˈna pǐpǐ: “A tia, a haere i te aroâ i parauhia ra, o Titiaifaro, e te utuafare roa o Iuda ra, a ui atu ai i te hoê taata no Tareso, o Saulo te iˈoa . . . E haere oe, e farii maitihia hoi oia na ˈu, ei hopoi i tau iˈoa i mua i te aro o te mau Etene ra, e i te hui arii ra, e i te tamarii hoi a Iseraela.” (Ohi. 9:3-6, 10, 11, 15) Ua riro Saulo ei aposetolo Paulo.—Tim. 1, 2:7.
11. Mea nafea to te Mesia haaparareraa i te pororaa maoti te varua moˈa?
11 Ia tae te taime e parare ai te pororaa o te Basileia i rotopu i te mau nunaa e ere i te ati Iuda, na te varua moˈa o Iehova i aratai ia Paulo i to ˈna tere mitionare na Asia Iti e na Europa. Te na ô ra te faatiaraa a Luka i roto i te Ohipa: ‘Te haamori ra ratou [te mau peropheta e te mau orometua Kerisetiano o te amuiraa i Anetiohia i Suria] ia Iehova ma te haapaeraa maa, ua parau maira te varua maitai, A faataa mai na ia Baranaba raua o Saulo no te ohipa i haapaohia e au. Ua haapae ihora ratou i te maa e pure atura, ua tuu aˈera i to ratou rima i nia iho ia raua, e oti aˈera, tono atura ratou ia raua.’ (Ohi. 13:2, 3) Na Iesu iho i parau e o Saulo no Tareso ta ˈNa “farii maitihia” no te faaite i to ˈNa iˈoa i te mau nunaa. No ǒ mai ïa i te Mesia te Aratai o te amuiraa teie itoito apî no te pororaa. I te piti o te tere mitionare o Paulo, ua ite-maitai-hia ta Iesu aratairaa maoti te varua moˈa. Te na ô ra te faatiaraa e na ‘te varua o Iesu,’ oia hoi na Iesu maoti te varua moˈa, i aratai ia Paulo e to ˈna mau hoa ratere no te faaoti afea e ihea ratou e haere ai, e ua aratai-orama-hia ratou i Europa.—A taio i te Ohipa 16:6-10.
To Iesu aratairaa i ta ˈna amuiraa
12, 13. E nafea te Apokalupo e faaite ai e te hiˈopoa maite ra te Mesia i te ohipa e tupu ra i roto i te amuiraa taitahi?
12 Ua hiˈopoa maite Iesu i te ohipa e tupu ra i roto i te mau amuiraa o ta ˈna mau pǐpǐ faatavaihia i te senekele matamua. Ua ite maitai oia i te tupuraa o te amuiraa taitahi, ia au i te Apokalupo pene 2 e 3. Ua faahiti oia e hitu amuiraa i Asia Iti. (Apo. 1:11) E nehenehe iho â tatou e tiaturi e ua ite maitai atoa o ˈna i te tupuraa o te tahi atu mau amuiraa o ta ˈna mau pǐpǐ i te fenua i tera tau.—A taio i te Apokalupo 2:23.
13 Ua haapopou Iesu i te tahi mau amuiraa no to ratou faaoromai, taiva ore i mua i te tamataraa, haapao maitai i ta ˈna parau e patoiraa i te mau apotata. (Apo. 2:2, 9, 13, 19; 3:8) Ua aˈo etaeta râ oia i te tahi atu no te itiraa to ratou here ia ˈna, te faatia-noa-raa i te haamoriraa idolo, te faaturi e te mau pǔpǔ iti faaroo. (Apo. 2:4, 14, 15, 20; 3:15, 16) Ei tiaau î i te here no te feia atoa ta ˈna i aˈo uˈana, ua na ô oia: “O ta ˈu e here ra, o ta ˈu ïa e aˈo, e e papai hoi; e tena na, a faaitoito, e e tatarahapa.” (Apo. 3:19) Noa ˈtu e tei te raˈi Iesu, te aratai nei oia i te mau amuiraa o ta ˈna mau pǐpǐ i te fenua maoti te varua moˈa. I te pae hopea o ta ˈna mau poroi i teie mau amuiraa, ua na ô oia: ‘E tariˈa to ˈna, a faaroo oia i ta te varua e parau i te mau amuiraa.’—Apo. 3:22.
14-16. (a) Mea nafea to Iesu haapapuraa e e Aratai itoito oia no te nunaa o Iehova i te fenua? (b) Eaha tei itehia mai i te mea e ‘tei pihai iho’ Iesu i ta ˈna mau pǐpǐ “e tae noa ˈtu i te hopea o teie nei ao”? (c) Eaha ta tatou e hiˈopoa mai i to muri nei tumu parau?
14 No ite mai nei tatou e e Aratai puai te melahi rahi ra o Mikaela (Iesu) no Iseraela. I muri aˈe, e Aratai itoito mau e e Tiai mamoe î i te here Iesu no ta ˈna mau pǐpǐ matamua. I to ˈna taviniraa i te fenua, ua aratai oia i te pororaa. E i muri aˈe i to ˈna tia-faahou-raa, ua tiaau maite oia i te parareraa o te evanelia o te Basileia.
15 Maoti te varua moˈa e faatae ai Iesu i te pororaa e ati aˈe te fenua. Hou oia i haere ai i nia i te raˈi, ua parau oia i ta ˈna mau pǐpǐ: ‘E noaa to outou mana i te varua maitai ia haere mai i nia iho ia outou e ei ite hoi outou no ˈu i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua.’ (Ohi. 1:8; a taio i te Petero 1, 1:12.) I raro aˈe i te aratairaa a te Mesia, e faaiteraa rahi mau â tei horoahia i te senekele matamua.—Kol. 1:23.
16 Ua faaite râ Iesu e e tamau teie ohipa e tae noa ˈtu i te hopea. I muri aˈe i to ˈna faaueraa i ta ˈna mau pǐpǐ ia poro e ia faariro i te mau taata o te fenua atoa ei pǐpǐ, ua fafau atu oia: “Tei pihai atoa iho vau ia outou, e tae noa ˈtu i te hopea o teie nei ao.” (Mat. 28:19, 20) I te mea e ua faatoroahia te Mesia ei Arii puai i 1914, ‘tei pihai iho’ atu â oia i ta ˈna mau pǐpǐ ei Aratai itoito. E hiˈopoa to muri nei tumu parau i to Iesu ohiparaa ma te itoito rahi mai 1914 mai â.
[Nota i raro i te api]
^ Ei faahohonuraa i teie parau tohu, a hiˈo i te tumu parau “E nafea te parau tohu a Daniela e faaite atea ˈi i te taeraa mai o te Mesia” o te tuhaa hau o te buka Eaha ta te Bibilia e haapii mau ra?
Ei haamanaˈoraa
• Mea nafea to te Tamaiti a te Atua haapapuraa e e Aratai itoito oia no Iseraela?
• Te aratai ra te Mesia i ta ˈna amuiraa i te fenua maoti te aha?
• Mea nafea to te Mesia faanahoraa ia parare te evanelia?
• Eaha te faaite ra e te hiˈopoa maite ra Iesu i te ohipa e tupu ra i roto i te amuiraa taitahi?
[Uiraa haapiiraa]
[Hohoˈa i te api 24]
‘Te tono nei au i te hoê melahi i mua ia outou’
[Hohoˈa i te api 26]
Mai i tahito ra, te faaohipa ra te Mesia i te ‘taata horoahia mai’ ei tiai i ta ˈna nǎnǎ
